Diikaꞌ chx̱iṉj chḻenan yic̱hjlallꞌdoꞌchonaꞌ
7
Fariseokaꞌ len zi baḻ beṉꞌkaꞌ chliꞌ chsedi leyaꞌ, beṉꞌkaꞌ zaak Jerusalénnaꞌ, bllingakeꞌ lao Jesúzaꞌ.
San Marcos 7:1-16
2 Naꞌ ka bleꞌgakileꞌ baḻ beṉꞌkaꞌ nak Jesúzaꞌ txen bi bix̱is biyib neekaꞌ ka ziꞌ gaogakeꞌ, naꞌ wdaogakeꞌ xya c̱hegakeꞌ.
3 (Ḻaꞌ fariseokaꞌ len yogꞌz beṉꞌ Israelkaꞌ ni nogakeꞌ daa bliꞌ bsedi dii x̱ozxtoeꞌkaꞌ ḻegakeꞌ nan bi gak gaogakeꞌ shi biṉꞌ yix̱is yiyib neekaꞌ.
4 Naꞌ ka chiyoll chajgakeꞌ lao yaanaꞌ shi bi yix̱is yiyib neekaꞌ bi gak gaogakeꞌ. Naꞌ ḻekzkaꞌ chix̱is chiyibgakeꞌ diikaꞌ cheej chaogakileꞌ. Naꞌ dii zanch diikaꞌ yoologakeꞌ chongakeꞌ.)
5 Naꞌ fariseokaꞌ len beṉꞌkaꞌ chliꞌ chsedi leyaꞌ wṉabgakileꞌ Jesúzaꞌ, cheꞌgakeꞌ:
―¿Bic̱he bi chon beṉꞌki nakoꞌ txen ka bliꞌ bsedi dii x̱ozxtoꞌchokaꞌ choꞌ?, ḻaꞌ bi chix̱is chiyib neekaꞌ katꞌ cheej chaogakeꞌ.
6 Naꞌ cheꞌ Jesúzaꞌ ḻegakeꞌ:
―Kwasḻoḻ inlleban wṉe dii Isaíazaꞌ c̱hele, leꞌ beṉꞌ wxiyeꞌ, kanaꞌ bzejeꞌ daa na:
Ka nak beṉꞌki, de choꞌa dillꞌzan choeꞌlaꞌogakeꞌ nadꞌ,
naꞌ aga choeꞌlaꞌogakeꞌ nadꞌ do yic̱hj do lallꞌgakeꞌ.
7 Bibi zjanayin chongakeꞌ ka choeꞌlaꞌo nadꞌ;
naꞌ daa chliꞌ chsedgakileꞌ nakan dii chyiljlallꞌz beṉꞌ.
8 Naꞌ leꞌ chbej yic̱hjle daa nllia Chiozaꞌ biaꞌ gonle kwenc̱he gonle daa chyiljlallꞌ beṉꞌ yell-lioni.
9 Naꞌ ḻekzkaꞌ golleꞌ ḻegakeꞌ:
―Chzoale kaꞌlə daa nllia Chiozaꞌ biaꞌ gonle kwenc̱he gonle daa bliꞌ bsedi dii x̱ozxtoꞌlekaꞌ leꞌ.
10 Moisézaꞌ wneꞌ: “Ḻi koo x̱axṉaꞌlenaꞌ balaaṉ”, naꞌ “Beenaꞌ iṉe zban c̱he x̱axṉeenaꞌ chiyaḻꞌ gueteꞌ.”
11 Naꞌ leꞌ choeꞌle latj yee beṉꞌ x̱axṉeenaꞌ: “Bi gak gaklenꞌ leꞌ, ḻaꞌ yogꞌ dga de c̱haꞌ ba nc̱hebꞌ wiꞌan Chiozaꞌ.”
12 Naꞌ daa nale kaꞌ, bich chonle byen gaklen beṉꞌ x̱axṉeenaꞌ.
13 Naꞌ daa chonle kaꞌ, chzoale choꞌa xtillꞌ Chiozaꞌ kaꞌlə kwenc̱he chonle daa bliꞌ bsedi dii x̱ozxtoꞌlekaꞌ leꞌ. Naꞌ dii zanch ka dga chonle.
14 Naꞌ wṉe Jesúzaꞌ yogꞌ beṉꞌkaꞌ lleꞌ naꞌ, naꞌ golleꞌ ḻegakeꞌ:
―Ḻi wzenag dga iṉiaꞌ leꞌ, naꞌ ḻi shajniin:
15 Aga daa cheej chao beṉꞌ yell-lionin chx̱iṉj chḻenan ḻeꞌ. San daa chalj chxe ḻoo yic̱hjlallꞌdoꞌenanꞌ chx̱iṉj chḻenan ḻeꞌ.
16 Ka leꞌ chenile dga niaꞌ, ḻi sen wṉeyi.
17 Naꞌ ka bikwaseꞌ kwit beṉꞌkaꞌ lleꞌ naꞌ biyoꞌe ḻoo yoonaꞌ ganaꞌ zoagakeꞌ, naꞌ beṉꞌkaꞌ nakgakeꞌneꞌ txen wṉabgakileꞌneꞌ bi zejin daa golleꞌ beṉꞌkaꞌ.
San Marcos 7:17-37
―¿Ani leꞌ bi chajniilen? ¿Abi chajniile aga daa cheej chao beṉaan chx̱iṉj chḻenan ḻeꞌ?
19 Ḻaꞌ aga ḻoo yic̱hjlallꞌdoꞌenanꞌ illinan, san ḻoo ḻiꞌenanꞌ lljc̱heꞌn, naꞌtech yichejan.
―Daa chchej ḻoo yic̱hjlallꞌdoꞌ beṉꞌ yell-lioni, ḻennanꞌ chx̱iṉj chḻenan ḻeꞌ.
21 Ḻaꞌ ḻoo yic̱hjlallꞌdoꞌekanꞌ chalj chxe diiki bi nak wen: yeḻꞌ chzaꞌlallꞌ mal, yeḻꞌ chṉelen ljwellin, yeḻꞌ chiyit ljwellin,
22 yeḻꞌ wban, yeḻꞌ wzelallꞌ, yeḻꞌ wen dii mal, yeḻꞌ wxiyeꞌ, yeḻꞌ wenlen kwerp c̱heyinnaꞌ daa bi nxe bi nzakꞌ, yeḻꞌ xeꞌ, yeḻꞌ wyilj wzan dillꞌ c̱he beṉꞌ, yeḻꞌ chep chaꞌlallꞌ, naꞌ yeḻꞌ nc̱hoḻ nniti.
23 Yogꞌḻoḻ dii malki chalj chxegakan ḻoo yic̱hjlallꞌdoꞌ beṉꞌ naꞌ chx̱iṉj chḻengakan ḻegakeꞌ.
To noolə bi nakeꞌ beṉꞌ Israel benḻilallee Jesúzaꞌ
24 Naꞌ bizaꞌ Jesúzaꞌ ganaꞌ wzoeꞌ naꞌ ziyajeꞌ ganaꞌ mbani yell Tíronaꞌ naꞌch yell Sidónnaꞌ. Naꞌ bllineꞌ to yoo naꞌ bi goklallee no iṉezin, per bi gok wkwashee.
25 Naꞌ to noolə, beṉꞌ zoa to biꞌ nool c̱heꞌ yoobꞌ dii x̱iwaa, ka wṉezileꞌ bllin Jesúzaꞌ, lii wyajtieꞌ jac̱hekꞌ xibeꞌnaꞌ laweꞌnaꞌ.
26 Naꞌ noolaꞌ nakeꞌ beṉꞌ griego, naꞌ goljeꞌ ganaꞌ mbani Sirofenícianaꞌ. Naꞌ gotꞌyoileꞌ Jesúzaꞌ yibejeꞌ dii x̱iwaa yoo biꞌ nool c̱heꞌnaꞌ.
27 Naꞌ goll Jesúzaꞌ ḻeꞌ:
―Yogꞌzə beṉꞌ zigaate chwaweꞌ xiiṉeꞌkaꞌ. Ḻaꞌ bi nakan wen koyocho daa chao xiiṉchokaꞌ naꞌ wzaḻꞌchon lao bekwꞌkaꞌ.
28 Naꞌ cheꞌ noolaꞌ ḻeꞌ:
―Lekziloꞌn, beṉꞌdoꞌ, per bekwꞌkaꞌ chbeꞌgakb xan mesaꞌ naꞌ chitopgakb bḻaakaꞌ chxop.
29 Naꞌch golleꞌneꞌ:
―Ni c̱he dillii ba biꞌo, biyaj mbalaz. Ba bichej dii x̱iwaa yoo biꞌ c̱hoꞌnaꞌ.
30 Naꞌ ka billin noolaꞌ lilleꞌnaꞌ, bleꞌileꞌ biꞌ nool c̱heꞌnaꞌ debꞌ lo blagaꞌ naꞌ ba bichej dii x̱iwaa wyoobꞌ.
Biyon Jesúzaꞌ to beṉꞌ kwell naꞌ bi chak iṉetieꞌ
31 Naꞌ bizaꞌ Jesúzaꞌ ganaꞌ mbani Tíronaꞌ naꞌ bidieꞌ yell Sidónnaꞌ naꞌ billineꞌ ganaꞌ de nisdoꞌ c̱he Galileanaꞌ, ganaꞌ mbani Decápolizaꞌ.
32 Naꞌ jwaꞌgakeꞌ laweꞌnaꞌ to beṉꞌ kwell naꞌ leyi bi chaꞌyeṉꞌ iṉieꞌ, naꞌ gotꞌyogakileꞌneꞌ wx̱oa neenaꞌ yic̱hjeꞌnaꞌ.
33 Naꞌ bc̱heꞌ Jesúzaꞌneꞌ kaꞌlə ganaꞌ kono lleꞌ, naꞌ bṉeꞌ xbeneꞌnaꞌ ḻoo nagueꞌnaꞌ, naꞌ bllaa x̱eneenaꞌ lo xbeneꞌnaꞌ, bshileꞌn lo ḻollꞌ beenaꞌ.
34 Naꞌ bḻis jalaweꞌnaꞌ chaꞌlə, wkaalallee, naꞌ golleꞌneꞌ:
―¡Éfata! ―zejin: ¡Byalj!
35 Naꞌ lii byaljte nagueꞌnaꞌ, naꞌ gok bita ḻolleenaꞌ naꞌ bishaljeꞌ wen.
36 Naꞌ cheꞌ Jesúzaꞌ beṉꞌkaꞌ bleꞌi kono yeꞌgakeꞌ kaꞌ. Naꞌ ḻaꞌkzi golleꞌ ḻegakeꞌ kaꞌ, zizikli bzegakeꞌn dillꞌ.
37 Naꞌ ḻe bibangakileꞌ, cheꞌgakeꞌ:
―Yogꞌḻoḻte chak gon beeni, chiyoneꞌ beṉꞌkaꞌ bi cheni, naꞌ beṉꞌkaꞌ bi chak iṉe, choneꞌ ka chṉegakeꞌ.