7
Kanꞌ nak daa ba bc̱heb Chiozaꞌ c̱hecho, leꞌ beṉꞌ bishꞌdawaa naꞌ leꞌ beṉꞌ zandawaa. Daan, chiyaḻꞌ goncho to dii byen gakcho beṉꞌ nxi nyech laweꞌnaꞌ kwenc̱he bibi dii mal taꞌ ichen kwerp c̱hechoni naꞌ yic̱hjlallꞌdoꞌchoni. Naꞌ daa chall chllebcho Chiozaꞌ goncho ka dii le gakcho dowalj ka cheenileꞌ.
2 Ḻi gaki netoꞌ do lallꞌle. Ḻaꞌ ni to kono biṉꞌ gonintoꞌ, naꞌ ni to konoṉꞌ wsakꞌziꞌntoꞌ, naꞌ ni to konoṉ siyeꞌntoꞌ.
3 Aga chsheshlenꞌ lenꞌ niaꞌ leꞌ kaꞌ. Ba wṉiaꞌkzꞌ ka chakchgaidꞌ leꞌ ax̱t ni guetidꞌ.
4 Nx̱enlallaa chonle wen, naꞌ choꞌa dillꞌ c̱hele ka wen ba chonle. Ladj dii ziꞌ dii yaꞌkaꞌ ni chtiplallaa naꞌ ḻe chiba chizakidꞌ.
5 Kon ka blaꞌntoꞌ gani mbani Macedóniani, bibi yeḻꞌ wixiꞌlallꞌ c̱hentoꞌ gotꞌ. Doxenzə chdiḻ chllagntoꞌ dii zed, chakdiḻ-len beṉꞌ netoꞌ, naꞌ zaꞌ dii chwall chsheban netoꞌ.
6 Per Chiozaꞌ, beenaꞌ chiyonxenlallꞌ beṉꞌkaꞌ zoa nyeshꞌ, biyonxenlallee netoꞌ ka blaꞌ Títonaꞌ.
7 Aga to daa blaꞌzeꞌn, san daa choeꞌyeṉee xtillꞌle ba chonle wen. Naꞌ beꞌleneꞌ netoꞌ dillꞌ ka zelallꞌle ileꞌile netoꞌ naꞌ ka chakyeshile daa zele wṉeyi c̱haꞌ. Naꞌ daa benidꞌ dga zizikli chibaidꞌ.
8 Ḻaꞌkzi yishaꞌ bseḻaa benyeshiin leꞌ, bibi chaktekidꞌ. Ḻaꞌkzi gokyeshidꞌ ka bwiaꞌ benyeshiin leꞌ shloll,
9 ṉaa chibaidꞌ, aga daa gokyeshile, san daa goklenan leꞌ biyaj bilenile ka cheeni Chiozaꞌ. Naꞌ aga bi gok c̱hele ni c̱he daa bzejꞌ leꞌ.
10 Chiozaꞌ choneꞌ ka gakyeshicho kwenc̱he yiyaj yilenicho naꞌ gatꞌ yeḻꞌ mban c̱hecho zejḻi kaṉi, naꞌ bich chakyeshicho daa gok c̱hecho kaꞌ. Per yeḻꞌ chakyeshii daa nsaꞌ dii malaꞌ choncho chlliayiꞌn choꞌ.
11 Yeḻꞌ chakyeshiinaꞌ daa beꞌ Chiozaꞌ latj gotꞌ ladjlenaꞌ benan ka gokbalileꞌ daa ben beenaꞌ, naꞌ wdaꞌle nadꞌ. Benan ka bllaale naꞌ wyoosheble, naꞌtech wzelallꞌle yidwiachꞌ leꞌ, naꞌ bsakꞌziꞌle beenaꞌ wdap doḻaa. Naꞌ yogꞌ diiki chliꞌn bi nonle txen dii malaꞌ beneꞌ.
12 Naꞌ ka bzejꞌ leꞌ, aga bzejꞌ ni c̱he beenaꞌ ben dii malaꞌ, ni aga ni c̱he beenaꞌ benileꞌ ziꞌbiaꞌ, san benaꞌn kwenc̱he Chiozaꞌ gakleneꞌ leꞌ gakbeꞌile dii ḻikzan zele wṉeyi c̱hentoꞌ.
13 Diiki chaklenan netoꞌ chiyakshaoꞌlallꞌntoꞌ.
Naꞌ zizikchli bibaintoꞌ ka bleꞌinto zoa Títonaꞌ mbalaz daa btiple lallee.
14 Ba beꞌlenꞌ Títonaꞌ dillꞌ c̱hele, goshee ḻe chibaidꞌ ka chonle, naꞌ bi chidoꞌidꞌ daa goshee kaꞌ. Naꞌ ka dillꞌ daa beꞌlenntoꞌ leꞌ nakan dii ḻi, ḻekzkaꞌ gokbeꞌi Títonaꞌ xtillꞌlenaꞌ daa biꞌa laweꞌnaꞌ nakan kon ka goshee.
15 Naꞌ zizikchli chakileꞌ leꞌ katꞌ chjadinileꞌ ka blebleneꞌ naꞌ bzenagle c̱heꞌ ḻega beṉꞌ chiyaḻꞌ gall illeble.
16 Chiba chizakidꞌ daa ba nxenlallaa dii ḻikzə chzenagle.