5
Ba benidꞌ dillꞌ nagakeꞌ nan len to beṉꞌ ladjlenaꞌ zoaleneꞌ xṉaꞌziꞌenaꞌ ka xooleꞌ. Daa chon beenaꞌ nakan to dii zban inlleb; ni beṉꞌkaꞌ bi nombiaꞌ Chiozaꞌ bi chongakeꞌ kaꞌ.
2 Naꞌ ḻaꞌkzi chak kaꞌ ladjlenaꞌ, ni chep chaꞌlallꞌzle daa chakile ba chonle ka cheeni Chiozaꞌ. Chiyaḻꞌlə gakyeshilen naꞌ yibejle beenaꞌ chon kaꞌ.
3 Ḻaꞌkzi ṉaa bi zoaꞌ ganaꞌ zoale, ḻe chiꞌ yic̱hjꞌ ka nsaꞌ c̱hele. Naꞌ kon ḻi gaktezi naꞌkzan zoalenꞌ leꞌ, naꞌ ḻi gon ka ba bc̱hogloaꞌ gak c̱he beenaꞌ ben kaꞌ.
4 Naꞌ katꞌ ndiꞌa nllagle choeꞌlaꞌole X̱ancho Jesúzaꞌ, ḻi gaktezi naꞌkzan zoaꞌ ladjlenaꞌ, naꞌ daa zoalen yeḻꞌ wak c̱he X̱ancho Jesúzaꞌ leꞌ,
5 ḻi yibej beenaꞌ naꞌ ḻi goneꞌ lallꞌ naꞌ Satanázaꞌ kwenc̱he shi yiyakbeꞌileꞌ naꞌ yiyaj yilenileꞌ naꞌ yileꞌ lo yeḻꞌ ziꞌnaꞌ daa zaꞌ llanaꞌ wc̱hoglo X̱anchonaꞌ c̱he beṉꞌ.
6 Bi nakan wen chep chaꞌlallꞌle. Ba ṉezkzile dillaa de nan: “Latꞌz levadúranaꞌ chisgolan doxen kwa c̱he yetxtilaꞌ.”
7 Dii mal daa ben beenaꞌ ladjlenaꞌ nakan ka levadúranaꞌ. Naꞌ ka netoꞌ beṉꞌ Israel bi choeꞌntoꞌ latj yigaaṉ ni latꞌ levadúranaꞌ ḻoo yoo lillntoꞌ katꞌ chaḻꞌ lṉi Paskwaꞌ, kaꞌkzə leꞌ chiyaḻꞌ kwejle beenaꞌ chon zban ladjlenaꞌ kwenc̱he gakle ka kwa kob daa bi nc̱hix̱ levadúranaꞌ, kon ka ba nakkzle. Ḻaꞌ Crístonaꞌ, beenaꞌ zaklebi xilꞌdoꞌnaꞌ chitgakeꞌ Paskwaꞌ, ba witeꞌ ni c̱hecho.
8 Naꞌ ka chon beṉꞌkaꞌ chon lṉi Paskwaꞌ chbejgakeꞌ yogꞌḻoḻ daa nc̱hix̱ levadúranaꞌ, kaꞌkzə choꞌ chiyaḻꞌ soa kwezcho bich goncho saaxyanaꞌ naꞌ bi dii mal daa bencho kaniꞌyi, san soacho do yic̱hj do lallꞌcho shajlencho daa nak dii ḻi.
9 Ba bzejkzꞌ leꞌ to shii wniaꞌ leꞌ bi gonlenle txen beṉꞌkaꞌ chdalen ljwellin.
10 Daa wniaꞌ bi chiyaḻꞌ gonle txen beṉꞌkaꞌ chdalen ljwellgakeꞌ, wa chzelallꞌgakeꞌ gatꞌ kweꞌgakileꞌ dii de yell-lioni, wa chbangakeꞌ, wa choeꞌlaꞌogakeꞌ no yaj yag, aga c̱he beṉꞌkaꞌ bi nombiaꞌ Chiozanꞌ niaꞌ kaꞌ, ḻaꞌ sheḻꞌ bi gak ḻencho ladjeꞌkaꞌ chiyaḻꞌ ichejtekzcho lo yell-lioni, sheḻꞌkaꞌ.
11 San daa wniaꞌ kaꞌ zejin bi gak ḻencho nottezə beṉꞌ neꞌ nakeꞌ choꞌ txen nonḻilallꞌcho Crístonaꞌ naꞌ chdaleneꞌ xiiṉ xool beṉꞌ, wa chzelallileꞌ gatꞌ kweꞌileꞌ dii de yell-lioni, wa choeꞌlaꞌoweꞌ no yaj yag, wa chbell chṉieꞌ c̱he beṉꞌ, wa nakeꞌ weezo, wa nakeꞌ beṉꞌ wban. Yogꞌ beṉꞌkaꞌ chon kaꞌ, ni bi yeej gaolenle ḻegakeꞌ.
12 Bi nak lallꞌ naꞌcho kweꞌcho kwent wṉeyi beṉꞌkaꞌ bi nonḻilallꞌ Crístonaꞌ. San beṉꞌkaꞌ nakcho txen nonḻilallꞌcho Crístonaꞌ, ḻegakenꞌ chiyaḻꞌ kweꞌcho kwent wṉeyi.
13 Chiozaꞌ yiziꞌe kwent beṉꞌkaꞌ bi nonḻilallꞌ Crístonaꞌ. Naꞌ leꞌ, ḻi yibej beenaꞌ chon dii malaꞌ ladjlenaꞌ.