Yang Pagpiar Ni Jesus Ta Kagaëman Tung Mga Tauan Na (9:1-6)
9
May dumang kaldaw ang ti Jesus nagpasagpun da tung mga tauan nang atiang pinagpilik nang sam puluk may durua.
Pagkatapus pinamiaran na ta kagaëman nirang mamagpalayas ta maskin unu pang mga dimunyuay ang namagsuut tung mga tau ig mamagpamaayën ka tung mga taung may mga laru.
Lucas 9:1-17
2 Dayun dang nanuw̓ul tung nira ang mamagliliw̓utun dang mamagparakaw̓utun natëtëngëd tung paggaraëmën yang Dios ang baklu tung mga tau kung ya pa ag̓aring mapalg̓uran da nira.
Pinanuw̓ul na kang mamagpamaayën tung may mga laru.
3 Baklu papanaway na,
sinugpatan na pang inaning,
“Kung magpanawamu ra nganing,
paisanu ilëm.
Indi mi ka isipën ang mag̓ëkël-ëkëlamu pa ta suyud,
maskin puyu-puyu pa ang pariu ka tung pag̓aëkël-ëkëlan ta mga manigpalimus,
maskin pamangan,
maskin kuarta,
maskin mga aw̓ël pang irimaraan mi.
4 Dispuis kung ariamu pang balayay nga patakwalay,
duunamu ilëm magdayun ang asta magliitamu ra ilëm.
5 Piru kung ariamu pa pangindiay ta mga tau,
bakluamu magliit,
pakdulan mi ta sasang sinyalis.
Yang apuk tung banwa nirang nag̓adëpët tung mga kakay mi,
ya ray itagbëng-tagbëngay mi ug̓ud asan da nga paamanay mi ang yang pagpakuindi nirang atia tung numyu ya ray panuw̓alan nira tung Dios,”
mag̓aning.
Atia,
ya ray mga tuyun ang ipinakdul ni Jesus tung nira baklu papanaway na.
6 Kapurisu numanyan namagpanaw ra ka man tanira ang namagliliw̓utun tung tanan ang mga baryu.
Maskin ay pa mamagpanaw,
sigi yang pagparakaw̓utun nira may yang pagparamaayënën nira tung mga taung may mga laru.
Yang Mga Balitang Nag̓aliwag̓an Ta Pag̓isip Ni Adi Herodes (9:7-9)
7 Taa numanyan nabalitaan da ni Adi Herodes natëtëngëd tung mga bag̓ay ang atiang makabëw̓ërëng ang pagkarainabu ig naliw̓ëg̓an da ta mupia yang kulu na natëtëngëd ang pamansianing da yang duma ang ya unu ay kabuat-buatan ni Juan ang manigpamënyag ay nabui si ka unung uman.
8 Piru may dumang pamansianing ang ya unu ay kabuat-buatan ni Elias ang nagbalik da.
May duma pa ka ëngëd ang pamansianing ang ya unu ay kabuat-buatan yang sam bilug pang manigpadapat yang bitala yang Dios ang tukaw ang mga panimpu ang ya si ka unu ay nabuing uman.
9 Numanyan pagkagngël ni Adi Herodes yang balitang nagsari-sari ra ilëm,
ag̓aaning tung sadili na,
“Ti Juan yuu mismu ay nagpapug̓us yang dikël na.
Tinu pa kayang tauay tiang sam bilug ang nag̓abalitaanung pagpalapus ta mga maning tiang pruiba?”
ag̓aaning.
Purisu kumus nag̓aliwag̓an da ta mupia yang pag̓irisipën na,
indi ra tëmëgka mintras indi na mabag̓as ti Jesus ang para masisiguru na.
Yang Pagpapaan Ni Jesus Tung Mga Taung Buntun (9:10-17)
10 Taa numanyan atiing pagbalik da yang mga taralig̓an ni Jesus ang sam puluk may duruang atiang pinanuw̓ul nang mamagliliw̓utun,
namagbaw̓alitaën da tung anya natëtëngëd tung tanan ang nagkarabuat-buat nirang kaayënan tung mga tau.
Pagkatapus pinangkëlan da ni Jesus ang ipinampaag̓ës duun ampir tung lansangan ang pag̓aningën ang Betsaida,
ang tanira tanira ra ilëm.
11 Numanyan yang mga taung buntun asan,
pagkaintindi nira ang ti Jesus duun da nagpaag̓ës,
dayun da nirang sinikad.
Pagkaw̓ut nira,
dayun na rang sinapët ang pinapag̓intindi natëtëngëd tung paggaraëmën yang Dios ang naang baklung pag̓atukud na.
Dispuis kumpurming tinu pay nangaministiran tung anyang pamaayënën tung laru na,
luw̓us da kang pinampamaayën na.
12 Numanyan atiing papakërëp da yang kaldaw tung bukid,
yang mga taung nag̓apangugyatan ni Jesus ang atiang sam puluk may durua,
namagpalëngët da tung anyang mag̓aning,
“Amëëy,
maayën pa,
pampapanawën mu ra ilëm yang mga taung atia ug̓ud mamansiangay ra ilëm duun tung mga baryung alëlëngëtën,
ang basi pa ra ilëm mangaita ta mapangan nira may mga balay kang maëlkan nira.
Ay naawita ra ka pa man tung rugal ang naang kapas,”
ag̓aaning.
13 Mag̓aning ti Jesus ang nagtimalës,
“Yamu ray magpapaan tung nira.”
Mag̓aning ka tanirang namagtimalës,
“Abëë yang nadipara yamën tung mga taung naa ya ra ilëm yang limang bilug ang tinapay ang gërëg̓ësyë may durua ka ilëm ang bilug ang ian.
Nusias yang gustu mung ianing basu,
yami pay papangalangën mu ta mapangan nira,
yang kinadaramëlën nirang atia pa man?”
ag̓aaning.
14 Nangapagbitala ta maning tia ay yang kinadakël yang mga taung atii,
pagdangat tung limang liw̓u nga tauan,
puira pa tung mga baw̓ay may tung mga mamula.
Numanyan ag̓aaning ti Jesus ang nagtimalës,
“Ala,
bërëblag̓ën mi ra kanay ta mga tag lilimang puluk nga tauan kaw̓a pampakarungun mi ra ka tung tanëk,”
ag̓aaning.
15 Pagkatapus dayun da nirang ipinampakarung ta maning ka tiing itinuw̓ul na tung nira.
16 Numanyan ti Jesus,
pagkadawat na yang mga tinapay ang atiang limang bilug may yang ian ang atiang duruang bilug,
dayun dang tuminingarang nagpasalamat tung Dios.
Pagkatapus diritsyu rang pinagpingas-pingas nang ipinamakdul-pakdul tung mga aruman na ang para ipanagtag-tagtag da nira tung mga taung atiang buntun.
17 Numanyan tanirang tanan nangapamangan dang asta namampabial dang luw̓us.
Pagkatapus atiing tuw̓urun da yang mga aruman ni Jesus yang mga yëpëd-yëpëd yang pinamanganan nira,
sam puluk may durua pa nga baayan yang napnuk nira.
Nag̓ailala Ni Pedro Ang Ti Jesus Ya Ra Yang Pag̓aningën Ang Cristo (9:18-20)
18 Taa numanyan,
may dumang kaldaw ang ti Jesus nag̓ampu ang tanya ilëm ang sam bilug.
Pati yang mga taung nag̓apangugyatan na duun ka.
Matapus ta pag̓ampu na,
dayun dang nagtalimaan tung nirang mag̓aning,
“Ëlat kanay,
ang yuu pagkërësën-kësënan ta mga tau,
unu pay pagpabëtang nira tung yëën?”
Lucas 9:18-27
19 Mag̓aning ka tanirang namagtimalës,
“Mag̓aning yang duma ang yawa unu ti Juan ang manigpamënyag ang nabui si kang uman.
Yang duma pag̓aning ka ang yawa unu ti Elias.
Yang pintu yang duma ang yawa unu sasang manigpalatay yang bitala yang Dios ta nagtukaw ang timpu ang ya si kay nabuing uman,”
ag̓aaning.
20 Mag̓aning ti Jesus ang nanalimaan si,
“Ay ta numyu,
unu pay numyung pagpabëtang tung yëën?”
Numanyan ti Pedro ya ray nagtuw̓al ang mag̓aning,
“Yawa ra ka man yang pag̓aningën ang Cristo!”
Nag̓ipasanag Ni Jesus Kung Unu Pay Dapat Ang Panawan Na, Pati Yang Dapat Kang Panawan Yang Kumpurming Mga Tauan Na (9:21-27)
21 Atii,
dayun dang nagkalalangan ti Jesus tung nirang mag̓aning,
“Luay!
Indiamu ra kanay magbaw̓alitaën maskin tung ninu pa ang yuu yang pag̓aningën ang Cristoa.
22 Ay ya pa ag̓ari,
yang nag̓aingaluk ni Ama tung yëën ang pag̓aningën ang Maninga Tau,
dapataung mapasaran ta pinitinsiang durug lëbat ay pangindianaw yang mga pamagpakigmaëpët may yang mga paring arabubwat ta katëngdanan may yang mga sag̓ad ang pagkatapus ipaimatayaw ra ka dayun nira.
Piru maskin pang maning tiang dapat ang mapasaranu,
tung pagkaw̓ut yang yaklung kaldaw,
pabungkarasënaw ra ka ëngëd yang Dios,”
ag̓aaning.
23 Atii dayun dang nagpasanag tung nirang mag̓aning,
“Kung tinu pay nag̓alëlyag dang magpakignunut tung yëën,
yang sadili na ya lipatay na.
Kaldaw-kaldaw yang isip na ya ag̓ipatëntënay nang mag̓agwanta tung mga pinitinsia,
maskin ilansang pa tung krusb.
Dapat maning tia yay ipabalay na tung isip na kung gustu nang magpaugyat tung yëën.
24 Ay kipurki kung tinu pay ag̓alëlyag ang yang sadili na ilibri na tung malain,
asan da nga kapa-kapaay na yang kaampiran na tung yëën.
Piru kung tinu pay mamirdi tung sadiling kalëlyag̓an na natëtëngëd ilëm tung yëën ang yuu ray nag̓ipalusu na ta gëgma na,
yang taung atia,
asan da ka nga siguruay na yang kaampiran na tung yëën ang yay pagnatisan nang asta tung sampa.
25 Kipurki unu pa pay pakinaw̓ang yang sasang taung magkatinir da ta tanan ang nag̓alëlyag̓an na taa tung kaliw̓utan ang naa ang pagkatapus asan da nga plëkay ta ipagnatis na tung kaliw̓utan ang baklu?
Andang pisan!
26 Ag̓aningënamu ra yëën ta maning tia ay natëtëngëd kung tinu pay maëyak ang mangërëngan tung yëën taa tung kaliw̓utan ang naa ubin yang bitalaw ikaëyak na kang ipagngël tung mga masigkatau na,
tung uri,
tanya ra kay ikaëyakung ingwaraën ang bëlag̓an tauanu.
Ay ta yëën ang pag̓aningën ang Maninga Tau,
kung maglëkataw ra nganing ang para maggaraëmënaw ra tung kaliw̓utan ang baklu,
duru rag kasusulaw yang pagkabëtangu ang yang pisan yang kasusulawën ang pag̓atiniran kang lag̓i ni Ama pati mga angil ang sagradu.
27 Iugtulu tung numyu yang kamatuuran.
May duma asan tung numyu ang baklu magkarapatay,
mabilug̓an da ka ëngëd nira yang palaksu yang paggaraëmën yang Dios kung ya pa ag̓ari,”
ag̓aaning ti Jesus duun tung nira.
Yang Pagpaita Ni Jesus Yang Kasusulawën Na (9:28-36)
28 Numanyan atiing pagpanaw ra ta mga san linggu tung pagkainambit ni Jesus yang mga bag̓ay ang atia,
nanungul da tung sasang bukid ang para duun da mag̓arampuën tung Dios.
Pati ti Pedro may ti Juan durua ni Santiago ingkëlan na ra ka duun.
Lucas 9:28-45
29 Numanyan atiing yang pag̓arampuën da,
inaling naglëw̓ad da yang ityura na.
Pati yang aw̓ël na durung pisan agkakulit ig duru kang pisan agkasulaw.
30 Pagkatapus may durua nga tauan ang inaling nansilput duun ang ya ra ti Moises,
durua ni Elias.
Pamagkërësën tanira ni Jesus.
31 Yang pirsunal nira duru ra kag kasusulaw ang tëlëngan.
Taa numanyan,
anday dumang nadapatan yang kërësën nirang tulu,
kung indi,
natëtëngëd tung pagtalus ni Jesus tung ipiniar yang Dios tung anya ang indi ra ilëm buay,
tanya magpakugmatay ra duun tung Jerusalem.
32 Taa numanyan na Pedro manëk dang pisan yang ëlëk nira.
Tung pagkapuaw nira,
ya ray napuawan nira ti Jesus ang duru rag kasulaw pati naang durua nga tauan ang këmdëngan tung tëpad na.
33 Numanyan atiing pagpablag da rin yang duruang atia tung ni Jesus,
ya ray pagbitala ni Pedro tung anyang mag̓aning,
“Ginuu,
maayën ilëm naawami ra ka.
Tugtayami kang magpakdëng ta tulu nga layang-layangan,
salëgsam bilug mi ni Moises may ni Elias,”
mag̓aning.
Naa pala ti Pedro,
nagbitala ra ilëm ta indi na naskëan.
34 Numanyan indi pa nganing ag̓atapus ta pagbitala,
kinaw̓utan da tanirang tanan ta sasang panganud ang ya ray nagpaulung tung nira.
Pagkatapus atiing pinutus da ka tanira tung panganud ang atia,
pinandëlaan da na Pedro ta mupia.
35 Atii may nagngël da nirang busis ang asan manliit tung panganud ang mag̓aning,
“Uay,
atia ra yang pag̓aningënung Anaw ang pinilikung magtalus tung kalëlyag̓anu.
Intindiën mi ta maayën yang kumpurming ianing na tung numyu,”
mag̓aning.
36 Pagkatapus yang busis ta pagbitala,
tëlëngan nira,
naa pala,
ti Jesus da ilëm ang sam bilug ang yag mana-mana.
Kapurisu mag̓impisa pa tii,
namag̓ëkmëng da ilëm tanira.
Mintras pagnurunutan pa tanira na Jesus,
tung tanan ang naita nira tung uras ang atii,
anda ëngëd ang pisan ay nabalita-w̓alita nira tung duma may ruma,
may san tag̓a.
Yang Pagpamaayën Ni Jesus Tung Sasang Mulang Dinimunyu Ra Rin (9:37-43a)
37 Numanyan pangayag yang kaliw̓utan,
baklu namagdanëkan.
Numanyan duun tung aranëk,
durug dakël yang mga taung namagpakigbag̓as tung ni Jesus.
38 Pagkatapus,
may sasang tau asan ang pagkëkëndalën da tung anyang mag̓aning,
“Aay,
Amëëy,
ildawan mu ka nakaang anaw ang bugtung ka pa man ilëm.
39 Ay kipurki muya-muyang balik-balikan ta sasang dimunyung papaggaluakën ta inali.
Pagkatapus,
dayun na rang papagpëdlët-pëdlëtën ang papagkëgtëngën ang asta magbura ra yang nganga na ang pagkatapus mag̓ingtang da ilëm yang tinanguni nang pinanluluw̓ayan.
Alus pa ilëm indi na ra paw̓ayaan.
40 Dispuis idinangëpu ra rin tung mga taung naang nag̓apangugyatan mung inamu-amu ang para palayasën da nira yang dimunyung atia,
piru indi ra ka ilëm nasarangan nira,”
ag̓aaning.
41 Numanyan magtimalës ti Jesus,
tung nira rang tanan asan iparumbuay na yang bitala nang mag̓aning,
“Uu,
yamung mga {tauamung mga} masigkanasyunu simanyan!
Ay ra yang pagtalig mi?
Duru pa ka ëngëd agkabaliskad yang laksu yang mga pag̓irisipën mi.
Midyu tung maglakgasënaw ra tung numyu ang sanuamu ra kaya ngaëyangay ta ipagtalig ming ustu tung yëën.
Kaministiran pang mag̓agwantaw ta mabuay tung ug̓ali ming maning tia?”
Pagkatapus dayun na rang inaning yang may ana,
“Ala,
ëklan mu ra tani tung yëën yang ana mu.”
42 Numanyan atiing pagpalëngët da yang mula tung anya,
gulpi ra ilëm ang ibinëgsak yang dimunyu tung tanëk ang pinapagkëgtëng.
Piru ti Jesus,
pagkaita na,
dayun na rang linalangan yang dimunyu ang maglayas da tung mula.
Maning tia yang pagpamaayën na tung mula ang pagkatapus dayun na rang inintriga tung may ana.
43 Purisu yang mga taung atiang nangaita,
nangabërëng da ta mupia tung paggaraëmën yang Dios ang durug puirsa ang ya ray nabilug̓an nira tung ni Jesus.
Nag̓asambit Si Ni Jesus Yang Dapat Ang Mapasaran Nang Durug Liwag (9:43b-45)
Taa numanyan,
durung pagkabërëng yang kadaklan ang mga tau tung tanan ang mga maning tiang buat-buat na.
44 Purisu ti Jesus tanya nagpaaman dang lag̓i tung mga taung nag̓apangugyatan na.
Mag̓aning tung nira,
“Ta yamu,
ipabtang mi tung mga isip mi yang nag̓ianingung naa tung numyu ang para indi mi malipatan.
Yuung pag̓aningën ang Maninga Tau anday dumang mabtanganu tung uri,
yuu ra ag̓intrigaay tung pudir yang mga tau,”
ag̓aaning.
45 Piru yang mga aruman na,
anday naërëm kung unu pay nalagpakan yang ibinitala nang atia.
Yang indi nira nasangkad yang linëgdangan na,
ay nakiputan da tanira ta pag̓irisipën nira.
Dispuis pa,
may dalëndën nirang magtalimaan pa tung anya kung unu pay gustu nang ianing.
Yang Magparanëk Tung Pagkabëtang Na, Yay Landaw Tung Pagtërëlëngën Yang Dios (9:46-50)
46 Taa numanyan,
yang mga tauan ni Jesus ang atia,
namag̓intra ra baralalaan kung tinu pay pinakalandaw tung nira.
Lucas 9:46-56
47 Numanyan pagkasiman ni Jesus yang laksu yang pag̓irisipën nira,
anday dumang binuat na,
may sasang mulang ingkëlan na ang ya ra kay ipinakdëng na tung tëpad na.
48 Mag̓aning tung nira,
“Kung tinu pay magsapët tung mulang maning ka ilëm taa yang pagkabëtang nang aranëk ang pisan arangan da ilëm tung yëën,
katimbang nang yuu kay nag̓asapët na.
Dispuis pa,
kung tinu pay magsapët tung yëën,
katimbang nang yang nagtuw̓ul tung yëën,
ya kay nag̓asapët na.
Kipurki tung numyung tanan,
kung tinu pay mapinagparanëk,
ya ray pinakalandaw tung pagtërëlëngën yang Dios,”
mag̓aning.
49 Numanyan pagkagngël ni Juan tia,
dayun dang nabngang nag̓ubligar ang mag̓aning,
“Ginuu,
nuntaa,
may sasang taung naita yamën ang atia pala nag̓apagpalayas ta mga dimunyu ëkël tung kagaëman mu ang yang aran mu yay ininambit na.
Purisu dayun dang pinagsambëng yamën ay natëtëngëd bëlag̓an kang lag̓ing ugpu yamën ang mga tauan mu,”
mag̓aning.
50 Mag̓aning ti Jesus ang minlës,
“Ëëy,
dapat ang indi mi ra rin pinagsambëng.
Tutal yang taung indi nganing pagbatuk tung yatën katimbang nang pagtaw̓ang ka tung yatën,”
ag̓aaning.
Yang Mga Tag̓a Samaria Pamagpakuindi Tung Ni Jesus (9:51-56)
51 Taa numanyan,
ti Jesus,
kumus ag̓alëngët-lëngët da yang uras ang itinipu tung anya ang tanya pablag dang ëklan duun tung langit,
anday dumang binuat na,
pinatëntën na ra ilëm yang isip nang magdistinu ra ka ëngëd duun tung Jerusalem,
maskin unu pay mapasaran na duun.
52 Numanyan may pira pa nga tauan ang pinanuw̓ul nang mamagtukaw ra tung anyang mamagsimpan da yang tanan ang mga kaministiran na.
Numanyan namagpanaw ra ka man ang namansiangay tung sasang baryu ang yang mga sakëp na pulus mga tag̓a Samaria yang nasyun nira.
53 Numanyan pagkainsapu yang mga taung atia ang yang rumbu ni Jesus anda duun tung nira,
kung indi,
duun ëngëd tung Jerusalem,
ya ray pinaglainan yang mga isip nira ang indi ra pinadayun nira na Jesus tung baryu nirac.
54 Numanyan pagkasinti yang mga tauan nang ti Santiago duruang mag̓ari ni Juan,
ya ray namagkig̓a tung ni Jesus.
Pagkatapus dayun dang nagtalimaan ang mag̓aning,
“Ginuu,
gustu mung pabungsaran da ilëm yamën ta apuy ang supukun?”
ag̓aaningd.
55 Piru ti Jesus tanya,
dayun dang nagbëdlëng tung nirang nag̓ampalar.
56 Yang pinakaw̓ut na,
duun da ilëm namagpadayun tung dumang baryu.
Yang Nag̓asikad Ëngëd Ni Jesus Tung Sasang Taung Nag̓alëlyag Dang Mag̓ing Tauan Na (9:57-62)
57 Numanyan atiing pagparanawën nira tung dalan,
may sasang taung nagprisintar tung ni Jesus ang mag̓aning,
“Magpakignunutaw ra tung nuyung magpaugyat,
maskin aria pa manganing,”
ag̓aaning.
Lucas 9:57-62
58 Mag̓aning ti Jesus ang minlës,
“Maayën pa yang mga dayap tung talun,
may mga anas nirang siguradu,
pati mga lamlam,
may mga bayay nirang sadili.
Indi ra ilëm yuung pag̓aningën ang Maninga Tau ang anday pirmaminting pag̓ëlkanu,”
mag̓aning.
59 Pagkatapus may sam bilug pa asan ang inimbitar ni Jesus ang inaning,
“Magpakignunuta ra ka tung yëën ang magpaugyat.”
Mag̓aning ka yang taung atiang minlës,
“Amëëy,
bakluaw ra magpakignunut tung nuyu,
kung maimu ilëm,
tugtayaw ra kanay nuyung mulik ang para mapalg̓uru tung lëyang ti tatay,”
ag̓aaning.
60 Mag̓aning ti Jesus ang nagtuung tung baliw̓ad na,
“Ipatug̓ay mu ra ilëm tia tung duma ang pamanalugpatay pa tung Dios.
Bag̓ay ang pisan tung nira ang mamagpalg̓ud tung lëyang tung mga aruman nirang patay rae.
Piru ta yawa,
bilug̓un mu ra ilëm yang isip mung magparakaw̓utun tung mga tau natëtëngëd tung paggaraëmën yang Dios ang naang baklung pag̓atukuru,
kung ya pa ag̓aring mapalg̓uran da nira.”
61 Atii,
may sam bilug pa ka ëngëd ang nagprisintar tung anyang mag̓aning,
“Ginuu,
magpakignunutaw ra tung nuyung magpaugyat.
Ug̓aring kung maimu ilëm tung nuyu,
mulikaw ra kanay ang magpaskë tung na nanay.”
62 Mag̓aning ti Jesus ang minlës,
“Indi mu ra ilëm pambungun yang sasang manig̓aradu ang napgës da tung kaling yang aradu ang pagkatapus yag baw̓alikid.
Kipurki kung ya ray pambungun mu,
indi ra magkabag̓ay ang palg̓uruna pa yëën tung paggaraëmën yang Dios ang naang baklung pag̓atukuru,”
mag̓aning.