Jempl c̱he to wishagnaꞌ
22
Naꞌ Jesúzaꞌ bseesileꞌ ḻegakeꞌ sto jempl, chiꞌe:
2 ―Yeḻꞌ wṉabiaꞌ c̱he Chiozaꞌ chzaklebin to beṉꞌ wṉabiaꞌ, beṉꞌ beneꞌ to lṉi c̱he xiiṉeꞌnaꞌ ka bshagnaꞌbꞌ.
3 Naꞌ bseḻee wen llin c̱heꞌkaꞌ lljaṉegakeꞌ beṉꞌkaꞌ ba byeꞌ, per beṉꞌkaꞌ byeꞌ bi goongakileꞌ shajgakeꞌ.
4 Naꞌch bizseḻee zi shkwen wen llin c̱heꞌkaꞌ chiꞌe ḻegakeꞌ: “Ḻi lljell beṉꞌkaꞌ ba byaꞌ yid lṉi c̱he biꞌ c̱haꞌnaꞌ ba de daa gaocho. Ba betgakeꞌ gooṉ c̱haꞌkaꞌ naꞌ nochlə bakaꞌ ḻe nak, naꞌ ba de yeḻꞌ wawaꞌ. Ḻi lljellgakeꞌ yidgakeꞌ kwenc̱he yeej gaocho.”
5 Per beṉꞌkaꞌ ba byeꞌ bi bengakeꞌ kwent daa goll wen llinkaꞌ. Toeꞌ wyaj jawiaꞌ yell-lio c̱heꞌnaꞌ naꞌ stoeꞌ wzee zejeꞌ delgens c̱heꞌnaꞌ.
6 Naꞌ beṉꞌkaꞌ sto bex̱ꞌgakeꞌ wen llinkaꞌ naꞌ biya dii bengakileꞌ ḻegakeꞌ ax̱t ka witgakeꞌ.
7 Naꞌ ḻe bllaachga beṉꞌ wṉabiaꞌnaꞌ, naꞌch bseḻee soldad c̱heꞌkaꞌ kwenc̱he jetgakeꞌ ḻegakeꞌ naꞌ bzeygakeꞌ yell c̱heꞌkaꞌ.
8 Naꞌch chiꞌe wen llin c̱heꞌkaꞌ sto: “Ba gok daa yeej gaocho, naꞌ wentelan bi wlen beṉꞌkaꞌ byaꞌ.
9 Naꞌ ḻi shaj lyell naꞌ ḻi wc̱heꞌ kon no beṉꞌ yillagle tnezaꞌ kwenc̱he yidgakeꞌ yeej gaogakeꞌ.”
10 Naꞌch wzaꞌ wen llinkaꞌ zejgakeꞌ, naꞌ jx̱iꞌgakeꞌ kon no beṉꞌ billaggakeꞌ, ka beṉꞌ wen ka beṉꞌ mal. Naꞌ billaꞌcha lill beṉꞌ wṉabiaꞌnaꞌ.
11 ’Naꞌ ka wyoo beṉꞌ wṉabiaꞌnaꞌ chwieꞌ beṉꞌkaꞌ ba ndop nllag, naꞌ ladj beṉꞌkaꞌ len to beṉꞌ bi nakw xeꞌnaꞌ daa chiyaḻꞌ gakweꞌ ganaꞌ chak wishagnaꞌnaꞌ.
12 Naꞌ goll beṉꞌ wṉabiaꞌnaꞌneꞌ: “Bishꞌdawaa, ¿nakra gok wyoozoꞌ naꞌ bi nakw xoꞌnaꞌ daa chiyaḻꞌ gakoꞌ kwenc̱he ḻenoꞌ gani chak wishagnaꞌni?” Naꞌ beenaꞌ bikzə bi billel-lallee yeeneꞌ.
13 Naꞌch cheꞌ beṉꞌ wṉabiaꞌnaꞌ beṉꞌkaꞌ chde yeḻꞌ wawaꞌ: “Ḻi wc̱hej ṉiꞌa naꞌ beeni naꞌ ḻi yibejeꞌ naꞌ ḻi wzaḻee ganaꞌ shgasj shc̱hoḻ, ganaꞌ kwellyeshee naꞌ gaox̱ax̱j ḻeyeꞌnaꞌ daa ḻe gakshejlallee.”
14 Ḻaꞌ beṉꞌ zan nak beṉꞌkaꞌ chax chṉab Chiozaꞌ, per baḻchgagakeꞌ kwejeꞌ gakgakeꞌ lallꞌ nee.
Wṉabgakileꞌ Jesúzaꞌ shi chiyaḻꞌ c̱hixjgakeꞌ daa chṉab beṉꞌ wṉabiaꞌnaꞌ
15 Naꞌ bizaꞌ fariseokaꞌ, naꞌ wloogakeꞌ xṉezi naklə gongakeꞌ kwenc̱he weꞌ Jesúzaꞌ dillꞌ dii wchix̱aꞌn ḻeꞌ.
16 Naꞌch bseḻꞌgakeꞌ baḻ beṉꞌkaꞌ nakgakeꞌneꞌ txen naꞌ zi baḻ beṉꞌkaꞌ nak Heródezaꞌ txen kwenc̱he wyajgakeꞌ lao Jesúzaꞌ naꞌ jellgakeꞌneꞌ:
―Maestro, ṉezintoꞌ nakoꞌ beṉꞌ ḻi beṉꞌ shaoꞌ naꞌ chliꞌ chsediloꞌ beṉꞌ c̱he nez ḻi c̱he Chiozaꞌ kon ka nakan, naꞌ bi chshoo choꞌa xtilloonaꞌ lao nottezə beṉꞌ, ḻaꞌ bi chwioꞌ no nakgakeꞌ.
17 Daan cheenintoꞌ iṉagachoꞌ netoꞌ nak ka chakiloꞌ: ¿Achiyaḻꞌ c̱hixjcho daa chṉab beṉꞌ wṉabiaꞌ Césaraꞌ, anti bi chiyaḻꞌ c̱hixjchon?
18 Naꞌ gokbeꞌi Jesúzaꞌ aga do lallꞌgakenꞌ gollgakeꞌneꞌ kaꞌ, naꞌch chiꞌe ḻegakeꞌ:
―Leꞌ beṉꞌ wxiyeꞌ, aga dii leilen nale kaꞌ.
19 Ḻi wliꞌshki nadꞌ to mech daa chyixjile beṉꞌ wṉabiaꞌnaꞌ.
―¿Nora choꞌalawin naꞌ no leyin daꞌ ḻee mechi?
21 Naꞌch cheꞌgakeꞌneꞌ:
―C̱he beṉꞌ wṉabiaꞌ, Césaranꞌ.
Naꞌ cheꞌ Jesúzaꞌ ḻegakeꞌ:
―Naꞌlen, ḻi weꞌ Césaraꞌ daa naki c̱heꞌ, naꞌ ḻekzkaꞌ ḻi weꞌ Chiozaꞌ daa naki c̱heꞌ.
22 Naꞌch bibangakileꞌ daa goll Jesúzaꞌ kaꞌ. Naꞌ bizaꞌgakeꞌ kwiteꞌnaꞌ ziyajgakeꞌ.
Saduceokaꞌ wṉabgakeꞌ nak gak katꞌ yiban beṉꞌ wetkaꞌ
23 Naꞌ lo llanaꞌkzə saduceokaꞌ, beṉꞌkaꞌ bi chajḻeꞌgakeꞌ yiban beṉꞌ wetkaꞌ, wyajgakeꞌ lao Jesúzaꞌ, naꞌ wṉabgakileꞌneꞌ:
24 ―Maestro, dii Moisézaꞌ wneꞌ shi to beṉꞌ byo gueteꞌ naꞌ kono xiiṉeꞌ wzoa, beṉꞌ bisheenaꞌ chiyaḻꞌ yikee xool dii beṉꞌ bisheenaꞌ kwenc̱he soa xiiṉ dia c̱he dii beṉꞌ wetaꞌ.
25 Naꞌ ki gok c̱he gall bishꞌ beṉꞌ nakgakeꞌ netoꞌ txen. Beṉꞌ nechaꞌ bshagnee, naꞌ witeꞌ naꞌ kono xiiṉeꞌ wzoa, naꞌ beṉꞌ bishee, beṉꞌ wchopinaꞌ, bikee xooleꞌnaꞌ.
26 Naꞌ ḻekzkaꞌ wit beṉꞌ wchopinaꞌ naꞌ kono xiiṉeꞌ wzoa. Naꞌ kaꞌkzə wit beṉꞌ wyoṉinaꞌ naꞌ ax̱t biyate beṉꞌkaꞌ gall wit. Naꞌ ni togakeꞌ bi wzoa xiiṉgakeꞌ.
27 Naꞌ ka wde wit yogꞌḻoḻeꞌ naꞌch ḻekzkaꞌ wit noolaꞌ.
28 Naꞌ katꞌ yiban beṉꞌ wetkaꞌ, ṉaa, ¿nora beṉꞌkaꞌ gall bishꞌ gaki xooleꞌ noolaꞌ? ḻaꞌ yogꞌḻoḻenꞌ wkaagakeꞌneꞌ.
29 Naꞌch cheꞌ Jesúzaꞌ ḻegakeꞌ:
―Nakllejzilen daa bi ṉezile ka na Choꞌa Xtillꞌ Chiozaꞌ, naꞌ ka nak yeḻꞌ wak c̱heꞌnaꞌ.
30 Ḻaꞌ katꞌ yiban beṉꞌ wetkaꞌ, koch no yikaa ljwellin, ni koch no witꞌ wde xiiṉin, san yiyakgakeꞌ ka anjlkaꞌ lleꞌ yabanaꞌ.
31 Naꞌ ka nak daa yiban beṉꞌ wetkaꞌ, ṉaa, ¿abiṉꞌ wlable daa wna kwin Chiozaꞌ, ganaꞌ nan:
32 “Nad nakꞌ Chios c̱he Abrahamaꞌ, Isaacaꞌ naꞌ Jacobaꞌ”? Naꞌ bi nakeꞌ Chios c̱he beṉꞌ wet, san nakeꞌ Chios c̱he beṉꞌ ban, ḻaꞌ lao Chiozaꞌ mban beṉꞌki.
33 Naꞌ ka beni beṉꞌkaꞌ lleꞌ naꞌ daa wna Jesúzaꞌ, ḻe bibangakileꞌ ka chliꞌ chsedileꞌ.
Daa llialote daa bllia Chiozaꞌ biaꞌ goncho
34 Ka wṉezi fariseokaꞌ ba wleklli Jesúzaꞌ saduceokaꞌ, naꞌch wyajgakeꞌ kwiteꞌnaꞌ.
35 Naꞌ to beenaꞌ chliꞌ chsedi leyaꞌ wṉabileꞌ Jesúzaꞌ kwenc̱hezə wchix̱eeneꞌ, chiꞌe:
36 ―Maestro, ¿beran llialote nllia leyaꞌ biaꞌ goncho?
37 Naꞌ Jesúzaꞌ golleꞌneꞌ:
―“Chiyaḻꞌ gakiloꞌ X̱ancho Chiozaꞌ do yic̱hj do lalloo naꞌ ax̱t ga zeelo chajniiloꞌ.”
38 Dgan ḻiizelozi chonte naꞌ llialon lawi yogꞌ diikaꞌ nllia leyaꞌ biaꞌ.
39 Naꞌ de wchopinaꞌ nakan katekzə dii nechaꞌ, naꞌ nan: “Chiyaḻꞌ gakiloꞌ bishꞌ ljwelloꞌkaꞌ ka chaki kwinoꞌ.”
40 Naꞌ diiki c̱hop chejin doxen ka na leyaꞌ len diikaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ.
Crístonaꞌ nakeꞌ xiiṉ dia c̱he dii Davinaꞌ
―¿Nak ka chakile c̱he Crístonaꞌ, beenaꞌ iṉabiaꞌ? ¿No xiiṉ dia c̱heyin nakeꞌ?
Naꞌ cheꞌgakeꞌneꞌ:
―Xiiṉ dia c̱he dii Davinanꞌ.
43 Naꞌ cheꞌ Jesúzaꞌ ḻegakeꞌ:
―Naꞌ ¿berac̱he ben Espíritu Sántonaꞌ ka goll dii Davinaꞌneꞌ: “X̱anꞌ”? Ḻaꞌ kin na daa bzejeꞌ:
44 X̱ancho Chiozaꞌ golleꞌ X̱anꞌnaꞌ:
“Wcheꞌ kwitꞌ de shḻini,
shlak wzoaꞌ xṉiꞌonaꞌ beṉꞌkaꞌ chakzbani liꞌ.”
45 Naꞌ shi kwin dii Davinaꞌ golleꞌ Crístonaꞌ: “X̱anꞌ”, ¿berac̱he nazle nakeꞌ xiiṉ dia c̱heꞌ, shkaꞌ?
46 Naꞌ ni toeꞌ bi gok yilliigakeꞌ xtilleenaꞌ. Naꞌ zeelo kanaꞌ koch no biyaxji bi iṉabgakileꞌneꞌ.