Betgakeꞌ Juannaꞌ, beenaꞌ bchoa beṉꞌ nisaꞌ
14
Naꞌ do kanaꞌ, Heródezaꞌ, beenaꞌ chṉabiaꞌ ganaꞌ mbani Galileanaꞌ, benileꞌ ka nak daa chon Jesúzaꞌ.
2 Naꞌ golleꞌ beṉꞌkaꞌ chon xshineꞌnaꞌ:
―Beenanꞌ dii Juannaꞌ, beenaꞌ bchoa beṉꞌ nisaꞌ. Ba bibaneꞌ ladj beṉꞌ wetkaꞌ, daan chak choneꞌ yeḻꞌ wakkaꞌ.
3 Ḻaꞌ kanaꞌ ni mban dii Juannaꞌ, Heródezaꞌ bseḻee beṉꞌ bex̱ꞌgakeꞌneꞌ naꞌ wloogakeꞌneꞌ lillyanaꞌ ni c̱he Herodíazaꞌ xool beṉꞌ bisheenaꞌ, beenaꞌ le Felipe.
4 Ḻaꞌ dii Juannaꞌ golleꞌ Heródezaꞌ:
―Bi nakan wen nkoo xool beṉꞌ bishoonaꞌ.
5 Naꞌ daa golleꞌneꞌ kaꞌ goklallꞌ Heródezaꞌ witeꞌneꞌ, per bi biyaxjileꞌ daa bllebeꞌ beṉꞌkaꞌ chajḻeꞌ daa nak Juannaꞌ to beṉꞌ chyix̱jee daa cheꞌ Chiozaꞌneꞌ.
6 Per ka wyaꞌi Heródezaꞌ yiz, biꞌ nool wewꞌ c̱he Herodíazaꞌ byaabꞌ lao beṉꞌkaꞌ lleꞌ lṉinaꞌ. Naꞌ daa ḻe biyoolallii Heródezaꞌ ka byaabꞌ
7 ax̱t bzoeꞌ Chiozaꞌ de tasc̱hiw bc̱hebeꞌ wiꞌebꞌ bittezə dii iṉabibꞌ ḻeꞌ.
8 Naꞌ kon ka bzajnii xṉaꞌbaabꞌ bemꞌ, naꞌ cheꞌbꞌ Heródezaꞌ:
―Yic̱hj Juannaꞌ, beenaꞌ chchoa beṉꞌ nisaꞌ, cheenidꞌ goṉoꞌn nadꞌ to lo plat llilj.
9 Naꞌ gokyeshii Heródezaꞌ, per daa ba bc̱hebleꞌ lao yogꞌ beṉꞌkaꞌ goxeꞌ lṉinaꞌ wiꞌebꞌ kon daa iṉabibꞌ ḻeꞌ, benshazeꞌ byen weꞌgakeꞌbꞌ daa wṉabbꞌ.
10 Naꞌ bseḻee beṉꞌ jac̱hoggakeꞌ yic̱hj Juannaꞌ ḻoo lillyanaꞌ.
11 Naꞌ blliagakeꞌn to lo plat llilj naꞌ beꞌgakeꞌn biꞌ nool wewaa naꞌ beꞌbaan xṉaꞌbaa.
12 Naꞌch beṉꞌkaꞌ wdalen Juannaꞌ txen wyajgakeꞌ jaxiꞌgakeꞌ kwerp c̱heꞌnaꞌ naꞌ bkwashꞌgakeꞌn. Naꞌ wdenaꞌ jellgakeꞌ Jesúzaꞌ ka gok.
Jesúzaꞌ bwaweꞌ gayaa mil beṉꞌ
13 Naꞌ ka wṉezi Jesúzaꞌ daa gok c̱he Juannaꞌ, bizee ganaꞌ zoeꞌ naꞌ biyoꞌe to ḻoo barkw ziyajeꞌ ganaꞌ kono beṉꞌ lleꞌ. Naꞌ ka wṉezi beṉꞌkaꞌ lleꞌ yellkaꞌ llia gaozə choꞌa nisdoꞌnaꞌ galan zej Jesúzaꞌ, naꞌch wloogakeꞌ nez janogakeꞌneꞌ.
14 Naꞌ ka bichej Jesúzaꞌ ḻoo barkwaꞌ, bleꞌileꞌ beṉꞌ zan inlleb ba lleꞌ naꞌ, naꞌ biyeshileꞌ ḻegakeꞌ naꞌ biyoneꞌ beṉꞌkaꞌ bi shaoꞌ.
15 Naꞌ ka ba wlleꞌ, naꞌch beṉꞌkaꞌ nak Jesúzaꞌ txen jabigꞌgakeꞌ kwiteꞌnaꞌ, cheꞌgakeꞌneꞌ:
―Ba wlleꞌ ṉaa, naꞌ gani lleꞌcho kono zoa witꞌ dii gaocho. Goll beṉꞌki yiyajgakeꞌ yellkaꞌ llia gaozə kwenc̱he lljx̱iꞌgakeꞌ dii gaogakeꞌ.
16 Naꞌ cheꞌ Jesúzaꞌ ḻegakeꞌ:
―Bi chonan byen yiyajgakeꞌ. Lenꞌ, ḻi weꞌ dii gaogakeꞌ.
17 Naꞌ cheꞌgakeꞌneꞌ:
―Gayꞌchga yetxtil naꞌ zi c̱hopchga beḻ noaꞌntoꞌ ni.
18 Naꞌ cheꞌ Jesúzaꞌ ḻegakeꞌ:
―Ḻi goṉshkin ni.
19 Naꞌch golleꞌ beṉꞌkaꞌ kweꞌgakeꞌ lo yixaꞌ. Naꞌ bex̱ee yetxtilkaꞌ gayꞌ naꞌ beḻkaꞌ c̱hop naꞌ bḻis laweꞌnaꞌ yabanaꞌ naꞌ biꞌe Chiozaꞌ yeḻꞌ chox̱ken. Naꞌch bxoxjeꞌ yetxtilkaꞌ naꞌ biꞌen beṉꞌkaꞌ nakgakeꞌneꞌ txen kwenc̱he beꞌgakeꞌ c̱he c̱he beṉꞌkaꞌ.
20 Naꞌ wdao yogꞌḻoḻ beṉꞌkaꞌ ax̱t ka beljgakileꞌ. Naꞌ ka bidaogakeꞌ, naꞌch bitopgakeꞌ diikaꞌ bgaaṉ, naꞌ biyakan shlliṉ xetꞌ.
21 Naꞌ beṉꞌ byokaꞌ wdao gokgakeꞌ ka do gayaa mil, naꞌ bi blabgakeꞌ noolkaꞌ naꞌ biꞌdoꞌkaꞌ wdao.
Jesúzaꞌ wzee lo nisdoꞌnaꞌ
22 Ka wde dga bigoo Jesúzaꞌ beṉꞌkaꞌ nakgakeꞌneꞌ txen to ḻoo barkw kwenc̱he yiḻagꞌgakeꞌ shḻaa nisdoꞌnaꞌ to ḻezgakeꞌ, naꞌ ḻeꞌ bigaaṉeꞌ kwenc̱he bisee beṉꞌkaꞌ bdop bllag.
23 Naꞌ wde bisee beṉꞌkaꞌ, naꞌch wyepeꞌ to lo yaa kwenc̱he jeḻwilleꞌ Chiozaꞌ tozeꞌ. Naꞌ ni zetieꞌ lo yaanaꞌ ka goḻ.
24 Naꞌ barkwaꞌ ganaꞌ ziyoo beṉꞌkaꞌ nakgakeꞌneꞌ txen ba zejan gchoḻ nisdoꞌnaꞌ. Chakan to ki to kaꞌlə daa chas chatꞌ nisaꞌ, naꞌ beꞌnaꞌ bi choꞌen latj yiyajan shḻicha.
25 Naꞌ zbaḻz biyetj Jesúzaꞌ lo yaanaꞌ naꞌ bizee tlo nisdoꞌnaꞌ zejeꞌ ganaꞌ zejləgakeꞌ.
26 Naꞌ ka bleꞌi beṉꞌkaꞌ non Jesúzaꞌ txen zejeꞌ tlo nisaꞌ, ḻe bllebgakeꞌ naꞌ ax̱t besyaagakeꞌ, nagakeꞌ:
―¡Ba zaꞌ to yel bx̱en!
27 Naꞌ lii wṉete Jesúzaꞌ ḻegakeꞌ, chiꞌe:
―Bi illeble. Nadꞌkzanꞌ.
28 Naꞌch wṉe Pédronaꞌ chiꞌe:
―X̱anꞌ, shi linꞌ, ben ka gak saa lo nisi kwenc̱he yidꞌ kwitoꞌnaꞌ.
29 Naꞌ cheꞌ Jesúzaꞌneꞌ:
―Dashkaꞌ.
Naꞌch bchej Pédronaꞌ ḻoo barkwaꞌ naꞌ wzoloeꞌ chzee tlo nisaꞌ nan shajeꞌ kwit Jesúzaꞌ.
30 Per ka gokbeꞌileꞌ zechga beꞌnaꞌ, naꞌ bllebeꞌ naꞌ lii wzolote chbiꞌe yel, naꞌch besyee chiꞌe:
―¡X̱anꞌ, bisla nadꞌ!
31 Naꞌ lii biyox̱ꞌte Jesúzaꞌ neenaꞌ, chiꞌeneꞌ:
―¿Berac̱he gokc̱hopziloꞌ? ¿Bic̱he bi nx̱enilalloo nadꞌ kwasḻoḻ?
32 Naꞌ kon ka biyoogakeꞌ ḻoo barkwaꞌ naꞌ bgan beꞌnaꞌ.
33 Naꞌ beṉꞌkaꞌ bgaaṉ ḻoo barkwaꞌ, beꞌlaꞌogakeꞌ Jesúzaꞌ naꞌ gollgakeꞌ:
―Dii ḻi, linꞌ Xiiṉ Chiozaꞌ.
Jesúzaꞌ biyoneꞌ beṉꞌkaꞌ bi shaoꞌ ganaꞌ mbani Genesaretaꞌ
34 Naꞌ ka bḻagꞌgakeꞌ shḻaa nisdoꞌnaꞌ naꞌ bllingakeꞌ ganaꞌ mbani Genesaretaꞌ.
35 Naꞌ beṉꞌ Genesaretkaꞌ biyombiaꞌgakeꞌ Jesúzaꞌ naꞌch bzengakileꞌ beṉꞌ yellkaꞌ lleꞌ gao nan ba bllin Jesúzaꞌ. Naꞌ jwaꞌgakeꞌ yogꞌ beṉꞌkaꞌ bi shaoꞌ laweꞌnaꞌ,
36 naꞌ gotꞌyogakileꞌneꞌ wiꞌe latj ḻaꞌc̱hꞌ gox̱ꞌ beṉꞌ weꞌkaꞌ xeꞌnaꞌ, naꞌ yogꞌ beṉꞌkaꞌ bex̱ꞌgakeꞌn biyakgakileꞌ.