Gotꞌ to wishagnaꞌ yellaꞌ le Caná
2
Naꞌ biyoṉ lla gotꞌ to wishagnaꞌ yellaꞌ le Caná daa llia ganaꞌ mbani Galileanaꞌ, naꞌ naꞌ len xṉaꞌ Jesúzaꞌ.
2 Naꞌ ḻekzkaꞌ goxgakeꞌ Jesúzaꞌ naꞌ beṉꞌkaꞌ nakgakeꞌneꞌ txen.
3 Naꞌ shlak chak lṉinaꞌ bibill vino c̱heꞌkaꞌ, naꞌ goll xṉaꞌ Jesúzaꞌneꞌ:
―Ba bibill vino c̱he beṉꞌki.
4 Naꞌch cheꞌ Jesúzaꞌneꞌ:
―¿Berac̱he nazoꞌ nadꞌ kaꞌ? Biṉꞌ gaḻꞌ gonꞌ daa llia biaꞌ gonꞌ.
El milagro en Caná (Juan 2.1-12)
5 Per xṉeenaꞌ golleꞌ wen mandadkaꞌ:
―Ḻi gon kon bin iṉeꞌ leꞌ.
6 Naꞌ naꞌ zoa x̱op yesꞌ xen de yaj, dii choll nis, diikaꞌ chon llin katꞌ beṉꞌ Israelkaꞌ chixi chiyechgakeꞌ kon ka na ley c̱heꞌkaꞌ. Naꞌ to to yesꞌkaꞌ chollan ka do shoṉ yid nis.
7 Naꞌ cheꞌ Jesúzaꞌ wen mandadkaꞌ:
―Ḻi kaa nisaꞌ ḻoo yesꞌki.
―Ḻi gashꞌ lataan ṉaa naꞌ ḻi lljeen beenaꞌ ngoo lo neen.
Naꞌ bengakeꞌ ka golleꞌ.
9 Naꞌ beenaꞌ ngoo lo neen bnix̱eꞌ nisaꞌ daa biyak vino, ni bi ṉezileꞌ ga wzaꞌn. Tochga wen mandadkaꞌ ṉezgakileꞌ, ḻaꞌ ḻegakenꞌ wdaagakeꞌ nisaꞌ. Naꞌch beenaꞌ ngoo lo neen goxeꞌ biꞌnaꞌ chshagnaꞌ,
10 chiꞌebꞌ:
―Yogꞌ beṉꞌ zigaate chdieꞌ vino wennaꞌ, naꞌ katꞌ ba weej beṉꞌkaꞌ len lṉinaꞌ dii zil, naꞌch chdieꞌ daa bi naktek wen. San liꞌ, ba bzagoo vino wenni naꞌ ax̱t ṉaach chdioꞌn.
11 Yeḻꞌ waki dga ben Jesúzaꞌ yell Canánaꞌ daa llia ganaꞌ mbani Galileanaꞌ, ḻennanꞌ beneꞌ dii nech. Naꞌ kaꞌ bliꞌe yeḻꞌ wak c̱heꞌnaꞌ napeꞌ, naꞌch beṉꞌkaꞌ nongakeꞌ ḻeꞌ txen benḻilallꞌgakeꞌneꞌ.
12 Naꞌ ka wde, biyajeꞌ Capernaúmaꞌ len xṉeenaꞌ, len beṉꞌ bisheekaꞌ naꞌ len beṉꞌkaꞌ nakgakeꞌneꞌ txen, naꞌ wzoagakeꞌ naꞌ to c̱hop shoṉ lla.
Bishesh Jesúzaꞌ beṉꞌkaꞌ chitꞌ chde leshꞌ chyoodoꞌnaꞌ
13 Naꞌ ka ba zoa gaḻꞌ lṉi Paskwaꞌ daa chon beṉꞌ Israelkaꞌ, wyaj Jesúzaꞌ Jerusalénnaꞌ.
Jesús en el patio del templo (Juan 2.13-25)
14 Naꞌ ka bllineꞌ leshꞌ chyoodoꞌnaꞌ, bleꞌileꞌ lleꞌ beṉꞌ chitꞌgakeꞌ gooṉ, xilꞌ, naꞌ palom, naꞌ ḻekzkaꞌ naꞌ chiꞌ beṉꞌkaꞌ chishaꞌ mechaꞌ.
15 Naꞌ ka bleꞌileꞌ ka chak, beneꞌ to do tashj, naꞌ kon ḻen bisheshileꞌ yogꞌḻoḻeꞌ leshꞌ chyoodoꞌnaꞌ lente gooṉkaꞌ naꞌ xilꞌkaꞌ. Naꞌ bzaḻee xmech beṉꞌkaꞌ chishaꞌ mechaꞌ lo yonaꞌ naꞌ bishiꞌe mes c̱heꞌkaꞌ.
16 Naꞌ beṉꞌkaꞌ chitꞌ palomkaꞌ, golleꞌ ḻegakeꞌ:
―¡Ḻi yishesh baki ni! ¡Bi gonzle lill X̱aꞌnaꞌ ka lao yaa!
17 Naꞌch beṉꞌkaꞌ nakgakeꞌneꞌ txen jadingakileꞌ Choꞌa Xtillꞌ Chiozaꞌ ganaꞌ nan: “Daa ḻe chakidꞌ lill xḻatjoꞌnaꞌ ḻen wlliayiꞌn nadꞌ.”
18 Naꞌch beṉꞌ Israelkaꞌ lleꞌ naꞌ cheꞌgakeꞌ Jesúzaꞌ:
―¿Bi yeḻꞌ wak gonoꞌ dii wliꞌn napoꞌ yeḻꞌ wṉabiaꞌ kwenc̱he chonoꞌ diiki?
19 Naꞌ cheꞌ Jesúzaꞌ ḻegakeꞌ:
―Ḻi yic̱hinj yoodoꞌni naꞌ lo shoṉə llazə yiyonaꞌn.
20 Naꞌch cheꞌ beṉꞌ Israelkaꞌ ḻeꞌ:
―X̱opiyon yiz bengakeꞌ yoodoꞌni, naꞌ liꞌ nazoꞌ shoṉə llazə yiyonoꞌn.
21 Per daa goll Jesúzaꞌ ḻegakeꞌ kaꞌ, kwerp c̱heꞌnanꞌ bsaklebileꞌ yoodoꞌnaꞌ.
22 Naꞌch ka biban Jesúzaꞌ ladj beṉꞌ wetkaꞌ, jadini beṉꞌkaꞌ nakgakeꞌneꞌ txen daa wneꞌ, naꞌ wyajḻeꞌgakeꞌ Choꞌa Xtillꞌ Chiozaꞌ naꞌ dillꞌkaꞌ beꞌ Jesúzaꞌ.
Nombiaꞌ Jesúzaꞌ yic̱hjlallꞌdoꞌ yogꞌcho