4
Daa ba biyeshꞌlallii Chiozaꞌ netoꞌ, ba bzoeꞌ netoꞌ chonntoꞌ xshineꞌnaꞌ, naꞌ bi chidiṉjintoꞌ.
2 Netoꞌ, ni to dii nak yeḻꞌ ztoꞌ bi chonntoꞌ, ka diikaꞌ chon beṉꞌ do ngashꞌzə. Naꞌ bi chziyeꞌntoꞌ, ni bi chshok chlewntoꞌ choꞌa xtillꞌ Chiozaꞌ, san choeꞌntoꞌ dillꞌ ḻi c̱heꞌnaꞌ kon ka nakan. Naꞌ yogꞌ beṉꞌ wzenagueꞌn, gakbeꞌi ḻoo yic̱hjlallꞌdoꞌenaꞌ ka nakan, naꞌ ḻekzkaꞌ Chiozaꞌ ṉezileꞌ ka chonntoꞌ.
3 Per beṉꞌkaꞌ kwiayiꞌ, bi chajniꞌgakileꞌ dillꞌ wen c̱he Crístonaꞌ choeꞌntoꞌ, daa ngashaan laweꞌkaꞌ.
4 Ḻaꞌ dii x̱iwaa daa chṉabiaꞌ yell-lioni, ba bc̱hoḻ bṉitin yic̱hjlallꞌdoꞌekaꞌ kwenc̱he bi shoꞌn beeniꞌ c̱he dillꞌ wen dillꞌ kob c̱he Crístonaꞌ, beenaꞌ bliꞌ ka nakyeṉꞌ Chiozaꞌ.
5 Aga xtillꞌntonꞌ choeꞌntoꞌ, san choeꞌntoꞌ dillꞌ c̱he Jesucrístonaꞌ, nantoꞌ ḻenꞌ nakeꞌ X̱ancho. Naꞌ daa chakintoꞌ Crístonaꞌ, chonntoꞌ bittez dii gak gonntoꞌ kwenc̱he gaklenntoꞌ leꞌ.
6 Ḻaꞌ Chiozaꞌ, beenaꞌ wna: “Wzeeniꞌ beeniꞌnaꞌ lo yel c̱hoḻaꞌ”, ḻekzkaꞌ ba wloꞌe beeniꞌ c̱heꞌnaꞌ ḻoo yic̱hjlallꞌdoꞌntoꞌnaꞌ kwenc̱he gombiaꞌntoꞌ Jesucrístonaꞌ, naꞌ kanꞌ gakbeꞌintoꞌ ka nak yeḻꞌ zakii c̱he Chiozaꞌ.
7 Naꞌ beeniꞌ c̱he dillꞌ wen c̱he Crístonaꞌ nakan to dii zakii inlleb. Naꞌ ba nzoa Chiozaꞌn ḻoo lallꞌdoꞌntoꞌni, netoꞌ nakntoꞌ beṉꞌ bibi zakii, kwenc̱he ka weꞌntoꞌ xtilleenaꞌ, gakbeꞌi beṉꞌ yeḻꞌ wak xennaꞌ nsaꞌn nakan c̱he Chios, aga nakan c̱hentoꞌ.
8 Ḻaꞌkzi chiya dii chak c̱hentoꞌ, bi nakgakan dii bi yichej yilalenntoꞌ. Ḻaꞌkzi de dii nzen netoꞌ wṉeyi, bi chakshejlallꞌntoꞌ.
9 Ḻaꞌkzi chino beṉꞌ netoꞌ, aga chchooṉlallꞌ Chiozaꞌ netoꞌ. Ḻaꞌkzi chchix̱ chḻoḻgakeꞌ netoꞌ, biṉꞌ wlliayiꞌgakeꞌ netoꞌ.
10 Gattezə chajntoꞌ, chsakꞌziꞌgakeꞌ netoꞌ naꞌ cheengakileꞌ witgakeꞌ netoꞌ ka betgakeꞌ Jesúzaꞌ. Chak c̱hentoꞌ kaꞌ kwenc̱he nakbiaꞌ Jesúzaꞌ zoeꞌ chakleneꞌ netoꞌ.
11 Ḻaꞌ shlak mbanntoꞌ, toshiizi zelenntoꞌ yeḻꞌ wit daa nakntoꞌ Jesúzaꞌ txen. Chak c̱hentoꞌ kaꞌ kwenc̱he nakbiaꞌ zoa Jesucrístonaꞌ chakleneꞌ netoꞌ lao diikaꞌ chllaglo beli chen c̱hentoꞌni dga guet.
12 Daa choeꞌntoꞌ choꞌa xtillꞌ Crístonaꞌ zelenntoꞌ yeḻꞌ wit, kwenc̱he leꞌ gatꞌ yeḻꞌ mban c̱hele.
13 Choꞌa Xtillꞌ Chiozaꞌ nan: “Daa benḻilallaa Chiozaꞌ, naꞌchan biꞌa dillꞌ.” Naꞌ kakzan netoꞌ, daa chonḻilallꞌntoꞌneꞌn, naꞌchan choeꞌntoꞌ choꞌa xtilleenaꞌ.
14 Naꞌ ṉezicho Chiozaꞌ, beenaꞌ bisbaneꞌ X̱ancho Jesúzaꞌ ladj beṉꞌ wetkaꞌ, ḻekzenꞌ yisbaneꞌ choꞌ ka bisbaneꞌ ḻeꞌ. Naꞌ ka netoꞌ ka leꞌ, yic̱hiꞌe choꞌ ganaꞌ zoeꞌ.
15 Yeḻꞌ ziꞌ dga chllaglontoꞌ ṉaa, chllaglontoꞌn kwenc̱he gak wen c̱hele. Naꞌ ka zej chanch beṉꞌ gombiaꞌ dillꞌ wen c̱he Crístonaꞌ, ḻekzkaꞌ beṉꞌ zanch wiꞌe Chiozaꞌ yeḻꞌ chox̱ken daa nakeꞌ beṉꞌ wen, naꞌ shoꞌe balaaṉ xen.
16 Daan bi chidiṉjintoꞌ. Ḻaꞌkzi beli chen c̱hentoꞌni zej chde c̱heyin, yic̱hjlallꞌdoꞌntoꞌni chikob Chiozaꞌn lla kon lla.
17 Diiki chtiḻntoꞌ ṉaa, nakan dii te toldezə, naꞌ bibi chaktekintoꞌ. Ḻaꞌ ṉezintoꞌ daa chak c̱hentoꞌ ki, Chiozaꞌ goṉeꞌ to dii wen inlleb c̱hentoꞌ dii bi te c̱heyin.
18 Aga zentoꞌ wṉeyi c̱he diiki chleꞌicho yell-lioni, san diikaꞌ bi nḻaꞌn zentoꞌ wṉeyi. Ḻaꞌ yogꞌte diiki chleꞌicho yell-lioni, de toldezə c̱he ka diikaꞌ, naꞌ diikaꞌ bi chleꞌicho ṉaa, nakan dii bi te c̱heyin.