2 Ṉezkzile kanaꞌ biṉꞌ gonḻilallꞌle X̱ancho Jesúzaꞌ, bentezle txen beṉꞌkaꞌ choeꞌlaꞌo lwaa lsakꞌ chioskaꞌ diikaꞌ ni bi chak iṉe.

3 Daan, cheenidꞌ iṉezile ni to beṉꞌ bi iṉeꞌ: “Aga bi zakii Jesúzaꞌ” shi zoalen Espíritu c̱he Chiozaꞌ ḻeꞌ. Naꞌ ḻekzkaꞌ ni to beṉꞌ bi gak iṉeꞌ: “Jesúzaꞌ nakeꞌ X̱ancho” shi bi zoalen Espíritu Santo c̱he Chiozaꞌ ḻeꞌ.

4 Wde wdeli daa choṉ Espíritu c̱he Chiozaꞌ to tocho, per ḻekzenꞌ choṉeꞌ yogꞌtegakan.

5 Wde wdeli nak xshin X̱ancho Crístonaꞌ goncho, per tozeꞌ ḻenꞌ nak X̱ancho.

6 Naꞌ wde wdeli nak daa noneꞌ lallꞌ naꞌcho gon to tocho, per toz Chiozanꞌ chakleneꞌ choꞌ kwenc̱he chak chonchon.

7 Chiozaꞌ chliꞌe zoalen Espíritu c̱heꞌnaꞌ choꞌ daa noṉeꞌ to tocho diikaꞌ chak choncho kwenc̱he chaklenan yogꞌcho.

8 Naꞌ ba beneꞌ kwenc̱he Espíritu c̱heꞌnaꞌ chakleneꞌ baḻcho choeꞌlencho beṉꞌ dillꞌ kon yeḻꞌ sinꞌ c̱heꞌnaꞌ, naꞌ zi baḻcho, choneꞌ ka chajniicho daa nak c̱he Chios naꞌ chak chzajniichon beṉꞌ yoblə.

9 Naꞌ zi baḻcho, chon Espíritu c̱heꞌnaꞌ ka chajḻeꞌchacho goneꞌ daa iṉabichoneꞌ; naꞌ zi baḻcho, choneꞌ ka gak yiyoncho beṉꞌ.

10 Naꞌ zi baḻcho, chc̱hineꞌ kwenc̱he choncho yeḻꞌ wak; zi baḻcho, choneꞌ ka chak chyix̱jeꞌcho daa na Chiozaꞌ choꞌ; zi baḻcho, choneꞌ ka chakbeꞌicho shi dillaa choeꞌ beṉꞌ dii ḻi nakan c̱he Chiozaꞌ wa shi nakan c̱he dii x̱iwaa. Zi baḻcho, choneꞌ ka chak chṉecho wde wdeli dillꞌ dii bi nsedcho; naꞌ zi baḻcho, choneꞌ ka chak chizajniicho bin wna beenaꞌ chṉe dillaa.

11 Naꞌ toz Espíritu c̱he Chiozaꞌ chgwee xṉezin goncho yogꞌ diikaꞌ, naꞌ ḻeꞌ chgoneꞌ daa gon to tocho.

12 Naꞌ ka kwerp c̱hechonaꞌ nakan toz ḻaꞌkzi zan diikaꞌ ndiḻ nllagan, kaꞌkzə choꞌ nonḻilallꞌcho Crístonaꞌ nakchoneꞌ toz ḻaꞌkzi nakcho beṉꞌ zan.

13 Naꞌ yogꞌḻoḻcho choꞌ, ka beṉꞌ Israel, ka beṉꞌ griego, ka beṉꞌ ndoo lla yel choneꞌ xshin beṉꞌ, naꞌ ka beṉꞌ chon xshinkzeꞌ, Espíritu c̱he Chiozaꞌ ba beneꞌ kwenc̱he nakcho ka toz kwerp. Naꞌ toz ḻenꞌ yoꞌe ḻoo yic̱hjlallꞌdoꞌ to tocho.

14 Naꞌ ka nak kwerp c̱hechonaꞌ, zan diikaꞌ ndiḻ nllagan.

15 Naꞌ shi ṉiꞌachonaꞌ iṉan: “Daa bi nakꞌ neenaꞌ, bi ndiḻ nllagꞌ kwerpaꞌ.” Ḻaꞌkzi shi iṉan kaꞌ, ndiḻ nllagkzan kwerpaꞌ.

16 Naꞌ shi nagchonaꞌ iṉan: “Daa bi nakꞌ jalaweꞌnaꞌ, bi ndiḻ nllagꞌ kwerpaꞌ.” Ḻaꞌkzi shi iṉan kaꞌ, ndiḻ nllagkzan kwerpaꞌ.

17 Naꞌ sheḻꞌkaꞌ doxen kwerp c̱hechonaꞌ nakan jalaocho, ¿nakra goncho kwenc̱he yenicho? Naꞌ shi doxen kwerp c̱hechonaꞌ nakan nagcho, ¿nakra goncho kwenc̱he iḻaꞌicho?

18 Naꞌ Chiozaꞌ bzoeꞌ to to diikaꞌ ndiḻ nllag kwerp c̱hechonaꞌ kon ganaꞌ chakileꞌ nakan wen soa to ton.

19 Ḻaꞌ sheḻꞌ toz ka nak yogꞌte daa ndiḻ nllagan, bi nakan to kwerp sheḻꞌkaꞌ.

20 Naꞌ ḻaꞌkzi zan diikaꞌ ndiḻ nllaggakan kwerp c̱hechonaꞌ, tozkz kwerpan nakan.

21 Naꞌ jalaochokaꞌ bi gak yeꞌgakan naꞌchokaꞌ: “Bi chyalljidꞌ leꞌ.” Ni bi gak yeꞌ yic̱hjchonaꞌ ṉiꞌachokaꞌ: “Bi chyalljidꞌ leꞌ.”

22 Naꞌ diikaꞌ ndiḻ nllag kwerp c̱hechonaꞌ daa chakicho bi nakan wal, ḻeləgakannanꞌ llialote.

23 Naꞌ diikaꞌ ndiḻ nllag kwerp c̱hechonaꞌ daa chakicho bitek bi zakaꞌn, ḻeləgakannanꞌ chapshiicho. Naꞌ diikaꞌ bi cheenicho ileꞌi beṉꞌ chkwashiꞌchon xachonaꞌ.

24 Naꞌ diikaꞌ ndiḻ nllag kwerp c̱hechonaꞌ naꞌ bi chonan ka yiyii yidoꞌicho ileꞌi beṉꞌ ḻegakan, bi chonan byen wkwashꞌchon. Naꞌ kaꞌ ben Chiozaꞌ kwerp c̱hechonaꞌ kwenc̱he nkwashꞌcho diikaꞌ chonan ka yiyii yidoꞌicho ileꞌi beṉꞌ ḻegakan.

25 Naꞌ yogꞌ diikaꞌ ndiḻ nllag kwerpaꞌ chaklen ljwellin daa nakgakan toz.

26 Daan shi gayi kwerp c̱hechonaꞌ chey chla, doxen kwerpaꞌ bi shaoꞌ. Naꞌ shi gayi kwerp c̱hechonaꞌ chonichon wen, doxenan chibayi.

27 Naꞌ leꞌ nakle ka kwerp c̱he Crístonaꞌ daa nakleneꞌ toz, naꞌ to tole nakle ka tkwen wej kwerp c̱heꞌnaꞌ.

28 Naꞌ ladjchonaꞌ, choꞌ chdop chllagcho choeꞌlaꞌocho Crístonaꞌ, Chiozaꞌ llialote bzoeꞌ netoꞌ nakntoꞌ postl, naꞌch bzoeꞌ beṉꞌ chyix̱jiꞌe daa chiꞌeneꞌ, naꞌ de wyoṉi bzoeꞌ beṉꞌ wliꞌ wsedileꞌ beṉꞌ choꞌa xtilleenaꞌ. Naꞌch bzoeꞌ beṉꞌ wliꞌe yeḻꞌ wak c̱heꞌnaꞌ, naꞌ beṉꞌ yiyoneꞌ beṉꞌ, naꞌ beṉꞌ gaklen bishꞌ ljwellchokaꞌ, naꞌ beṉꞌ chgoo xṉezin c̱he xshineꞌnaꞌ, naꞌ beṉꞌ chṉe wde wdeli dillꞌ dii bi nsedeꞌ.

29 Ṉezicho aga yogꞌcho nakcho postl. Aga yogꞌcho chak c̱hix̱jeꞌcho daa na Chiozaꞌ choꞌ. Aga yogꞌcho chak wliꞌ wsedicho choꞌa xtilleenaꞌ. Naꞌ aga yogꞌcho chak goncho yeḻꞌ wak.

30 Aga yogꞌcho chak yiyoncho beṉꞌ. Aga yogꞌcho chak iṉecho wde wdeli dillꞌ dii bi nsedcho. Naꞌ aga yogꞌcho chak yizajniicho bi zeji dillꞌkaꞌ.

31 Naꞌ leꞌ, ḻi selallꞌ gaklen Espíritu c̱he Chiozaꞌ leꞌ kwenc̱he gak gonle diikaꞌ zakꞌchi.