8
Naꞌ ṉaa, leꞌ beṉꞌ bishꞌ naꞌ leꞌ beṉꞌ zanꞌ, cheenintoꞌ iṉantoꞌ leꞌ ka mba ba ben Chiozaꞌ gokleneꞌ beṉꞌkaꞌ chdop chllag choeꞌlaꞌogakeꞌ Crístonaꞌ gani mbani Macedóniani.
2 Ḻaꞌkzi biya dii ba gok c̱hegakeꞌ, mbalaz inlleb zoagakeꞌ. Naꞌ ḻaꞌkzi chak yeḻꞌ ziꞌ yeḻꞌ yeshꞌ c̱hegakeꞌ, do yic̱hj do lallꞌgakeꞌ bzangakileꞌ bi de c̱hegakeꞌ kwenc̱he gaklengakeꞌ beṉꞌ yoblə.
3 Nadꞌ ṉezyeṉꞌidꞌ do yic̱hj do lallꞌgakeꞌ beꞌgakeꞌ mechaꞌ bzangakileꞌ, naꞌ bengakeꞌ ax̱t ga zeelo gokgakeꞌ.
4 Naꞌ ḻegakeꞌ gotꞌyochgagakileꞌ netoꞌ kweṉche weꞌntoꞌ latj ḻengakeꞌ gaklengakeꞌ bishꞌ ljwellchokaꞌ nak lallꞌ naꞌ Chiozaꞌ.
5 Bentechlgakeꞌ aga ka to daa nonntoꞌ lez gongakeꞌ. Zigaate ben kwingakeꞌ lallꞌ naꞌ X̱ancho Crístonaꞌ kwenc̱he gongakeꞌ ka cheenileꞌ, naꞌtech bzenaggakeꞌ c̱hentoꞌ daa ṉezgakileꞌ nan kanꞌ cheeni Chiozaꞌ gongakeꞌ.
6 Ni c̱heyinnanꞌ ba gotꞌyointoꞌ Títonaꞌ kwenc̱he yisyolleꞌ wtopeꞌ daa chzanile weꞌle beṉꞌkaꞌ chyallj chc̱hini.
7 Naꞌ ka mbejlaole chonle yogꞌ dii nak wen: daa nonḻilallꞌchgale Crístonaꞌ, daa chak weꞌle dillꞌ mbalaz, daa ḻe chajniile, daa cheenchgaile gonle dii wennaꞌ, naꞌ daa ḻe chakileꞌ netoꞌ, ḻekzkaꞌ ḻi gon byen kwejlaole gaklenle beṉꞌ weꞌle daa chzanile.
8 Aga chontekꞌ byen gonle ka niaꞌ, san daa cheenzidꞌ iṉezile ka chibachgayi beṉꞌ bishꞌchokaꞌ gaklengakeꞌ beṉꞌ, naꞌ kanꞌ cheenidꞌ gonle, kwenc̱he wliꞌle shi lekzilen chaki ljwell-le do yic̱hj do lallꞌle.
9 Ba ṉezkzile dii wennaꞌ ben X̱ancho Jesucrístonaꞌ. Ḻaꞌkzi nakeꞌ beṉꞌ choo beṉꞌ xen, ben kwineꞌ ka beṉꞌ bibi zakii kwenc̱he gak wen c̱hele.
10 Daa godwizi wzolole btople mech kwenc̱he gaklenle beṉꞌ. Naꞌ aga no gotꞌyoi leꞌ btoplen, san benlen do yic̱hj do lallꞌle. Naꞌ ṉaa iṉiaꞌ ka nak daa gonle:
11 ḻi yisyoll daa wzolole chonle dii nech do yic̱hj do lallꞌle. Ka bibaile kanaꞌ wzolole, kaꞌkzə ḻi yibayi yisyoll-len. Ḻi weꞌ ka to daa gak weꞌle.
12 Ḻaꞌ shi izanilen do yic̱hj do lallꞌle, naꞌ ixinꞌ lao Chiozaꞌ, ḻaꞌkzi latꞌzan. Chiozaꞌ bi chṉabeꞌ dii bi napcho.
13 Aga ni c̱he niaꞌ leꞌ gaklenle beṉꞌ naꞌ leꞌlə yigaaṉ yeshꞌle, san gatꞌ dii iyalljile ganga.
14 Ṉaa leꞌ naple daa chyalljgakileꞌ. Naꞌ shi wx̱e willj ba napgakeꞌ bi dii iyalljile, naꞌ yiyaklengakeꞌ leꞌ. Naꞌ bibi iyalljile ganga.
15 Naꞌ gak ka na Choꞌa Xtillꞌ Chiozaꞌ: “Beenaꞌ bitop dii zan, aga bi bichooṉan, naꞌ beenaꞌ bitop latꞌzan, aga bi byalljileꞌ.”
16 Chox̱ken Chiozaꞌ bzieꞌ Títonaꞌ wṉeyi ka wṉeyi daa ziaꞌ c̱hele.
17 Naꞌ ḻe bibaileꞌ bc̱hebeꞌ yidwieꞌ leꞌ, daa ḻekzkaꞌ chaklallee ileꞌileꞌ leꞌ.
18 Naꞌ chseḻꞌlenntoꞌneꞌ sto beṉꞌ bishꞌcho, beṉꞌ ḻe wen zeyi c̱heꞌ lao yogꞌḻoḻ beṉꞌkaꞌ nonḻilallꞌ Crístonaꞌ to to ganaꞌ chdop chllaggakeꞌ, daa ḻe choꞌe dillꞌ wen dillꞌ kob c̱he Crístonaꞌ.
19 Naꞌ aga daazə, san ḻekzkaꞌ beṉꞌkaꞌ chdop chllag choeꞌlaꞌogakeꞌ Crístonaꞌ ni, wlejgakeꞌneꞌ saꞌleneꞌ netoꞌ lljasanntoꞌ mechaꞌ bdop. Naꞌ chonntoꞌ dga kwenc̱he shoꞌch Chiozaꞌ balaaṉ naꞌ kweṉche wliꞌn nan cheenintoꞌ gaklenntoꞌ beṉꞌ.
20 Bi cheenintoꞌ bi gon iṉaz beṉꞌ c̱hentoꞌ ni c̱he mech xenni ngoo lo nantoꞌ.
21 Naꞌ chonntoꞌ to dii byen gonntoꞌn ka chiyaḻi, aga toz lao X̱ancho Chiozaꞌ san lenkz lao beṉꞌ.
22 Ḻekzkaꞌ chseḻꞌlenntoꞌ ḻegakeꞌ sto beṉꞌ bishꞌcho, beenaꞌ zan shii ba bleꞌintoꞌ choneꞌ wen, naꞌ ṉaa cheenchlileꞌ gakleneꞌ daa nxenlallee gonle ka cheeni Chiozaꞌ.
23 Naꞌ ka nak Títonaꞌ, nakeꞌ nadꞌ txen choneꞌ xshin Chiozaꞌ ladjlenaꞌ. Naꞌ beṉꞌ bishꞌchokaꞌ zi c̱hop wlej beṉꞌkaꞌ chdop chllag choeꞌlaꞌogakeꞌ Crístonaꞌ ni, chongakeꞌ ka choo Crístonaꞌ balaaṉ.
24 Kwenc̱he iṉezi beṉꞌkaꞌ nonḻilallꞌ Crístonaꞌ gan yoblə, ḻi wliyi beṉꞌki chseḻaa nan dii ḻi ba chakile beṉꞌ, naꞌ ḻi wliꞌ chonle wen kon ka choeꞌntoꞌ xtillꞌle.