3
Ka choeꞌlenntoꞌ leꞌ dillꞌki, ¿achakile ba wizzolontoꞌ chshalj chshon c̱he kwinntonꞌ? ¿Awa chakile chiyaḻꞌ gonntoꞌ ka chon baḻ beṉꞌ, goṉntoꞌ yish, wa iṉabintoꞌn leꞌ, ganaꞌ choꞌen dillꞌ nan chonntoꞌ wen?
2 Leꞌkzan nakle ka yish daa choꞌen dillꞌ chonntoꞌ wen, ḻaꞌ daa nonḻilallꞌle Crístonaꞌ chakbeꞌi yogꞌ beṉꞌ choeꞌntoꞌ dillꞌ ḻi. Naꞌ toshiizi yoole ḻoo yic̱hjlallꞌdoꞌntoꞌki.
3 Naꞌ daa ileꞌi beṉꞌ ba bikob Crístonaꞌ yic̱hjlallꞌdoꞌlenaꞌ daa beꞌlenntoꞌ leꞌ choꞌa xtilleenaꞌ, nakle ka to yish dii bzej kwin Crístonaꞌ nan chonntoꞌ wen. Naꞌ bi nakan to dii nyoj ḻee yish wa dii nyoj ḻee yaj taa, san daa ba bseḻꞌ Crístonaꞌ Espíritu c̱he Chios yaa Chios bannaꞌ ḻoo yic̱hjlallꞌdoꞌlenaꞌ zejin bzejeꞌn ḻee lallꞌdoꞌlenaꞌ.
4 Daa chaklen Crístonaꞌ netoꞌ, chiyaxjidꞌ niaꞌ chonntoꞌ xshineꞌnaꞌ ka chazlallꞌ Chiozaꞌ.
5 Aga daa ḻe napntoꞌ yeḻꞌ sinꞌnanꞌ chonntoꞌ diiki, san Chiozanꞌ chakleneꞌ netoꞌ chonntoꞌn.
6 Chiozaꞌ ba bliꞌ bsedileꞌ netoꞌ kwenc̱he gak weꞌntoꞌ dillꞌ c̱he dii kobaꞌ daa ba bc̱hebeꞌ goneꞌ c̱hecho. Naꞌ dga bi nakan ka ley c̱he dii Moisézaꞌ daa chlliayiꞌn beṉꞌ, san dga nakan c̱he Espíritu c̱he Chiozaꞌ, naꞌ ḻenꞌ choꞌe yeḻꞌ mban c̱he beṉꞌ.
7 Ka nak leyaꞌ beꞌ Chiozaꞌ dii Moisézaꞌ, daa byoj ḻee yaj taanaꞌ, nc̱hogbiaꞌn gatꞌ yeḻꞌ wit c̱hecho, gokan to dii zakii nlleb naꞌ bsaꞌn yeḻꞌ chey cheeniꞌ xen ax̱t ni bi gok wwia beṉꞌ Israelkaꞌ choꞌalao dii Moisézaꞌ daa ḻe chey cheeniꞌn ḻaꞌkzi gokan dii yinit. Naꞌ shi leyaꞌ daa nc̱hogbiꞌa gatꞌ yeḻꞌ wit c̱hecho gokan to dii zakii nlleb,
8 ¿alechlə nak yeḻꞌ zakii c̱he dii kobaꞌ daa bx̱e Espíritunaꞌ?
9 Shi leyaꞌ daa nc̱hogbiꞌa guetcho gokan to dii zakii nlleb, naꞌ daa chon Chiozaꞌ c̱hecho chiziꞌxeneꞌ xtoḻꞌchokaꞌ, naktechan dii zakii nllebch.
10 Ka nak yeḻꞌ zakii c̱he leyaꞌ, bi bllinan ka nak yeḻꞌ zakꞌ xen inlleb c̱heyi dga ba bx̱ieꞌ sto.
11 Naꞌ shi leyaꞌ daa ben llin shlollz gokan to dii zakii, dii zakꞌtechi nak dga gon llin toshiizi.
12 Daa ba de dga nonntoꞌ lez naꞌchan choeꞌntoꞌ dillꞌ kon ka nakan.
13 Naꞌ bi chonntoꞌ ka ben dii Moisézaꞌ kanaꞌ bkwashꞌ choꞌalaweꞌnaꞌ kon to lechꞌ kwenc̱he beṉꞌ Israelkaꞌ bi ileꞌgakileꞌ ka chinit yeḻꞌ chey cheeniꞌnaꞌ choꞌalaweꞌnaꞌ.
14 Naꞌ yeḻꞌ chajnii c̱heꞌkaꞌ bi benkzan llin, ḻaꞌ ax̱t ṉaanlla katꞌ chlabgakeꞌ leyaꞌ bi chajniꞌkzgakileꞌn naꞌ nakan ka to dii ngashꞌ. San beṉꞌkaꞌ gonḻilallꞌgakeꞌ Crístonaꞌ, ḻegakenꞌ shajniꞌgakileꞌn, ḻaꞌ ḻenꞌ wsaljeꞌ yic̱hjlalldoeꞌkaꞌ.
15 Ax̱t ṉaa, katꞌ chlabgakeꞌ daa bzej dii Moisézaꞌ, de to dii chsej chllonan shajniꞌgakileꞌn.
16 Per katꞌ to beṉꞌ yiyaj yilenileꞌ naꞌ gonḻilallee X̱ancho Crístonaꞌ, naꞌ yikwas daa chsej chllonan shajniileꞌn.
17 Ḻaꞌ X̱anchonaꞌ, ḻekzenꞌ Espíritunaꞌ, naꞌ beenaꞌ zoalen Espíritu c̱he X̱anchonaꞌneꞌ, bich bi ntakw nc̱hejan ḻeꞌ.
18 Daan, yogꞌḻoḻcho choꞌ bich bi de wsej wllonan gombiaꞌchoneꞌ, naꞌ ba nakcho ka to wan ganaꞌ chliꞌlao balaaṉ c̱he X̱anchonaꞌ. Naꞌ Espíritu c̱heꞌnaꞌ zejch chiyonshaweꞌ choꞌ kwenc̱he yiyakcho ka X̱anchonaꞌ.