Yang Nag̓ipagngël Ni Jesus Tung Mga Tau, Asan Da Nag̓ipapanaway Na Tung Pulus Pananglit (13:1-3a)
13
Numanyan tung kaldaw ang atii ti Jesus luminua ra tung balay ang nagpabakayan.
Duun da kuminarung ay magturuldukanën si.
2 Duru-durung mga taung namagtaripukpuk tung anya.
Purisu naparugal-rugal dang suminaay tung sasang balangay ang napaabwat-abwat ta gësyë.
Duun da ilëm ngarung ang ya kag tatalunga tung mga taung këmdëngan asan tung bakayan.
3 Duru-durung mga bag̓ay ang ipinagtulduk na tung nira ang asan da nag̓ipapanaway na tung mga pananglit.
Nag̓ipananglit Ni Jesus Yang Mga Tau Tung Mga Tanëk Ang Tarakbulan Ta Binik (13:3b-9)
Mag̓aning tanyang nagpananglit,
“Numanyan may sasang taung minangay duun tung pinagbangtëran na,
ay magtarakbulun da ta binik ta trigu.
4 Numanyan tung pagtarakbulun na,
yang dumang binik nalagsik da tung dalan ang palanawan ta mga tau tung kakngaan ang pagkatapus kinaw̓utan da ta mga lamlam ang pinagsumpit.
5 Yang duma kang binik,
duun ka nëpa tung tanëk ang manipis ang may batung tapik ang unayën ang alëngët dang lumput tung ulit yang tanëk.
Purisu indi ilëm nabuay,
buminukngil da ay malw̓aw kang lag̓i yang tanëk.
6 Numanyan pagkapangayag da ang atiing abwat da yang kaldaw,
nangalëëy ra ang asta namanlumpayëng dang pisan ay indi nangapanlamut ta adalëm.
7 Yang duma kang binik duun ka nëpa tung tanëk ang may mga laskaw yang sapinit ang indi nadëëg̓an ta kapwa yang aradu.
Purisu tung pagkatubu yang mga sapinit,
pinanaw̓ëd-saw̓ëran da nira yang mga trigu ang pinagpig̓ës.
8 Piru yang dumang binik duun da tung lunsan ang tanëk nëpa ang asta namansidarakul dang nangapamurak.
Yang pangaluay yang duma arabubwat da ang tung katëgkaan na ra,
yang duma kasarangan,
yang duma inisën.
9 Ta,
yang nagngël ta mga talinga mi,
ya ra kay painu-inuan mi ta mupia,”
mag̓aning.
Yang Katuyuan Yang Pagparananglitën Ni Jesus (13:10-17)
10 Numanyan yaming mga nag̓apangugyatan nang dati,
nagpalëngëtami ra tung anyang nanalimaan ang mag̓aning,
“Natëtëngëd tung unu pa w̓asu nag̓ipananglit mu ra ilëm yang gustu mung ianing tung mga tau?”
11 Mag̓aning ka ti Jesus ang tuminuw̓al,
“Yang nag̓ipagpananglitu tung mga tau ay natëtëngëd bëlag̓an parariu ta pupusukun.
Ta yamung pagpaugyat da tung yëën,
linugtanamu ra yang Dios ang makdëkan mi ra yang mga bag̓ay ang nag̓aëgtëman na pa rin ang tukaw natëtëngëd tung paggaraëmën nang baklu tung mga tau kung ya pa ag̓aring tukurun na.
Piru tung mga taung atiang pamagpamati ka ilëm,
indi na ilinug̓ut.
12 Ay ya pa ag̓ari,
kumpurming tinu pay madërëp ang magpasadsad tung nag̓ipananglitu,
dulangan pa yang Dios yang maintindian na ang para anday kulang na.
Piru kumpurming tinu pay paw̓aya-w̓ayaën ang magpasadsad,
maskin yang gësyëng atiang nag̓aintindian na,
bawiën da ka ëngëd yang Dios tung anya.
13 Purisu ya ray nag̓ipagpagngëlu ta mga pananglit tung nira ay natëtëngëd yang kadaklan maskin sam puluk ang magtëlëng,
maning pa tung anday sinakëp ta mga mata nira,
basin sam puluk ang mamati,
maning pa tung anda kay nagngël nira,
kag anda kay naintindian nira.
14 Purisu taniray nag̓atëmëngan da yang sasang ipinaula yang Dios tung ni Isaias ang tukaw ang mag̓aning,
‘Kung pampakaw̓utan da nganing yang mga taung naa yang bitalaw,
mamati ra ilëm ang mamati,
piru indi ra ka ëngëd mangaklëran.
Magtëlëng da ilëm ang magtëlëng,
piru maning pa tung anday sakpën ta mga mata nira.
15 Ay pa ag̓ari,
yang mga kinaisipan nira pakiputun da nira,
pati mga talinga nira pabëngëlën da ka nira,
asta mga mata nira pamëyëngën da ka nira.
Ya ray buw̓uatën nira ay may sasang pangamanan ëngëd nira asan,
ang kung disgrasia magkaraklëran da yang mga kinaisipan nira,
kung mag̓aranting da yang mga talinga nira,
kung magkarabuskad da yang mga mata nira,
muya mamagsug̓at dang mamagbalik tung yëën ang asan da rin nga panapnayayu,’
mag̓aninga.
16 Piru ta numyu,
tëëd mi tiang kaayënan ang nag̓ipakdul da yang Dios tung numyu!
Ay yang kaalimbawaan mi maning pa tung maikas da yang mga talinga mi,
buskad da yang mga mata mi.
17 Ag̓aningënamu ra yëën ta maning tia ay atiing tukaw pang mga panimpu,
dakëlëng mga manigpalatay,
dakëlë kang mga taung matinumanën tung nag̓auyunan yang Dios ang duru ka rin ang kalëlyag nirang mangagngël yang nag̓agngël mi numanyan tung yëën,
ang pagkatapus indi ra ka nagngël nira.
Duru ka rin ang kalëlyag nirang mangaita yang nag̓aita mi numanyan tung yëën ang pagkatapus indi ra ka naita nira.
Nag̓ipasanag Da Ni Jesus Kung Unu Pay Linëgdangan Yang Ipinananglit Na (13:18-23)
18 “Purisu ta numyu,
pamatian mi ra kanay ta mupia kung unu pay linëgdangan yang ipinananglitung atia natëtëngëd tung manigtakbul.
19 Kung natëtëngëd tung dalan ang atiang nalagsikan ta binik,
yang linëgdangan na ya ra yang kumpurming pamati tung nag̓ipagpakaw̓ut tung nira natëtëngëd tung palaksu yang paggaraëmën yang Dios ang baklu ang pagkatapus indi ra nira nag̓amarësmësan.
Yang nag̓ainabu,
nag̓apalëngtan dang lag̓i ni Satanas ang yay pinangapunglan ta tanan ang malalain ang pagkatapus ludasën na ra tung mga isip nira yang nagngël nira.
20 Yang linëgdangan yang tanëk ang atiang manipis ang may batung natampëk,
ya ra yang duma ang kung mapamatian da nganing nira yang bitala yang Dios,
atiang lag̓i magpauyun da ang duru rag kasadya yang mga isip nira.
21 Piru kumus indi nalamut ta ustu tung mga kinaisipan nira,
indi ra ilëm buay yang pagparanangërën nira.
Ay kung mapasaran da nganing ta kaliwag̓an ubin pandëëg-dëëg natëtëngëd tung bitalang atiang nag̓apanangëd da rin nira,
atiang lag̓i,
mansipalpas da ka ilëm.
22 Yang linëgdangan yang tanëk ang atiang may mga laskaw ang masapinitën,
ya ra yang duma ang maskin pamati tung bitala yang Dios,
piru kumus masyadung pagpakabëgbëg nira tung mga pagpangabui nira taa tung kaliw̓utan ang naa ubin tung pag̓intris nirang magmanggad,
maning pa tung asan da ilëm nga pig̓ësay yang bitalang nag̓agngël nira ang asta anda ray pinakaw̓ut na.
23 Yang linëgdangan yang tanëk ang atiang lunsan ya ra yang duma ang tung pagparamatiën nira tung bitala yang Dios ya ray nag̓apamarësmësan nira ta mupia.
Ya ra yang mga tau ang yang pag̓irintindiën nira may pakaw̓utun nang nag̓auyunan yang Dios.
Tung duma may pakaw̓utun nang katëgkaan na ra ëngëd,
tung duma may pakaw̓utun nang kasarangan,
tung duma gëg̓ësyë ka ilëm yang pakaw̓utun na,”
mag̓aning.
Yang Nag̓ipananglit Ni Jesus Natëtëngëd Tung Mga Ilamunun Ang May Pagkatrigu Na Ang Yay Nalakët Tung Katriguan (13:24-30)
24 Numanyan nagpagngël si ti Jesus ta sam bilug ang pananglit ang mag̓aning,
“Yang palaksu yang paggaraëmën yang Dios ang naang baklu maning taa.
May sasang taung nagtarakbulun ta analadung binik ta trigu duun tung pinagbangtëran na.
25 Pagkatapus may sasang law̓ii ang yang sasang taung pagpakigsuay tung sambilug,
yay nasubli tung uras ang iërëlëk da yang mga tau.
Ya ra kay nagtarakbulun tung katriguan yang sambilug ang yang ipinanakbul na ya ra yang mga similya yang sasang ilamunun ang may pagkatrigu nab Pagkatapus ta pagtarakbulun na,
dayun dang nagliit.
26 Numanyan tung pagtubu nira,
amat-amat dang pinangisian,
baklu ra ngailala tung mga kaluay nira ang naa pala lakët-lakët da yang trigu may yang ilamunun ang atia.
27 Numanyan pagkainsapu yang mga turuw̓ulun yang may trigu,
dayun dang namagbalik tung ag̓alën nirang namagbaw̓alitaën ang mag̓aning,
‘Maëpët,
bëlag bang analadu yang binik ang atiing ipinatakbul mu tung yamën duun tung pinagbangtëran?
Ya ra ilëg̓ ari kaya ang naglalakëtan da ilëm yang trigu may yang ilamunun ang atiang may pagkatrigu na?’
28 Mag̓aning ka yang ag̓alën nirang minlës,
‘Aa,
siguru yang taung atiang pagpakigsuay tung yëën,
ya ray nagsisting nanakbul tia,’
Mag̓aning ka tanirang namanalimaan,
‘Ta,
maëpët,
gustu mung pamundukun da ilëm yamën yang may pagkatrigu na?’
29 Mag̓aning ka tanyang tuminuw̓al,
‘Indi ra kanay.
Muya pati yang trigu madamay pang mapunduk.
30 Maayën pa,
paw̓ayaan da ilëm kanay ang asta kaw̓utun da yang tilig̓ayëg baklu ra mandarayu yang mga manig̓ayëg ang pamundukun da kanay nira yang ilamunun ang atiing may pagkatrigu na ang pagkatapus pamëgkës-bëgkësën nira ang para sirukun tung apuy.
Matapus da nganing nira tia,
baklu ra dayunay nirang ayëg̓ën yang purung trigu ang tumpiën tung tambuw̓uu,’”
mag̓aning.
Yang Palaksu Yang Paggaraëmën Yang Dios Nag̓ipananglit Na Tung Gëg̓ësyëng Mga Bag̓ay (13:31-33)
31 Numanyan nagpananglit si ti Jesus ang mag̓aning,
“Yang kaalimbawaan yang palaksu yang paggaraëmën yang Dios ang baklu ang naang pag̓atukuru,
maning pa tung lisu ta mustasac ang ingkëlan yang sasang taung ipinanakbul tung sular na.
32 Maskin pinakagëtëy tung tanan ang mga lisu,
piru kung tumubu ra nganing,
ya ray mag̓ing pinakaabwat tung tanan ang kapariu nang luak ang gurulayën.
Magyari rang ayu ang mananga-sanga ang pati mga lamlam duun da kag pamangapun ang pamagbayay,”
mag̓aning.
33 Pagkatapus may sam bilug sing pananglit ang ipinagngël ni Jesus ang mag̓aning,
“Yang kaalimbawaan yang palaksu yang paggaraëmën yang Dios ang naang baklu,
maning pa tung pampalëskag ang ilinakët ta sasang baw̓ay tung sang palangganang arina ang pag̓abuat nang tinapay ang asta pinalëskag na yang intirung pag̓amasa na,”
ag̓aaning.
Naula Kang Lag̓i Atiing Tukaw Ang Ti Jesus Magparananglitën (13:34-35)
34 Yang tanan ang mga bag̓ay ang atia natëtëngëd tung paggaraëmën yang Dios ang baklu luw̓us ang ipinapanaw na tung mga pananglit ang ipinagngël tung mga taung atiang buntun.
Indi nagparakaw̓utun tung nira kung indi ipinapanaw na tung mga pananglit.
35 Purisu asan da nagkamatuud yang sasang ipinaula yang Dios tung sasang manigpalatay ang tukaw ang mag̓aning,
“Kung magparakaw̓utunaw ra nganing tung mga tau,
magparananglitënaw.
Ipasimanu tung nira yang mga bag̓ay ang inëgtëman pa rin yang Dios disti pa atiing pag̓imu na yang kaliw̓utan,”
ag̓aaningd.
Nag̓abadbaran Da Ni Jesus Kung Unu Pay Linëgdangan Yang Ipinananglit Na Natëtëngëd Tung Ilamunun Ang Atiang May Pagkatrigu Na (13:36-43)
36 Numanyan nagpaskë ra ti Jesus tung mga tau ang tanya magliit da.
Purisu dayun dang minulik duun tung balay na ang nagpaklëd.
Numanyan pinalëngtan da yamën ang nag̓apangugyatan nang inaning,
“Maimu ilëm,
Ginuu,
pasanag̓ayami ka kung unu pay linëgdangan yang ipinananglit mu natëtëngëd tung ilamunun ang atiang may pagkatrigu na ang nalakët tung katriguane.”
37 Mag̓aning ti Jesus ang nagpaintindi,
“Yang taung atiang nagtarakbulun ta analadung binik,
yuu ra ang pag̓aningën ang Maninga Tau.
38 Yang pinagbangtëran ya ra yang bilug ang kaliw̓utan.
Yang analadung binik ya ra yang mga taung nagpagaëm dang bug̓us tung Dios.
Yang ilamunun ang atiang may pagkatrigu na,
ya ra yang mga taung nag̓amanguluan ni Satanas.
39 Yang taung atiang nagpakigsuay tung aruman na ang ya kay nagtarakbulun ta similya yang may pagkatrigu na,
ya ra ka man mismu ti Satanas.
Yang linëgdangan yang ayëg,
ya ra yang uras ang ipagtapus yang Dios tung panimpung naa.
Yang mga manig̓ayëg ya ra yang mga angil.
40 Purisu katulad ka tung ilamunun ang atiang may pagkatrigu na ang pinamunduk dang pinagpunpun ang pagkatapus pinagsiruk tung apuy,
maning kang pisan tia ay mainabu tung uras ang ipagtapus yang Dios tung panimpung naa.
41 Ay ta yëën ang pag̓aningën ang Maninga Tau,
panuw̓ulunu yang mga angilung punpunun da nira yang mga taung kumpurming pagsunlug tung mga aruman nirang magpakasalak may yang kumpurming pagpadayun tung paglalampasën nira.
42 Tanirang tanan luw̓us ang ipamlëk nira tung impirnu,
duun tung apuy ang maning pa tung sasang urnuan.
Duun da tanira mamagtarangitën ang mamagkarëtkët yang mga isi nirang mamagpapinitinsia.
43 Pagkatapus yang mga taung nag̓abiw̓ilangung salu rang pisan tung pagtërëlëngënu,
pampadëngëg̓anu ra ta mupia duun tung baklung kaliw̓utan ang paggaëman yang Ama nira ang yang pagkabëtang nira masusulaw rang pisan ang anggid tung kaldaw yang kasusulawën nira.
Purisu kung unu pay nagngël ta mga talinga mi,
ipabalay mi rang lag̓i tung mga isip mi,”
mag̓aning.
Nag̓ipananglit Ni Jesus Kung Unu Pay Balur Na Tung Sasang Tau Kung Tanya Magpalg̓ud Da Tung Palaksu Yang Paggaraëmën Yang Dios (13:44-46)
44 Mag̓aning ti Jesus ang nagpananglit si,
“Kung ipananglitu kung unu pay balur na tung sasang tau ang magpalg̓ud da tung palaksu yang paggaraëmën yang Dios,
maning pa tung may sasang manggad ang itinaluk ang itinampëk tung tanëk,
ang pagkatapus naita ta sasang tau.
Pagkaita na,
ibinalik na si kang itinampëk.
Pagkatapus natëtëngëd tung kasasadyaën yang isip nang duru,
dayun dang minulik ang nagpaalang da yang tanan ang nabtang tung pudir na ang pagkatapus binalikan na sing inalang yang tanëk ang atiing pinagtampëkan na yang manggad ang atii.
45 Yang sam bilug pang ipananglitu tung balur na tung sasang tau ang magpalg̓ud da tung palaksu yang paggaraëmën yang Dios,
maning pa tung sasang nigusyanti ang pagsagyap ta mga musyang matitinlu ang para alangën na.
46 Pagkatapus atiing may napanawan nang sam bilug ang inding pisan mapakdingan,
anday duma,
dayun dang minulik ang nagpaalang da yang tanan ang nabtang tung pudir na ang pagkatapus binalikan na sing inalang yang musyang atii.”
Yang Nag̓ipananglit Ni Jesus Kung Ya Pa Ag̓ari Yang Pagpinig Yang Dios Tung Mga Tau Kung Tinu Pay Risibiën Na Ig Kung Tinu Pay Kaskasën Na Tung Uri (13:47-50)
47 Utru si,
nagpakdul da ta sasang pananglit tung mga taung nag̓apangugyatan nang mag̓aning,
“Yang palaksu yang Dios tung paggaraëmën na tung uri maning pa tung sasang lambat ang itinaktak yang mga manug̓ian tung lalaguna ang pagkatapus sari-saring klasi ta mga ian ang nasapul.
48 Numanyan pagbatak nira yang lambat,
dayun da nirang ginuyuran tung takas.
Asan da ilëm nansikarung ang namagpilik yang mga ian.
Yang mga matitinlu ipinabtang da nira tung mga tiklis.
Yang anday pakinaw̓ang ipinamlëk da ka ilëm nira asan.
49-50 Ya kang pisan tia yang kaalimbawaan yang mainabu tung uras ang ipagtapus yang Dios tung panimpung naa.
Tung uras ang atia,
panuw̓ulunu ra yang mga angilung mamagliliw̓utun da tung bilug ang kaliw̓utan ang para kumpurming tinu pay pagpadayun tung pagburuatën nirang mga malalain,
ya ray paminig̓ën nirang ipampablag tung kumpurming tinu pay pagpadayun tung pag̓urubraën nira yang magkatama.
Pagkatapus yang ipinampablag nirang atia ya ray ipamlëk da nira tung impirnu,
duun tung apuy ang maning pa tung sasang urnuan.
Duun da tanira mamagtarangitën ang mamagkarëtkët yang mga isi nirang mamagpapinitinsia.”
Nag̓ipananglit Ni Jesus Yang Nag̓apangugyatan Na Tung Sasang Manggarën Ang Kung Magturuldukun Tung Duma, May Baklung Matulduk Nira Kag May Dati (13:51-53)
51 Matapus na yang pagparananglitën na,
dayun dang nagtalimaan tung yamën ang nag̓apangugyatan na ang,
“Ta,
nag̓aintindian mi ra yang linëgdangan yang tanan ang pinananglitanung atia?”
Ag̓aaningami kang nagtimalës,
“Ëë,
nag̓aintindian da ka yamën.”
52 Mag̓aning ka ti Jesus ang minlës,
“Maayën ka tia kipurki yang tanan ang mga sag̓ad tung kasulatan ang datif ang kumpurming naugyatanu ra natëtëngëd tung palaksu yang paggaraëmën yang Dios ang naang baklu ang pagkatapus dayun da kang nagpagaëm ang bug̓us tung yëën,
maning taa yang kaalimbawaan nang magturuldukun tung duma.
Tanya magkapariu tung sasang manggaranën ang may kuartung pagtalukan na ta mga mamaalën na ang puiding abrian nang para ipalua na ra yang mga mamaalën nang baklu pati yang datig.”
53 Numanyan matapus ni Jesus yang pananglit ang atia,
dayun dang nagliit tung banwang atia.
Ti Jesus Nag̓apangindian Da Yang Mga Masigkabanwa Na (13:54-58)
54 Numanyan,
pagbalik na duun tung banwang pinagdakulan na,
nag̓impisa rang nagturuldukun tung mga taung namagsarapun da duun tung pagsaragpunan nira.
Yang pinakaw̓ut na,
nangabërëng da ta mupia tung anyang namag̓araning-aningan dang mag̓aning,
“Abaa,
yang tau kang naa ka,
ay pa ngaëklay na yang kataku nang atia ang pagkatapus ya pay magtulduk tung yatën?
Pati yang mga pruibang atiang maktël ang nag̓abalitaan tang nag̓apagpalapus na buat,
ay pa ngaëklay na?
55 Bëlag bang atia ana ka ilëm yang karpintiru ta?
Bëlag bang yang nanay na ti Maria?
Bëlag bang yang mga putul nang lalii ti Santiago,
ti Jose,
ti Simon,
may ti Judas?
56 Bëlag ba ang pati yang mga putul nang mga baw̓ay,
taa kang tanan agpamag̓istar tung banwa ta?
Ayw̓a,
unu pa w̓asu ay pagpabëtang na tung sadili na?”
mag̓aning.
57 Purisu duun da namagmalagana yang mga isip nirang namagdiskumpiar tung anya.
Numanyan mag̓aning ti Jesus tung nira,
“Talagang matuud ka man pala yang bitala yang mga mamaëpët ang yang sasang manigpalatay yang bitala yang Dios,
maskin ay pang banwaay nga tëyëb,
nag̓agalang ta mga tau,
puira pa tung banwang natauan na maskin pa tung sëlëd yang sadiling pamalay-w̓alay na,
anda ka,”
ag̓aaning.
58 Purisu gësyë ka ilëm yang mga pruibang maktël ang ipinagpalapus na duun natëtëngëd tung pagdiskumpiar nira tung anya.