6
Netoꞌ chonntoꞌ xshin Chiozaꞌ, chatꞌyointoꞌ leꞌ gonle ka chiyoolallee daa ba beneꞌ to dii wen c̱hele.
2 Ḻaꞌ Choꞌa Xtillꞌ Chiozaꞌ nan:
Ka byalljiloꞌ wzenagꞌ c̱hoꞌ, nadꞌ bzenagꞌ.
Ka byalljiloꞌ yislaꞌ liꞌ naꞌ goklenꞌ liꞌ.
Naꞌ niaꞌ leꞌ, ṉaanꞌ ba bllin lla bllin gor gaklen Chiozaꞌ leꞌ. Ṉaanꞌ nakan llanaꞌ yisleꞌ leꞌ.
3 Naꞌ netoꞌ bi chonntoꞌ bittez dii gon ka iṉe beṉꞌ zban c̱he xshin Chiozaꞌ dga chonntoꞌ.
4 San toshiizi chonntoꞌ to dii byen chonntoꞌ xshin Chiozaꞌ ka chiyaḻi. Daan, chonntoꞌ banez ḻaa lo yeḻꞌ ziꞌ, ḻaa chyallj chc̱hinintoꞌ, ḻaa de dii lallj,
5 ḻaa chit chyingakeꞌ netoꞌ, ḻaa chyix̱jgakeꞌ netoꞌ lillya, ḻaa lliadiaꞌ beṉꞌ netoꞌ, ḻaa chonntoꞌ llin dii nak zii zshab, ḻaa tentoꞌ bishgal ziꞌ bishgal yaꞌ, ḻaa chbiḻ chdonntoꞌ.
6 Naꞌ ḻekzkaꞌ chliꞌntoꞌ chonntoꞌ xshin Chiozaꞌ ka chiyaḻi daa zoantoꞌ do yic̱hj do lallꞌntoꞌ, daa ba ṉezintoꞌ daa nak dii ḻi, daa napntoꞌ yeḻꞌ chxenlallꞌ c̱he beṉꞌ naꞌ chonntoꞌ wen c̱hegakeꞌ, daa zoalen Espíritu Sántonaꞌ netoꞌ, daa chakintoꞌ beṉꞌ do lallꞌntoꞌ,
7 daa choeꞌntoꞌ choꞌa xtillꞌ Chiozaꞌ daa nak dii ḻi, naꞌ daa zoalen yeḻꞌ wak c̱he Chiozaꞌ netoꞌ. Naꞌ dii ḻi dii shaoꞌkaꞌ chonntoꞌ nakgakan ka dii chṉiayintoꞌ kwenc̱he chdiḻ-lenntoꞌ dii malaꞌ.
8 Zoa beṉꞌ chleꞌshiꞌgakileꞌ netoꞌ, naꞌ zoate beṉꞌ chleꞌzbangakileꞌ netoꞌ. Zoa beṉꞌ chṉegakeꞌ wen c̱hentoꞌ, naꞌ zoate beṉꞌ chṉit chdegakeꞌ netoꞌ. Zoa beṉꞌ chongakileꞌ netoꞌ ka to beṉꞌ wxiyeꞌ, ḻaꞌkzi dillꞌ ḻin choeꞌntoꞌ.
9 Zoa beṉꞌ chongakeꞌ ka bi nombiaꞌ netoꞌ, ḻaꞌkzi nombiaꞌkzgakeꞌ netoꞌ. Ḻaꞌkzi chtiḻntoꞌ yeḻꞌ witaꞌ, ni mbankzntoꞌ. Naꞌ ḻaꞌkzi chit chyingakeꞌ netoꞌ, biṉꞌ gongakeꞌ gan guetntoꞌ.
10 Ḻaꞌkzi de dii zan dii cheenin gonyeshiin netoꞌ, toshiizi zoantoꞌ mbalaz. Ḻaꞌkzi nakntoꞌ beṉꞌ yeshꞌ, beṉꞌ zan chonntoꞌ ka beṉꞌ wniꞌa daa choeꞌlenntoꞌ ḻegakeꞌ choꞌa xtillꞌ Chiozaꞌ. Ḻaꞌkzi bibi napntoꞌ ni, ṉezintoꞌ dii xench nak c̱hentoꞌnaꞌ de.
11 Leꞌ beṉꞌ bishꞌ naꞌ leꞌ beṉꞌ zanꞌ, leꞌ lleꞌle yell Coríntonaꞌ, ba beꞌlentoꞌ leꞌ dillꞌ kon ka nakan naꞌ ba bliꞌntoꞌ chakintoꞌ leꞌ do yic̱hj do lallꞌntoꞌ.
12 Netoꞌ chliꞌntoꞌ chakintoꞌ leꞌ do yic̱hj do lallꞌntoꞌ, per leꞌ, bi chliꞌle shi chakile netoꞌ.
13 Chatꞌyoidꞌ leꞌ, leꞌ nakle ka xiiṉ c̱haꞌ, gonle ka chon netoꞌ naꞌ ḻi gaki netoꞌ do yic̱hj do lallꞌle.
14 Bi gonle txen beṉꞌkaꞌ bi nonḻilallꞌ Crístonaꞌ. Ḻaꞌ aga widiḻi daa nak dii ḻi dii shaoꞌ kon dii malaꞌ, naꞌ aga wdiḻi beeniꞌnaꞌ kon daa nak yel c̱hoḻ.
15 Ḻaꞌ ba ṉezkzile bi chidiḻi Crístonaꞌ dii x̱iwaa. Naꞌ ḻekzkaꞌ beenaꞌ ba chonḻilallee Crístonaꞌ bi chidiḻileꞌ beenaꞌ bi chonḻilalleeneꞌ.
16 Naꞌ bi gak soa daa nak lwaa lsakꞌ, diikaꞌ choeꞌlaꞌo beṉꞌ, ḻoo yoodoꞌ c̱he Chiozaꞌ. Ḻaꞌ choꞌ nakcho ka yoodoꞌ c̱he Chios yaa Chios bannaꞌ. Ka wna Chiozaꞌ c̱he beṉꞌ Israelkaꞌ:
Soaꞌ ladjeꞌkaꞌ, naꞌ nadꞌ gak Chios c̱hegakeꞌ
naꞌ ḻegakeꞌ gakgakeꞌ yell c̱haꞌ.
17 Naꞌ daan goll Chiozaꞌ ḻegakeꞌ:
Ḻi yichej ladj beṉꞌkaꞌ, bi gonle ḻegakeꞌ txen.
Bi gox̱ꞌle daa ba wniaꞌ bi nxi nyech.
Naꞌ kaꞌ wlebꞌ leꞌ,
18 naꞌ gakꞌ X̱ale,
naꞌ leꞌ gakle xiiṉ c̱haꞌ.
Kanꞌ na X̱ancho Chiozaꞌ, beenaꞌ zeelo nap yeḻꞌ wak choo yeḻꞌ wak xen.