Biyon Jesúzaꞌ to beṉꞌ net ṉiꞌa nee
5
Ka wde gok diiki, goḻꞌ to lṉi c̱he beṉꞌ Israelkaꞌ Jerusalénnaꞌ, naꞌ biyaj Jesúzaꞌ lṉinaꞌ.
2 Naꞌ Jerusalénnaꞌ, gaozə choꞌa puertaꞌ le Puert C̱he Xilꞌkaꞌ llia to tang dii le Betesda dillꞌ hebreo. Naꞌ gayꞌ koridor nec̱hjan tangaꞌ.
Jesús cura en Sábado (Juan 5.1-15)
3 Naꞌ ḻoo koridorkaꞌ de beṉꞌ zan beṉꞌ weꞌ, no beṉꞌ lc̱hoḻ, no beṉꞌ bi chak saꞌ wen, naꞌ no beṉꞌ net ṉiꞌa nee, chbezgakeꞌ ta nisaꞌ.
4 Ḻaꞌ zoa katꞌ chetj to anjl choꞌa tangaꞌ chteꞌ nisaꞌ, naꞌ beenaꞌ chyobi choꞌe ḻoo nisaꞌ chiyoll chta anjlaꞌn chiyakileꞌ bittezə yillweꞌ cheꞌileꞌ.
5 Naꞌ ladj beṉꞌkaꞌ lleꞌ naꞌ len to beṉꞌ ba gok shinꞌshoṉichoa yiz bi shawee.
6 Naꞌ bleꞌi Jesúzaꞌneꞌ naꞌ gokbeꞌileꞌ ba wlla dieꞌ kaꞌ, naꞌch chiꞌeneꞌ:
―¿Acheeniloꞌ yiyakiloꞌ?
7 Naꞌch beenaꞌ bi shaoꞌ chiꞌeneꞌ:
―Beṉꞌdoꞌ, aga no zoa c̱haꞌ wḻetjeꞌ nadꞌ ḻoo nisi katꞌ chdan. Naꞌ katꞌ chakidꞌ yetjꞌ ḻoo nisaꞌ, beṉꞌ yoblə lii chjshoꞌtieꞌ ḻoꞌinnaꞌ.
8 Naꞌch cheꞌ Jesúzaꞌneꞌ:
―Biyas, bitob daa c̱hoꞌnaꞌ biyoaꞌn naꞌ bigoo nez.
9 Naꞌ katenaꞌ biyakileꞌ naꞌ lii bitobtieꞌ daa c̱heꞌnaꞌ biyoꞌen naꞌ bigwee nez. Gok dga lla sabdaꞌ, llanaꞌ chombaaṉgakeꞌ.
10 Naꞌ beṉꞌkaꞌ chṉabiaꞌ beṉꞌ Israelkaꞌ gollgakeꞌ beenaꞌ biyaki:
―Lla chombaaṉcho ṉaa. Aga bi lsens de woo daa c̱hoꞌnaꞌ.
11 Naꞌch cheꞌ beenaꞌ ḻegakeꞌ:
―Beenaꞌ biyoneꞌ nadꞌ ḻenꞌ wneꞌ: “Bitob daa c̱hoꞌnaꞌ biyoaꞌn naꞌ bigoo nez.”
12 Naꞌch cheꞌgakeꞌneꞌ:
―¿Nora beenaꞌ wna liꞌ: “Bitob daa c̱hoꞌnaꞌ biyoaꞌn naꞌ bigoo nez”?
13 Naꞌ beenaꞌ biyaki aga ṉezileꞌ non biyon ḻeꞌ, ḻaꞌ Jesúzaꞌ ba bikwaseꞌ ladj beṉꞌkaꞌ lleꞌ naꞌ.
14 Naꞌtech billag Jesúzaꞌneꞌ leshꞌ chyoodoꞌnaꞌ, naꞌ chiꞌeneꞌ:
―Ba biyakiloꞌ ṉaa. Bich bi dii mal gonoꞌ kwenc̱he ki wtiḻchoꞌ dii walch.
15 Naꞌch beenaꞌ biyajeꞌ lao beṉꞌ wṉabiaꞌ c̱he beṉꞌ Israelkaꞌ jayelleꞌ ḻegakeꞌ nan Jesúzaꞌ biyoneꞌneꞌ.
16 Naꞌ daa ben Jesúzaꞌ yeḻꞌ wakaꞌ lla sabdaꞌ, llanaꞌ chombaaṉgakeꞌ, goklallꞌgakeꞌ witgakeꞌneꞌ.
Jesús defiende su autoridad (Juan 5.16-47)
―X̱aꞌnaꞌ bittezə lla choneꞌ llin naꞌ kaꞌkzə nadꞌ.
18 Naꞌch beṉꞌ wṉabiaꞌ c̱he beṉꞌ Israelkaꞌ goklallꞌgakeꞌ witgakeꞌneꞌ aga toz daa wdishjeꞌ leyaꞌ daa choꞌen dillꞌ c̱he llanaꞌ chombaaṉgakeꞌ, san ḻekzkaꞌ daa chon kwineꞌ ka Chios daa chiꞌe Chiozaꞌ nakeꞌ X̱eꞌ.
Yeḻꞌ wṉabiaꞌ daa nap Xiiṉ Chiozaꞌ
19 Naꞌ Jesúzaꞌ chiꞌe ḻegakeꞌ:
―Dii ḻi niaꞌ leꞌ, nadꞌ, Xiiṉ Chios, aga bi gak gonꞌ tobiaꞌlozꞌ, san daa chleꞌidꞌ chon X̱aꞌnanꞌ ḻekzannanꞌ chonꞌ.
20 Ḻaꞌ X̱aꞌnaꞌ chakileꞌ nadꞌ naꞌ chliileꞌ nadꞌ yogꞌ diikaꞌ choneꞌ. Naꞌ wliꞌchileꞌ nadꞌ dii zakꞌtechlə ka diiki, dii gonan ka yibanchile.
21 Ka chon X̱aꞌnaꞌ chisbaneꞌ beṉꞌ wetkaꞌ naꞌ chiyoꞌe yeḻꞌ mban c̱hegakeꞌ, kaꞌkzə chon nadꞌ, Xiiṉeꞌ, choꞌa yeḻꞌ mban c̱he nottezə beṉꞌ cheenidꞌ wiꞌan.
22 Naꞌ X̱aꞌnaꞌ aga ga chc̱hogloeꞌ c̱he beṉꞌ, san nadꞌ nakꞌ Xiiṉeꞌ, ba beneꞌ lallꞌ naꞌ wc̱hogloaꞌ c̱he yogꞌḻoḻ beṉꞌ.
23 Beneꞌ kaꞌ kwenc̱he yogꞌ beṉꞌ koogakeꞌ nadꞌ balaaṉnaꞌ ka daa chgoogakeꞌ X̱aꞌnaꞌ. Beenaꞌ bi chgwee nadꞌ balaaṉ, nadꞌ nakꞌ Xiiṉ Chios, ḻekzkaꞌ bi chgwee X̱aꞌnaꞌ balaaṉ, beenaꞌ bseḻꞌ nadꞌ.
24 ’Dii ḻi niaꞌ leꞌ, beenaꞌ chzenag xtillaanaꞌ naꞌ chonḻilallee beenaꞌ bseḻꞌ nadꞌ, gatꞌ yeḻꞌ mban c̱heꞌ zejḻi kaṉi. Naꞌ aga bi de dii gonan ka c̱hoglo c̱heꞌ sakꞌziꞌe, san ba bileꞌ lo yeḻꞌ witaꞌ naꞌ ba zoeꞌ lo yeḻꞌ mban daa bi te c̱heyin.
25 Dii ḻi niaꞌ leꞌ, wllin lla katꞌ beṉꞌ wetkaꞌ yengakileꞌ iṉiaꞌ ḻegakeꞌ, nadꞌ nakꞌ Xiiṉ Chios, naꞌ beṉꞌkaꞌ yengakileꞌ katꞌ iṉiaꞌ naꞌ yibangakeꞌ.
26 X̱aꞌnaꞌ napeꞌ yeḻꞌ wak kwenc̱he wiꞌe yeḻꞌ mban c̱he beṉꞌ daa bi te c̱heyin. Kaꞌkzə ba beṉeꞌ nadꞌ Xiiṉeꞌ yeḻꞌ wak kwenc̱he wiꞌa yeḻꞌ mban c̱he beṉꞌ daa bi te c̱heyin.
27 Naꞌ ḻekzkaꞌ ba beṉeꞌ nadꞌ yeḻꞌ wṉabiaꞌ kwenc̱he gonꞌ yeḻꞌ josc̱his daa nakꞌ Beṉꞌ Bseḻꞌ Chiozaꞌ Yell-lioni.
28 Bi yibanile daa niaꞌ kaꞌ, ḻaꞌ wllin lla wllin gor yeni yogꞌte beṉꞌ wetkaꞌ katꞌ iṉiaꞌ ḻegakeꞌ.
29 Naꞌ ka yengakileꞌ iṉiaꞌ naꞌch yichejgakeꞌ ḻoo banaꞌ. Naꞌ beṉꞌkaꞌ ben dii wennaꞌ yibangakeꞌ naꞌ siꞌgakeꞌ banez to yeḻꞌ mban daa bi te c̱heyin, naꞌ beṉꞌkaꞌ ben dii malaꞌ, yibangakeꞌ naꞌ c̱hoglo tegakeꞌ lo yeḻꞌ zakꞌziꞌnaꞌ zejḻi kaṉi.
Jesúzaꞌ bliꞌe yeḻꞌ wṉabiaꞌ c̱heꞌnaꞌ
30 ’Ni to bibi gak gonꞌ tobiaꞌlozꞌ, san chc̱hogloaꞌ c̱he beṉꞌ kon ka nllia Chiozaꞌ biaꞌ gonꞌ, naꞌ kon ka nakannanꞌ wc̱hogloaꞌn. Ḻaꞌ aga chonꞌ kon ka cheenidꞌ, san daa cheeni X̱aꞌnaꞌ, beenaꞌ bseḻꞌ nadꞌ, ḻennanꞌ chonꞌ.
31 Naꞌ shi nadꞌ wiꞌa dillꞌ c̱he kwinꞌ, ṉezidꞌ aga no shajḻeꞌ c̱haꞌ.
32 San zoa to beṉꞌ choꞌe xtillaanaꞌ, naꞌ ṉezidꞌ daa neꞌ c̱haꞌ nakan shḻicha.
33 Leꞌ bseḻꞌle beṉꞌ jaṉabgakileꞌ Juannaꞌ bi ka iṉeꞌ c̱haꞌ, naꞌ dillaa daa biꞌe c̱haꞌ nakan dii ḻi.
34 Ḻaꞌkzi nadꞌ bi chyalljidꞌ weꞌ beṉꞌ yell-lioni xtillaa; niaꞌ leꞌ diiki kwenc̱he yilale naꞌ bi kwiayiꞌle.
35 Juannaꞌ gokeꞌ ka to yiꞌ dii bzeeniꞌ naꞌ ḻe bibaile bzenagle c̱heꞌ tolde.
36 Daa chonꞌ diikaꞌ non X̱aꞌ Chiozaꞌ lallꞌ naꞌ gonꞌ choeꞌn dillꞌ c̱haꞌ, naꞌ zakꞌchin aga ka daa wna Juannaꞌ. Naꞌ chliꞌlawin Chiozanꞌ bseḻee nadꞌ.
37 X̱aꞌnaꞌ, beenaꞌ bseḻꞌ nadꞌ, ḻekzkaꞌ ba biꞌe dillꞌ c̱haꞌ. Ni shlin bigaṉꞌ yenile iṉieꞌ ni biṉꞌ ileꞌileneꞌ nak nakeꞌ.
38 Naꞌ choꞌa xtilleenaꞌ biṉꞌ shoꞌn ḻoo yic̱hjlallꞌdoꞌlenaꞌ, ḻaꞌ bi chajḻeꞌle c̱haꞌ, nadꞌ beṉꞌ bseḻee.
39 Leꞌ chsedchgale Choꞌa Xtillꞌ Chiozaꞌ daa chakile ḻeꞌinnaꞌ yillelile naklə ka gonle kwenc̱he gatꞌ yeḻꞌ mban c̱hele zejḻi kaṉi. Naꞌ ḻaꞌkzi Choꞌa Xtillꞌ Chiozaꞌ choeꞌn xtillaanaꞌ,
40 aga cheenile gakle nadꞌ txen kwenc̱he gatꞌ yeḻꞌ mban c̱hele daa bi te c̱heyin.
41 ’Aga chyalljidꞌ no koo nadꞌ balaaṉ.
42 Naꞌ nombiaꞌ leꞌ, naꞌ ṉezidꞌ aga chakile Chiozaꞌ.
43 X̱aꞌ Chiozaꞌ bseḻee nadꞌ naꞌ ba bidꞌ, naꞌ bi chzenagle c̱haꞌ. San shi yid beṉꞌ yoblə tobiaꞌlozeꞌ, beenaꞌlan ḻe gak c̱hele.
44 ¿Nakrakzə gonle shajḻeꞌle c̱haꞌ? Ḻaꞌ gangazə chgoo ljwell-le balaaṉ, naꞌ bi chinole shoꞌle balaaṉ c̱he beenaꞌ zeelo nak Chios.
45 Bi gakile nadꞌ gawꞌ xya c̱hele lao X̱aꞌ Chiozaꞌ, ḻaꞌ zoa sto beṉꞌ gaweꞌ xya c̱hele. Dii Moisézaꞌ, beenaꞌ nonle lez gakleneꞌ leꞌ, ḻenꞌ gaweꞌ xya c̱hele lao X̱aꞌ Chiozaꞌ.
46 Ḻaꞌ sheḻꞌ chajḻeꞌle daa bzej dii Moisézaꞌ, ḻekzkaꞌ wyajḻeꞌle c̱haꞌ, sheḻꞌkaꞌ. Ḻaꞌ ḻenꞌ bzejeꞌ xtillaanaꞌ.
47 Naꞌ daa bi chajḻeꞌle c̱he daa bzej dii Moisézaꞌ, ¿nakra gonle shajḻeꞌle c̱he diiki niaꞌ?