Nag̓apiaran Ni Jesus Ta Kagaëman Yang Mga Taralig̓an Nang Sam Puluk May Durua (10:1-4)
10
Numanyan yaming nag̓apangugyatan ni Jesus ang sam puluk may durua pinapagsaragpunami ra anya ang pagkatapus pinamiaranami ra ka anya ta kagaëman yamën ang magpalayas tung mga dimunyung namagsuut tung mga tau ig magpamaayën ka tung mga taung may mga laru,
maskin unu pang laruay.
2 Ya ra taa yang mga aran yamën ang mga taralig̓an ni Jesus ang sam puluk may durua bilang mga apustul na.
Yang pagmangulu-mangulu tung yamën ang tanan ti Simon ang pinapuanggaan tung ni Pedro.
Yang aruman na tung pagliliw̓utun yang ari nang ti Andres.
Yang magdasun ti Santiagong durua kang mag̓ari ni Juan ang yay mga ana ni Zebedeo.
3 Yang magdasun ti Felipe,
durua ni Bartolome.
Yang magdasun ti Tomas may yuu ka mismung ti Mateo ang atii kanay manigpanukutaw ra rin ta balayaran tung gubirnu.
Yang magdasun,
ti Santiagong ana ni Alfeo,
durua ni Tadeo.
4 Yang magdasun ti Simon ang sam bilug ang yay kinasakpan da rin yang sasang partidung durug isëg yang pagbaratukun nira tung gubirnu yang mga tag̓a Roma,
durua ka ni Judas ang Iscariote ang tung uri,
ya ra ka man ay nagtraidur tung ni Jesus.
Yang Mga Bitalang Nag̓ipabalun Ni Jesus Tung Sam Puluk May Durua NGa Tauan Na Baklu Papanaway Nang Mamagparakaw̓utun (10:5-15)
5 Numanyan yaming nag̓apangugyatan nang atiang sam puluk may durua,
bakluami papanaway na,
may mga bitalang ipinabalun na tung yamën ang maning taa:
“Kung magpanawamu ra nganing,
indiamu ilëm magdistinu tung mga baw̓anwaan yang mga tag̓a duma-rumang nasyun ubin maskin tung mga lansangan yang mga tag̓a Samaria.
6 Kung indi,
yang pabilug̓an ming angayën ya ra kanay ilëm yang mga masigkanasyun tang mga Israel ang yang kaalimbawaan nira maning pa tung mga karnirung nagkaratalang da.
7 Ya ray pampakaw̓utan ming panganingën ang kinaw̓ut da yang uras ang ipagpundar yang Dios yang paggaraëmën nang baklu tung nira.
8 Kung may mapanawan ming mga taung may mga laru nira,
pampamaayënën mi,
pati mga patay,
pampabuiën mi si kang uman,
asta yang may mga larung tung ulit nirang makabiw̓iru,
pampamaayënën mi ka,
pati yang mga dimunyung namagsuut tung mga tinanguni yang duma,
pampalayasën mi ka.
Kumus diw̓aldi ilëm yang pagpakdulu tung numyu yang kagaëman ming atia,
indi ra ka magkabag̓ay ang pabayarën mi pa yang mga taung atiang pampakaayënën mi.
9-10 “Dispuis paisanu ra ilëm yang pagparanawën mi.
Indiamu magbalun ta kuarta,
maskin unu pang klasiay,
mag̓ing bulawan man,
mag̓ing salapi man,
mag̓ing saway man.
Indiamu ka mag̓ëkël-ëkël ta puyu-puyu ang pariu ka tung pag̓aëkël-ëkëlan ta mga manigpalimus.
Maskin lambung ming irimaraan mi,
sandalyas,
ubin bastun pa,
indi mi ka ëkël-ëkëlan.
Ay yang sasang manigparakaw̓utun,
bag̓ay kang asikasuën tung mga kaministiran na ang yay maning pa tung isuul tung anya yang mga taung nag̓apampakaw̓utan na.
11 Dispuis kung kumaw̓utamu ra nganing tung sasang lansangan ubin baryu,
magpaniiramu ra ta tau ang midyu may kalëlyag na kang magpadayun tung numyu tung balay na.
Duunamu ra ilëm magdayun ang asta magliitamu ra ilëm tung banwang atia.
12 Pagkatapus tung pagpaklëd mi tung balay na,
kumustaën mi ka yang pamag̓istar asan ang aningën,
‘Yamung tanan ang pag̓istar taa tung balay ang naa,
maimu rang pakaayënënamu ra ka ta mupia yang Dios.’
13 Simanyan kung panangërën nira yang ipagpakaw̓ut mi tung nira natëtëngëd tung yëën,
magkamaningan da ka man tanira ang katulad ka tung ikinumusta ming atia tung nira.
Piru kung indi mamanangëd,
bawiën mi ra ilëm yang ikinumusta ming atia tung nira.
14 Kung ariamu pang balayay nga dayun u kung ariamu pang lansanganay nga distinu,
ang pagkatapus indiamu ka ëngëd risibiën nira pati yang bitalang nag̓ipagpakaw̓ut mi indi ka ëngëd pamatiën nira,
magliitamu ra ilëm asan.
Ug̓aring tung pagliit mi,
pakdulan mi ta sasa pang sinyalis.
Yang apuk tung banwa nira ang namandëpët tung mga kakay mi,
ya ray itagbëng-tagbëngay mi ug̓ud asan da nga paamanay mi ang yang pagpakuindi nirang atia tung numyu ya ray panuw̓alan nira tung Dios.
15 Iugtulu tung numyu,
kung kaw̓utun da nganing yang uras ang ipagsintinsia yang Dios tung tanan ang mga tau,
malakan-lakan pa yang parusang dangatën yang mga tag̓a lansangan ang Sodoma may Gomora kay tung dangatën yang mga taung tag̓a maskin ay pang lansanganay ang kumpurming namagpakuindi tung numyu.
Nag̓apabantay Ni Jesus Tanira Natëtëngëd Tung Mga Kaliwag̓an Ang Magkarapanawan Nira Tung Pagturumanën Nira Yang Nag̓ituw̓ul Na Tung Nira (10:16-25)
16 “Papatandaan mi ta mupia yang bitalaw.
Ta yamung pag̓atuw̓ulung magparakaw̓utun yang bitalaw,
yang kaalimbawaan mi maning pa tung mga karniru ang duunamu ra ipaangayayu tung mga taung maning pa tung mga kirung talunanën ta kaisëg.
Purisu yang maayën ang panularën mi ya ra yang mga iraw ang durug tarëm yang mga isip nira pati yang mga kalapati ang durug kaamumu.
17 Nag̓apabantayamu ilëm yëën ay may mga masigkanasyun ta mismu ang yay magpadëëp tung numyu ang para idimandaamu ra nira tung mga usgadu.
Duunamu mismu paburdunay yang pamagmaëpët-ëpët tung mga pagsaragpunan nira.
18 Kung kaisan guyuranamu nirang patalungaën tung mga gubirnadur may tung mga adi pa natëtëngëd tung pagkërërëngën mi tung yëën.
Panlugtan nganing yang Dios ang magbuat ta maning tia tung numyu ug̓ud asanamu nga pakdulay na ta lugar ming magparakaw̓utun tung nira natëtëngëd tung yëën.
Pati yang mga kaarumanan ka nirang bëlag̓an kang mga masigka Israel ta,
mapampakaw̓utan mi ka tung mga uras ang atia.
19 Kung pabistaanamu nganing nira ta maning tia,
indiamu ilëm magpakabëgbëg ta mga kulu mi kung unu pay ituw̓al mi u kung ya pa ag̓ari yang pamëtang-bëtang mi yang mga bitala mi.
Ay kipurki kung kaw̓utun da nganing yang uras ang atia,
paisipënamu ra yang Dios kung unu pay ipanuw̓al mi.
20 Ay yang mga bitalang ipanuw̓al mi tung nira,
bëlag̓an numyung sadiling bitala,
kung indi,
ya ray ipaisipay tung numyung ipabitala yang Espiritu Santong nag̓ipatinir tung numyu yang Ama mi.
21 “Maning taa yang mainabu tung sam pamilya.
Kung tinu pay manangëd tung Matinlung Balita natëtëngëd tung yëën,
ya ray dëmtan yang mga putul nang idangëp tung usgadung ipaimatay.
Ang kaisan ya ra kay buatën yang sasang ama tung mga ana nang namagpasirung da tung yëën.
Ang kaisan,
kung yang mga ginikanan ya ray namagpasirung tung yëën,
ya ra kay batukan yang mga ana nirang ipaimatay.
22 May uras ang kaw̓utun ang dëmtanamu ra ka ta maskin tinu pang tauay arangan da ilëm tung yëën ang nag̓akëgngan mi.
Piru kung tinu pay magpatëntën yang isip nang magpadayun ka ëngëd tung pagtaralig̓ën na tung yëën,
maskin imatayën pa,
ya ray tapnayën yang Dios ang ipalg̓ud tung kaliw̓utan ang baklu.
23 Kung yamu dërëëg-dëëg̓an tung sasang lansangan,
magpalaksuamu ra ilëm tung dumang lansangan ang para duunamu si magparakaw̓utun.
Iugtulu tung numyu yang kamatuuran,
baklu mi ra matëptëp yang tanan ang mga lansangan taa tung banwa tang naang Israel,
ta yuung pag̓aningën ang Maninga Tau,
magbalikaw raa.
Indi Mamaglaum Yang Mga Tauan Ni Jesus Ang Mas Matinlu Yang Buatën Yang Mga Tau Tung Nira Kay Tung Buatën Nira Tung Ni Jesus (10:24-25)
24 “Yang sasang taung pagpaugyat indi maglaum ang tanya mas pang galangën kay tung pag̓ugyat tung anya.
Pariu ka tung sasang turuw̓ulun.
Indi ka maglaum ang tanya mas pang saptën kay tung ag̓alën na.
25 Purisu yang sasang pagpaugyat kaministiran ang mag̓ing kuntintu tung isip na ang mapasaran ta pariu ka tung nag̓apasaran yang pag̓ugyat tung anya.
Pati yang sasang turuw̓ulun,
kung mapasaran ta pariu ka tung nag̓apasaran yang ag̓alën na,
ya ka.
Kung yuung maning pa tung sasang tatay tung pamalay-w̓alay,
yuu ag̓aningay ta mga tau ang ti Satanasb,
yamung lug̓ud tung pamalay-w̓alayu mas pang pakulainënamu nira.
Nag̓apaktël Nang Magpakatëntën Ang Mag̓agwanta Tung Padëëg-dëëg (10:26-31)
26 “Purisu indiamu mag̓ëlëd tung maskin tinu pang tauay ang magkuntra tung numyu.
Ay kipurki dëmdëmën mi yang bitalaw:
anday nag̓atipig̓an ang indi luw̓awan,
anda kay nag̓italuk ang indi makdëkan.
27 Purisu kung unu pay nag̓ipag̓aningu tung numyu ang ita ita ilëm,
ya ray ipagpakaw̓ut mi ëngëd tung publiku maskin unu pay buatën yang mga tau tung numyu.
Kung unu pay nag̓ipag̓alas-alasu tung numyu,
ya ra kay ipagngël mi tung kadaklan.
28 Indiamu mag̓ëlëd tung mga taung gustu nirang mangimatay tung numyu ang ya ra ka ilëm yang mga tinanguni mi ay sarangan nirang patayën,
ang pagkatapus anda kay sarang ang mabuat nirang malain tung ispiritu mi.
Kung indi,
yang dapat ang ëldan mi ëngëd,
ya ra yang Dios ang yay sarang ang magbuat ta ikadiadu yang tinanguni yang sasang tau pati ispiritu na duun tung impirnu.
29 Dispuis para indiamu mag̓ëlëd tung buatën yang mga tau tung numyu,
padëmdëman mi ra ilëm yang mga kutung ang mga balaynën.
Indi w̓a,
kung mangalangamu tung palingki,
maskin duruang bilug,
durung pisan agkabaratu?
Piru andang pisan ay kutung may sam bilug ang lumagpak tung tanëk ang indi magtandaan yang Ama mi.
30 Ya pa yamung mga tauanu,
paw̓aya-w̓ayaanamu pa anya?
Ultimung mga bua mi ilëm ngani pinamilang na rang tanan.
31 Purisu indiamu mag̓ëlëd.
Ay yamu mas maal tung anya kay tung mga kutung ang panëng.
Natëtëngëd Tung Pag̓urubligarën May Pag̓iringwaraën (10:32-33)
32 “Kapurisu kung tinu pay mag̓ubligar tung katalungaan yang mga masigkatau na ang tanya sasa rang tauanu,
ig disir ta yëën,
kung kaw̓utun da nganing yang uras,
yuu kay magpailala tung anya tung katalungaan ni Ama duun tung langit ang tanya sasa ra ka man tauanu.
33 Piru kung tinu pay mag̓ingwara tung yëën tung katalungaan yang mga masigkatau na ang tanya bëlag̓an tauanu,
ig disir ta yëën,
yang buatënu,
ingwaraënu ka tung katalungaan ni Ama duun tung langit ang tanya bëlag̓an ka man tauanu.”
Ti Jesus Ya Ray Pagbëlag̓anan Ta Isip Yang Sam Pamilya (10:34-39)
34 Mag̓aning ti Jesus ang nagpadayun yang bitala na,
“Indiamu maglaum ang yang inangayu taa ang para yang tanan ang mga tau mamag̓uruyunan dang mamagsarasaan,
kung indi,
asan da ngani mamagsuruag-suag̓an natëtëngëd tung pagpabëtang nira tung yëën ang indi ra magpariu-pariu.
35 Ayw̓a indiamu paamanënu,
sindu anday dumang pakaw̓utun na,
kung indi,
yang sam pamilya magbërëlag̓an da ta kinaisipan may kinaisipan.
Yang sasang lalii magbëlag̓an ta kinaisipan tanirang mag̓ama.
Yang sasang baw̓ay magbëlag̓an ka ta kinaisipan tanirang mag̓ina.
Yang sasang minag̓arën ang baw̓ay magbëlag̓an ka ta kinaisipan tanirang magpunyangan ang baw̓ay.
36 Bilang yang magkuntra ëngëd tung sasang tumatalig tung yëën ya ra mismu yang may kaampiran tung anya.
37 Purisu katulad tung sasang ana,
kung yang gëgma na tung ginikanan na ya ray lusu tung gëgma na tung yëën,
yang taung atia,
indi magkabag̓ay tung yëën ang ugyatanu pa.
Pariu ka tung sasang ginikanan.
Kung yang gëgma na tung ana na ya ray landaw tung gëgma na tung yëën,
ya ka,
indi ka magkabag̓ay tung yëën ang ugyatanu pa.
38 Kung tinu pay indi magpakatëntën ang mag̓agwanta tung mga kaliwag̓an ang maskin ipalansang pa tung krusc ig magpalalang ka tung yëën,
yang taung atia indi magkabag̓ay tung yëën ang ugyatanu pa.
39 Kung tinu pay pagsikad ang yang sadili na ang pirmi tung matinlu,
asan da nga kapa-kapaay na yang kaampiran na tung yëën.
Piru kung tinu pay mamirdi tung sadiling kalëlyag̓an na natëtëngëd tung yëën ang yuu ray ipalusu na ta gëgma na,
asan nga siguruay na yang kaampiran na tung yëën ang yay pagnatisan nang asta tung sampad.
May Iblës Yang Dios Tung Kumpurming Magtaw̓ang Tung Mga Manigparakaw̓utun (10:40-42)
40 “Tung pagliliw̓utun ming pagparakaw̓utun yang bitalaw,
kung tinu pay mag̓asikasu tung numyu tung balay na,
katimbang nang yuu kay nag̓asikasuën na.
Dispuis kung tinu pay mag̓asikasu tung yëën,
katimbang na ka ang yang nagtuw̓ul tung yëën,
ya kay nag̓asikasuën na.
41 Kung tinu pay mag̓asikasu tung numyung pag̓apanuw̓ulung magpalatay yang bitala yang Dios natëtëngëd ag̓ilalaënamu ka anyang maning ka man tii,
may iblës yang Dios tung anyang magkapariu ka tung iblës na tung numyung mga manigpalatay.
Kung tinu pay mag̓asikasu tung numyung matinumanën tung nag̓auyunan yang Dios natëtëngëd ag̓ilalaënamu ka anyang maning ka man tii,
may iblës ka yang Dios tung anyang magkapariu ka tung iblës na tung numyung matinumanën.
42 Kung tinu pay magtaw̓ang tung numyung mga tauanu,
maskin aranëk ta pagkabëtang ig maskin gësyëng bag̓ay ra ilëm yang itaw̓ang na ang katulad ka tung sam basu ra ilëm ang waing malamig ang ipainëm na tung numyu natëtëngëd ag̓ilalaënamu ra ka anya ang yamu nag̓atuw̓ulu,
iugtulu tung numyu,
siguradung balësan ka ëngëd yang Dios,”
mag̓aning.