8
Naꞌ ka nak c̱he yeḻꞌ wawaꞌ daa chllia beṉꞌ lao lwaa lsakꞌ chios c̱heꞌkaꞌ, yogꞌcho ṉezicho c̱heyi dga. Per nxoll gakcho beṉꞌ chaꞌsib daa chakicho ḻe ṉezicho. San shi napcho yeḻꞌ chakinaꞌ, wzecho wṉeyi gaklen ljwellcho gakchachcho.
2 Naꞌ beenaꞌ chaki ḻe ṉezileꞌ, chiyaḻꞌ gakbeꞌileꞌ bi ṉezileꞌ ka chiyaḻꞌ.
3 Per beenaꞌ ḻe chakileꞌ Chiozaꞌ, Chiozaꞌ nombiꞌeneꞌ.
4 Naꞌ ka nak yeḻꞌ wawaꞌ daa chllia beṉꞌ lao lwaa lsakꞌ chios c̱heꞌkaꞌ, ṉezicho lwaa lsakꞌ chios c̱heꞌkaꞌ bibi zakꞌgakan, san toz Chiozanꞌ zoa.
5 Dii ḻi de dii zan daa na beṉꞌ nakgakan chios c̱hegakeꞌ. Per ḻaꞌkzi nagakeꞌ zoa chios c̱hegakeꞌ naꞌ x̱angakeꞌ yabanaꞌ wa lo yell-lioni,
6 choꞌ ṉezicho toz Chiozanꞌ zoa, beenaꞌ nak X̱acho. Ḻenꞌ bx̱e bsil yogꞌḻoḻte dii de, naꞌ zoacho kwenc̱he weꞌlaꞌochoneꞌ. Naꞌ ḻekzkaꞌ zoa toz beenaꞌ nak X̱ancho, naꞌ ḻenꞌ Jesucrístonaꞌ, beenaꞌ bx̱e bsileꞌ yogꞌḻoḻte dii de, naꞌ ni c̱henꞌ mbancho.
7 Per aga yogꞌ beṉꞌ ṉezgakileꞌ dga. Baḻ beṉꞌ wyoologakeꞌ beꞌlaꞌogakeꞌ lwaa lsakꞌ chios c̱heꞌkaꞌ, naꞌ katꞌ cheej chaogakeꞌ yeḻꞌ wawaꞌ daa ba bllia beṉꞌ lawinkaꞌ chakgakileꞌ txenan chonlengakeꞌn. Naꞌ daa biṉꞌ gakbeꞌgakileꞌ bibi zakii diikaꞌ, chakgakileꞌ malanꞌ chongakeꞌ katꞌ cheej chaogakeꞌ yeḻꞌ wawaꞌ.
8 Per aga ni c̱he daa cheej chaochon ileꞌshiꞌchi Chiozaꞌ choꞌ wa gonileꞌ choꞌ nakzi; ḻaꞌ aga bi chon daa gaocho wa daa bi gaocho.
9 Per choꞌ, ḻaꞌkzi chakbeꞌicho aga bi zakii lwaa lsakꞌ chios c̱heꞌkaꞌ naꞌ ṉezicho aga bi nonan shi yeej gaocho diikaꞌ blliagakeꞌ lawinkaꞌ, chiyaḻꞌ wsakꞌcho kwenc̱he ki wchix̱cho beenaꞌ biṉꞌ gakcha lo xṉez Chiozaꞌ goneꞌ daa chakileꞌ nakan mal.
10 Ḻaꞌ shi ṉezile aga bi zakii lwaa lsakꞌ chios c̱heꞌkaꞌ naꞌ cheej chaole ganaꞌ choeꞌlaꞌogakeꞌ ḻegakan, naꞌ ileꞌi to bishꞌ ljwell-le leꞌ, beṉꞌ biṉꞌ gakcha lo xṉez Chiozaꞌ, naꞌ nxoll wc̱hoglallee yeej gaweꞌn, ḻaꞌkzi chakileꞌ nakan mal.
11 Naꞌ daa chonle daa ṉezile bi nakan mal, nxoll wḻaale lo xṉez Chiozaꞌ bishꞌ ljwell-lenaꞌ beenaꞌ biṉꞌ gakcha, beenaꞌ ḻekzkaꞌ wit Crístonaꞌ ni c̱heꞌ.
12 Naꞌ daa chonle ka gon bishꞌ ljwell-lenaꞌ to dii na yic̱hjlallꞌdoꞌenaꞌ bi chiyaḻꞌ goneꞌ, lao Crístonaꞌkzan chx̱iṉj chḻenle.
13 Daan shi daa cheej chawꞌ gonan ka wx̱iṉj wḻen bishꞌ ljwellaa, naklan wen bichga gawꞌ belaa, kwenc̱he bi gonꞌ ka wx̱iṉj wḻeneꞌ.