3
Leꞌ beṉꞌ bishꞌ naꞌ leꞌ beṉꞌ zanꞌ, bi gok weꞌlenꞌ leꞌ ka dillꞌkaꞌ choeꞌlenꞌ beṉꞌkaꞌ ba nakcha lo xṉez Chiozaꞌ, daa ni chonle ka nazan c̱hele, naꞌ ni nakle ka biꞌdoꞌ daa biṉꞌ shajniꞌyeṉꞌile c̱he Crístonaꞌ.
2 Naꞌ ka chon beṉꞌ kon bdoꞌ cheeṉnaꞌ choꞌebꞌ nillaa daa biṉꞌ gak gaobꞌ yeḻꞌ wawaꞌ, kanꞌ benꞌ c̱hele, bi beꞌlenꞌ leꞌ dillꞌ dii nak lallj, ḻaꞌ biṉꞌ gak shajniilen. Naꞌ ni ṉaa biṉꞌ shajniꞌkzilen.
3 Niaꞌ kaꞌ, daa ni chonle daa nazan c̱hele. Daa chakxeꞌi ljwell-le, naꞌ chakdiḻ-len ljwell-le, chliꞌn ni chonle ka nazan c̱hele naꞌ chonle ka beṉꞌ bi nombiaꞌ Chiozaꞌ.
4 Daa na baḻ-le: “Nadꞌ nakꞌ txen Páblonaꞌ”, naꞌ zi baḻ-le nale: “Nadꞌ nakꞌ txen Apólozaꞌ”, ¿abi chakbeꞌile ka beṉꞌ bi nombiaꞌ Chiozanꞌ chonle?
5 ¿No nak Apólozaꞌ? Naꞌ ¿no nakꞌ nadꞌ? Zeelochoz nakntoꞌ wen llin c̱he X̱ancho Crístonaꞌ, naꞌ ḻeꞌ beneꞌ ka benḻilallꞌleneꞌ ka beꞌlenntoꞌ leꞌ xtilleenaꞌ. To to netoꞌ benntoꞌ kon ka wloꞌe xṉezin gonntoꞌ.
6 Nadꞌ nakꞌ ka beenaꞌ goz daa wdisꞌ xtillꞌ Crístonaꞌ ladjlenaꞌ, naꞌ Apólozaꞌ nakeꞌ ka beenaꞌ wdil, daa bliꞌ bsedchileꞌ leꞌ. Per Chiozaꞌ beneꞌ ka wyajḻeꞌle daa bliꞌ bsedintoꞌ leꞌ.
7 Naꞌ aga no nak beenaꞌ chaz ni beenaꞌ chyil, ḻaꞌ toz Chiozanꞌ choneꞌ ka chgol daa ba byaz.
8 Toz ka zakꞌ beenaꞌ chaz naꞌ beenaꞌ chyil. Naꞌ Chiozaꞌ goneꞌ kwenc̱he to toeꞌ siꞌe banez kon ka nak llinnaꞌ daa beneꞌ.
9 Netoꞌ nakntoꞌ txen chonntoꞌ xshin Chiozaꞌ ladjlenaꞌ, naꞌ nakntoꞌ ka beṉꞌ goz gooṉ c̱heꞌ, naꞌ leꞌ nakle ka yell-lio c̱heꞌ ganaꞌ chonntoꞌ llinnaꞌ. Naꞌ ḻekzkaꞌ nakle ka to yoo c̱heꞌ dii chonntoꞌ.
10 Chiozaꞌ ba gokleneꞌ nadꞌ chonꞌ xshineꞌnaꞌ ladjlenaꞌ, naꞌ daa benꞌ ladjlenaꞌ nakan ka beṉꞌ wlek to len yoo, naꞌ beṉꞌ yoblə chḻiseꞌ zeekaꞌ. Naꞌ to to wen llin chiyaḻꞌ wsakee shi choneꞌ llinnaꞌ ka chiyaḻꞌ gakan.
11 Naꞌ kono gak wx̱e sto len yoblin, ḻaꞌ Jesucrístonanꞌ zaklebileꞌ len yoonaꞌ ba chiꞌ.
12 Naꞌ lo len yooni, zoa beṉꞌ wx̱eileꞌn or wa plat, wa yaj dii zakii, naꞌ zoa beṉꞌ wx̱eileꞌn yaglaꞌ, wa yeje, wa yix.
13 Naꞌ llinnaꞌ daa gon to toeꞌ wliꞌlawin shi nakan dii zakii. Ḻaꞌ katꞌ illin lla gon Chiozaꞌ yeḻꞌ josc̱his c̱he beṉꞌ yell-lioni, yiꞌ c̱heꞌnaꞌ wzeyan daa bi zakii, naꞌ gakbiaꞌ nak nak llinnaꞌ ben to toeꞌ.
14 Naꞌ shi no ben to dii bi shey, naꞌ siꞌe banez c̱he xshineꞌnaꞌ.
15 Per shi daa beneꞌ sheyan, naꞌ bibi banez siꞌe c̱heyin. Naꞌ kayaadia yileꞌ bi kwiayee lo yiꞌnaꞌ.
16 ¿Abi chakbeꞌile nan leꞌ chdop chllagle choeꞌlaꞌole Crístonaꞌ nakle ka lill xḻatj Chiozaꞌ, naꞌ Espíritu c̱heꞌnaꞌ zoeꞌ ladjlenaꞌ?
17 Naꞌ shi no wlliayiꞌ lill xḻatjeꞌnaꞌ, Chiozaꞌ wlliayee beenaꞌ gon kaꞌ, naꞌ lenꞌ nakle ka lill xḻatj Chiozaꞌ daa nakle lallꞌ nee.
18 Bi siyeꞌ kwinle. Shi nole chakile nakle beṉꞌ sinꞌ daa naple yeḻꞌ sinꞌ c̱he yell-lioni, chiyaḻꞌ yiyakle ka to beṉꞌ bibi chajnii lao beṉꞌ yell-lioni kwenc̱he Chiozaꞌ goṉeꞌ leꞌ dowalj yeḻꞌ sinꞌnaꞌ.
19 Ḻaꞌ yeḻꞌ sinꞌ c̱he beṉꞌ yell-lioni aga bi zakaan lao Chiozaꞌ. Choꞌa Xtillꞌ Chiozaꞌ nan: “Chiozaꞌ choneꞌ kwenc̱he beṉꞌ sinꞌkaꞌ chakc̱hix̱gakileꞌ lo yeḻꞌ sinꞌ c̱heꞌkaꞌ.”
20 Naꞌ ḻekzkaꞌ nan: “X̱ancho Chiozaꞌ nombiꞌe yogꞌḻoḻ daa chzaꞌlallꞌ beṉꞌ yell-lioni, naꞌ ṉezileꞌ nakan dii bibi zakii.”
21 Daan, ni tole bi chiyaḻꞌ gakle beṉꞌ chaꞌsib daa shi non nakle txen, ḻaꞌ yogꞌ beṉꞌ naꞌ yogꞌ dii de nakan c̱hele kwenc̱he siꞌle banez c̱heyin:
22 ḻaa nadꞌ Pablo, ḻaa Apólozaꞌ, ḻaa Céfazaꞌ, ḻaa yell-lioni, ḻaa yeḻꞌ mbannaꞌ, ḻaa yeḻꞌ witaꞌ, ḻaa daa chak ṉaa, ḻaa daa ziꞌ gak. Yogꞌntoꞌ len yogꞌ diikaꞌ nakgakan c̱hele kwenc̱he siꞌle banez c̱heyin.
23 Naꞌ leꞌ nakle lallꞌ naꞌ Crístonaꞌ, naꞌ Crístonaꞌ nakeꞌ lallꞌ naꞌ Chiozaꞌ.