7
Ka nak diikaꞌ wṉabile nadꞌ ka bzejle nadꞌ, nadꞌ niaꞌ nakan wen shi bi ikaa c̱he beṉꞌ byonaꞌ.
2 Per daa zoale dii nxoll gatꞌlenle nottez ka chon beṉꞌ yell-lioni, daan to to beṉꞌ byo chiyaḻꞌ soa nool c̱heꞌ, naꞌ ḻekzkaꞌ to to noolə chiyaḻꞌ soa beṉꞌ c̱heꞌ.
3 Naꞌ beṉꞌkaꞌ nshagnaꞌ, ka beṉꞌ byo ka nool, bi chiyaḻꞌ wlloni ljwellgakeꞌ kwerp c̱heꞌkaꞌ.
4 Ḻaꞌ noolaꞌ aga nak kwerp c̱heꞌnaꞌ c̱he tozeꞌ, san nakan len c̱he beṉꞌ c̱heꞌnaꞌ. Naꞌ kaꞌkzə beṉꞌ c̱heꞌnaꞌ bi nak kwerp c̱heꞌnaꞌ c̱he tozeꞌ, san nakan len c̱he xooleꞌnaꞌ.
5 Naꞌ daan bi wlloni ljwell-le kwerp c̱helekaꞌ, per shi c̱hoptele ba beꞌle dillꞌ bi gatꞌlen ljwell-le to tiemp kwenc̱he weꞌḻwill-le Chiozaꞌ, aga bi nonan. Naꞌ tenaꞌ chiyaḻꞌ yiyell ljwell-le dii yoblə kwenc̱he bi soale dii nxoll gon dii x̱iwaa leꞌ gan naꞌ weꞌle choꞌa xbayi beli chennaꞌ talenle beṉꞌ yoblə.
6 Niaꞌ leꞌ kaꞌ kwenc̱he iṉezile wak wshagnaꞌ beṉꞌ byonaꞌ naꞌ noolaꞌ, per bi chonan byen shi bi cheengakileꞌ.
7 Nadꞌ chakidꞌ nakan wen sheḻꞌkaꞌ yogꞌ beṉꞌ byo soeꞌ tozeꞌ ka zoaꞌ nadꞌ, per wde wdeli nak daa noṉ Chiozaꞌ gon to tocho.
8 Naꞌ leꞌ biṉꞌ wshagnaꞌle, naꞌ ḻekzkaꞌ leꞌ ba wit beṉꞌ c̱helekaꞌ, niaꞌ leꞌ naklan wen soa tozle, ka zoaꞌ nadꞌ.
9 Per shi bi yizoilen, wenchoklə ikaa c̱hele kwenc̱he bi shoꞌ shejlallꞌle selallꞌle nool wa beṉꞌ byo daa chonan lallj iṉabiaꞌ kwinle.
10 Naꞌ leꞌ nshagnaꞌle, niaꞌ leꞌ kon ka non X̱ancho Crístonaꞌ mandad gonle, aga nakan dii niaꞌ nadꞌ: Noolaꞌ bi chiyaḻꞌ yiḻee beṉꞌ c̱heꞌnaꞌ.
11 Naꞌ shi noolaꞌ yiḻee beṉꞌ c̱heꞌnaꞌ, bi chiyaḻꞌ yikee beṉꞌ yoblə, san wenlan yiyoeꞌxeneꞌ beṉꞌ c̱heꞌnaꞌ naꞌ yikeeneꞌ dii yoblə. Naꞌ kaꞌkzə beṉꞌ byonaꞌ bi chiyaḻꞌ yiḻee xooleꞌnaꞌ.
12 Ka leꞌ nshagnaꞌle naꞌ bi nonḻilallꞌle Crístonaꞌ c̱hoptele, niaꞌ leꞌ dga, per bi nakan daa nllia X̱anchonaꞌ biaꞌ gonle: shi to beṉꞌ byo nshagnaꞌleneꞌ to noolə bi nonḻilallꞌ Crístonaꞌ, naꞌ noolaꞌ noneꞌ lez gax̱ꞌsheꞌleneꞌneꞌ, bi chiyaḻꞌ yiḻaa beṉꞌ c̱heꞌnaꞌ ḻeꞌ.
13 Naꞌ shi to noolə nshagnaꞌleneꞌ to beṉꞌ byo bi nonḻilallꞌ Crístonaꞌ, naꞌ beṉꞌ c̱heꞌnaꞌ noneꞌ lez gax̱ꞌsheꞌleneꞌneꞌ, bi chiyaḻꞌ yiḻaa xooleꞌnaꞌ ḻeꞌ.
14 Beṉꞌ byonaꞌ, beenaꞌ bi nonḻilallee Crístonaꞌ shi nshagnee to noolə beṉꞌ ba nonḻilalleeneꞌ, Chiozaꞌ chleꞌshiileꞌneꞌ ni c̱he nool c̱heꞌnaꞌ. Naꞌ noolaꞌ, beenaꞌ bi nonḻilallee Crístonaꞌ, shi nshagnee to beṉꞌ byo beṉꞌ ba nonḻilalleeneꞌ, Chiozaꞌ chleꞌshiileneꞌ ni c̱he beṉꞌ c̱heꞌnaꞌ. Sheḻꞌ bi nakan kaꞌ, bi chleꞌshii Chiozaꞌ xiiṉeꞌkaꞌ, sheḻꞌkaꞌ. San daa nonḻilallꞌ togakeꞌ Crístonaꞌ, Chiozaꞌ chleꞌshiileꞌ xiiṉeꞌkaꞌ.
15 Per shi xooloꞌnaꞌ wa beṉꞌ c̱hoꞌnaꞌ, beenaꞌ bi nonḻilallee Crístonaꞌ, bich cheenileꞌ soaleneꞌ liꞌ, beꞌ latj yiyajeꞌ. Bi chonan byen soayaadialenzoꞌneꞌ, ḻaꞌ Chiozaꞌ ba gox wṉabeꞌ choꞌ kwenc̱he soacho mbalaz.
16 Naꞌ liꞌ nonḻilalloo Crístonaꞌ, bi ṉeziloꞌ shi wak gonoꞌ kwenc̱he beṉꞌ c̱hoꞌnaꞌ wa xooloꞌnaꞌ gonḻilallee Crístonaꞌ naꞌ yileꞌ bi kwiayiꞌe.
17 To tocho, ka beṉꞌ nshagnaꞌ ka beṉꞌ zoa tozeꞌ, chiyaḻꞌ soacho kon ka non X̱anchonaꞌ c̱hecho ka gox wṉab Chiozaꞌ choꞌ. Kaꞌkzə chonꞌ byen gon yogꞌ kwen beṉꞌkaꞌ chdop chllag choeꞌlaꞌogakeꞌ Crístonaꞌ.
18 Shi nole yoole seṉ daa le circuncisión ka gox wṉab Chiozaꞌ leꞌ, bi gonle ka yinit seṉnaꞌ. Naꞌ shi bi yoole seṉnaꞌ ka gox wṉab Chiozaꞌ leꞌ, bi koo kwinle seṉ.
19 Aga bi nonan shi yoocho seṉnaꞌ wa shi bi yoochon, san daa llialote goncho ka nlliaꞌ Chiozaꞌ biaꞌ.
20 To tocho chiyaḻꞌ soacho kon ka nakcho ka gox wṉab Chiozaꞌ choꞌ.
21 Shi ba nziꞌ beṉꞌ liꞌ kwenc̱he gonoꞌ xshineꞌnaꞌ ka gox wṉab Chiozaꞌ liꞌ, bibi gakiloꞌ. Per shi shoꞌiloꞌ xṉezin yisaneꞌ liꞌ, ben to dii byen.
22 Ḻaꞌ beenaꞌ ndoo chon xshin beṉꞌ ka gox wṉab Chiozaꞌneꞌ, Crístonaꞌ ba bisell biḻeeneꞌ lao dii malaꞌ. Naꞌ beenaꞌ chon xshinkzeꞌ ka gox wṉab Chiozaꞌ ḻeꞌ, ba nak Crístonaꞌ X̱aneꞌ daa ba biyaꞌo biziꞌeneꞌ lao dii malaꞌ.
23 Daa wit Crístonaꞌ biyaꞌo biziꞌe choꞌ lo ṉiꞌa naꞌ dii malaꞌ. Daan chiyaḻꞌ wzenagchcho c̱heꞌ aga ka c̱he nottez beṉꞌ.
24 Naꞌ leꞌ beṉꞌ bishꞌ naꞌ leꞌ beṉꞌ zanꞌ, kon ka zoacho ka gox wṉab Chiozaꞌ choꞌ, kaꞌkzan soa kwezcho laweꞌnaꞌ.
25 Naꞌ ka leꞌ ni zoale tozle, bi nllia X̱ancho Crístonaꞌ biaꞌ nak gonle, per nadꞌ iṉiaꞌ ka chakidꞌ chiyaḻꞌ gonle. Naꞌ daa ba biyeshꞌlallii X̱anchonaꞌ nadꞌ, zakꞌkzi xtillaanaꞌ wzenaglen.
26 Nadꞌ chakidꞌ nakan wen soale kon ka zoale ṉaa, ḻaꞌ llaki zoacho nakgakan dii lallj.
27 Shi zoa nool c̱hele bi yiḻaaleneꞌ. Naꞌ shi kono nool c̱hele zoa, bi gonle byen ikaa c̱hele.
28 Shi wshagnaꞌle, bi nakan mal; naꞌ shi to nool wewꞌ wshagnaꞌbꞌ ḻekzkaꞌ aga bi mal nakan. Per dii zan dii zed chen chleꞌi beṉꞌkaꞌ nshagnaꞌ, naꞌ chaklallaa bi gak c̱hele kaꞌ.
29 Naꞌ leꞌ beṉꞌ bishꞌ naꞌ leꞌ beṉꞌ zanꞌ, cheenidꞌ iṉiaꞌ leꞌ dga: Ziꞌ latꞌchga latj c̱hecho de. Daan, leꞌ nshagnaꞌle, bi weꞌle latj wsej wllon nool c̱helenaꞌ gonle ka cheeni Chiozaꞌ.
30 Naꞌ shi nole zoale nyeshꞌ bi weꞌle latj wsej wllonan gonle ka cheeni Chiozaꞌ. Naꞌ shi nole zoale mbalaz, bi weꞌle latj wsej wllonan gonle ka cheeni Chiozaꞌ. Naꞌ shi nole chaꞌo chziꞌle bittezə, bi weꞌle latj wsej wllonan gonle ka cheeni Chiozaꞌ.
31 Naꞌ shi nole chziꞌle banez dii de yell-lioni, bi weꞌle latj wsej wllonan gonle ka cheeni Chiozaꞌ; ḻaꞌ yell-lioni dga nombiaꞌcho nakan dii te c̱heyin.
32 Nadꞌ chaklallaa bibi sele wṉeyi c̱heyin, sheḻꞌkaꞌ. Ḻaꞌ beṉꞌ byonaꞌ bi nshagnaꞌ chzecheꞌ wṉeyi daa nak c̱he X̱anchonaꞌ kwenc̱he goneꞌ ka yiyoolallee.
33 San beenaꞌ nshagnaꞌ chzecheꞌ wṉeyi c̱heyi daa de yell-lioni naꞌ nak goneꞌ kwenc̱he yiyoolallii nool c̱heꞌnaꞌ daa choneꞌ,
34 naꞌ c̱hoplə nak diikaꞌ chzieꞌ wṉeyi c̱heyin. Naꞌ nool tonaꞌ naꞌ kaꞌkzə nool wewaa zechgakeꞌ wṉeyi c̱he daa nak c̱he X̱anchonaꞌ, naꞌ do ka nakgakeꞌ chon kwingakeꞌ lallꞌ nee kwenc̱he gongakeꞌ daa cheenileꞌ. San noolaꞌ nshagnaꞌ chzecheꞌ wṉeyi c̱heyi daa de yell-lioni naꞌ nak goneꞌ kwenc̱he yiyoolallii beṉꞌ c̱heꞌnaꞌ daa choneꞌ.
35 Niaꞌ leꞌ kaꞌ aga daa cheenidꞌ wsej wllonꞌ bi gonle, san daa cheenidꞌ gaklenꞌ leꞌ gonle ka chiyaḻi, kwenc̱he bibi wllonan gon kwinle lallꞌ naꞌ X̱ancho Crístonaꞌ do ka nakle naꞌ gonle ka cheenileꞌ.
36 Shi to biꞌ wewꞌ ba nakan ikaabꞌ to nool wewꞌ biꞌ ba nzagꞌbꞌ, naꞌ chakibꞌ wenan ikaabꞌ ḻebꞌ daa ba goḻbꞌ, wshagnaꞌchbꞌ, aga bi mal chomꞌ.
37 Per shi zoa biꞌ wewꞌ chakibꞌ bi chonan byen ikaabꞌ noolə naꞌ wzoibꞌ beli chen c̱hebaa kwenc̱he bi wx̱iṉj wḻemꞌ, wenan gomꞌ bi wshagnaꞌbꞌ.
38 Naꞌ biꞌnaꞌ wshagnaꞌ wenkzan chomꞌ, per biꞌnaꞌ bi wshagnaꞌbꞌ chontechbꞌ wen.
39 Naꞌ noolaꞌ nshagnaꞌ, chonan byen soaleneꞌ toz beṉꞌ c̱heꞌnaꞌ,shlak mbaneꞌ; per shi guet beṉꞌ c̱heꞌnaꞌ, wak yikee beṉꞌ yoblə, kon shi nakeꞌ beṉꞌ nonḻilallꞌ X̱ancho Crístonaꞌ.
40 Per nadꞌ chakidꞌ wzoacheꞌ mbalazch shi bich yikaa c̱heꞌ. Naꞌ dga ba wniaꞌ, chakidꞌ Espíritu c̱he Chiozaꞌ yoo ḻoo yic̱hjlallꞌdawaꞌnin na kaꞌ.