Bshaljlen Jesúzaꞌ to nool Samaria
4
Fariseokaꞌ gokbeꞌgakileꞌ beṉꞌ zanch nakgakeꞌ Jesúzaꞌ txen, naꞌ beṉꞌ zanch chchoeꞌ nisaꞌ aga ka Juannaꞌ,
2 ḻaꞌkzi aga kwin Jesúzanꞌ bchoeꞌ beṉꞌ nisaꞌ, san beṉꞌkaꞌ nakgakeꞌneꞌ txenan.
Jesús habla con una mujer samaritana (Juan 4.1-42)
3 Naꞌ ka gokbeꞌi Jesúzaꞌ ba ṉezi fariseokaꞌ beṉꞌ zanch nakgakeꞌneꞌ txen, naꞌch bizee ganaꞌ mbani Judeanaꞌ ziyajeꞌ ganaꞌ mbani Galiléanaꞌlə.
4 Naꞌ kwenc̱he yillineꞌ ganaꞌ mbani Galileanaꞌ chiyaḻꞌ yidieꞌ ganaꞌ mbani Samárianaꞌ.
5 Naꞌ billingakeꞌ to yell dii le Sicar, daa llia ganaꞌ mbani Samárianaꞌ. Naꞌ yellaꞌ llian gaozə ganaꞌ de yell-lionaꞌ beꞌ dii Jacobaꞌ xiiṉeꞌ dii Josénaꞌ.
6 Naꞌ lo yell-lionaꞌ llia posaꞌ wden dii Jacobaꞌ. Naꞌch wcheꞌ Jesúzaꞌ choꞌa posaꞌ daa ba chjx̱akchgaileꞌ zingwee nezaꞌ. Naꞌ ba chonan ka gobill.
7-8 Naꞌ beṉꞌkaꞌ nakgakeꞌneꞌ txen zejgakeꞌ yellaꞌ zjx̱iꞌgakeꞌ daa gaolengakeꞌneꞌ. Naꞌ choꞌa posaꞌ chiꞌ Jesúzaꞌ ka bllin to noolə Samaria zjx̱iꞌe nisaꞌ. Naꞌ cheꞌ Jesúzaꞌneꞌ:
―Beṉ latꞌ nis yeejꞌ.
9 Naꞌch cheꞌ noolə Samárianaꞌneꞌ:
―¿Berac̱he chṉabziloꞌ nadꞌ nisaꞌ yeejoꞌ?, ḻaꞌ beṉꞌ Israel liꞌ, naꞌ nool Samaria nadꞌ.
―Sheḻꞌkaꞌ ṉezshailoꞌ daa choṉ Chiozaꞌ naꞌ no nadꞌ chṉabidꞌ liꞌ nisaꞌ yeejꞌ, ba wṉabiloꞌ nadꞌ goṉ daa yeejoꞌ, sheḻꞌkaꞌ, ḻaꞌ napꞌ to nis yaa nis ban daa goṉ liꞌ.
11 Naꞌ noolaꞌ chiꞌeneꞌ:
―Beṉꞌdoꞌ, bibi nox̱oo wḻepiloꞌ nisaꞌ, naꞌ posi ḻe zitjan. ¿Gara lljx̱iꞌo nis yaa nis bannaꞌ goṉoꞌ nadꞌ nazoꞌ kaꞌ?
12 Dii x̱ozxtoꞌcho Jacobaꞌ bkwaaṉleneꞌ netoꞌ posi gani weejeꞌ, naꞌ weej xiiṉeꞌkaꞌ naꞌ bayix̱ꞌ c̱heꞌkaꞌ. ¿Achakiloꞌ zakꞌchiloꞌ ka ḻeꞌ?
13 Naꞌ cheꞌ Jesúzaꞌneꞌ:
―Nottezə beṉꞌ cheejeꞌ nis c̱he posi, wbiḻchkzileꞌ dii yoblə.
14 San beenaꞌ yeej nisaꞌ daa wiꞌaneꞌ, aga wbiḻchileꞌ. Ḻaꞌ nisaꞌ daa wiꞌaneꞌ nakan ka to dii galchga ḻoo yic̱hjlallꞌdoꞌenaꞌ naꞌ gonan ka gatꞌ yeḻꞌ mban c̱heꞌ zejḻi kaṉi.
15 Naꞌch cheꞌ noolaꞌneꞌ:
―Beṉꞌdoꞌ, beṉ nadꞌ nisaꞌ noꞌ kaꞌ kwenc̱he bich ibiḻidꞌ naꞌ bich yid bejaꞌ ni.
16 Naꞌ cheꞌ Jesúzaꞌneꞌ:
―Biyaj jaṉe beṉꞌ c̱hoꞌnaꞌ, naꞌ daleneꞌ ni.
17 Naꞌ cheꞌ noolaꞌneꞌ:
―Aga no beṉꞌ c̱haꞌ zoa.
Naꞌ Jesúzaꞌ chiꞌeneꞌ:
―Lekziloꞌ noꞌ kaꞌ, aga no beṉꞌ c̱hoꞌ zoa.
18 Ḻaꞌ ba gok gayꞌ beṉꞌ c̱hoꞌkaꞌ, naꞌ beenaꞌ zoalenoꞌ ṉaa ni bi nshagnaꞌlenkzoꞌneꞌ. Shḻikzan ba wṉioꞌ.
19 Naꞌch noolaꞌ chiꞌeneꞌ:
―Beṉꞌdoꞌ, ba gokbeꞌidꞌ nakoꞌ to beṉꞌ chyix̱jee daa na Chiozaꞌ.
20 Dii x̱ozxtoꞌntoꞌkaꞌ beꞌlaꞌogakeꞌ Chiozaꞌ lo yaani, naꞌ leꞌ beṉꞌ Israel nale chonan byen weꞌlaꞌochoneꞌ Jerusalénnaꞌ.
21 Naꞌ cheꞌ Jesúzaꞌneꞌ:
―Noolə, wyajḻeꞌ c̱haꞌ, wllin lla katꞌ bich gonan byen yidle lo yaani, ni bich gonan byen shajle Jerusalénnaꞌ kwenc̱he weꞌlaꞌole X̱acho Chiozaꞌ.
22 Leꞌ beṉꞌ Samaria ni bi nombiaꞌle non choeꞌlaꞌole, san netoꞌ beṉꞌ Israel nombiaꞌntoꞌ Chiozaꞌ, beenaꞌ choeꞌlaꞌontoꞌ, ḻaꞌ ladjntoꞌnanꞌ ichej beenaꞌ yisleꞌ beṉꞌ kwenc̱he bi kwiayiꞌgakeꞌ.
23 Ba zoa illin lla, wa ba bllinkz llanaꞌ beṉꞌkaꞌ dii ḻi choeꞌlaꞌogakeꞌ X̱acho Chiozaꞌ weꞌlaꞌogakeꞌ beenaꞌ nak dowalj Chios do yic̱hj do lallgakeꞌ, ḻaꞌ kanꞌ chaklallꞌ X̱acho Chiozaꞌ weꞌlaꞌochoneꞌ.
24 Chiozaꞌ nakeꞌ Espíritu, naꞌ beṉꞌkaꞌ cheengakileꞌ weꞌlaꞌogakeꞌneꞌ, chiyaḻꞌ weꞌlaꞌogakeꞌneꞌ dowalj naꞌ do yic̱hj do lallꞌgakeꞌ.
25 Naꞌ cheꞌ noolaꞌneꞌ:
―Ṉezidꞌ wlaꞌ beenaꞌ chbezcho wseḻꞌ Chiozaꞌ beenaꞌ nsiꞌe Mesías wa Cristo. Naꞌ katꞌ yideꞌ, wzajniileꞌ choꞌ yogꞌ diiki.
26 Naꞌ cheꞌ Jesúzaꞌneꞌ:
―Nadꞌkzanꞌ beenaꞌ noꞌ kaꞌ, naꞌ ḻenꞌ chshaljleneꞌ liꞌ.
27 Naꞌ shlak choeꞌleneꞌ noolaꞌ dillꞌ, billin beṉꞌkaꞌ nakgakeꞌneꞌ txen naꞌ bibangakileꞌ daa chshaljlen Jesúzaꞌ to noolə. Per ni toeꞌ bi biyaxji iṉabileꞌneꞌ bin cheeni noolaꞌ wa bi dillaan chshaljleneꞌneꞌ.
28 Naꞌch noolaꞌ bkwaaṉeꞌ chee nis c̱heꞌnaꞌ naꞌzə, naꞌ biyajeꞌ jayelleꞌ beṉꞌ wlall c̱heꞌkaꞌ:
29 ―Ḻi da lljawiacho to beṉꞌ ba wneꞌ nadꞌ yogꞌ diikaꞌ ba benꞌ. ¿Aaga ḻenꞌ Crístonaꞌ, lla?
30 Naꞌch blleshgakeꞌ yellaꞌ wyajgakeꞌ ganaꞌ chiꞌ Jesúzaꞌ.
31 Naꞌ shlak ziyaj noolaꞌ zeyid beṉꞌkaꞌ nak Jesúzaꞌ txen cheꞌgakeꞌneꞌ:
―Maestro, wdao latꞌ.
32 Naꞌ Jesúzaꞌ chiꞌe ḻegakeꞌ:
―De to yeḻꞌ wao c̱haꞌ daa bi nombiaꞌle.
33 Naꞌch cheꞌ ljwell beṉꞌkaꞌ nakgakeꞌneꞌ txen:
―¿Anti no ba bidwaꞌ dii wdaweꞌ, lla?
34 Naꞌ cheꞌ Jesúzaꞌ ḻegakeꞌ:
―Yeḻꞌ wao c̱haꞌnaꞌ nakan daa chonꞌ ka cheeni beenaꞌ bseḻꞌ nadꞌ naꞌ wzeeloaꞌ daa cheenileꞌ gonꞌ.
35 Leꞌ nazle: “Chyalljch zi tap beoꞌ kwenc̱he yiziꞌ yilapcho.” Per nadꞌ niaꞌ leꞌ, ḻi wwiakachi ba de daa yiziꞌ yilapcho.
36 Beenaꞌ chyix̱jee choꞌa xtillꞌ Chiozaꞌ ṉaa, zaklebileꞌ to beṉꞌ ba chilaḻileꞌ chiziꞌ chilapeꞌ. Naꞌ beṉꞌkaꞌ chzenag daa chyix̱jiꞌe, gatꞌ to yeḻꞌ mban c̱hegakeꞌ zejḻi kaṉi, naꞌ beenaꞌ goz yibalenileꞌ beenaꞌ chiziꞌ chilap.
37 Nakan ka dillaa de daa na: “Beṉꞌ yoblan chaz naꞌ beṉꞌ yoblə chiziꞌ chilap.”
38 Nadꞌ ba bseḻaa leꞌ lljalaple ganaꞌ bi bllaglole gozle, ḻaꞌ leꞌ gonle ka wzenag beṉꞌ choꞌa xtillꞌ Chiozaꞌ daa wdix̱jee beṉꞌ yoblə.
39 Beṉꞌ zan beṉꞌ Samáriakaꞌ, beṉꞌkaꞌ lleꞌ yell Sicaraꞌ benḻilallꞌgakeꞌ Jesúzaꞌ daa goll noolaꞌ ḻegakeꞌ: “Ba wneꞌ nadꞌ yogꞌte dii ba benꞌ.”
40 Naꞌch ka bllingakeꞌ ganaꞌ chiꞌ Jesúzaꞌ, gotꞌyogakileꞌneꞌ kwenc̱he yigaaṉleneꞌ ḻegakeꞌ. Naꞌ bigaaṉeꞌ naꞌ c̱hop lla.
41 Naꞌ beṉꞌ zanch benḻilallꞌgakeꞌneꞌ daa bengakileꞌ dillaa choꞌe.
42 Naꞌch cheꞌgakeꞌ noolaꞌ:
―Ṉaach ba chajḻeꞌntoꞌ, aga daa wnazoꞌ netoꞌ kanꞌ, san kwinkzntonꞌ ba benintoꞌ choꞌe dillaa naꞌ ṉezintoꞌ dii ḻi ḻekzenꞌ beenaꞌ yisla beṉꞌ yell-lioni kwenc̱he bi kwiayiꞌgakeꞌ.
Jesúzaꞌ biyoneꞌ xiiṉ to beṉꞌ wṉabiaꞌ
43 Naꞌ ka gok c̱hop lla, bizee biyajeꞌ ganaꞌ mbani Galileanaꞌ.
Jesús sana al hijo de un oficial (Juan 4.43-54)
44 Kwinkz Jesúzaꞌ wneꞌ nan to beṉꞌ chyix̱jee daa cheꞌ Chiozaꞌneꞌ aga no chgoo ḻeꞌ balaaṉ lalleꞌnaꞌ.
45 Naꞌ ka billineꞌ ganaꞌ mbani Galileanaꞌ, blebgakeꞌneꞌ daa bleꞌgakileꞌ yogꞌ daa beneꞌ Jerusalénnaꞌ ka goḻꞌ lṉi Paskwaꞌ.
46 Naꞌ dii yoblə wizaj Jesúzaꞌ yell Canánaꞌ daa llia ganaꞌ mbani Galileanaꞌ, ganaꞌ biyoneꞌ nisaꞌ vino. Naꞌ yellaꞌ zoa to beṉꞌ zakii beṉꞌ chon llin c̱he beṉꞌ wṉabiaꞌnaꞌ, naꞌ zoa to xiiṉeꞌ biꞌ byo bi shaoꞌbꞌ.
47 Naꞌ ka wṉezileꞌ ba billin Jesúzaꞌ Galileanaꞌ zizee Judeanaꞌlə, naꞌ wyajeꞌ laweꞌnaꞌ gotꞌyoileꞌneꞌ shajeꞌ lljayeneꞌ biꞌ c̱heꞌnaꞌ daa ba chakshwetbꞌ.
48 Naꞌch cheꞌ Jesúzaꞌneꞌ:
―Aga wyajḻeꞌle c̱haꞌ shi bibi yeḻꞌ wak gonꞌ ileꞌile.
49 Naꞌ beṉꞌ wṉabiaꞌnaꞌ chiꞌeneꞌ:
―Beṉꞌdoꞌ, ben goklen dagach ṉaate, shategali biṉꞌ guet biꞌ c̱haꞌnaꞌ.
50 Naꞌch cheꞌ Jesúzaꞌneꞌ:
―Biyaj, jawia. Aga wet biꞌnaꞌ.
Naꞌ beenaꞌ wyajḻiꞌe daa goll Jesúzaꞌneꞌ naꞌ bizee.
51 Naꞌ ka ba zoa yillineꞌ lilleꞌnaꞌ jatiḻ xmoseꞌkaꞌ ḻeꞌ, cheꞌgakeꞌneꞌ:
―Ba biyaki biꞌ c̱hoꞌnaꞌ.
52 Naꞌch wṉabileꞌ ḻegakeꞌ ka do bi gor wzolo chiyakshaoꞌlallꞌbꞌ. Naꞌ cheꞌgakeꞌneꞌ:
―Daa ṉeji do ka chida to bichejbꞌ dii ḻanaꞌ.
53 Naꞌch gokbeꞌi x̱abaa biyakshaoꞌlallꞌbꞌ ka goraꞌ goll Jesúzaꞌneꞌ: “Biyaj jawia. Aga wet biꞌnaꞌ.” Naꞌ ḻeꞌ len yogꞌ beṉꞌkaꞌ zoa lilleꞌnaꞌ benḻilallꞌgakeꞌ Jesúzaꞌ.
54 Dga gok de wchopi yeḻꞌ wakkaꞌ ben Jesúzaꞌ Galileanaꞌ ka zizee Judeanaꞌ.