Bwao Jesúzaꞌ wdeli gayaa mil beṉꞌ
6
Naꞌ ka wde, Jesúzaꞌ wyajeꞌ shḻaa nisdoꞌ c̱he Galileanaꞌ, daa ḻekzkaꞌ le nisdoꞌ c̱he Tiberias.
2 Naꞌ beṉꞌ zan janogakeꞌneꞌ daa bleꞌgakileꞌ yeḻꞌ wakkaꞌ beneꞌ kanaꞌ biyoneꞌ beṉꞌkaꞌ bi shaoꞌ.
Jesús alimenta una multitud (Juan 6.1-15)
3 Naꞌch wyep Jesúzaꞌ to lo yaa naꞌ wcheꞌleneꞌ beṉꞌkaꞌ nakgakeꞌneꞌ txen.
4 Naꞌ ba zoa gaḻꞌ lṉi Paskw c̱he beṉꞌ Israelkaꞌ.
5 Ka bleꞌi Jesúzaꞌ beṉꞌ zan ba bllin ganaꞌ chiꞌe, naꞌ chiꞌe Felípenaꞌ:
―¿Gara lljx̱iꞌcho dii gao yogꞌ beṉꞌki?
6 Golleꞌ kaꞌ daa chakileꞌ laꞌshki bi yee Felípenaꞌ, ḻaꞌ ba ṉezkzileꞌ nakan goneꞌ.
7 Naꞌ Felípenaꞌ chiꞌeneꞌ:
―Aga waki laxj to beṉꞌ c̱he x̱onꞌ beoꞌ lljx̱iꞌyicho dii gao yogꞌ beṉꞌki latꞌ wej.
8 Naꞌ sto beenaꞌ nak Jesúzaꞌ txen lieꞌ Andrés, beṉꞌ bishꞌ Simón Pédronaꞌ, chiꞌeneꞌ:
9 ―Ni ze to biꞌ xkwidꞌ noꞌabꞌ gayꞌ yetxtil de cebada naꞌ zi c̱hop beḻ. Per bizə daa par yogꞌ beṉꞌki.
10 Naꞌch Jesúzaꞌ chiꞌe:
―Ḻi yee yogꞌ beṉꞌkaꞌ kweꞌgakeꞌ.
Naꞌ dechga yixdoꞌ ganaꞌ lleꞌgakeꞌ, naꞌ yogꞌtieꞌ wcheꞌ, naꞌ to beṉꞌ byokaꞌzə gok ka do gayaa mil.
11 Naꞌch bex̱ꞌ Jesúzaꞌ yetxtilkaꞌ, naꞌ biꞌe Chiozaꞌ yeḻꞌ chox̱ken, naꞌ bgoneꞌ c̱he c̱he beṉꞌkaꞌ nakgakeꞌneꞌ txen naꞌ ḻegakeꞌ beꞌgakeꞌ c̱he yogꞌ beṉꞌkaꞌ chiꞌ naꞌ ax̱t ka beljgakileꞌ. Naꞌ ḻekzkaꞌ beneꞌ c̱he beḻkaꞌ.
12 Naꞌ ka beljgakileꞌ, naꞌch chiꞌe beṉꞌkaꞌ nakgakeꞌneꞌ txen:
―Ḻi yitop yogꞌḻoḻ dii laoꞌkaꞌ bichooṉan kwenc̱he bibi gakditj.
13 Naꞌch bitopgakeꞌn, biyakte shlliṉ xetꞌ diikaꞌ bichooṉan lao yetxtilkaꞌ gayꞌ.
14 Naꞌ ka bleꞌi beṉꞌkaꞌ yeḻꞌ wakaꞌ daa ben Jesúzaꞌ, naꞌch cheꞌ ljwellgakeꞌ:
―Dii ḻi beenin nakeꞌ beenaꞌ llia biaꞌ yid yell-lioni kwenc̱he c̱hix̱jiꞌe daa cheꞌ Chiozaꞌneꞌ.
15 Naꞌ daa gokbeꞌi Jesúzaꞌ cheengakileꞌ yic̱heꞌgakeꞌneꞌ kwenc̱he wzoagakeꞌneꞌ iṉabiꞌe ḻegakeꞌ, bichejeꞌ ladjeꞌkaꞌ naꞌ wyepeꞌ tozeꞌ zi latꞌ chaꞌch lo yaanaꞌ.
Wzaꞌ Jesúzaꞌ lo nisdoꞌnaꞌ
16 Ka ba chaḻ, beṉꞌkaꞌ nak Jesúzaꞌ txen biyetjgakeꞌ choꞌa nisdoꞌnaꞌ.
Jesús camina sobre el agua (Juan 6.16-22)
17 Naꞌ biyoogakeꞌ to ḻoo barkw kwenc̱he ziyajgakeꞌ yell Capernaúmaꞌ. Ba goḻ naꞌ biṉꞌ yillin Jesúzaꞌ kwiteꞌkaꞌ.
18 Naꞌch wzolo wzechga beꞌnaꞌ naꞌ wzolo chas chatꞌ nisdoꞌnaꞌ.
19 Naꞌ ka do gayꞌ wa x̱op kilómetro ba wzaꞌlen barkwaꞌ ḻegakeꞌ lo nisdoꞌnaꞌ katꞌ bleꞌgakileꞌ Jesúzaꞌ zejeꞌ tlo nisdoꞌnaꞌ zjatiḻeꞌ barkwaꞌ naꞌ ḻe bllebgakeꞌ.
20 Naꞌ Jesúzaꞌ chiꞌe ḻegakeꞌ:
―Nadꞌkzan, ¡bi illeble!
21 Naꞌ chibagakileꞌ bigoogakeꞌneꞌ ḻoo barkwaꞌ, naꞌ lii bllintekzgakeꞌ ganaꞌ chwiagakeꞌ illingakeꞌ.
Zan beṉꞌ chiyiljgakeꞌ Jesúzaꞌ
22 Naꞌ betiyo gokbeꞌi beṉꞌkaꞌ bigaaṉ shḻaa nisdoꞌnaꞌ nan tochga barkwaꞌ gotꞌ naꞌ to beṉꞌkaꞌ nonz Jesúzaꞌ txen biyoogakeꞌn naꞌ bi len Jesúzaꞌ biyooleneꞌ ḻegakeꞌ.
El pan de vida (Juan 6.22-71)
23 Naꞌ gaozə ganaꞌ wdaogakeꞌ yetxtilkaꞌ ka wde beꞌ X̱ancho Jesúzaꞌ Chiozaꞌ yeḻꞌ chox̱ken, bllin sto c̱hop barkw dii zaꞌ yell Tibériazaꞌ.
24 Naꞌ ka gokbeꞌi beṉꞌkaꞌ aga no Jesúzaꞌ nḻaꞌ ni beṉꞌkaꞌ nakgakeꞌneꞌ txen, naꞌch biyoogakeꞌ ḻoo barkwkaꞌ ziyajgakeꞌ Capernaúmaꞌ jadiljgakeꞌneꞌ.
Jesúzaꞌ nakeꞌ ka to yeḻꞌ wao dii choṉaꞌn yeḻꞌ mban
25 Naꞌ ka bllingakeꞌ shḻaa nisdoꞌnaꞌ jadiꞌgakeꞌneꞌ, naꞌ gollgakeꞌneꞌ:
―Maestro, ¿bat biyedoꞌ ni?
26 Naꞌ Jesúzaꞌ chiꞌe ḻegakeꞌ:
―Dii ḻi niaꞌ leꞌ, chiyiljle nadꞌ aga daa wyajniꞌlatiꞌle bi zejin yeḻꞌ wakkaꞌ benanꞌ, san daa wdaozle ax̱t ka beljilen.
27 Bi yilaḻ yizodzile kwenc̱he gatꞌ dii yeej gaole, ḻaꞌ dii te c̱heyin nak daa. San ḻi gaḻꞌ kweꞌno daa goṉ yeḻꞌ mban c̱hele zejḻi kaṉi, daa goṉꞌ nadꞌ, Beṉꞌ Bseḻꞌ Chiozaꞌ Yell-lioni. Ḻaꞌ X̱aꞌ Chiozaꞌ ba beneꞌn lallꞌ naꞌ wiꞌan.
28 Naꞌ cheꞌgakeꞌneꞌ:
―¿Beran chiyaḻꞌ gonntoꞌ kwenc̱he gonntoꞌ daa cheeni Chiozaꞌ?
29 Naꞌ cheꞌ Jesúzaꞌ ḻegakeꞌ:
―Daa cheeni Chiozaꞌ gonle, gonḻilallꞌle nadꞌ, beṉꞌ bseḻee.
30 Naꞌch cheꞌgakeꞌneꞌ:
―¿Bera yeḻꞌ wak gonoꞌ ileꞌintoꞌ kwenc̱he shajḻeꞌntoꞌ c̱hoꞌ? ¿Bi ka gonoꞌ?
31 Dii x̱ozxtoꞌchokaꞌ wdaogakeꞌ daa le maná latjaꞌ ganaꞌ bibi chashj chḻeb, ka na Choꞌa Xtillꞌ Chiozaꞌ ganaꞌ na: “Yeḻꞌ wawaꞌ daa zaꞌ yabanaꞌ biꞌen wdaogakeꞌ.”
32 Naꞌ cheꞌ Jesúzaꞌ ḻegakeꞌ:
―Dii ḻi niaꞌ leꞌ, aga dowaljyeṉꞌ yeḻꞌ wao daa zaꞌ yabananꞌ beꞌ dii Moisézaꞌ ḻegakeꞌ, san X̱aꞌnaꞌ choṉeꞌ daa nak dowalj yeḻꞌ wao daa zaꞌ yabanaꞌ.
33 Ḻaꞌ nadꞌ, beṉꞌ zaꞌ yabanaꞌ, nakꞌ ka to yeḻꞌ wao dii choeꞌ Chiozaꞌ beṉꞌ yell-lioki kwenc̱he ibangakeꞌ.
34 Naꞌch cheꞌgakeꞌneꞌ:
―Beṉꞌdoꞌ, beṉgach netoꞌ toshiizi yeḻꞌ wawaꞌ noꞌ kaꞌ.
35 Naꞌ cheꞌ Jesúzaꞌ ḻegakeꞌ:
―Nadꞌ nakꞌ ka yeḻꞌ wawaꞌ daa choeꞌn yeḻꞌ mban c̱he beṉꞌ. Beenaꞌ gakeꞌ nadꞌ txen, gakeꞌ ka beṉꞌ nelj nllaꞌi toshiizi. Naꞌ beenaꞌ gonḻilallee nadꞌ, gakeꞌ ka to beṉꞌ bichga ibiḻi.
36 Per kon ka ba wniaꞌ leꞌ, ḻaꞌkzi ba bleꞌile nadꞌ bi chajḻeꞌle.
37 Yogꞌ beṉꞌkaꞌ chon X̱aꞌnaꞌ lallꞌ naꞌ, gakgakeꞌ nadꞌ txen. Naꞌ beenaꞌ gakeꞌ nadꞌ txen aga wzoaꞌneꞌ kaꞌlə.
38 Ḻaꞌ zaa yabanaꞌ naꞌ zoaꞌ yell-lioni aga kwenc̱he gonꞌ daa nazan c̱hanꞌ, san zaa kwenc̱he gonꞌ daa cheeni X̱aꞌnaꞌ, beenaꞌ bseḻꞌ nadꞌ.
39 Naꞌ X̱aꞌnaꞌ, beenaꞌ bseḻꞌ nadꞌ, cheenileꞌ bi wiꞌa latj kwiayiꞌ ni to beṉꞌkaꞌ ba wlejeꞌ kwenc̱he gakgakeꞌ nadꞌ txen. San cheenileꞌ yisbanꞌ ḻegakeꞌ ladj beṉꞌ wetkaꞌ katꞌ illin lla te c̱he yell-lioni.
40 Naꞌ dgan cheeni X̱aꞌnaꞌ, beenaꞌ bseḻꞌ nadꞌ: chaklallee gatꞌ yeḻꞌ mban zejḻi kaṉi c̱he yogꞌḻoḻ beṉꞌ gakbeꞌi nakꞌ X̱iineꞌ naꞌ gonḻilallee nadꞌ. Naꞌ nadꞌ yisbanee ladj beṉꞌ wetkaꞌ katꞌ te c̱he yell-lioni.
41 Naꞌch beṉꞌ wṉabiaꞌ c̱he beṉꞌ Israelkaꞌ wzologakeꞌ biz chon chnagakeꞌ c̱he Jesúzaꞌ daa wneꞌ: “Nadꞌ nakꞌ yeḻꞌ wao daa zaꞌ yabanaꞌ.”
42 Naꞌ cheꞌgakeꞌ:
―¿Aaga beenin Jesús, xiiṉ Josénaꞌ? Nombiaꞌcho x̱axṉaꞌ beeni. ¿Berac̱he nazeꞌ: “nadꞌ zaꞌ yabanaꞌ”?
43 Naꞌch cheꞌ Jesúzaꞌ ḻegakeꞌ:
―Bibi gon iṉazle c̱heyi daa wniaꞌ leꞌ.
44 Ni to kono gak gon nadꞌ txen shi X̱aꞌnaꞌ, beenaꞌ bseḻꞌ nadꞌ, bi goneꞌ ḻeꞌ lallꞌ naꞌ. Naꞌ beṉꞌkaꞌ nak nadꞌ txen, yisbanꞌ ḻegakeꞌ katꞌ te c̱he yell-lioni.
45 Ḻee librkaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi nan: “Chiozaꞌ wliꞌ wsedileꞌ yogꞌḻoḻte beṉꞌ.” Naꞌ yogꞌ beṉꞌ chzenag c̱he X̱aꞌnaꞌ naꞌ chajniꞌgakileꞌ daa neꞌ, ḻegakenꞌ chongakeꞌ nadꞌ txen.
46 ’Aga ga zoa beṉꞌ ba bleꞌileꞌ X̱aꞌnaꞌ; toz nadꞌ, beṉꞌ zaꞌ yabanaꞌ, ba bleꞌidee.
47 Dii ḻi niaꞌ leꞌ, nottez beṉꞌ nonḻilallee nadꞌ de yeḻꞌ mban c̱heꞌ zejḻi kaṉi.
48 Nadaan nakꞌ ka yeḻꞌ wawaꞌ daa choeꞌn yeḻꞌ mban c̱he beṉꞌ zejḻi kaṉi.
49 Dii x̱ozxtoꞌlekaꞌ wdaogakeꞌ daa le maná latjaꞌ ganaꞌ bibi chashj chḻeb naꞌ biaꞌkzə witgakeꞌ.
50 San nadꞌ choꞌa dillꞌ c̱he yeḻꞌ wao daa zaꞌ yabanaꞌ, naꞌ beenaꞌ gaweꞌn aga bi yeḻꞌ wit zejḻi kaṉi ileꞌileꞌ.
51 Nadaan nakꞌ yeḻꞌ wao daa zaꞌ yabanaꞌ daa choꞌen yeḻꞌ mban c̱he beṉꞌ. Beenaꞌ gao yeḻꞌ wawi, ibaneꞌ zejḻi kaṉi. Naꞌ yelꞌ wawaꞌ daa wiꞌaneꞌ, ḻennanꞌ beli chen c̱haꞌni daa chzanidꞌ kwenc̱he gatꞌ yeḻꞌ mban c̱he beṉꞌ yell-lioni.
52 Naꞌch beṉꞌ Israelkaꞌ wzolo chshesh chṉegakeꞌ, cheꞌ ljwelleꞌ:
―¿Nakra gon beeni goṉeꞌ beli chen c̱heꞌnaꞌ gaochon?
53 Naꞌ cheꞌ Jesúzaꞌ ḻegakeꞌ:
―Nadꞌ, Beṉꞌ Bseḻꞌ Chiozaꞌ Yell-lioni, dii ḻi niaꞌ leꞌ, shi bi gaole kwerp c̱haꞌni naꞌ shi bi yeejle chen c̱haꞌni, aga watꞌ yeḻꞌ mban c̱hele daa bi te c̱heyin.
54 Ḻaꞌ beṉꞌkaꞌ gaogakeꞌ kwerp c̱haꞌni naꞌ yeejgakeꞌ chen c̱haꞌni, beṉꞌkanꞌ gatꞌ yeḻꞌ mban c̱hegakeꞌ zejḻi kaṉi. Naꞌ katꞌ illin lla te c̱he yell-lioni, nadꞌ yisbangakee ladj beṉꞌ wetkaꞌ.
55 Ḻaꞌ kwerp c̱haꞌni nakan dowalj yeḻꞌ wao, naꞌ chen c̱haꞌni nakan dowalj dii cheejeꞌ.
56 Beenaꞌ gao kwerp c̱haꞌni naꞌ yeejeꞌ chen c̱haꞌni, nakeꞌ nadꞌ txen, naꞌ ḻekzkaꞌ nadꞌ nakee txen.
57 X̱aꞌnaꞌ, beenaꞌ bseḻꞌ nadꞌ, zoeꞌ zejḻi kaṉi naꞌ de yeḻꞌ mban c̱haꞌ daa mbaneꞌ ḻeꞌ. Naꞌ kaꞌkzan beenaꞌ gao beli chen c̱haꞌni ibaneꞌ daa wiꞌaneꞌ yeḻꞌ mbannaꞌ.
58 Beli chen c̱haꞌni nakan yeḻꞌ waw dii zaꞌ yabanaꞌ. Ka nak yeḻꞌ wawi, aga nakan ka daa le maná daa wdao dii x̱ozxtoꞌlekaꞌ naꞌ biaꞌkzə witgakeꞌ. Beenaꞌ gao yeḻꞌ wawaꞌ daa zaꞌ yabanaꞌ, ibaneꞌ zejḻi kaṉi.
59 Diikin wna Jesúzaꞌ shlak bliꞌ bsedileꞌ beṉꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ yell Capernaúmaꞌ.
Dillꞌ dii nsaꞌ yeḻꞌ mban
60 Naꞌ zan beṉꞌkaꞌ nogakeꞌneꞌ, ka bengakileꞌ daa wna Jesúzaꞌ, naꞌ wnagakeꞌ:
―Lallj inlleb nak dga chliꞌ chsedi beeni. ¿Notgui gon ka neꞌ?
61 Naꞌ Jesúzaꞌ gokbeꞌileꞌ bi wyazlallꞌgakeꞌ xtilleeꞌnaꞌ, naꞌch wṉabileꞌ ḻegakeꞌ:
―¿Achakzbanile dga ba wniaꞌ leꞌ?
62 ¿Nakra gonle sheḻꞌkaꞌ ileꞌile nadꞌ, Beṉꞌ Bseḻꞌ Chiozaꞌ Yell-lioni, yiyepꞌ ganaꞌ wzaa?
63 Espíritu c̱he Chiozaꞌ choꞌe yeḻꞌ mban c̱he beṉꞌ, ḻaꞌ beli chennaꞌ aga bi zakiin. Dillꞌkaꞌ ba wniaꞌ gonan ka soalen Espíritunaꞌ leꞌ naꞌ gatꞌ yeḻꞌ mban c̱hele.
64 Per biaꞌkzə zoa baḻ-le bi chajḻeꞌle.
Goll Jesúzaꞌ ḻegakeꞌ kaꞌ, ḻaꞌ dezd nechte ba ṉezkzileꞌ no beṉꞌkaꞌ bi chajḻeꞌ c̱heꞌ naꞌ non gon ḻeꞌ lo naꞌ beṉꞌ malkaꞌ.
65 Naꞌ chiꞌe ḻegakeꞌ:
―Ba wniakzꞌ leꞌ ni to kono gak gon nadꞌ txen shi X̱aꞌnaꞌ bi goneꞌneꞌ lallꞌ naꞌ.
66 Naꞌ lo llanaꞌtez beṉꞌ zan beṉꞌkaꞌ nakgakeꞌneꞌ txen bkwasgakeꞌ bich janogakeꞌneꞌ.
67 Naꞌch cheꞌ Jesúzaꞌ beṉꞌkaꞌ shlliṉ, beṉꞌkaꞌ nakgakeꞌneꞌ txen:
―¿Aḻekzkaꞌ lenle cheenile yiyajle?
68 Naꞌ Simón Pédronaꞌ chiꞌeneꞌ:
―X̱anꞌ, aga nochlə c̱heyi zakii wzenagntoꞌ, ḻaꞌ tozoꞌ linꞌ choo dillaa daa chonan ka gatꞌ yeḻꞌ mban c̱hentoꞌ zejḻi kaṉi.
69 Ba wyajḻeꞌntoꞌ c̱hoꞌ, naꞌ ṉezintoꞌ linꞌ Crístonaꞌ, Xiiṉ Chios yaa Chios bannaꞌ.
70 Naꞌ Jesúzaꞌ chiꞌe ḻegakeꞌ:
―Ba wlejꞌ shlliṉle gakle nadꞌ txen. Per tole nakle dii x̱iwaa txen.
71 Wneꞌ kaꞌ c̱he Jud Scariotaꞌ, xiiṉ to beṉꞌ le Simón, ḻaꞌ ṉezileꞌ nan Judaꞌ goneꞌneꞌ lallꞌ naꞌ beṉꞌ malkaꞌ, ḻaꞌkzi wleneꞌ beṉꞌkaꞌ shlliṉ.