Ti Jesus Nag̓apangindian Da Yang Mga Masigkabanwa Nang Tag̓a Nazaret (6:1-6a)
6
Taa numanyan,
ti Jesus,
nagliit da tung lugar ang atii ang naglëkat da duun tung lansangan ang pinagdakulan na,
kasiraan da ka tanira yang mga taung nag̓apangugyatan na.
2 Numanyan pagkaw̓ut yang kaldaw ang nag̓ipamaënay,
nag̓intra ra pasanag duun tung pagsaragpunan nira.
Kadakël dang namamati tung anya ang pagkatapus nangabërëng da ka ta mupia tung anyang namag̓araning-aningan dang mag̓aning,
“Abaa,
yang tau kang naa ka,
ay pa ngaëklay na yang kataku nang atia ang ya pay magtulduk tung yatën?
Pati yang mga pruibang atiang maktël ang nag̓abalitaan tang nag̓apagpalapus na ay pa ngaëklay na?
3 Bëlag bang atia karpintiru ka ilëm ang ana ni Maria?
Bëlag ba ang yang putul nang mga lalii ya ra taa ti Santiago,
ti Jose,
ti Judas,
may ti Simon?
Bëlag ba ang pati yang mga putul nang mga baw̓ay taa ka tung banwa ta agpamag̓istar?”
mag̓aning.
Purisu duun da namagmalagana yang mga isip nirang namagdiskumpiar tung anya.
4 Purisu dayun dang nanuw̓al ti Jesus tung nira ang mag̓aning,
“Talagang matuud ka man yang bitala yang mga mamaëpët ang yang sasang manigpalatay yang bitala yang Dios,
maskin ay pang banwaay nga tëyëb,
nag̓agalang ta mga tau,
puira pa tung banwang natauan na may tung may mga kaampiran tung anya maskin pa tung sëlëd yang sadiling pamalay-w̓alay na,”
ag̓aaning.
5 Numanyan anda ray mga pruibang maktël ang napalapus na duun,
puira pa tung pira pa ilëm nga tauan ang may mga laru nira ang ya ray pinandëënan nang pinampamaayën.
6 Purisu nabërëng da ta mupia ti Jesus natëtëngëd tung pagkadiskumpiadu nirang atia tung anya.
Nag̓apiaran Ni Jesus Yang Mga Tauan Nang Sam Puluk May Durua Ta Kagaëman Nira (6:6b-13)
Taa numanyan,
ti Jesus,
nagliliw̓utun da tung mga baryung nagturuldukun tung mga tau,
kasiraan da ka tanira yang mga tauan na.
7 Tung pagliliw̓utun nirang atii,
may uras ang ti Jesus nagguuy tung mga tauan nang atiang sam puluk may durua ang para mamagsaragpun da.
Pagkatapus pinanuw̓ul na tanirang mamagliliw̓utun ta taludua taludua nga tauan.
Pinamiaran na ra ka dayun ta katëngdanan nirang mamagpalayas ta mga dimunyung namagsuut tung mga tau.
8 Dispuis nagkalalangan da ka tung nirang mag̓aning,
“Kung magpanawamu ra nganing,
paktaw ilëm yang pagparanawën mi,
puira pa tung bastun mi.
Indiamu ka magbalun ta pamangan may kuarta,
indiamu ka mag̓ëkël-ëkël ta puyu-puyu ang pariu ka tung pag̓aëkël-ëkëlan ta mga manigpalimus.
9 Maskin magsuutamu ta mga sandalyas mi,
indiamu mag̓ëkël ta lambung ang imaraan mi,”
mag̓aning.
10 Numanyan dayun dang sinugpatan na yang bitala na tung nirang mag̓aning,
“Dispuis kung patakwalënamu ra nganing tung sasang balay,
duunamu ilëm magdayun ang asta magliitamu ra ilëm tung banwang atia.
11 Dispuis kung ariamu pang lugaray nga distinu ang pagkatapus indiamu ra risibiën yang mga taung pamatian,
magliitamu ra ilëm asan.
Ug̓aring tung pagliit mi,
pakdulan mi ta sasang sinyalis.
Yang apuk tung banwa nira ang namandëpët tung mga kakay mi,
ya ray itagbëng-tagbëngay mi ug̓ud asan da nga paamanay mi ang yang pagpakuindi nirang atia tung numyu ya ray panuw̓alan nira tung Dios,”
mag̓aning.
12 Kapurisu numanyan namagparanawan da ka man tanirang namagparakaw̓utun tung mga tau ang tanira dapat ang manligna ra tung mga kasalanan nirang magbalik tung Dios.
13 Dispuis namagpalayas ka tung dakëlëng mga dimunyung namagsuut tung mga tau ig namagpamaayën ka tung dakëlë kang mga taung may mga laru nira ëkël tung pag̓aplas nira ta lana.
Natëtëngëd Tung Kamatayën Ni Juan Ang Manigbënyag Kung Unu Pay Natëngëran Na (6:14-29)
14 Taa numanyan,
yang mga buat-buat ang atiang makabëw̓ërëng,
nabalitaan da ni Adi Herodes,
ay maknul yang aran ni Jesus maskin ay pa.
Mag̓aning yang duma ang namagbaw̓alitaën,
“Siguru ya ra ti Juan ang manigbënyag ang ya ray pinabungkaras yang Dios ang binwi si kang uman.
Purisu ya ray natëngëran na ang tanya may kagaëman nang magpalapus ta mga pruibang maning tiang maktël,”
mag̓aning.
15 Piru mag̓aning ka yang duma,
“Ya ti Elias,”
ag̓aaning.
Mag̓aning ka yang duma,
“Ya ra yang sasang manigpalatay yang bitala yang Dios ang katulad ka tung namaglua tung namagtukaw ang mga panimpu,”
mag̓aning.
16 Numanyan pagkabalita yang Adi,
ya ra ag̓aningay nang,
“Anday duma tia,
kung indi,
ti Juan dang atiing pinapug̓usanu ta dikël na.
Ya si kay binwing uman yang Dios,”
mag̓aning.
17 Ibalik ta ra kanay yang isturia tung napasaran ni Juan ang atiang manigbënyag.
Atii kanay ipinadëëp ni Adi Herodes ang pagkatapus pinapusasan nang ipinakalabus.
Ya ray binwat yang Adi natëtëngëd ilëm tung ni Herodias ang kasawa ra rin ni Felipe ang putul na ang ya ray kinalaw nang pinangasawa.
18 Ay yang ipinagpadëëp yang Adi tung ni Juan ay natëtëngëd ang pirmi ilëm ang pag̓aningën ni Juan ang lampas da unu tung katuw̓ulan yang Dios ang mangasawa tung kasawa yang putul na.
19 Purisu ti Juan dinëmtan da ta mupia ni Herodias.
Gustu na ra rin ang ipaimatay na piru indi na mabuat natëtëngëd tung ni Adi Herodes ang anday kalëlyag na.
20 Ay durung panggalang na tung ni Juan ay naskëan nang yay sasang taung matinumanën tung nag̓auyunan yang Dios ig bilug yang isip na tung anya.
Purisu ya ray dinipindiran na ang para indi ra maunu pa.
Dispuis pa,
kada mamati tung anya,
duun dag paglingët ta maayën yang isip na.
Piru maskin dang maning tii,
agtinluan pa ka ëngëd ang pamati tung anya.
21 Taa numanyan,
tung pira pang kaldaw kinaw̓ut da yang uras ang may lugar da ni Herodias ang magtuman yang kalëlyag̓an na.
Natuun tung uras ang ipagsilibra yang Adi tung kakaldawan yang pagkapangana tung anya ang ya ra kay uras ang ipinagpundar na ta punsiun ang dakulu.
Yang mga taung pinangimbitar nang mamagpasakëp,
ya ra yang mga upisial tung gubirnu may yang may mga katëngdanan tung mga sundalung atiang mga tag̓a Roma asta yang dumang darakulu kang mga tau.
22 Taa numanyan,
yang ana ni Herodias ang darala,
ya ray nagpaklëd tung pagpunsiunan ang pagkatapus dayun dang nagtalëk.
Tung pagpaniid ni Herodes may yang mga bisita na tung daralang pagtalëk,
pinanadyaan da ta durung pinangganaan.
Purisu yang Adi ya ray nabnga ang mag̓aning tung darala,
“Nini,
maskin unu pay nag̓alëlyag̓an mu,
ingalukun mu ra ilëm tung yëën.
Siguradung ipapakdulu tung nuyu,”
mag̓aning.
23 Pagkatapus sinumpaan na pa yang bitala nang mag̓aning,
“Tung Dios may tung tau,
maskin unu pay ingalukun mu tung yëën,
nini,
siguradung ipapakdulu tung nuyu,
maskin tëngaën ta pa yang pag̓agaëmanu,”
mag̓aning.
24 Numanyan dayun dang luminua yang daralang nagtalimaan tung ni nanay nang mag̓aning,
“Nanay,
unu pay ingalukunu tung Adi?”
Mag̓aning ti nanay nang nagtuw̓al,
“Yang kulu ni Juan ang manigbënyag,
ya ray ingalukun mu,”
mag̓aning.
25 Atii,
kali-kaling nagbalik tung Ading nag̓ingaluk tung anyang mag̓aning,
“Maginuung Adi,
gustuu rin ang ipakdul mu rang lag̓i tung yëën numaan yang kulu ni Juan ang manigbënyag.
Ipabtang da ilëm tung basyada,”
mag̓aning.
26 Numanyan pagkagngël yang Adi tia,
pinungaw ra ta mupia yang isip na.
Piru kumus pinanumpaan na yang pangaku na tung katalungaan yang mga imbitasiun na,
anday gustu nang isulan na pa yang nabitalaan na tung darala.
27 Purisu anday dumang binwat na,
tinuw̓ul na ra ilëm yang sasang sundalung manigpamug̓us ang yang kulu ni Juan ëklan da.
Purisu dayun da ka man ang minangay duun tung kalabus ang namug̓us tung dikël ni Juan.
28 Pagkapug̓us na yang kulu na,
dayun na rang ingkëlan duun tung daralang ipinakdul ang yag bëbtang tung basyada.
Pagkatapus dayun dang ingkëlan yang daralang inintriga tung ni nanay na.
29 Taa numanyan,
pagkabalita yang mga taung namagpaugyat da rin tung ni Juan,
dayun dang namansiangay tung kalabus ang ingkëlan yang tinanguni nang ipinalg̓ud tung sasang lëyang.
Yang Pagpapaan Ni Jesus Tung Limang Liw̓u NGa Tauan (6:30-44)
30 Taa numanyan,
yang mga taralig̓an ni Jesus ang atiing pinanuw̓ul nang mamagliliw̓utun,
namagbalik da tung anyang namagbaw̓alitaën natëtëngëd tung tanan ang nagkarabuat nira pati yang kumpurming ipinagpakaw̓ut nira tung mga tau inulit ka nira tung anya.
Jesus feeds 5000 (Marcos 6:30-44)
31 Numanyan,
durug dakël yang mga taung namanlag̓ud-lag̓ud da asan tung nira.
May magkakaw̓ut,
may magliliit,
may magsusubli,
ang asta anda ray uras nira na Jesus ang ipamangan.
Purisu numanyan mag̓aning ti Jesus tung mga aruman na,
“Mga putulu,
amus ta ra.
Magpaag̓ësita ra kanay duun tung anday tatau na ug̓ud duunita ra kanay mamaënay ta gësyëng uras,”
mag̓aning.
32 Purisu dayun dang namansisaay tung balangay ang namampaag̓ës duun tung anday tatau na ang tanira tanira ra ilëm.
33 Ug̓aring tung pagsaay nira,
durung mga taung nangaita tung nirang nangailala.
Purisu anday dumang binwat nira,
dayun dang namagliliitan tung mga lansangan nirang namagralaksuan ang namagbakay ang asta natkawan da nira na Jesus.
34 Purisu tung paglampud ni Jesus tung balangay,
ya ray naita na yang mga taung atiang buntun.
Pagkaita na tung nira,
ya ra ngampayay ta kakaildawën nang duru tung nira ay natëtëngëd yang pagtërëlëngën na tung nira,
maning pa tung kaayëpan ang mga karniru ang anda ray manigpastur nira.
Purisu dayun dang pinasanag̓an na ta mupia natëtëngëd tung kabag̓ay-bag̓ayan yang paggaraëmën yang Dios.
35 Taa numanyan,
atiing apun da,
dayun dang namagpalëngët tung ni Jesus yang mga taung nag̓apangugyatan nang mag̓aning tung anya,
“Amëëy,
yawa rag tëtëlëng.
Naawita ra tung banwang naang kapas.
Alang-alang da yang uras.
36 Maayën pa,
pampapanawën mu ra ilëm yang mga taung atia ug̓ud mamansiangay ra tung mga baryung alëlëngëtën ubin mga lansangan ang para mamangalang da ta mapangan nira.”
37 Mag̓aning ti Jesus ang nagtimalës,
“Yamu ray magpapaan tung nira.”
Mag̓aning ka tanirang namagtimalës,
“Abëë,
Amëëy,
yang gustu mung ianing basu,
papanawënami pa nuyung papangalangën ta tinapay ang magbaluran ta duruang gatus ang para ya ray ipapaan yamën tung nira?”
38 Mag̓aning si ti Jesus ang minlës,
“Ayw̓a,
pira pang bilug ang tinapay ang nag̓adipara mi?
Insapuën mi ra kanay asan.”
Numanyan pagkainsapu nira,
dayun dang namagbalik tung ni Jesus ang namagpaskë ang mag̓aning,
“May limang bilug ang tinapay ang gërëg̓ësyë may duruang bilug ang ian,”
mag̓aning.
39 Numanyan nagkalalangan da ti Jesus ang yang mga taung atiang buntun mamaggrupu-grupu ra kanay ang mamansikarung asan tung kailamununan ang atiang madalumu.
40 Kapurisu kumarung-karungan da ka man tanirang tanan,
grupu may grupu.
Yang dumang grupu nira may salëgsang gatus nga tauan,
yang duma taglilimang puluk.
41 Pagkatapus numanyan,
pagkadawat ni Jesus yang mga tinapay ang atiang limang bilug may yang ian ang atiang duruang bilug,
dayun dang tuminingarang nagpasalamat tung Dios natëtëngëd tung pamangan ang atia.
Pagkatapus ta pagpasalamat na,
dayun na rang pinagpingas-pingas yang mga tinapay ang atia ang ya ray ipinamakdul-pakdul na tung mga taung nag̓apangugyatan nang para ipanagtag-tagtag nira tung mga tau.
Pati yang mga ian ang atiang duruang bilug,
ipinagparti-parti na ra ka ang asta namagkarampëd da tanirang tanan.
42 Numanyan tanirang tanan nangapamangan dang asta namampabial dang luw̓us.
43 Pagkatapus atiing tuw̓urun da yang mga taung atiang nag̓apangugyatan ni Jesus yang mga yëpëd-yëpëd yang tinapay may yang ian ang pinamanganan nira,
sam puluk may durua pa nga baayan yang napnuk nira.
44 Kung bilangën yang mga taung atiang namamangan,
may limang liw̓u nga tauan,
puira pa tung mga baw̓ay may tung mga mamula.
Yang Pagpanaw Ni Jesus Tung Ulit Yang Aw̓uyuk (6:45-52)
45 Taa numanyan,
atiang lag̓i,
itinulmun da ni Jesus yang mga taung atiang nag̓apangugyatan nang mamagsaay ra tung balangay ang mamagtukaw ra tung anyang mamagpatindak duun tung lansangan ang Betsaida.
Ay pampaulikën na pa unu yang mga taung atiang buntun ang pampapanawën.
46 Numanyan atiing pinampaulik na ra yang mga taung atia,
dayun dang nanungul tung bukid ang para mag̓arampuën da tung Dios.
47 Pagkalaw̓ii,
yang balangay ang pag̓asaayan yang mga tauan na atii ra tung kakngaan yang lalaguna.
Ti Jesus sam bilug ilëm ang napabutwan tung banwa.
48 Taa numanyan nabandaw ra ni Jesus ang yang mga tauan na tung balangay nag̓aliwag̓an dang pamanggayung ay natëtëngëd sungsung yang palët.
Numanyan atiing sam parti pa mangayag,
baklu pa manikad ti Jesus ang ya ra ilëm agpagpanaw tung ulit yang lalguna.
Midyu tung magtataklib da ilëm din tung nira.
49 Ug̓aring pagkaita nira tung anyang yag pagpanaw tung ulit yang lalaguna,
ya ra mag̓irisyakan ay kanisip nirang sasang kalag.
50 Ay nangataranta ra tanira ta mupia tung pagkaita nira tung anya.
Atii,
dayun dang nagbitala ti Jesus tung nirang mag̓aning,
“Ëëy,
paisëg̓ën mi ra yang mga isip mi.
Yuu ra taa.
Ustu ra tiang pagpakataranta mi!”
mag̓aning.
51 Pagkatapus diritsyu rang nagsaay ti Jesus tung balangay ang nagpakiugpu ra tung nira.
Pagkasaay na,
dayun dang nag̓ëltëng yang palët.
Pag̓ëltëng da yang palët,
nangabërëng da ta mupia yang mga tauan na.
52 Ay ya pa ag̓ari,
maskin naita nirang nagpapaan tung mga taung atiing buntun,
piru indi pa ka ëngëd nag̓amarësmësan nira kung unu pa ëngëd ay linagpakan na,
kung indi,
maluw̓ay pa ka ëngëd yang mga isip nirang magdëëp.
Nag̓apampamaayën Ni Jesus Yang May Mga Laru Duun Tung Banwang Pag̓aningën Ang Genesaret (6:53-56)
53 Taa numanyan,
dayun-dayun yang pagpalaktëd nira ang asta duun da nangasampët tanira tung banwang pag̓aningën ang Genesaret.
Pagkaduung nira,
yang balangay pinunduan da ilëm nira asan tung duruungan.
54 Numanyan paglampud nira tung balangay,
ti Jesus nailala rang lag̓i yang mga tau asan tung bakayan.
55 Pagkailala nira tung anya,
dayun dang namagralaksuan ang namagliliw̓utun tung intirung banwang atia ang namag̓ërëkëlën tung may mga larung lumbug̓an tung mga lulubgan nira.
Ay gustu nirang ipampadangëp nira tung ni Jesus tung maskin ay pang rugalay ang nag̓abalitaan nira ang tanya duun.
56 Maskin ay pa nanganing ti Jesus,
kung duun tung mga baryu ubin tung mga lansangan ubin tung mga kabiw̓init-binitan,
duun da ka tung mga plasa nag̓ipampabtangay nira yang mga kaarumanan nirang may mga laru.
Namagpakiildaw ra dayun tung anya ang kung maimu ilëm ang maskin ya ra ilëm yang mga mabiw̓ilug-bilug ang yag tatakëd tung sidsirën yang aw̓ël nang atiang langkuy ya ray madëënan yang mga kaarumanan nirang atia.
Ang pagkatapus,
kumpurming tinu pay nagdëën,
ya ray nagmaayën tung pag̓alaru na.