11
Ḻaꞌkzi chakile biz dillꞌ diikaꞌ choꞌa, ḻi wzenagan.
2 Dga chaktek c̱haꞌ c̱hele zaꞌn c̱he Chiozaꞌ. Nadꞌ ba nonꞌ leꞌ lo naꞌ Crístonaꞌ, ka chak c̱he to beṉꞌ zoa to nool wewꞌ c̱heꞌ, biꞌ napshii kwimꞌ, naꞌ choneꞌbꞌ lo naꞌ beenaꞌ gak beṉꞌ c̱hebꞌ. Naꞌ kanꞌ cheenidꞌ gakle lao Crístonaꞌ, ka to nool wewꞌ, biꞌ napshii kwinin.
3 Per chxollidꞌ gak c̱hele ka gok c̱he dii Évanaꞌ kanaꞌ wxiyeꞌ beḻaꞌ ḻeꞌ daa bzenagueꞌ c̱heb. Naꞌ chakidꞌ shi kaꞌ gonzle wzenagle bi dillꞌ wxiyeꞌ dii gonllejin leꞌ, naꞌ bich gonḻilallꞌle Crístonaꞌ do yic̱hj do lallꞌle.
4 Shi chlaꞌ beṉꞌ choeꞌleneꞌ leꞌ dillꞌ nllaꞌlə aga ka daa ba bsedintoꞌ leꞌ c̱he Jesúzaꞌ, wa chsedtegakileꞌ leꞌ nllaꞌlə c̱he Espíritu c̱he Chiozaꞌ, beenaꞌ zoa ḻoo yic̱hjlallꞌdoꞌchonaꞌ, wa c̱he dillꞌ wen dillꞌ kob c̱he Crístonaꞌ daa wyajḻeꞌle dii nech, naꞌ chajḻeꞌtezle c̱hegakeꞌ.
5 Ḻaꞌkzi chakile chajniꞌchi beṉꞌkaꞌ nale nakgakeꞌ postl c̱hele aga ka nadꞌ, nadꞌ ṉezidꞌ bi nakan kaꞌ.
6 Leljaile bi chakyeṉaa wiꞌa dillꞌ, per chajniꞌchidꞌ aga ka ḻegakeꞌ. Naꞌ dgan ba bliintoꞌ leꞌ toshiizi lao yogꞌḻoḻte dii chonntoꞌ.
7 ¿Achakile malan benꞌ bentezꞌ ka beṉꞌ bibi zakii naꞌ aga bi laxjꞌ wṉabidꞌ leꞌ kanaꞌ beꞌlenꞌ leꞌ dillꞌ wen dillꞌ kob c̱he Chiozaꞌ? Goktgui gakle beṉꞌ zakii laweꞌnaꞌ.
8 Bex̱ꞌshazꞌ mechaꞌ daa beṉ beṉꞌkaꞌ chdop chllag choeꞌlaꞌogakeꞌ Crístonaꞌ yell yoblə kwenc̱he bibi byalljidꞌ shlak bliꞌ bsedidꞌ leꞌ.
9 Naꞌ kanaꞌ wzoaꞌ ladjlenaꞌ naꞌ byallj bc̱hinidꞌ, ni tole bi benidꞌ zed. Beṉꞌ bishꞌchokaꞌ lleꞌ yell Macedónianaꞌ bidwaꞌgakeꞌ daa byalljidꞌ. Naꞌ kaꞌ bibi zed benidꞌ leꞌ, naꞌ biga gonkzidꞌ leꞌ zed.
10 Dillꞌ ḻi c̱he Crístonanꞌ choꞌa, naꞌ niaꞌ ni to beṉꞌ lleꞌ ganaꞌ mbani Acáyanaꞌ bi wsej wlloneꞌ wshalj wshonꞌ ka to dga chonꞌ.
11 ¿Aṉezile bic̱he niaꞌ kaꞌ? ¿Achakile bi chakidꞌ lenꞌ? Chiozaꞌ ṉezileꞌ ḻe chakidꞌ leꞌ.
12 Per gonchkzꞌ ka chonꞌ kwenc̱he bi wiꞌa latj c̱he beṉꞌkaꞌ cheeni wshalj wshongakeꞌ iṉazgakeꞌ chongakeꞌ ka chonntoꞌ.
13 Beṉꞌki bi nakgakeꞌ dowalj postl, naꞌ chdagakeꞌ chziyeꞌgakeꞌ, nazgakeꞌ nakgakeꞌ postl c̱he Crístonaꞌ.
14 Naꞌ daa chongakeꞌ kaꞌ bi nakan ka dii yibanicho, ḻaꞌ ṉezicho dii xiwaa chonz kwinin ka anjl c̱he Chios.
15 Daan, bi nakan ka dii yibanicho beṉꞌkaꞌ chon xshininnaꞌ nagakeꞌ chsedgakileꞌ beṉꞌ nakan gongakeꞌ yiyakgakeꞌ beṉꞌ wen lao Chiozaꞌ. Naꞌ daa chongakeꞌ kaꞌ, ḻen wlliayiꞌn ḻegakeꞌ.
16 Sto shii niaꞌ leꞌ, bi gakile bizə dillaan choeꞌlenꞌ leꞌ. Wa shi kaꞌ chakile, ḻi gakshazi kaꞌ, per ḻi weꞌ latj wiꞌa dillꞌ kwenc̱he wshalj wshonlataa.
17 Naꞌ daa chshalj chshonꞌ c̱he kwinꞌ, chonꞌ ka beṉꞌ bi nteyi, ḻaꞌ aga kanꞌ cheeni X̱anchonaꞌ.
18 Daa ḻe chshalj chshon beṉꞌ zan shi no nakgakeꞌ, ḻekzkaꞌ nadꞌ wshalj wshonꞌ non nakꞌ.
19 Leꞌ nale nakle beṉꞌ sinꞌ naꞌ chibazile chleble beṉꞌkaꞌ bizə chon chna latꞌ wej.
20 Chonzle banez shi bi chgongakeꞌ leꞌ gonle, shi chziꞌ chkaagakeꞌ bi de c̱hele, shi kon daa nazan c̱hegakeꞌ chongakileꞌ leꞌ, wa shi chgapꞌ chballꞌgakeꞌ x̱agꞌlenaꞌ.
21 ¿Achakile bi chiyaxjidꞌ gonꞌ ka chon beṉꞌkin? Ṉezganz bi gaklebidꞌ ḻegakeꞌ gonꞌ kaꞌ.
Ḻete shi ḻegakeꞌ chiyaxjgakileꞌ chshalj chshongakeꞌ, ḻekzkaꞌ nadꞌ wiyaxjidꞌ wshalj wshonꞌ, ka chon to beṉ bi nteyi.
22 Shi nagakeꞌ nakgakeꞌ beṉꞌ hebreo, ḻekzkaꞌ beṉꞌ hebreo nadꞌ. Shi nagakeꞌ nakgakeꞌ beṉꞌ Israel, ḻekzkaꞌ beṉꞌ Israel nadꞌ. Shi nagakeꞌ nakgakeꞌ xiiṉ dia c̱he dii Abrahamaꞌ, ḻekzkaꞌ xiiṉ dia c̱heꞌ nadꞌ.
23 Shi nagakeꞌ chongakeꞌ xshin Crístonaꞌ, nadꞌ niaꞌ chontechlaꞌn ka ḻegakeꞌ. (Daa niaꞌ kaꞌ chonꞌ ka beṉꞌ bi nteyi.) Nadꞌ choeꞌḻ-lallꞌchꞌ chonꞌ xshin Crístonaꞌ aga ka ḻegakeꞌ. Ḻech ba wyaa lillya ka ḻegakeꞌ, ba bet wdinch beṉꞌ nadꞌ aga ka ḻegakeꞌ, naꞌ dii zan shii ba bilaꞌ lo yeḻꞌ witaꞌ.
24 Gayꞌ shii ba bet wdini beṉꞌ Israelkaꞌ nadꞌ yid sotaꞌ twaljichoa wej,
25 shoṉ shii bet wdingakileꞌ nadꞌ yagaꞌ, naꞌ zi shlin blliagakeꞌ nadꞌ yajaꞌ. Ḻekzkaꞌ shoṉə shii ka yoꞌa ḻoo barkwaꞌ wcheꞌlenan nadꞌ yel, naꞌ zi shlla shyel bgaaṉaꞌ lo nisdoꞌnaꞌ.
26 Shlak chdaꞌ ngwaa nez dii zan dii ba ben bleꞌidꞌ. Ba wzoaꞌ dii nxoll waꞌ no yao nadꞌ, no c̱he beṉꞌ wban, no c̱he beṉꞌ wlall c̱haꞌkaꞌ, no c̱he beṉꞌ bi nak beṉꞌ Israel. Ba wzoaꞌ dii nxoll ka wdiaꞌ yell xenkaꞌ, naꞌ ka wdiaꞌ lyix̱ꞌ, naꞌ ka wdiaꞌ lo nisdoꞌnaꞌ. Naꞌ ḻekzkaꞌ ba wzoaꞌ dii nxoll c̱he beṉꞌ wxiyeꞌkaꞌ nazgakeꞌ ba chajḻeꞌgakeꞌ c̱he Crístonaꞌ.
27 Ba benchgaꞌ llinnaꞌ ax̱t ba chjx̱akchgaidꞌ, zan shii ba wlejꞌ bishgal, ba wbiḻ wdonchgaꞌ naꞌ ben banez bi weej wdawꞌ, ba bllagloaꞌ no dii zag naꞌ byallj xalaanaꞌ.
28 Naꞌ ka chllagloaꞌ yogꞌḻoḻ diiki, kaꞌkzan chllagloaꞌ daa ziaꞌ wṉeyi lla kon lla c̱he yogꞌ beṉꞌkaꞌ nonḻilallꞌ Crístonaꞌ to to yell.
29 Ḻaꞌ katꞌ to beṉꞌ bich choneꞌ ka dii le, kon chakidꞌ nadꞌkzan chak c̱haꞌ kaꞌ; wa shi ga zoa beṉꞌ biz c̱heꞌ choneꞌ naꞌ chchix̱eꞌ beṉꞌ yoblə lo xṉez Chiozaꞌ, naꞌ chllaa yic̱hjꞌ.
30 Shi de dii chonzan ka wshalj wshonꞌ, weꞌtochlꞌ dillꞌ c̱heyi daa chliꞌn bibi gak gonꞌ tobiaꞌlozꞌ.
31 Chios, beenaꞌ nak X̱a X̱ancho Jesúzaꞌ, beenaꞌ chgoocho balaaṉ toshiizi, ṉezileꞌ choꞌa dillꞌ ḻi.
32 Naꞌ ka wzoaꞌ yell Damásconaꞌ, beenaꞌ nzoa rey Arétazaꞌ ngoo lallꞌ nee yellaꞌ bzoeꞌ beṉꞌ wdapgakeꞌ choꞌa yellaꞌ kwenc̱he nan gox̱ꞌgakeꞌ nadꞌ.
33 Naꞌ beṉꞌkaꞌ zoa ganaꞌ bllinꞌ, bigoogakeꞌ nadꞌ to ḻoo llom, biḻetjgakeꞌ nadꞌ to choꞌa ventan dii zoa ḻee zee daa nec̱hj yellaꞌ, naꞌ bi bex̱ꞌgakeꞌ nadꞌ.