6
Katꞌ tole de to dii zed c̱hele kon sto beenaꞌ nakle txen nonḻilallꞌle Crístonaꞌ, bi chiyaḻꞌ shajle lao beṉꞌkaꞌ bi nonḻilallꞌ Crístonaꞌ kwenc̱he gongakeꞌ yeḻꞌ josc̱his c̱helenaꞌ, san ḻi shaj lao beṉꞌkaꞌ nak lallꞌ naꞌ Chiozaꞌ kwenc̱he gongakeꞌ yeḻꞌ josc̱his c̱helenaꞌ.
2 ¿Abi ṉezile wllin lla leꞌ nakle lallꞌ naꞌ Chiozaꞌ gonle yeḻꞌ josc̱his c̱he beṉꞌ yell-lioki? Naꞌ shi lenꞌ gonle yeḻꞌ josc̱his c̱heꞌkaꞌ, ḻekzkaꞌ wak gonle yeḻꞌ josc̱his c̱he bizə diidoꞌkaꞌ chak ṉaa.
3 ¿Abi ṉezile ax̱t anjlkaꞌ goncho yeḻꞌ josc̱his c̱heꞌkaꞌ? Naꞌ shi goncho yeḻꞌ josc̱his c̱he anjlkaꞌ, ¿abi gak goncho yeḻꞌ josc̱his c̱he diiki chak ṉaa zoacho yell-lioni?
4 Naꞌ shi leꞌ chakdiḻ-len ljwell-le ni c̱he biz diikaꞌ chak c̱hele, ¿berac̱he chajzle lao josc̱hiskaꞌ beṉꞌkaꞌ bi nonḻilallꞌgakeꞌ Crístonaꞌ, beṉꞌkaꞌ bibi zakii ladjlenaꞌ?
5 Niaꞌ leꞌ kaꞌ kwenc̱he yidoꞌlatile. ¿Aniga tlishꞌle bi nteyi kwenc̱he gak gonle yeḻꞌ josc̱his c̱he beṉꞌkaꞌ nonḻilallꞌlenle Crístonaꞌ?
6 Latjin dii gonlen ladjle naꞌz, ba zejzle zjtaole xya c̱he ljwell-le lao josc̱hiskaꞌ bi nonḻilallꞌ Crístonaꞌ.
7 Naꞌ daa chao xya c̱he ljwell-le chliꞌn bi nsaꞌ c̱hele wen. ¿Bic̱he ki chonxenlallꞌle yogꞌ dii choni beṉꞌ leꞌ, wa ki chonle kaꞌz katꞌ no chziꞌ chban bi de c̱hele?
8 Per leꞌlə, lwaa dii gonle kaꞌ, dii zan dii choni ljwell-le naꞌ chiziꞌ chibantezle c̱he ljwell-le.
9 ¿Abi ṉezile beṉꞌkaꞌ bi chon wen aga willingakeꞌ ganaꞌ zoa Chiozaꞌ chṉabiꞌe? Bi siyeꞌz kwinle, ḻaꞌ ka nak beṉꞌkaꞌ chdalen ljwellin, beṉꞌkaꞌ choeꞌlaꞌo yaj yagkaꞌ, beṉꞌkaꞌ bi chon banez xoolin wa noolkaꞌ bi chon banez beṉꞌ c̱heyin, beṉꞌ xejkaꞌ,
10 beṉꞌ wbankaꞌ, beṉꞌkaꞌ chzelallii gatꞌ kweꞌgakileꞌ daa de yell-lioni, beṉꞌ weezokaꞌ, beṉꞌkaꞌ chbell chṉe c̱he beṉꞌ, wa beṉꞌkaꞌ chyiljlallꞌ naklə siꞌ kwangakeꞌ bi de c̱he beṉꞌ, ni to beṉꞌkaꞌ chon diiki bi yillingakeꞌ ganaꞌ zoa Chiozaꞌ chṉabiꞌe.
11 Naꞌ baḻ-le gokle ka beṉꞌ malki kanaꞌ. Per ṉaa Chiozaꞌ ba bix̱is biyibeꞌ leꞌ, ba noneꞌ leꞌ yell c̱heꞌ, naꞌ ba biyoneꞌ leꞌ beṉꞌ ḻi beṉꞌ shaoꞌ laweꞌnaꞌ daa ba nonḻilallꞌle X̱ancho Jesucrístonaꞌ naꞌ daa chon Espíritu c̱heꞌnaꞌ llin lo yeḻꞌ mban c̱helenaꞌ.
12 Dillꞌ de, nan: “De latj goncho bittezə.” Ḻikzan, per aga yogꞌ daa goncho nakan wen. Naꞌ ḻaꞌkzi de latj goncho bittezə, bi chiyaḻꞌ weꞌcho latj iṉabiaꞌn choꞌ.
13 Ṉezicho yeḻꞌ wawaꞌ nakan c̱he ḻeechoni, naꞌ ḻeechoni noneꞌn kwenc̱he shoon yeḻꞌ wawaꞌ. Per Chiozaꞌ goneꞌ ka te c̱he c̱hopte diiki. Naꞌ kwerp c̱hechoni aga noneꞌn kwenc̱he nottez gatꞌlencho, san kwenc̱he goncho daa cheeni X̱ancho Crístonaꞌ, naꞌ X̱anchonaꞌ nak lallꞌ nee kwerp c̱hechoni.
14 Naꞌ ka bisban Chiozaꞌ X̱ancho Jesucrístonaꞌ ladj beṉꞌ wetkaꞌ kon yeḻꞌ wak c̱heꞌnaꞌ, kaꞌkzan yisbaneꞌ choꞌ ladj beṉꞌ wetkaꞌ.
15 Ṉezile yogꞌcho nonḻilallꞌcho Crístonaꞌ chzaklebicho tkwen wej kwerp c̱heꞌnaꞌ. Naꞌ biga chiyaḻꞌ wc̱hincho kwerp c̱hechoki nak ka tkwen wej kwerp c̱he Crístonaꞌ kwenc̱he gatꞌlencho noolə wdanaꞌ.
16 ¿Abi ṉezile nottezə beṉꞌ gatꞌleneꞌ to noolə wda, chakeꞌneꞌ toz? Ḻaꞌ Choꞌa Xtillꞌ Chiozaꞌ nan: “Beṉꞌkaꞌ c̱hop gakgakeꞌ toz kwerp.”
17 Per beenaꞌ chon kwineꞌ lallꞌ naꞌ X̱ancho Crístonaꞌ, chakeꞌneꞌ toz daa yoo Espíritu c̱heꞌnaꞌ ḻoo yic̱hjlallꞌdoꞌenaꞌ.
18 Bi wc̱hinle kwerp c̱helenaꞌ gatꞌlenzle nottez beṉꞌ, ḻi ikwas lao dii malaꞌ nak kaꞌ. Ḻaꞌ ḻennanꞌ chx̱iṉj chḻenchan kwerp c̱hechonaꞌ aga ka bichlə dii mal yoblə. Beenaꞌ gon to dii mal yoblə, aga bi nonan c̱he kwerp c̱heꞌnaꞌ, san daa chon beenaꞌ chc̱hin kwerp c̱heꞌnaꞌ chatꞌleneꞌ nottez, chx̱iṉj chḻenan do ka nakeꞌ.
19 ¿Abi ṉezile kwerp c̱hechoni nakan lill xḻatj Espíritu Sántonaꞌ, beenaꞌ bzoa Chiozaꞌ ḻoo yic̱hjlallꞌdoꞌchoni? Naꞌ bi gak goncho daa nazan c̱hecho;
20 ḻaꞌ Crístonaꞌ ba biyaꞌo biziꞌe choꞌ daa blalj xc̱heneꞌnaꞌ naꞌ witeꞌ ni c̱hecho kwenc̱he nakcho lallꞌ naꞌ Chiozaꞌ. Daan yogꞌ daa gonlen kwerp c̱hechoni chiyaḻꞌ gonchon ka shoꞌ Chiozaꞌ balaaṉ.