Wloogakeꞌ xṉezin witgakeꞌ Jesúzaꞌ
22
Ba zoa gaozə lṉi Paskwaꞌ katꞌ chaogakeꞌ yetxtil daa bi nc̱hix̱ levadúranaꞌ.
Lucas 22.1-71
2 Naꞌ bx̱ozkaꞌ chṉabiaꞌ len beṉꞌkaꞌ chliꞌ chsedi leyaꞌ chiyiljlallꞌgakeꞌ naklə gongakeꞌ witgakeꞌ Jesúzaꞌ ka kono gakbeꞌi, ḻaꞌ bllebgakeꞌ shi bi goni beṉꞌ wlall c̱heꞌkaꞌ ḻegakeꞌ.
3 Naꞌch x̱an dii x̱iwꞌkaꞌ daa le Satanás wyoon ḻoo yic̱hjlallꞌdoꞌ Jud Scariotaꞌ, beenaꞌ nak txen beṉꞌkaꞌ shlliṉ.
4 Naꞌ wyajeꞌ lao bx̱ozkaꞌ chṉabiaꞌ len lao beṉꞌkaꞌ ngoo lallꞌ naꞌ beṉꞌkaꞌ chap yoodoꞌnaꞌ, naꞌ biꞌe dillꞌ nakan goneꞌ Jesúzaꞌ lallꞌ naꞌgakeꞌ.
5 Naꞌ ḻe bibagakileꞌ naꞌ bc̱hebgakeꞌ weꞌgakeꞌneꞌ mech.
6 Naꞌch bc̱hebeꞌ goneꞌneꞌ lallꞌ naꞌgakeꞌ. Naꞌ wzolo chinoeꞌ batan gatꞌ latj katꞌ kono beṉꞌ lleꞌ goneꞌ Jesúzaꞌ lallꞌ naꞌgakeꞌ.
Lleꞌnaꞌ zeelo wdaolengakeꞌ Jesúzaꞌ
7 Naꞌ bllin llanaꞌ chsiniꞌagakeꞌ c̱he lṉinaꞌ, llanaꞌ chzolo chaogakeꞌ yetxtil daa biꞌ nc̱hix̱ levadúranaꞌ naꞌ chitgakeꞌ to xilꞌdoꞌ, banaꞌ gaogakeꞌ lleꞌ Paskwaꞌ.
8 Naꞌch wlej Jesúzaꞌ Pédronaꞌ len Juannaꞌ naꞌ chiꞌe ḻegakeꞌ:
―Ḻi lljasiniꞌa daa gaocho lṉi Paskwi.
9 Naꞌch cheꞌgakeꞌneꞌ:
―¿Garan cheeniloꞌ lljasiniꞌantoꞌn?
10 Naꞌ cheꞌ Jesúzaꞌ ḻegakeꞌ:
―Ka shoꞌle Jerusalénnaꞌ, naꞌ ileꞌile to beṉꞌ byo zinoꞌe to chee nis, naꞌ ḻi lljanoeꞌ ax̱t yoonaꞌ ganaꞌ yillineꞌ.
11 Naꞌ yeꞌle x̱an yoonaꞌ: “Maestronaꞌ chṉabileꞌ liꞌ: ¿Garan zoa yoonaꞌ wyooneꞌ ganaꞌ gaoleneꞌ beṉꞌkaꞌ nakgakeꞌneꞌ txen lleꞌ Paskwi?”
12 Naꞌ wliileꞌ leꞌ to yoo xen dii llia shkwianaꞌ chaꞌlə ga ba nonshaoꞌtieꞌ. Nanꞌ wsiniꞌale daa gaocho xsheꞌnaꞌ.
13 Naꞌ wloogakeꞌ nez zejgakeꞌ, naꞌ kon kayeṉꞌ golleꞌ ḻegakeꞌ gok. Naꞌ bsiniꞌagakeꞌ daa wdaogakeꞌ lleꞌ lṉi Paskwaꞌ.
14 Naꞌ ka goḻꞌ gaogakeꞌ xsheꞌnaꞌ, Jesúzaꞌ wcheꞌleneꞌ postl c̱heꞌkaꞌ choꞌa mesaꞌ.
15 Naꞌch chiꞌe ḻegakeꞌ:
―Ba goklallꞌchgaꞌ yeej gaolenꞌ leꞌ lṉi Paskwi ṉaa biṉꞌ witgakeꞌ nadꞌ.
16 Naꞌ ba niaꞌ leꞌ, zeelo ṉaa cheej chawꞌ dga. Bichga yeej gawaꞌn ax̱t ki illin llanaꞌ wliꞌ Chiozaꞌ yeḻꞌ wṉabiaꞌ xen c̱heꞌnaꞌ, kanaꞌch yeej gawaꞌn dii yoblə.
17 Naꞌ bex̱ee kopaꞌ naꞌ biꞌe Chiozaꞌ yeḻꞌ chox̱ken, naꞌ chiꞌe:
―Ḻi gox̱ꞌ dga, ḻi yeejan latꞌ wej.
18 Naꞌ niaꞌ leꞌ, bichga yeejꞌ nis uvani ax̱t ki illin lla wliꞌ Chiozaꞌ yeḻꞌ wṉabiaꞌ xen c̱heꞌnaꞌ.
19 Naꞌch bex̱ee yetxtilaꞌ naꞌ biꞌe yeḻꞌ chox̱ken Chiozaꞌ. Naꞌ bxoxjeꞌn biꞌen ḻegakeꞌ kwenc̱he wdaogakeꞌn, naꞌ chiꞌe:
―Dgan kwerp c̱haꞌni, chzanlallidaan ni c̱hele. Kin gonle kwenc̱he lljadinile nadꞌ.
20 Naꞌ ḻekzkaꞌ beneꞌ ka wde wdaogakeꞌ xsheꞌnaꞌ, bex̱ee kopaꞌ sto shii, naꞌch chiꞌe:
―Dga yoll ḻoo kopi zejin xc̱henꞌnaꞌ daa ḻaljə ni c̱hele daa gonan ka gakḻi dii kobaꞌ bc̱heb Chiozaꞌ goneꞌ.
21 ’Naꞌ ṉaa, beenaꞌ goneꞌ nadꞌ lo naꞌ beṉꞌkaꞌ chakziꞌgakileꞌ nadꞌ chiꞌleneꞌ nadꞌ choꞌa mesi.
22 Ḻaꞌ ba bllin lla gak ka nak daa llia biaꞌ gak c̱haꞌ, nadꞌ, Beṉꞌ Bseḻꞌ Chiozaꞌ Yell-lioni, per ¡nyeshꞌlaz gak c̱he beenaꞌ goneꞌ nadꞌ lo naꞌ beṉꞌ malkaꞌ!
23 Naꞌch beṉꞌkaꞌ nakgakeꞌneꞌ txen wzologakeꞌ chṉabi ljwellgakeꞌ noenꞌ goneꞌneꞌ lo naꞌ beṉꞌkaꞌ.
Gokgued beṉꞌkaꞌ nak Jesúzaꞌ txen nogakenꞌ zakꞌchi
―Zoa beṉꞌ wṉabiaꞌ to to nación, naꞌ chongakeꞌ byen chzenag beṉꞌ c̱hegakeꞌ, naꞌ nagakeꞌ c̱he kwingakeꞌ ḻe chaklengakeꞌ beṉꞌ.
26 San leꞌ, bi chiyaḻꞌ gonle kaꞌ. Shi nole nakle beṉꞌ zakii, chiyaḻꞌ wc̱hekꞌ yic̱hjle ka to biꞌ xkwidꞌ, naꞌ shi nole chṉabiaꞌ, chiyaḻꞌ gonle ka nottezə beṉꞌ wen mandad.
27 ¿Noran nak beṉꞌ zakꞌchi?, ¿abeenaꞌ chbeꞌ choꞌa mesaꞌ chaweꞌ?, ¿anti beenaꞌ chon mandadanꞌ, lla? Beenaꞌ chiꞌ choꞌa mesanꞌ nakeꞌ beṉꞌ zakꞌchi. San nadꞌ, ḻaꞌkzi naktiaꞌ x̱anle, zoaꞌ ladjleni ka to beṉꞌ wen mandad c̱hele.
28 ’Leꞌ ba wzoalenle nadꞌ lao yogꞌte daa ba gok c̱haꞌ.
29 Naꞌ daan, goṉꞌ leꞌ yeḻꞌ wṉabiaꞌnaꞌ ka daa beṉ X̱aꞌnaꞌ nadꞌ.
30 Naꞌ yeej gaolenle nadꞌ ganaꞌ iṉabiꞌa. Naꞌ kweꞌle ganaꞌ iṉabiaꞌle yiziꞌle kwent c̱he shlliṉ kwen beṉꞌkaꞌ nak xiiṉ dia c̱he dii Israelaꞌ.
Jesúzaꞌ wneꞌ bi wc̱heb Pédronaꞌ shi nombiꞌeneꞌ
31 Naꞌ ḻekzkaꞌ golleꞌ Simón Pédronaꞌ:
―Simón, Simón, Satanázaꞌ, daa chṉabiaꞌ dii x̱iwꞌkaꞌ, ba wṉaban leꞌ gakle lo naꞌyin kwenc̱he gondinj gonganin leꞌ.
32 Naꞌ nadꞌ ba wṉabidꞌ Chiozaꞌ gakleneꞌ liꞌ, Simón, kwenc̱he gonḻilallꞌcho nadꞌ. Naꞌ katꞌ ba biyajiloꞌ c̱heyi daa gonoꞌ, naꞌ gaklenoꞌ beṉꞌki nakoꞌ txen kwenc̱he soac̱hec̱hgakeꞌ gonḻilallꞌgakeꞌ nadꞌ.
33 Naꞌ cheꞌ Simónnaꞌ:
―X̱anꞌ, ba nc̱hoglallaa ḻaa lillyanaꞌ saꞌlenꞌ liꞌ wa ax̱t guetlenꞌ liꞌ txen.
34 Naꞌ cheꞌ Jesúzaꞌ:
―Pedro, niaꞌ liꞌ, ṉaanlleꞌ shoṉ shii bi wc̱heboꞌ shi nombiꞌo nadꞌ ka ziꞌ kwell shikwtezaꞌ.
Ba zoa gaoz wtiḻ Jesúzaꞌ daa gak c̱heꞌ
35 Naꞌch cheꞌ Jesúzaꞌ ḻegakeꞌ:
―¿Azyalljile bi byalljile kanaꞌ bseḻaa leꞌ naꞌ bibi bex̱ꞌle, ni ga koo xalaanle, ni mech naꞌ ni xel-le?
Naꞌ cheꞌgakeꞌ:
―Bibi byalljintoꞌ.
36 Naꞌch golleꞌ:
―Per ṉaach niaꞌ leꞌ, shi de ga chgoo xalaanle, ḻi gox̱aan, naꞌ shi de xmechle, ḻi waꞌn; naꞌ shi nole bi de spad c̱hele, ḻi lljayetꞌ xalenaꞌ naꞌ ḻi siꞌ tlishaꞌn.
37 Niaꞌ leꞌ, chonan byen gak c̱haꞌ kon ka na Choꞌa Xtillꞌ Chiozaꞌ ganaꞌ na: “Gongakileꞌneꞌ ka chongakileꞌ to beṉꞌ wen dii mal.”
38 Naꞌ cheꞌgakeꞌ:
―X̱anꞌ, ni napntoꞌ c̱hop spad.
Naꞌ chiꞌe:
―Lliz ḻi soachoklə.
Beꞌḻwill Jesúzaꞌ Chiozaꞌ ganaꞌ le Getsemaní
39 Naꞌch bizaꞌ Jesúzaꞌ, naꞌ kon ka yooloeꞌ choneꞌ biyajeꞌ lo Yaa Olívozaꞌ, naꞌ zjano beṉꞌkaꞌ nakgakeꞌneꞌ txen.
40 Naꞌ ka bllingakeꞌ latjaꞌ, naꞌ chiꞌe ḻegakeꞌ:
―Ḻi weꞌḻwill Chiozaꞌ kwenc̱he bi weꞌzle latj gon beli chennaꞌ leꞌ gan.
41 Naꞌ bkwaseꞌ kwiteꞌkaꞌ, ka to ga zeelo chllin to yaj dii chzaḻꞌcho, naꞌch bc̱hekꞌ xibeꞌnaꞌ beꞌḻwilleꞌ Chiozaꞌ.
42 Naꞌ golleꞌ:
―X̱a, shi liꞌ cheeniloꞌ, bislagach nadꞌ lawi dga ba zoa idiḻ illagꞌ; per aga gak ka cheenidꞌ, san gak ka cheeniloꞌ.
43 Naꞌch bliꞌlao to anjl beṉꞌ zaꞌ yabanaꞌ ḻeꞌ, naꞌ biyoꞌeneꞌ fuerz.
44 Naꞌ daa ḻe chakyeshꞌchgaileꞌ, zizikli beꞌḻwillcheꞌ Chiozaꞌ ax̱t biyakloljeꞌ. Naꞌ nis yes c̱heꞌnaꞌ daa chxop lo yonaꞌ nakan ka to bllon wej chen.
45 Biyoll beꞌḻwilleꞌ Chiozaꞌ, naꞌ bizollee biyajeꞌ ganaꞌ lleꞌ beṉꞌkaꞌ nakgakeꞌneꞌ txen, naꞌ ka billineꞌ kwiteꞌkaꞌ ba chesgakeꞌ daa chakyeshꞌgakileꞌ.
46 Naꞌ chiꞌe ḻegakeꞌ:
―¿Berac̱he cheszle? Ḻi c̱has naꞌ ḻi weꞌḻwill Chiozaꞌ kwenc̱he bi weꞌzle latj gon beli chennaꞌ leꞌ gan.
Bex̱ꞌgakeꞌ Jesúzaꞌ
47 Ni choeꞌte Jesúzaꞌ dillꞌ, ka bllin beṉꞌ zan, naꞌ beenaꞌ le Jud, beenaꞌ nak txen beṉꞌkaꞌ shlliṉ, nc̱hiꞌe ḻegakeꞌ. Naꞌ ka bllineꞌ jabiguee kwit Jesúzaꞌ naꞌ bnopeꞌ x̱agueenaꞌ.
48 Naꞌch cheꞌ Jesúzaꞌneꞌ:
―Jud, ¿akon dga bnopoꞌ nadꞌ chonoꞌ nadꞌ, Beṉꞌ Bseḻꞌ Chiozaꞌ Yell-lioni, lo naꞌ beṉꞌki?
49 Naꞌ beṉꞌkaꞌ lleꞌlen Jesúzaꞌ, ka bleꞌgakileꞌ ka ba chak c̱heꞌ, naꞌch gollgakeꞌneꞌ:
―X̱anꞌ, ¿awṉiayintoꞌ spadki?
50 Naꞌ toeꞌ lii wdintieꞌn to mos c̱he bx̱oz choo bx̱oz xennaꞌ bc̱hogtieꞌ nagueꞌ de shḻinaꞌ.
51 Naꞌ cheꞌ Jesúzaꞌ:
―Bich bi gonile beṉꞌkaꞌ.
Naꞌch bidaꞌ Jesúzaꞌ nag beenaꞌ.
52 Naꞌ daa bllin bx̱ozkaꞌ chṉabiaꞌ len beṉꞌkaꞌ chap yoodoꞌnaꞌ, naꞌ beṉꞌ golkaꞌ chṉabiaꞌ, kwenc̱he gox̱ꞌgakeꞌneꞌ, chiꞌe ḻegakeꞌ:
―¿Berac̱he zaꞌzle nox̱ꞌle yag naꞌ spad kwenc̱he zidṉizle nadꞌ ka to no beṉꞌ wban?
53 Yogꞌ lla wzoaꞌ ladjlenaꞌ yoodoꞌnaꞌ naꞌ bi bex̱ꞌle nadꞌ. Per ṉaach bllin lla gonle ka cheenile naꞌ ṉaayeṉꞌ chṉabiaꞌ dii malaꞌ daa chṉabiaꞌ ganaꞌ shgasj shc̱hoḻ.
Bi bc̱heb Pédronaꞌ shi nombiꞌe Jesúzaꞌ
54 Naꞌch bṉizgakeꞌ Jesúzaꞌ naꞌ bc̱heꞌgakeꞌneꞌ lill bx̱oz choo bx̱oz xennaꞌ, naꞌ zitꞌ zitꞌlə zjano Pédronaꞌneꞌ.
55 Naꞌ bxengakeꞌ yiꞌnaꞌ leshꞌ chyoo c̱he bx̱oz choo bx̱oz xennaꞌ naꞌ wcheꞌgakeꞌ choꞌa yiꞌnaꞌ, naꞌ wlen Pédronaꞌ ḻegakeꞌ.
56 Naꞌ to noolə wen mandad, ka bleꞌileꞌ chiꞌ Pédronaꞌ choꞌa yiꞌnaꞌ, lii wzetieꞌ chwieꞌneꞌ, naꞌ chiꞌe:
―Ḻekzkaꞌ len beenin nakeꞌ Jesúzaꞌ txen.
57 Naꞌ Pédronaꞌ aga bc̱hebeꞌ, naꞌ chiꞌeneꞌ:
―Noolə, aga nombiꞌa beenaꞌ.
58 Naꞌ gokzə xtit bizleꞌi beṉꞌ yoblə Pédronaꞌ naꞌ chiziꞌeneꞌ:
―Ḻekzkaꞌ lenonꞌ nakoꞌ beṉꞌkaꞌ txen.
Naꞌ Pédronaꞌ chiꞌeneꞌ:
―Bi lenꞌ nakꞌ beṉꞌkaꞌ txen.
59 Naꞌ wizak ka do ziꞌ tgor naꞌ wizeꞌ sto beṉꞌ yoblə:
―Dii ḻikzan len beeni nakeꞌ txen Jesúzaꞌ ḻaꞌ ḻekzkaꞌ beṉꞌ Galilean.
60 Naꞌch cheꞌ Pédronaꞌneꞌ:
―¡Ni bi ṉezidꞌ bi dillaan choo!
Naꞌ ni cheꞌtelə Pédronaꞌ kaꞌ, ka wchell to shikwtez.
61 Naꞌch biyec̱hj X̱ancho Jesúzaꞌ bwieꞌ Pédronaꞌ, naꞌ Pédronaꞌ jadinileꞌ daa golleꞌneꞌ, kanaꞌ chiꞌe: “Ṉaanlleꞌ shoṉ shii bi wc̱heboꞌ shi nombiꞌo nadꞌ ka ziꞌ kwell shikwtezaꞌ.”
62 Naꞌ bichej Pédronaꞌ ganaꞌ lleꞌ beṉꞌkaꞌ naꞌ wchellyeshee.
Btitjgakileꞌ Jesúzaꞌ
63 Naꞌch beṉꞌkaꞌ chapgakeꞌ Jesúzaꞌ btitjgakileꞌneꞌ naꞌ wdapꞌ wlallꞌgakeꞌneꞌ.
64 Naꞌ bsejgakeꞌ jalaweꞌnaꞌ, naꞌch wlallꞌgakeꞌneꞌ, cheꞌgakeꞌneꞌ:
―¡Wnashki non wlallꞌ liꞌ!
65 Naꞌ biya dii gollgakeꞌneꞌ kwenc̱he gakileꞌ ziꞌ.
Wde Jesúzaꞌ lao beṉꞌkaꞌ chṉabiaꞌgakeꞌ beṉꞌ Israelkaꞌ
66 Naꞌ ka wyeeniꞌ, bidop beṉꞌkaꞌ chṉabiaꞌ beṉꞌ Israelkaꞌ, len bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ. Naꞌ bdegakeꞌ Jesúzaꞌ laweꞌkaꞌ. Naꞌch wṉabgakileꞌneꞌ, cheꞌgakeꞌ:
67 ―Wnashki netoꞌ shi liꞌkzan Crístonaꞌ, beenaꞌ chbezntoꞌ.
Naꞌ cheꞌ Jesúzaꞌ:
―Shi iṉiaꞌ leꞌ: “Awe, nadaan”, aga wyajḻeꞌle c̱haꞌ.
68 Naꞌ shi iṉabidꞌ leꞌ bi dii iṉabidꞌ leꞌ, aga williilen naꞌ ni bi yisanle nadꞌ, shi ṉaa.
69 Naꞌ ṉaate, nadꞌ, Beṉꞌ Bseḻꞌ Chiozaꞌ Yell-lioni, kwiꞌa kwit de shḻi c̱he Chiozaꞌ, beenaꞌ nap yeḻꞌ wak xennaꞌ.
70 Naꞌch yogꞌzeꞌ wṉabgakileꞌneꞌ:
―¿Anaꞌ linꞌ nakoꞌ Xiiṉ Chiozaꞌ?
Naꞌch cheꞌ Jesúzaꞌ:
―Awe, shḻikzan ba wnale.
71 Naꞌch cheꞌ ljwellgakeꞌ:
―Kochno chyalljicho gaweꞌ xya c̱he beeni. Kwintekzcho ba benicho ka ba wneꞌ.