Daa chx̱iṉj yic̱hjlallꞌdoꞌ beṉec̱haꞌ
15
Baḻ fariseokaꞌ naꞌ beṉꞌkaꞌ chliꞌ chsedi leyaꞌ, wzaꞌgakeꞌ Jerusalénnaꞌ naꞌ wyajgakeꞌ lao Jesúzaꞌ, wṉabgakileꞌneꞌ:
2 ―¿Bic̱he beṉꞌki nakgakeꞌ liꞌ txen bi chongakeꞌ ka wyoolo dii x̱ozxtoꞌchokaꞌ? Ḻaꞌ bi chix̱is chiyib neekaꞌ ka ziꞌ gaogakeꞌ.
3 Naꞌ wṉabi Jesúzaꞌ ḻegakeꞌ chiꞌe:
―¿Bic̱he chyishjle daa nllia Chiozaꞌ biaꞌ gonle naꞌ zechle wṉeyi chonle ka ben dii x̱ozxtoꞌchokaꞌ?
4 Ḻaꞌ kin wna Chiozaꞌ: “Ḻi gap x̱axṉaꞌle balaaṉ”, naꞌ “Beenaꞌ iṉe zban c̱he x̱eꞌnaꞌ wa xṉeenaꞌ, chiyaḻꞌ gueteꞌ.”
5 Per leꞌ, nale wak yeꞌ beṉꞌ x̱axṉeenaꞌ: “Bi gak gaklenꞌ leꞌ, ḻaꞌ yogꞌ daa napꞌ ba nc̱hebꞌ wiꞌan Chiozaꞌ.”
6 Naꞌ beenaꞌ yee x̱axṉeenaꞌ kaꞌ, choꞌallaleneꞌ daa nale bi chonan byen gakleneꞌ ḻegakeꞌ. Naꞌ daa chonle kaꞌ, chonile daa nllia Chiozaꞌ biaꞌ goncho ka to dii bibi zakii kwenc̱he nole diikaꞌ wyoolo dii x̱ozxtoꞌchokaꞌ.
7 ¡Leꞌ beṉꞌ wxiyeꞌ, leꞌ wen gan! Kwasḻoḻ inlleb beꞌ dii Isaíazaꞌ xtillꞌle, ka wneꞌ:
8 Beṉꞌki choeꞌlaꞌogakeꞌ nadꞌ de choꞌa ḻollꞌzgakeꞌ,
ḻaꞌ aga do yic̱hj do lallꞌgakenꞌ choeꞌlaꞌogakeꞌ nadꞌ.
9 Bibi zjanayin chonzgakeꞌ ka beṉꞌ choeꞌlaꞌo nadꞌ;
naꞌ diikaꞌ chliꞌ chsedgakileꞌ nakgakan c̱he beṉꞌ yell-lioz.
10 Naꞌ wṉe Jesúzaꞌ beṉꞌkaꞌ lleꞌ naꞌ, golleꞌ ḻegakeꞌ:
―Ḻi wzenag dga iṉiaꞌ leꞌ naꞌ ḻi shajniin.
11 Aga daa cheej chao beṉaan chx̱iṉj chḻenan yic̱hjlallꞌdoꞌenaꞌ, san dillꞌkaꞌ chchej choꞌenanꞌ, ḻennanꞌ chx̱iṉj chḻenan yic̱hjlallꞌdoꞌenaꞌ.
12 Naꞌch beṉꞌkaꞌ nak Jesúzaꞌ txen wbigꞌgakeꞌ kwiteꞌnaꞌ, gollgakeꞌneꞌ:
―¿Azakbeꞌiloꞌ gokziꞌchgayi fariseokaꞌ ka bengakileꞌ wnoꞌ kaꞌ?
13 Naꞌch goll Jesúzaꞌ ḻegakeꞌ:
―Nottezə beṉꞌ bi chzenagueꞌ c̱he X̱aꞌnaꞌ zoa yabanaꞌ, yiyol yiniteꞌ, naꞌ gak c̱heꞌ ka chak c̱he to yag dii chḻallꞌ beṉꞌ do loyin.
14 Jwayishazi fariseokaꞌ, ḻaꞌ nnit nc̱hoḻgakilenꞌ. Naꞌ ṉezicho shi to beṉꞌ lc̱hoḻ wc̱hiꞌe sto ljwell lc̱hoḻeꞌ, c̱hoptieꞌ lljabix̱.
15 Naꞌch Pédronaꞌ golleꞌ Jesúzaꞌ:
―Bizajnii netoꞌ bi zejin jemplaꞌ daa ba bseesoo.
16 Naꞌch goll Jesúzaꞌ ḻegakeꞌ:
―¿Aḻekzkaꞌ lenle biṉꞌ shajniile bi zejin daa ba wniaꞌ?
17 ¿Abi ṉezile nan daa cheej chaocho chjc̱heꞌn ḻoo ḻeechonaꞌ naꞌtech chiden?
18 Per ka nak daa chṉecho, ḻennanꞌ chalj chxen ḻoo yic̱hjlallꞌdoꞌchonaꞌ. Naꞌ shi chṉecho dii bi nak wen, ḻennanꞌ chx̱iṉj chḻenan choꞌ.
19 Ḻaꞌ ḻoo yic̱hjlallꞌdoꞌ beṉec̱hanꞌ chalj chxe diiki bi nak wen: yeḻꞌ chon xya, yeḻꞌ chṉelen ljwellin, yeḻꞌ wban, yeḻꞌ chyiljlallꞌ c̱he beṉꞌ, naꞌ yeḻꞌ chbell chṉe c̱he beṉꞌ.
20 Diikin chx̱iṉjan yic̱hjlallꞌdoꞌ beṉꞌ, aga daa bi chix̱is chiyib neenaꞌ ka ziꞌ gawenꞌ.
To noolə bi nak beṉꞌ Israel benḻilallee Jesúzaꞌ
21 Naꞌ bizaꞌ Jesúzaꞌ wyajeꞌ ganaꞌ mbani yell Tíronaꞌ len yell Sidónnaꞌ.
22 Naꞌ to noolə cananea zoeꞌ ganaꞌ mbani yellkaꞌ wbigueꞌ kwiteꞌnaꞌ naꞌ wṉieꞌ zilljə, chiꞌeneꞌ:
―X̱anꞌ, Xiiṉ dia c̱he dii Daví, biyeshꞌlallꞌgachi nadꞌ, ḻaꞌ biꞌ nool c̱haꞌnaꞌ yoobꞌ dii x̱iwaa naꞌ ḻe chsakꞌziꞌn ḻebꞌ.
23 Per Jesúzaꞌ bikzə bi golleꞌ noolaꞌ. Naꞌch beṉꞌkaꞌ nakgakeꞌneꞌ txen wbigꞌgakeꞌ kwiteꞌnaꞌ gollgakeꞌneꞌ:
―Goll nooli yiyajeꞌ, ḻaꞌ kon chosyee zidnoeꞌ choꞌ.
24 Naꞌch goll Jesúzaꞌ:
―Bseḻꞌ Chiozaꞌ nadꞌ kwenc̱he gaklenꞌ to beṉꞌ Israelkaꞌzə, beṉꞌkaꞌ nak ka xilꞌkaꞌ wnit.
25 Naꞌch noolaꞌ jabiguee kwit Jesúzaꞌ naꞌ bc̱hekꞌ xibeꞌnaꞌ laweꞌnaꞌ chiꞌeneꞌ:
―¡X̱anꞌ, goklengach nadꞌ!
26 Naꞌch cheꞌ Jesúzaꞌneꞌ:
―Bi nakan wen yikaacho yeḻꞌ wawaꞌ chao biꞌdoꞌ c̱hechokaꞌ naꞌ weꞌchon bekwꞌkaꞌ.
27 Naꞌch noolaꞌ chiꞌeneꞌ:
―Lekziloꞌ, X̱anꞌ, per chak chao xikwꞌchokaꞌ diikaꞌ chxop lo yonaꞌ.
28 Naꞌch goll Jesúzaꞌneꞌ:
―¡Noolə, nonḻilallꞌlikzoꞌ nadꞌ! Naꞌ gak ka cheeniloꞌ.
Naꞌ katenaꞌ lii biyakteyi biꞌ nool c̱heꞌnaꞌ.
Jesúzaꞌ biyoneꞌ beṉꞌ zan
29 Naꞌ bizaꞌ Jesúzaꞌ naꞌ, naꞌ billineꞌ choꞌa nisdoꞌ c̱he Galileanaꞌ naꞌ wyepeꞌ to lo yaa jc̱hiꞌe.
30 Naꞌ beṉꞌ zan bllin laweꞌnaꞌ nc̱heꞌgakeꞌ no beṉꞌ bi chak saꞌ, no beṉꞌ lc̱hoḻ, no beṉꞌ bi chak iṉe, no beṉꞌ nxiṉj, no beṉꞌ chak bichlə yillweꞌ. Naꞌ bzoagakeꞌ ḻegakeꞌ lao Jesúzaꞌ naꞌ biyoneꞌ ḻegakeꞌ.
31 Naꞌ bibani beṉꞌkaꞌ ka gok, ḻaꞌ beṉꞌkaꞌ bi chak iṉe wṉegakeꞌ, naꞌ beṉꞌkaꞌ nxiṉj biyakgakileꞌ, naꞌ beṉꞌkaꞌ bi chak saꞌ wzaꞌgakeꞌ, naꞌ beṉꞌ lc̱hoḻkaꞌ bleꞌgakileꞌ. Naꞌch yogꞌḻoḻ beṉꞌkaꞌ beꞌlaꞌogakeꞌ Chios, beenaꞌ choeꞌlaꞌo beṉꞌ Israelkaꞌ.
Jesúzaꞌ bwaweꞌ tapa mil beṉꞌ
32 Naꞌch gox Jesúzaꞌ beṉꞌkaꞌ nakgakeꞌneꞌ txen, naꞌ golleꞌ ḻegakeꞌ:
―Ḻe chiyeshidꞌ beṉꞌki, ḻaꞌ ba gok shoṉ lla zoalengakeꞌ choꞌ ni, naꞌ aga bi de dii gaogakeꞌ. Naꞌ bi cheenidꞌ yisangakee daa biṉꞌ gaogakeꞌ, ḻaꞌ nxoll ikwidgakileꞌ tnezaꞌ.
33 Naꞌ cheꞌ beṉꞌkaꞌ nakgakeꞌneꞌ txen:
―Per ¿ga lljx̱iꞌcho dii gao yogꞌḻoḻ beṉꞌki?, ḻaꞌ gani lleꞌcho kono zoa witꞌ dii gaocho.
34 Naꞌch wṉabi Jesúzaꞌ ḻegakeꞌ, chiꞌe:
―¿Zi baḻchga yetxtil c̱hechokaꞌ de?
Naꞌ cheꞌgakeꞌneꞌ:
―De gall yetxtilkaꞌ naꞌ sto c̱hop beḻ.
35 Naꞌch goll Jesúzaꞌ beṉꞌkaꞌ kweꞌgakeꞌ lo yonaꞌ.
36 Naꞌ bex̱ee yetxtilkaꞌ gall naꞌ beḻkaꞌ naꞌ biꞌe Chiozaꞌ yeḻꞌ chox̱ken, naꞌ bxoxjeꞌn biꞌen beṉꞌkaꞌ nakgakeꞌneꞌ txen kwenc̱he beꞌgakeꞌ c̱he c̱he beṉꞌkaꞌ.
37 Naꞌ yoguee wdao ax̱t ka beljgakileꞌ. Naꞌ wdenaꞌ bitopgakeꞌ dii laoꞌkaꞌ bichooṉan, gokten zi gall xetꞌ.
38 Naꞌ beṉꞌ byokaꞌ wdao nakgakeꞌ tapa mil, naꞌ bi blabgakeꞌ noolkaꞌ ni biꞌdoꞌkaꞌ wdao.
39 Naꞌ biyoll bisaꞌ Jesúzaꞌ ḻegakeꞌ, biyoꞌe to ḻoo barkw len beṉꞌkaꞌ nakgakeꞌneꞌ txen naꞌ biyajgakeꞌ ganaꞌ mbani yell Magdálanaꞌ.