4
Chiyaḻꞌ gakbeꞌile netoꞌ nakntoꞌ wen llin c̱he Crístonaꞌ, naꞌ nak lo naꞌntoꞌ chzajniintoꞌ beṉꞌ daa kono wṉezi daa wloo Chiozaꞌ xṉezin.
2 Naꞌ chonan byen gonntoꞌ kon ka ba noneꞌ lallꞌ naꞌntoꞌ gonntoꞌ.
3 Naꞌ aga bitek wṉeyi ziaꞌ shi leꞌ wa ḻaa x̱oṉj beṉꞌ chiꞌe nadꞌ kwent wṉeyi shi chak gonꞌ xshin Chiozaꞌ ka chiyaḻꞌ. Ni nadꞌ biga chbiꞌa kwent wṉeyi c̱he kwinꞌ shi chonꞌ ka chiyaḻꞌ.
4 Naꞌ ḻaꞌkzi bibi de dii chao chdian nadꞌ, aga ni c̱he kaꞌ bibi doḻꞌ c̱haꞌ de. Toz X̱ancho Crístonaꞌ ṉez nḻeꞌileꞌ shi chonꞌ ka chiyaḻꞌ gonꞌ.
5 Naꞌ daan, bi chiyaḻꞌ sele kwent wṉeyi beṉꞌ, san ḻi kwez ax̱t katꞌkaꞌ yilaꞌ X̱ancho Crístonaꞌ naꞌ wliꞌe lawi daa ngashꞌ ṉaa naꞌ daa yoo ḻoo yic̱hjlallꞌdoꞌ yogꞌ beṉꞌ. Kanaꞌchan gon Chiozaꞌ ka shoꞌcho balaaṉ shi bencho ka cheenileꞌ.
6 Leꞌ beṉꞌ bishꞌ naꞌ leꞌ beṉꞌ zanꞌ, choeꞌlenꞌ leꞌ dillꞌki kwenc̱he gak wen c̱hele, naꞌ choꞌa dillꞌ c̱he kwinꞌ len xtillꞌ Apólozaꞌ kwenc̱he iṉezile ka chonntoꞌ naꞌ wsedle bi tele lawi daa na Choꞌa Xtillꞌ Chiozaꞌ. Naꞌch bi gakle beṉꞌ chaꞌsib naꞌ soazle c̱he baḻ beṉꞌ naꞌ gonzile zi baḻeꞌ nakzi.
7 ¿Achakile nakchle beṉꞌ zakꞌchi aga ka beṉꞌ yoblə? Ḻaꞌ Chiozaꞌ beṉeꞌ diikaꞌ ba naple. Naꞌ daa beṉ Chiozaꞌgakan, ¿berac̱he chshalj chshonzle c̱heyin ka iṉacho tobiaꞌlozlen bllelilen?
8 Leꞌ chakile bich bi chyalljile. Chakile ba nakle ka beṉꞌ wniꞌa daa noṉ Chiozaꞌ diikaꞌ gak gon to tole. Chakile ba chṉabiaꞌlenle Crístonaꞌ naꞌ bich chyalljile netoꞌ. Ḻe mba sheḻꞌ dii ḻi ba chṉabiaꞌle, kwenc̱he len netoꞌ iṉabiaꞌlenntoꞌ leꞌ, sheḻꞌkaꞌ.
9 Chakidꞌ Chiozaꞌ ba noneꞌ kwenc̱he netoꞌ postl nakntoꞌ ka beṉꞌ ḻiizelozi bibi zakii, naꞌ ka beṉꞌ nchogbiaꞌ guet. Naꞌ yogꞌte beṉꞌ yell-lioki naꞌ len anjlkaꞌ chibangakileꞌ chwiagakeꞌ ka chak c̱hentoꞌ.
10 Beṉꞌ zan chakgakileꞌ nakntoꞌ beṉꞌ bi nteyi daa chonntoꞌ xshin Crístonaꞌ, san leꞌ, chon kwinle ka beṉꞌ ḻe chajnii daa nonḻilallꞌle Crístonaꞌ. Netoꞌ chakbeꞌintoꞌ bibi chak gonntoꞌ, san leꞌ chakile chak gonle bittezə. Chleꞌshii beṉꞌ leꞌ, san netoꞌ, chleꞌzbani beṉꞌ netoꞌ.
11 Ax̱t ṉaanlla zoa katꞌ chbiḻ chdonntoꞌ, chyallj xalaanntoꞌ, chsakꞌziꞌ beṉꞌ netoꞌ, naꞌ aga bi lill xḻatjntoꞌ de.
12 Naꞌ chisto yic̱hj chisto lallꞌntoꞌ chonntoꞌ llin kon ṉiꞌa naꞌntoꞌki kwenc̱he gatꞌ dii yeej gaontoꞌ. Zoa beṉꞌ chyishjgakeꞌ biaꞌ blagꞌ c̱hentoꞌ, naꞌ netoꞌ chṉablntoꞌ gaklen Chiozaꞌ ḻegakeꞌ. Chc̱hi chsakꞌgakeꞌ netoꞌ naꞌ chzo chzakintoꞌ daa chongakileꞌ netoꞌ.
13 Chiya dii nagakeꞌ c̱hentoꞌ, naꞌ netoꞌ choeꞌlentoꞌ ḻegakeꞌ dillꞌ xochi. Naꞌ chongakileꞌ netoꞌ ka beṉꞌ zeelo bibi zakii, ka to dii ba wchooṉ beṉꞌ. Ax̱t ṉaanlla ni chongakileꞌ netoꞌ kaꞌ.
14 Aga chzejꞌ dga kwenc̱he wsiꞌa leꞌ yeḻꞌ ztoꞌ, san kwenc̱he wzajniidꞌ leꞌ, daa chakidꞌ leꞌ ka xiiṉꞌ.
15 Naꞌ ḻaꞌkzi zoa shi mil beṉꞌ wzajniileꞌ leꞌ c̱he Crístonaꞌ, toz beenaꞌ nak ka x̱alen zoa. Ḻaꞌ nadaan nakꞌ ka x̱ale daa wloꞌa leꞌ lo xṉez Cristo Jesúzaꞌ ka beꞌlenꞌ leꞌ dillꞌ wen dillꞌ kob c̱heꞌnaꞌ.
16 Daan chatꞌyoidꞌ leꞌ, ḻi gon ka chonꞌ.
17 Naꞌ daan, ba bseḻaa Timotewaꞌ ganaꞌ zoale. Chakidee ka dowalj xiiṉꞌ naꞌ choneꞌ xshin Crístonaꞌ ka chiyaḻꞌ goneꞌ. Ḻeꞌ yisee lallꞌle ka nsaꞌ c̱haꞌ lo xṉez Crístonaꞌ, naꞌ ka chzajniidꞌ beṉꞌkaꞌ chdop chllag choeꞌlaꞌogakeꞌ Crístonaꞌ doxen ganaꞌ chdaꞌ.
18 Baḻ-le ba chep chaꞌlallꞌle daa chakileꞌ bich yidwiaꞌ leꞌ.
19 Per shi X̱anchonaꞌ wiꞌe latj, yob yidwiaꞌ leꞌ naꞌ ileꞌidꞌ shi beṉꞌkaꞌ chep chaꞌlallꞌ dii ḻi chak gongakeꞌ ka nagakeꞌ wa shi chshaljzgakenꞌ.
20 Aga de dillꞌzan iṉacho ba chṉabiaꞌ Chiozaꞌ choꞌ, san daa gapcho yeḻꞌ wak c̱heꞌnanꞌ naꞌchan gak goncho ka cheenileꞌ.
21 ¿Nakra cheenile gonꞌ katꞌ yidwiaꞌ leꞌ? ¿Acheenile gonidꞌ leꞌ zṉia?, anti ¿weꞌlenꞌ leꞌ dillꞌ xochi daa ḻe chakidꞌ leꞌ?