14
Ḻi gon byen gakileꞌ bishꞌ ljwell-lekaꞌ naꞌ ḻekzkaꞌ ḻi selallꞌ goṉ Espíritu c̱he Chiozaꞌ leꞌ to dii gak gonle, naꞌ daa llialoch selallꞌle goneꞌ ka gak c̱hix̱jeꞌle daa iṉa Chiozaꞌ leꞌ.
2 Ḻaꞌ beenaꞌ chṉe dillꞌ daa kono chajnii, Chiozanꞌ chshaljleneꞌ, aga beṉꞌ yell-lionin. Ḻaꞌ Espíritu c̱he Chiozanꞌ choneꞌ ka choꞌe dillꞌ daa kono chajnii.
3 San beenaꞌ chyix̱jee daa cheꞌ Chiozaꞌ ḻeꞌ, choneꞌ ka gakchach beṉꞌ lao Chiozaꞌ, naꞌ chtipeꞌ lallꞌgakeꞌ naꞌ chiyonxenlallee ḻegakeꞌ.
4 Beenaꞌ chṉe dillꞌ daa kono chajnii, to ḻeꞌzenꞌ chaklenan, san beenaꞌ chyix̱jee daa cheꞌ Chiozaꞌneꞌ chakleneꞌ yogꞌ beṉꞌkaꞌ chdop chllag choeꞌlaꞌogakeꞌ Crístonaꞌ kwenc̱he gakchagakeꞌ lo xṉezeꞌnaꞌ.
5 Nadꞌ cheenidꞌ sheḻꞌkaꞌ yogꞌḻoḻ-le gak iṉele dillꞌkaꞌ daa kono chajnii, per wibachidꞌ sheḻꞌkaꞌ gak c̱hix̱jeꞌle daa iṉa Chiozaꞌ leꞌ. Ḻaꞌ dii zakꞌchi daa chyix̱jee beṉꞌ daa na Chiozaꞌ aga ka daa iṉieꞌ dillꞌ daa kono chajnii, ḻete shi yizajniileꞌ beṉꞌkaꞌ bin zeji dillꞌkaꞌ chṉieꞌ kwenc̱he gakchachgakeꞌ lao Chiozaꞌ.
6 Naꞌ leꞌ beṉꞌ bishꞌ naꞌ leꞌ beṉꞌ zanꞌ, shi nadꞌ yidwiaꞌ leꞌ naꞌ iṉiaꞌ dillꞌ daa kono chajnii, bi gaklenan leꞌ. Ḻete waklenan leꞌ shi wzajniidꞌ leꞌ to dii ba bliꞌ bsedi Chiozaꞌ nadꞌ, wa to dii chiyaḻꞌ iṉezile c̱heꞌ, wa c̱hix̱jeꞌidꞌ leꞌ bi iṉeꞌ nadꞌ, wa wliꞌ wsedidꞌ leꞌ choꞌa xtilleenaꞌ.
7 Kachakaꞌ bllejaꞌ wa no dii llia kwerd c̱heyin, kono shajnii bin chkwellgakeꞌ shi bi chllaa shiinkaꞌ.
8 Naꞌ katꞌ chak to wdiḻ, shi beenaꞌ chkwell clarínnaꞌ bi wkwelleꞌn kwasḻoḻ, aga no idop illag kwenc̱he shajgakeꞌ lo wdiḻaꞌ.
9 Naꞌ kaꞌkzan chak c̱hele, shi iṉele dillꞌ daa bi chajnii beṉꞌ, nakra goneꞌ shajniileꞌ bin nale. Naꞌ bibi zakii dillꞌkaꞌ chṉele shi ṉaa.
10 Ṉezicho zan kwen xtillꞌ beṉꞌ de yell-lioni naꞌ to togakan chajnii beṉꞌkaꞌ chṉegakeꞌn.
11 Naꞌ shi bi chajniidꞌ dillaa weꞌlen to beṉꞌ nadꞌ, nakꞌ ka beṉꞌ zitꞌ par ḻeꞌ, naꞌ ḻekzkaꞌ ḻeꞌ nakeꞌ ka beṉꞌ zitꞌ par nadꞌ.
12 Naꞌ daa ba chzelallꞌle goṉ Espíritu c̱he Chiozaꞌ daa gak gonle, ḻi gon ka dii le iṉable daa gaklenan bishꞌ ljwell-lekaꞌ chdop chllag choeꞌlaꞌogakeꞌ Crístonaꞌ kwenc̱he gakchachgakeꞌ laweꞌnaꞌ.
13 Daan, beenaꞌ chṉe dillꞌ daa kono chajnii, chiyaḻꞌ iṉabileꞌ Chiozaꞌ gakleneꞌneꞌ kwenc̱he gak yizajniileꞌ beṉꞌ bin zeji dillaa chṉieꞌ.
14 Ḻaꞌ shi chshaljlenꞌ Chiozaꞌ dillꞌ daa bi chajniidꞌ, yic̱hjlallꞌdawaani ṉezin chshaljlenꞌ Chiozaꞌ, per bi chajniidꞌ bin chepee.
15 ¿Beran chiyaḻꞌ gonꞌ, lla? Chiyaḻꞌ weꞌḻwillꞌ Chiozaꞌ kon dillꞌ daa na Espíritu c̱heꞌnaꞌ, naꞌ ḻekzkaꞌ weꞌḻwillee kon dillꞌ daa chajniidꞌ. Naꞌ ḻekzkaꞌ chiyaḻꞌ goḻꞌ kon dillꞌ daa na Espíritu c̱heꞌnaꞌ, naꞌ goḻꞌ kon dillꞌ daa chajniidꞌ.
16 Ḻaꞌ shi weꞌlaꞌole Chiozaꞌ kon dillꞌ daa kono chajnii, ḻaꞌkzi nakan c̱he Espíritu c̱he Chiozaꞌ, beṉꞌkaꞌ yengakileꞌ dillꞌkaꞌ chṉele aga gongakeꞌ leꞌ txen weꞌle yeḻꞌ chox̱ken Chiozaꞌ ḻaꞌ bi chajniꞌgakileꞌ bin nale.
17 Ḻaꞌkzi choeꞌle Chiozaꞌ yeḻꞌ chox̱ken do yic̱hj do lallꞌle, bi chaklenan beṉꞌ yoblə daa bi chajniꞌgakileꞌ bin nale.
18 Choꞌa Chiozaꞌ yeḻꞌ chox̱ken daa chṉechꞌ dillꞌ daa kono chajnii aga ka yogꞌtele.
19 Per katꞌ ndop nllagcho choeꞌlaꞌocho Chiozaꞌ txen, wenchlan iṉiaꞌ gayꞌzə dillꞌ daa chajniicho kwenc̱he wzajniidꞌ beṉꞌ yoblə, aga ka daa iṉiaꞌ ga shi mil dillꞌ daa kono chajnii.
20 Naꞌ leꞌ beṉꞌ bishꞌ naꞌ leꞌ beṉꞌ zanꞌ, bi gonzle pensar ka biꞌdoꞌ biṉꞌ shajnii, san ḻi gon pensar ka beṉꞌ golə, beṉꞌ ba chajnii. Per ka nak c̱he dii malaꞌ, ḻi gak ka to biꞌdoꞌ biṉꞌ shoꞌ yic̱hjin dii malaꞌ.
21 Choꞌa Xtillꞌ Chiozaꞌ nan: “Wc̱hinꞌ beṉꞌ zitꞌ, beṉꞌ chṉe dillꞌ yoblə, kwenc̱he wzajniidꞌ beṉꞌ Israelki, per ni kaꞌ bi wzenaggakeꞌ c̱haꞌ, na X̱ancho Chiozaꞌ.”
22 Daan, katꞌ chṉecho dillꞌ daa kono chajnii chonan kwenc̱he beṉꞌkaꞌ bi chonḻilallꞌgakeꞌ Chiozaꞌ gakbeꞌgakileꞌ zoaleneꞌ choꞌ per bibi chzajniin choꞌ ba nonḻilallꞌchoneꞌ. San daa c̱hix̱jeꞌcho daa na Chiozaꞌ choꞌ, chaklenan choꞌ ba nonḻilallꞌchoneꞌ per bi chaklenan beṉꞌkaꞌ bi chonḻilallꞌgakeꞌneꞌ.
23 Naꞌ katꞌkaꞌ ndop nllagle choeꞌlaꞌole Crístonaꞌ, shi yogꞌzle choeꞌle dillꞌ daa kono chajnii, naꞌ shoꞌ beṉꞌ bi chajniileꞌ bin chonle wa beṉꞌ biṉꞌ gonḻilallꞌ Crístonaꞌ, wak gakileꞌ bi nzaꞌn c̱helenanꞌ.
24 San shi yogꞌle chyix̱jeꞌle daa na Chiozaꞌ leꞌ, naꞌ shoꞌ to beṉꞌ biṉꞌ gonḻilallꞌ Crístonaꞌ wa to beṉꞌ bi chajnii bin chonle, naꞌ yiyakbeꞌileꞌ nakeꞌ beṉꞌ saaxya naꞌ yiyaj yilenileꞌ dii malkaꞌ choneꞌ ka yenileꞌ dillꞌkaꞌ chyix̱jeꞌle.
25 Naꞌch gonan ka wliꞌlawi daa yoo ḻoo yic̱hjlallꞌdoꞌenaꞌ, naꞌ wc̱hekꞌ xibeꞌ weꞌlawee Chiozaꞌ, naꞌ gakbeꞌileꞌ dii ḻicha Chiozaꞌ zoaleneꞌ leꞌ.
26 Naꞌ leꞌ beṉꞌ bishꞌ naꞌ leꞌ beṉꞌ zanꞌ, katꞌ chdop chllagle de latj kwenc̱he baḻ-le goḻ-le dii koon Chiozaꞌ balaaṉ, naꞌ zi baḻ-le wliꞌ wsedile, zi baḻ-le c̱hix̱jeꞌle daa na Chiozaꞌ leꞌ, naꞌ ziꞌ baḻ-le iṉele dillꞌ daa kono chajnii, naꞌ zi baḻ-le yizajniile dillaa kono chajnii. Yogꞌ diiki chiyaḻꞌ wc̱hinlen kwenc̱he gaklenan soac̱hec̱hle lo xṉez Chiozaꞌ.
27 Naꞌ katꞌ iṉele dillꞌ daa kono chajnii, c̱hopzle wa shoṉzle iṉelen, naꞌ yizoayile iṉele, naꞌ chiyaḻꞌ soa to beṉꞌ yizajniileꞌ bin wnale.
28 Naꞌ shi kono zoa beṉꞌ chak yizajniileꞌ bin iṉale, bi chiyaḻꞌ iṉelen ganaꞌ ndop nllagle choeꞌlaꞌole Crístonaꞌ, san wak iṉelenlen Chiozaꞌ de ḻoo yic̱hjlallꞌdoꞌlenaꞌzə.
29 Naꞌ ḻekzkaꞌ c̱hop shoṉzlen c̱hix̱jeꞌle daa na Chiozaꞌ leꞌ, naꞌ yizoayile iṉele. Naꞌ beṉꞌkaꞌ chzenag, chiyaḻꞌ wzenagyeṉꞌgakeꞌ shi dii ḻi nakan daa na Chiozaꞌ.
30 Shi shlak to beṉꞌ chyix̱jiꞌe dillaa daa cheꞌ Chiozaꞌneꞌ, naꞌ iṉe Chiozaꞌ sto beṉꞌ chiꞌe ladjlenaꞌ, chiyaḻꞌ kwez beenaꞌ chṉe kwenc̱he c̱hix̱jee beenaꞌ sto daa cheꞌ Chiozaꞌneꞌ.
31 To tole yizoayile c̱hix̱jeꞌle daa na Chiozaꞌ kwenc̱he yogꞌle shajniꞌchile diikaꞌ na Chiozaꞌ naꞌ wtipch lallꞌle.
32 Naꞌ beenaꞌ chyix̱jee daa cheꞌ Chiozaꞌneꞌ chiyaḻꞌ iṉabiaꞌ kwineꞌ kwenc̱he wiꞌe latj iṉe beṉꞌ yoblə, shi ṉaa.
33 Ḻaꞌ Chiozaꞌ cheenileꞌ gonle xochi yogꞌ daa chonle katꞌ choeꞌlaꞌoleneꞌ naꞌ bi gonle kon daa nazan c̱hele.
Ka yoolo beṉꞌkaꞌ choeꞌlaꞌo Crístonaꞌ yogꞌte ganaꞌ chdop chllaggakeꞌ,
34 noolkaꞌ chiyaḻꞌ soagakeꞌ llizə ganaꞌ chdop chllagle, ḻaꞌ bi de lsens iṉegakeꞌ. San chiyaḻꞌ wc̱hekꞌ yic̱hj wc̱hekꞌ laogakeꞌ lao beṉꞌkaꞌ chṉabiaꞌ ḻegakeꞌ, kon ka na ley daa bzej dii Moisézaꞌ.
35 Naꞌ shi de daa cheengakileꞌ iṉezgakileꞌ, chiyaḻꞌ iṉabgakileꞌ beṉꞌ c̱heꞌkaꞌ ḻoo yoo lillgakeꞌ, ḻaꞌ bi nakan wen iṉegakeꞌ katꞌ ndop nllagle.
36 Bi gakile zigaate ladjlenanꞌ golj wxe choꞌa xtillꞌ Chiozaꞌ, ni bi gakile leꞌchgan ba bleblen.
37 Shi nole chakile nakle beṉꞌ chyix̱jee daa na Chiozaꞌ, wa chakile Espíritu c̱he Chiozaꞌ chzajniileꞌ leꞌ, chiyaḻꞌ gakbeꞌile dga chzejꞌ leꞌ nakan dii chon X̱ancho Crístonaꞌ mandad.
38 Naꞌ shi no bi chzenag c̱heyi dga chzejꞌ leꞌ, ḻekzkaꞌ kono wzenag c̱heꞌ.