9
Bich chonan byen wzejꞌ leꞌ iṉiaꞌ chiyaḻꞌ gaklenle beṉꞌ bishꞌchokaꞌ nak lallꞌ naꞌ Chiozaꞌ.
2 Ḻaꞌ ba ṉezidꞌ ka cheenile gaklenle beṉꞌ, naꞌ ba biꞌa xtillꞌle lao beṉꞌ Macedóniaki, chepgakee godwizteyi leꞌ lleꞌle Acáyanaꞌ cheenile gaklenle. Naꞌ ka wṉezi beṉꞌ Macedóniaki ka cheenile gonle, zangakeꞌ ba chaklallꞌgakeꞌ gaklengakeꞌ.
3 Ḻaꞌkzi nakan kaꞌ, chseḻaa beṉꞌ bishꞌchoki kwenc̱he iṉezgakileꞌ nan choeꞌntoꞌ dillꞌ ḻi daa cheꞌntoꞌgakeꞌ nan chonle wen. Niaꞌ leꞌ kaꞌ kwenc̱he gonchle ka dii le wtoplen.
4 Ḻaꞌ shi zaꞌlen no beṉꞌ Macedonia nadꞌ ka yidwiaꞌ leꞌ, naꞌ ileꞌgakileꞌ bi chonle ka dillaa choeꞌntoꞌ c̱hele, naꞌ gakan yeḻꞌ ztoꞌ c̱hentoꞌ daa nxenlallꞌntoꞌ chonle wen. Naꞌ leꞌ siꞌtechləle yeḻꞌ ztoꞌ.
5 Ni c̱heyinnanꞌ chakidꞌ chonan byen wseḻaa beṉꞌ bishꞌchoki yidwiagakeꞌ leꞌ zigaate, kwenc̱he gaklengakeꞌ leꞌ yiyoll wtople daa ba bc̱heble. Naꞌ katꞌ yidꞌ, ba xoashawan ḻega dii chzanile, naꞌ aga iṉacho do ki do lallꞌlen choeꞌlen.
6 Ḻi lljadini c̱heyi dga: Beenaꞌ gaz latꞌzə, latꞌchokzə yiziꞌ yilapeꞌ; naꞌ beenaꞌ gaz dii xen, ḻekzkaꞌ dii xen yiziꞌ yilapeꞌ.
7 To tole weꞌle ka to daa chzanile. Bi gonlen do ki do lallꞌle, ḻaꞌ aga no chon byen weꞌlen. Ḻaꞌ Chiozaꞌ chakchgaileꞌ beenaꞌ chibayi weꞌn do yic̱hj do lallee.
8 Chiozaꞌ wak goneꞌ ka gakchga wen c̱hele kwenc̱he toshiizi gatꞌch yogꞌḻoḻ dii chyallj chc̱hinile naꞌ gakteyin gaklenle yogꞌḻoḻ beṉꞌ bibi de c̱heꞌ.
9 Choꞌa Xtillꞌ Chiozaꞌ nan:
Choꞌe beṉꞌ yeshꞌdoꞌkaꞌ daa chyallj chc̱hingakileꞌ,
naꞌ dii wennaꞌ daa choneꞌ biga llia te c̱heyin.
10 Chiozaꞌ, beenaꞌ choṉ bi dii chaz chbekcho naꞌ dii cheej chaocho, ḻekzeꞌn goṉeꞌ bittezə dii chyalljile, naꞌ goneꞌ ka shesh shanch bi de c̱hele kwenc̱he gonchle dii wennaꞌ.
11 Naꞌ kaꞌ, gapchle dii xench kwenc̱he gak weꞌchle dii xench gaklenle beṉꞌ. Naꞌ katꞌ lljasanntoꞌ mechaꞌ daa ba btople lao beṉꞌkaꞌ chyalljin, naꞌ weꞌgakeꞌ Chiozaꞌ yeḻꞌ chox̱ken.
12 Ka nak mechaꞌ daa weꞌle beṉꞌkaꞌ nak lallꞌ naꞌ Chiozaꞌ, aga to gaklenzan ḻegakenꞌ, san ḻekzkaꞌ gonan ka weꞌchgagakeꞌ Chiozaꞌ yeḻꞌ chox̱ken.
13 Naꞌ ka ikaagakeꞌn, weꞌlaꞌogakeꞌ Chiozaꞌ daa chonle ka na dillꞌ wen dillꞌ kob c̱he Crístonaꞌ daa ba chajḻeꞌle. Naꞌ ḻekzkaꞌ weꞌlaꞌogakeꞌ Chiozaꞌ daa btople mech xen beꞌlen ḻegakeꞌ naꞌ nochlə beṉꞌ yoblə.
14 Naꞌ daa chwiagakeꞌ chaklenchga Chiozaꞌ leꞌ, naꞌ iṉabgakileꞌneꞌ gaklencheꞌ leꞌ.
15 Chox̱ken Chiozaꞌ, daa ba beneꞌ to dii wen inlleb c̱hecho. Bichkzə bi dillꞌ chillel weꞌcho ka to ba beneꞌ c̱hecho.