5
Kwerp c̱hechoni nakan ka to yoo dii te c̱heyin. Naꞌ ṉezicho shi ba wlliayiꞌn, Chiozaꞌ yiyoṉeꞌ sto dii kob dii bi te c̱heyin yabanaꞌ. Naꞌ aga nakan dii beni ṉiꞌa naꞌ beṉꞌ.
2 Chibanchgaicho ṉaa zoacho yell-lioni, naꞌ ba cheenchgaicho yobzə lljazoalencho Chiozaꞌ yabanaꞌ ganaꞌ goṉeꞌ sto kwerp kob c̱hecho.
3 Ka chak c̱he beenaꞌ chishaa xeꞌnaꞌ daa ba biyi naꞌ chiyakweꞌ to dii kob, kakzan gak c̱hecho daa yishaa Chiozaꞌ kwerp c̱hechoni dga kwiayiꞌ.
4 Shlak ni zoacho lo kwerpi, chibanicho naꞌ chakyeshicho. Aga iṉacho chibachgaicho guetchon, san daa cheenicho yobzə ileꞌicho kwerp kob c̱hechonaꞌ daa bi te c̱heyin naꞌ ibanlenchon zejḻi kaṉi.
5 Naꞌ kwin Chiozaꞌ ba noneꞌ c̱hecho ileꞌicho dga, naꞌ ba bseḻee Espíritu c̱heꞌnaꞌ zoeꞌ ḻoo yic̱hjlallꞌdoꞌchonaꞌ kwenc̱he chakḻiyicho goneꞌ yogꞌ daa ba bc̱hebeꞌ.
6 Naꞌ daa ṉezicho dga, toshiizi nx̱enilallꞌcho Chiozaꞌ. Naꞌ ṉezicho kwerpi mbanlencho, bi yillinlenchon ganaꞌ zoa Chiozaꞌ.
7 Chajḻeꞌcho dga, ḻaꞌkzi biṉꞌ ileꞌichon.
8 Naꞌ cheenicho yobzə yizaꞌcho yell-lioni naꞌ yigaaṉ kwerp c̱hechoni, ḻaꞌ nxenlallꞌcho katꞌ yizaꞌcho ni, naꞌ lljazoalencho X̱anchonaꞌ.
9 Naꞌ daan, choncho to dii byen choncho ka chazlallꞌ Chiozaꞌ ṉaa mbancho wa ḻaꞌkzi ba witcho.
10 Ḻaꞌ chonan byen yogꞌḻoḻcho lljazecho lao Crístonaꞌ ganaꞌ wc̱hogloeꞌ c̱hecho, kwenc̱he to tocho ikaacho daa chidoḻꞌcho kon ka bencho shlak wbancho, shi bencho wen wa bencho mal.
11 Naꞌ daa ṉezintoꞌ yogꞌcho techo lao X̱anchonaꞌ, naꞌchan chonntoꞌ to dii byen choeꞌlenntoꞌ beṉꞌ xtilleenaꞌ kwenc̱he gonḻilallꞌgakeꞌneꞌ. Chiozaꞌ ṉezileꞌ do yic̱hj do lallꞌntoꞌ chonntoꞌ xshineꞌnaꞌ, naꞌ nonꞌ lez ṉezkzi yic̱hjlallꞌdoꞌlekaꞌ ka chonntoꞌ.
12 Aga cheenintoꞌ c̱hibzə kwinntoꞌ laolenanꞌ, san niaꞌ leꞌ kaꞌ kwenc̱he yibaile ka chonntoꞌ naꞌ gak yilliile xtillꞌ beṉꞌkaꞌ chonz ka ḻe chontegalə naꞌ nagakeꞌ ḻegakenꞌ zeelo chongakeꞌ dii wennaꞌ per bi chongakeꞌn do yic̱hj do lallꞌgakeꞌ.
13 Shi baḻ-le chakile chaktontntoꞌn, Chiozaꞌ ṉezileꞌ xshineꞌnanꞌ chonntoꞌ. Naꞌ shi chakile aga chaktontntoꞌn, banez c̱hekzle llinnaꞌ chonntoꞌ.
14 Daa ṉezintoꞌ ḻe chaki Crístonaꞌ choꞌ, naꞌchan chonntoꞌ to dii byen choeꞌntoꞌ xtilleenaꞌ. Naꞌ chajḻeꞌntoꞌ daa witeꞌ ni c̱hecho, zejin yogꞌcho witcho.
15 Witeꞌ ni c̱he yogꞌḻoḻcho kwenc̱he bich goncho kon daa nazan c̱hecho, san goncho ka chazlallꞌ beenaꞌ wit naꞌ bibaneꞌ ni c̱hecho.
16 Ni c̱heyi daan, bich chonintoꞌ nottez beṉꞌ nakzi, shi zakee wa bibi zakee. Ḻaꞌ kanaꞌ gokintoꞌ bibi zakii Crístonaꞌ, naꞌ ṉaa ba ṉezintoꞌ bi nakan kaꞌ.
17 Beenaꞌ ba nakeꞌ Crístonaꞌ txen, ba bikob Chiozaꞌ yeḻꞌ mban c̱heꞌnaꞌ. Ba wchooṉlallee yeḻꞌ mban gol c̱heꞌnaꞌ, naꞌ ba zoeꞌ to lo yeḻꞌ mban kob.
18 Yogꞌḻoḻte diiki nakan c̱he Chiozaꞌ, beenaꞌ ba ben ka bizoalenchoneꞌ wen daa bseḻee Crístonaꞌ witeꞌ ni c̱hecho. Naꞌ beneꞌ lallꞌ nantoꞌ weꞌlenntoꞌ beṉꞌ dillꞌ nak gongakeꞌ yizoalengakeꞌ Chiozaꞌ wen.
19 Kwin Chiozaꞌ beneꞌ ka choꞌ beṉꞌ yell-lio chizoalenchoneꞌ wen daa bseḻee Crístonaꞌ witeꞌ kwenc̱he biṉitloeꞌ saaxya c̱hechokaꞌ. Naꞌ ba beneꞌ lallꞌ naꞌntoꞌ weꞌlenntoꞌ beṉꞌ choꞌa xtilleenaꞌ kwenc̱he iṉezgakileꞌ nak gongakeꞌ yizoalengakeꞌneꞌ wen.
20 Daa bzoa Crístonaꞌ netoꞌ choeꞌlenntoꞌ leꞌ xtilleenaꞌ, ḻi gaktezi kwinkz Chiozanꞌ chatꞌyoileꞌ leꞌ daa nantoꞌ leꞌ: “Ḻi yizoalen Chiozaꞌ wen.”
21 Crístonaꞌ ni to dii mal bi beneꞌ. Per ni c̱hecho chonꞌ, Chiozaꞌ benileꞌneꞌ ka beṉꞌ saaxya, kwenc̱he daa gonḻilallꞌcho Crístonaꞌ yiyakcho beṉꞌ ḻi beṉꞌ shaoꞌ laweꞌnaꞌ.