13
Shi nadꞌ chakꞌ wde wdeli dillꞌ dii chṉe beṉꞌ yell-lioni naꞌ ax̱t len xtillꞌ anjlkaꞌ chakꞌ, per bi chakidꞌ beṉꞌ, aga bi zjanayin chakꞌ diikaꞌ, naꞌ nakꞌ ka to dii nak de ya dii chon daṉe wa ka platiy dii chon sshag.
2 Naꞌ ḻaꞌkzi shi chak c̱hix̱jiꞌa daa na Chiozaꞌ nadꞌ, naꞌ ṉezidꞌ yogꞌḻoḻ daa nak c̱he Chiozaꞌ ax̱t daa kochnoṉꞌ iṉezi, naꞌ ḻaꞌkzi shi ḻe chajḻiꞌa c̱he Chiozaꞌ ax̱t chonꞌ ka illaꞌ xishnaꞌ yaakaꞌ, shi bi chakidꞌ beṉꞌ, aga bi zjanayin chak gonꞌ diikaꞌ.
3 Naꞌ ḻaꞌkzi shi wiꞌa beṉꞌ yeshꞌdoꞌkaꞌ yogꞌ dii de c̱haꞌ, wa izanidꞌ kwerp c̱haꞌni kwenc̱he wzeygakeꞌn, shi bi chakidꞌ beṉꞌ, aga bi gaklenan nadꞌ lao Chiozaꞌ.
4 Shi chakicho beṉꞌ, gapcho yeḻꞌ chxenlallꞌ c̱hegakeꞌ, gonicho ḻegakeꞌ wen, bi gakxeꞌicho ḻegakeꞌ, bi wshalj wshoncho laweꞌkaꞌ, bi gakcho beṉꞌ chaꞌsibə,
5 bi gonichogakeꞌ zban, bi c̱hiljcho daa nak to banez c̱hezcho, bi gakcho zgaaḻ zyil, ni bi koolallꞌcho.
6 Ni bi yibaicho katꞌ no chon mal, san yibaicho katꞌ no chon wen.
7 Shi chakicho beṉꞌ, bi goncho dii choo dii xen bittez dii chonileꞌ choꞌ, naꞌ bi saꞌlallꞌcho mal c̱heꞌ, san toshiizi goncho lez goneꞌ wen, naꞌ so sakicho bittezə.
8 Yeḻꞌ chakinaꞌ aga wiyoll widon. San ka nak daa chyix̱jee beṉꞌ daa cheꞌ Chiozaꞌneꞌ, naꞌ daa iṉe beṉꞌ wde wdeli dillꞌ dii bi nsedeꞌ, wllin lla bich iyalljan, naꞌ ni bich bi iyalljicho iṉezicho.
9 Ḻaꞌ latꞌchga daa ṉezicho ṉaa, naꞌ latꞌchga daa na Chiozaꞌ choꞌ kwenc̱he chyix̱jeꞌichon beṉꞌ,
10 per katꞌ illin lla Chiozaꞌ goneꞌ ka gombiaꞌchoneꞌ kwasḻoḻ, naꞌ te c̱heyi diikaꞌ chzajniin choꞌ latꞌ wej ṉaa.
11 Kanaꞌ nakꞌ biꞌdoꞌ, bshaljꞌ ḻega biꞌdoꞌ, benꞌ pensar ka biꞌdoꞌ, naꞌ wyajniidꞌ ḻega biꞌdoꞌ. Per ka bgolꞌ bich bsaꞌ c̱haꞌ ka c̱he biꞌdoꞌ.
12 Kaꞌkzan chak c̱hecho kon daa nak c̱he Chiozaꞌ ṉaa. Nakcho ka to beṉꞌ chwia to lo wan dii bi nḻaꞌyeṉꞌ. Per wllin lla katꞌ ileꞌyeṉꞌichoneꞌ ka chleꞌi choꞌalao ljwellcho. Biṉꞌ gombiaꞌyeṉꞌcho Chiozaꞌ ṉaa, per wllin lla katꞌ gombiaꞌchoneꞌ kwasḻoḻ ka nombiꞌe choꞌ.
13 Naꞌ ṉaa diiki shoṉə nakgakan dii llialote goncho: gonḻilallꞌcho Chiozaꞌ, gonchoneꞌ lez, naꞌ gapcho yeḻꞌ chakinaꞌ. Naꞌ daa llialote lawi diiki shoṉ, ḻennanꞌ yeḻꞌ chakinaꞌ.