10
Nadꞌ Pablo, chatꞌyoidꞌ leꞌ, naꞌ choeꞌlenꞌ leꞌ dillꞌ goll-lallꞌ ka beꞌ Crístonaꞌ dillꞌ daa napeꞌ yeḻꞌ chxenlallꞌ, ḻaꞌkzi nagakeꞌ c̱haꞌ bi chiyaxjidꞌ wsheshlenꞌ leꞌ katꞌ zoaꞌ ladjlenaꞌ, naꞌ galjə zoaꞌ zitꞌ chiyaxjidꞌ chṉiaꞌ leꞌ ziꞌbiaꞌ ḻee yishkaꞌ chzejꞌ.
2 Naꞌ chatꞌyoidꞌ leꞌ, ḻi gongach wen kwenc̱he katꞌ yidwiaꞌ leꞌ bi lenle wsheshlenꞌ ka wsheshlenꞌ beṉꞌkaꞌ naz chonꞌ ḻega beṉꞌ yell-lio.
3 Ḻaꞌkzi nakntoꞌ beṉꞌ de beli chen, bi chdiḻntoꞌ ka chdiḻ beṉꞌ yell-lioki.
4 Netoꞌ, katꞌ chdiḻ-lenntoꞌ dii malaꞌ bi chc̱hinntoꞌ yesya ka daa chc̱hin beṉꞌ yell-lioki, san daa chc̱hinntoꞌ nsaꞌn yeḻꞌ wak c̱he Chiozaꞌ kwenc̱he chlliayiꞌntoꞌ yeḻꞌ wak c̱he dii x̱iwaa.
5 Naꞌ chlliayiꞌntoꞌ daa yoo ḻoo yic̱hjlallꞌdoꞌ beṉꞌ daa chsej chllonan gombiaꞌgakeꞌ Chiozaꞌ. Naꞌ chonntoꞌ kwenc̱he wzex̱j yic̱hjgakeꞌ wzenaggakeꞌ c̱he Crístonaꞌ.
6 Naꞌ katꞌ ba nakbiaꞌ chzenagle kwasḻoḻ, naꞌ wwiantoꞌ nak gonntoꞌ c̱he beenaꞌ bi chzenagkz.
7 Ḻi wwia ka chonntoꞌ. Naꞌ shi chakile nonle Crístonaꞌ txen, chiyaḻꞌ gakbeꞌile ḻekzkaꞌ netoꞌ nakntoꞌneꞌ txen.
8 Aga chidoꞌidꞌ chshalj chshonꞌ daa niaꞌ kwin Crístonaꞌ beneꞌ lallꞌ naꞌntoꞌ weꞌntoꞌ xtilleenaꞌ kwenc̱he gaklenntoꞌ leꞌ gakle wal, aga kwenc̱he wlliayiꞌntoꞌ lenꞌ.
9 Bi cheenidꞌ gakzile chzejꞌ yishki kwenc̱he wshebꞌ leꞌ.
10 Zoa beṉꞌ neꞌ yishkaꞌ chzejꞌ leꞌ ḻe zṉia chṉen, per katꞌ zoalenꞌ leꞌ ni bi nakꞌ ka beṉꞌ illeble, naꞌ ni dillꞌ bi chak wiꞌa.
11 Naꞌ beṉꞌkaꞌ naz kaꞌ, chiyaḻꞌ iṉezgakileꞌ kon ka chzejntoꞌ ṉaa zoantoꞌ zitꞌ, kaꞌkzə gonntoꞌ katꞌ soantoꞌ ladjlenaꞌ.
12 Bi cheenintoꞌ gaklebintoꞌ beṉꞌkaꞌ chyibz kwingakeꞌ. Daa chakgakileꞌ ḻe wen chongakeꞌ naꞌ daa chsaklebi ljwelleꞌ nochgakeꞌ chonch, chliꞌgakeꞌ bi ntegakileꞌ.
13 Netoꞌ, aga wshalj wshonntoꞌ c̱he to dii biṉꞌ gonntoꞌ. San c̱heyi daa ben Chiozaꞌ lallꞌ naꞌntoꞌ gonntoꞌn choeꞌntoꞌ dillꞌ, naꞌ ḻeꞌ bseḻee netoꞌ lall-lenaꞌ.
14 Netoꞌ bidyeꞌlenntoꞌ leꞌ dillꞌ wen dillꞌ kob c̱he Crístonaꞌ dii nech, naꞌ bi chix̱oa c̱hentoꞌ iṉantoꞌ: “ki benntoꞌ”.
15 Bi chshalj chshonlenzntoꞌ xshin beṉꞌ yoblə, san nonntoꞌ lez gonḻilallꞌchle Crístonaꞌ kwenc̱he gonchntoꞌ xshin Chiozaꞌ daa nak lallꞌ naꞌntoꞌ gonntoꞌ ganaꞌ zoale.
16 Ḻekzkaꞌ nonntoꞌ lez weꞌntoꞌ dillꞌ wen dillꞌ kob c̱he Crístonaꞌ kon ga biṉꞌ illin xtilleenaꞌ, kwenc̱he bi wshalj wshonlenzntoꞌ xshin beṉꞌ yoblə.