2
Naꞌ leꞌ beṉꞌ bishꞌ naꞌ leꞌ beṉꞌ zanꞌ, ka bidtix̱jeꞌidꞌ leꞌ xtillꞌ Chiozaꞌ, aga bpaa dillꞌkaꞌ beꞌlenꞌ leꞌ, ni bi bc̱hinꞌ dillꞌ sinꞌ c̱he beṉꞌ yell-lioni.
2 Kanaꞌ wzoa ladjlenaꞌ, benꞌ to dii byen beꞌlenꞌ leꞌ toz xtillꞌ Jesucrístonaꞌ naꞌ ka nak daa witeꞌ ḻee yag cruzaꞌ, naꞌ bich bi dillꞌ yoblə beꞌlenꞌ leꞌ.
3 Naꞌ ka wzoalenꞌ leꞌ, bllebꞌ daa gokidꞌ shi bi gakꞌ wiꞌa xtillꞌ Jesucrístonaꞌ ka chiyaḻꞌ.
4 Naꞌ ka bshaljlenꞌ leꞌ naꞌ ka wdix̱jeꞌidꞌ leꞌ xtillꞌ Crístonaꞌ, aga biꞌa dillꞌ dii chaki beṉꞌ nakan dillꞌ sinꞌ kwenc̱he kooyeḻaa leꞌ shajḻeꞌle. San daa biꞌa xtilleenaꞌ kon yeḻꞌ wak c̱he Espíritu c̱he Chiozanꞌ wyajḻeꞌle.
5 Ḻaꞌ aga goklallaa shajḻeꞌle ni c̱he yeḻꞌ sinꞌ c̱he beṉꞌ yell-lioni, san daa yenileꞌ dillꞌkaꞌ nsaꞌ yeḻꞌ wak c̱he Chiozanꞌ.
6 Dii ḻi de to yeḻꞌ sinꞌ daa choeꞌlenntoꞌ beṉꞌkaꞌ ba nakcha nonḻilallꞌgakeꞌ Crístonaꞌ. Per bi nakan yeḻꞌ sinꞌ c̱he yell-lioni, ni bi nakan yeḻꞌ sinꞌ c̱he beṉꞌkaꞌ chṉabiaꞌgakeꞌ lo yell-lioni, ḻaꞌ wllin lla te c̱he beṉꞌkaꞌ.
7 San chzajniintoꞌ leꞌ yeḻꞌ sinꞌ c̱he Chiozaꞌ daa ngashꞌ kaniꞌteyi, daa wloꞌe xṉezin kanaꞌ ziꞌ wx̱e wsileꞌ yell-lioni. Ḻaꞌ kanaꞌte wloꞌe xṉezin yid Crístonaꞌ c̱hixjeꞌ xtoḻꞌchokaꞌ kwenc̱he soacho mbalaz.
8 Ni tlishꞌ beṉꞌ wṉabiaꞌkaꞌ zoa yell-lioni bi wyajniꞌgakileꞌ yeḻꞌ sinꞌ c̱he Chiozaꞌ, ḻaꞌ sheḻꞌkaꞌ wyajniꞌgakileꞌn, bi betgakeꞌ X̱ancho Crístonaꞌ ḻee yag cruzaꞌ, beenaꞌ ḻiizelozi nak beṉꞌ choo beṉꞌ xen.
9 Per ka na choꞌa xtillꞌ Chiozaꞌ:
Daa konoṉꞌ ileꞌi naꞌ konoṉꞌ yeni, ni konoṉꞌ saꞌlallꞌ shi gakan,
ḻennanꞌ wloo Chiozaꞌ xṉezin goneꞌ c̱he beṉꞌkaꞌ chakgakileꞌneꞌ.
10 Naꞌ Chiozaꞌ ba beneꞌ kwenc̱he Espíritu c̱heꞌnaꞌ ba bzajniileꞌ choꞌ c̱heyi diikaꞌ. Naꞌ Espíritu c̱heꞌnaꞌ ṉez nḻeꞌileꞌ yogꞌḻoḻ, naꞌ chajniileꞌ kwasḻoḻ yogꞌ daa nak c̱he Chiozaꞌ.
11 Ḻaꞌ choꞌ beṉꞌ yell-lio shinchozə ṉezicho dii yoo ḻoo yic̱hjlallꞌdoꞌ kwincho, naꞌ bi ṉezicho bi yoo ḻoo yic̱hjlallꞌdoꞌ beṉꞌ yoblə. Kaꞌkzan, toz Espíritu c̱he Chiozaꞌ ṉez nḻeꞌileꞌ daa ngoo Chiozaꞌ xṉezin.
12 Naꞌ choꞌ aga yeḻꞌ sinꞌ daa de yell-lionin chc̱hincho, san Chiozaꞌ ba beṉeꞌ choꞌ Espíritu c̱heꞌnaꞌ kwenc̱he chajniicho ka nak dii wennaꞌ daa ba noṉeꞌ choꞌ.
13 Naꞌ netoꞌ, katꞌ choeꞌntoꞌ xtillꞌ Crístonaꞌ, aga chc̱hinntoꞌ yeḻꞌ sinꞌnaꞌ de yell-lionizə, san chzajniintoꞌ diikaꞌ chzajnii Espíritu c̱he Chiozaꞌ netoꞌ, naꞌ chc̱hinntoꞌ dillꞌ daa chzajniileꞌ netoꞌ.
14 Naꞌ beenaꞌ bi yoo Espíritu c̱he Chiozaꞌ ḻoo yic̱hjlallꞌdoꞌenaꞌ, bi chajḻiꞌe dillꞌ daa chzajnii Espíritu c̱he Chiozaꞌ, daa chakileꞌ bizan chon chnan. Naꞌ bi chajniileꞌn daa chyalljin gaklen Espíritunaꞌneꞌ kwenc̱he shajniileꞌn.
15 San beenaꞌ yoo Espíritu c̱he Chiozaꞌ ḻoo yic̱hjlallꞌdoꞌenaꞌ chajniileꞌ c̱he bittezə daa cheeni Chiozaꞌ iṉezileꞌ, naꞌ kono gak bi iṉa c̱heꞌ.
16 Choꞌa Xtillꞌ Chiozaꞌ nan: “Ni to kono ṉezi daa cheeni X̱ancho Chiozaꞌ goneꞌ, naꞌ ni to kono gak wzajniileꞌneꞌ nakan chiyaḻꞌ goneꞌ.” San choꞌ ba yoo Espíritu c̱he Chiozaꞌ ḻoo yic̱hjlallꞌdoꞌchoni, ba chajniicho daa cheeni Crístonaꞌ goneꞌ.