9
De lsens gonꞌ daa chakidꞌ nakan wen. Nadꞌ nakꞌ postl c̱he X̱ancho Jesucrístonaꞌ. Nadꞌ bleꞌidee, naꞌ leꞌ ba nonḻilallꞌleneꞌ daa bzajniidꞌ leꞌ xtilleenaꞌ.
2 Naꞌ ḻaꞌkzi zoa beṉꞌ bi chajḻeꞌgakeꞌ nakꞌ postl c̱he Jesucrístonaꞌ, leꞌ ṉezile nakꞌ postl c̱heꞌ. Naꞌ daa ba nonḻilallꞌleneꞌ chliꞌn kanꞌ nakan.
3 Naꞌ ki chilliꞌa xtillꞌ beṉꞌkaꞌ na bi nakꞌ dowalj postl:
4 Ṉezile wak iṉabntoꞌ goṉ beṉꞌ dii yeej gaontoꞌ sheḻꞌkaꞌ.
5 Naꞌ ḻekzkaꞌ wak ikaantoꞌ to noolə nonḻilallee Crístonaꞌ naꞌ wc̱heꞌntoꞌneꞌ ganaꞌ gonntoꞌ xshin Chiozaꞌ, ka chon postlkaꞌ sto, naꞌ beṉꞌkaꞌ nak beṉꞌ bishꞌ X̱ancho Crístonaꞌ, naꞌ ḻekzkaꞌ Céfazaꞌ.a
6 ¿Achakile zeelo Bernabénaꞌ len nadꞌ chiyaḻꞌ gonntoꞌ llinnaꞌ kon ṉiꞌa naꞌntoꞌki kwenc̱he yeej gaontoꞌ?
7 Aga ga zoa soldad chyixj gax̱t c̱he kwineꞌ. Naꞌ biga zoa beṉꞌ gazeꞌ yag uvanaꞌ naꞌ bi yeejeꞌ daa chbian. Ni biga zoa beṉꞌ gapeꞌ no shib wa no xilꞌ naꞌ bi yeejeꞌ xillꞌbkaꞌ katꞌ chsieꞌn.
8 Bi gakile nadꞌzan niaꞌ kaꞌ, ḻaꞌ ḻekzkaꞌ na leyaꞌ bzej dii Moisézaꞌ.
9 Ḻaꞌ leyaꞌ nan: “Bi wllinoꞌ yix̱jaꞌ choꞌa gooṉkaꞌ katꞌ chlej chshoshjgakb trígonaꞌ.” Naꞌ aga toz c̱he gooṉkanꞌ ze Chiozaꞌ wṉeyi.
10 San daa zieꞌ wṉeyi c̱hechon wneꞌ kaꞌ. Ḻaꞌ leyaꞌ byojan kwenc̱he gaklenan choꞌ. Ka beenaꞌ chwaaṉ gooṉnaꞌ, naꞌ ka beenaꞌ chonshaoꞌ trígonaꞌ, nongakeꞌ lez lengakeꞌ ikaagakeꞌ daa chiziꞌ chilapgakeꞌ.
11 Naꞌ shi netoꞌ nakntoꞌ ka beṉꞌ goz daa ba bzajniintoꞌ leꞌ choꞌa xtillꞌ Chiozaꞌ, ¿achakile ziꞌtelan gonntoꞌ iṉabintoꞌ leꞌ shi bi chyalljintoꞌ?
12 Shi beṉꞌkaꞌ sto chliꞌ chsedi leꞌ choeꞌle daa chyallj chc̱hingakileꞌ, ¿alechla netoꞌ?
Per chonntoꞌ banez bibi chṉabintoꞌ leꞌ kwenc̱he bibi gombeg wzenagle dillꞌ wen dillꞌ kob c̱he Crístonaꞌ.
13 Ṉezkzile beṉꞌkaꞌ chon llin ḻoo lill xḻatj Chiozaꞌ cheej chaogakeꞌ daa chjwaꞌ beṉꞌkaꞌ lao Chiozaꞌ. Naꞌ bx̱ozkaꞌ chit bayix̱ꞌkaꞌ lao Chiozaꞌ de lsens gaogakeꞌ xpelꞌ bayix̱ꞌkaꞌ chitgakeꞌ.
14 Naꞌ kaꞌkzə X̱ancho Crístonaꞌ bllieꞌ biaꞌ c̱he beṉꞌkaꞌ chyix̱jee dillꞌ wen dillꞌ kob c̱heꞌnaꞌ, ḻekzan ibangakileꞌ.
15 Per nadꞌ ni tshii biṉꞌ iṉabidꞌ leꞌ goṉle dii chyalljidꞌ, ni bi chzejꞌ dga kwenc̱he goṉlen. Wenchlan guetꞌ aga ka daa iṉa beṉꞌ c̱haꞌ chonꞌ xshin Crístonaꞌ daa naxjidꞌ. Ḻaꞌ chibaidꞌ iṉiaꞌ bibi chc̱hix̱jꞌ chonꞌ xshineꞌnaꞌ.
16 Naꞌ nadꞌ bi gak wshalj wshonꞌ daa chyix̱jiꞌa dillꞌ wen dillꞌ kob c̱he Crístonaꞌ, ḻaꞌ chonan byen gonꞌ daa noneꞌ lallꞌ naꞌ. ¡Naꞌ nyeshꞌlaz gak c̱haꞌ shi bi wiꞌa dillꞌ wen dillꞌ kob c̱heꞌnaꞌ!
17 Naꞌ sheḻꞌkaꞌ chyix̱jiꞌan daa goljan ḻoo yic̱hjlallꞌdawaani, naꞌ chidoḻꞌ siaꞌ laxjꞌ, sheḻꞌkaꞌ. Per aga chyix̱jiꞌan daa goljan ḻoo yic̱hjlallꞌdawaanin, san zeelo chonꞌ daa ben Crístonaꞌ lallꞌ naꞌ gonꞌ.
18 Naꞌ dgan banezaꞌ chiziꞌa: daa ḻe chibaidꞌ chyix̱jiꞌa dillꞌ wen dillꞌ kob c̱he Crístonaꞌ naꞌ bibi iṉabidꞌ beṉꞌ wzenagueꞌn, ḻaꞌ bi cheenidꞌ ibanidꞌ dillꞌ wen dillꞌ kob c̱heꞌnaꞌ, ḻaꞌkzi wak gon kaꞌ, sheḻꞌkaꞌ.
19 Ḻaꞌkzi kono beṉꞌ chṉabiꞌe nadꞌ, chon kwinꞌ ka beṉꞌ ndoo lla yel lao yogꞌḻoḻ beṉꞌ daa choeꞌlengakee xtillꞌ Crístonaꞌ, kwenc̱he shanch beṉꞌkaꞌ gonḻilallꞌgakeꞌneꞌ.
20 Katꞌ zoaꞌ ladj beṉꞌ Israelkaꞌ, beṉꞌkaꞌ nak beṉꞌ wlall c̱haꞌ, naꞌ chsaꞌ c̱haꞌ ka nsaꞌ c̱hegakeꞌ kwenc̱he gonḻilallꞌgakeꞌ Crístonaꞌ. Naꞌ chonꞌ daa na leyaꞌ bzej dii Moisézaꞌ daa nogakeꞌ ḻaꞌkzi ṉezidꞌ bich chṉabiꞌan nadꞌ.
21 Naꞌ katꞌ zoaꞌ ladj beṉꞌkaꞌ bi nombiaꞌ ley daa bzej dii Moisézaꞌ, naꞌ chsaꞌ c̱haꞌ ka nsaꞌ c̱hegakeꞌ kwenc̱he gonḻilallꞌgakeꞌ Crístonaꞌ. Per bi iṉacho chzoaꞌ kaꞌlə daa nllia Chiozaꞌ biaꞌ, ḻaꞌ chzenagꞌ c̱he leyaꞌ daa bzoa Crístonaꞌ ḻoo yic̱hjlallꞌdawaani.
22 Naꞌ katꞌ zoaꞌ ladj beṉꞌkaꞌ chaki dii zan dii bi de lsens gongakeꞌ, naꞌ chsaꞌ c̱haꞌ ka nsaꞌ c̱hegakeꞌ kwenc̱he wzajniꞌchgakidee c̱he Crístonaꞌ. Ba bsaꞌ c̱haꞌ ka nsaꞌ c̱he yogꞌḻoḻgakeꞌ kwenc̱he gonꞌ gan yislaꞌ baḻgakeꞌ naꞌ bi kwiayiꞌgakeꞌ.
23 Chonꞌ yogꞌ diiki kwenc̱he wzenag beṉꞌ dillꞌ wen dillꞌ kob c̱he Crístonaꞌ naꞌ yiziꞌlengakee banez c̱heyin.
24 Ṉezkzile ka nak c̱he beṉꞌkaꞌ chxoṉj, zangakeꞌ chxoṉjgakeꞌ, per tochokzenꞌ goneꞌ gan naꞌ ikee daa chidoḻee. Naꞌ ka chon beenaꞌ chxoṉj kwenc̱he goneꞌ gan, kanꞌ chiyaḻꞌ gonle, ḻi gon ka dii le gonle ka cheeni Chiozaꞌ kwenc̱he goṉeꞌ daa siꞌle banez.
25 Beṉꞌ wyitjkaꞌ chsed, chbej yic̱hjgakeꞌ daa chzoaziꞌyaa kwerp c̱heꞌkaꞌ. Naꞌ chongakeꞌ kaꞌ kwenc̱he idoḻꞌ illongakileꞌ daa yibagakileꞌ xtit shloll naꞌ te c̱heyin. San choꞌ choncho to dii byen kwenc̱he idoḻꞌ illonicho to dii biga llia te c̱heyin.
26 Daan, nadꞌ bi chonꞌ ka beenaꞌ kon chxoṉj ni bi ṉezileꞌ gan illineꞌ, ni bi chonꞌ ka beenaꞌ chdiḻ naꞌ bi chzakileꞌ kwalleꞌ beenaꞌ chdiḻ-leneꞌ.
27 San chṉabiꞌa kwinꞌ kwenc̱he chonꞌ daa chiyaḻꞌ gonꞌ kwenc̱he ki, ka yiyoll wliꞌ wsedidꞌ beṉꞌ nakan chiyaḻꞌ goneꞌ, nadꞌlə bi shoꞌlallꞌzi Chiozaꞌ ka nsaꞌ c̱haꞌ.