Yang nagsulat yang librung atia, ti Marcos ang ana ni Mariang atiang may balay ang dakulu duun tung Jerusalem (Mga Binwat-bwatan 12:12). Ti Marcos pinsan ka ni Bernabe ig pinanunut nira ni Pablo atiing primirung pagliliw̓utun nirang namagparakaw̓utun yang Matinlung Balita (Mga Binwat-bwatan 13:5). Nag̓askëan ta ka ang ti Marcos nag̓aruman ka tung ni Pedrong sasa kang apustul ni Jesu-Cristo (1 Pedro 5:13). Purisu tung pag̓intindi yang kadaklan ang mga sag̓ad tung kasulatan, ti Pedro yay nagparaintindiën tung ni Marcos natëtëngëd tung nagkarabuat ni Jesus pati tung nagkaratulduk na.

Yang mga taung nag̓aisipan ni Marcos ang nag̓aparumbuan, ya ra yang mga tag̓a duma-rumang nasyun ang bëlag̓an mga masigka Judio na. Yang mga tag̓a Roma ya ëngëd ay gustu nang paintindiën.

Kung tag̓aman tang pabilug̓an yang pinakaisi yang isinulat na, ya ra yang sasang inaning ni Jesus tung 10:45: “Ay ya pa ag̓ari, ta yëën ang pag̓aningën ang Maninga Tau, yang katuyuanu, bëlag̓an ang mag̓aning ang para yuuy magpanuw̓ul tung mga taung magpasikasu, kung indi, ang para yuuy mag̓ing turuw̓ulun nirang mag̓arasikasuën tung nira, ang yang inangayu ëngëd, ay magpatumbasaw yang linawaw ang para durung mga taung mapaluasu tung pagpakirëpën nira tung pagburuatën nira ta mga kasalanan.”

Gustu ni Marcos ang maintindian ëngëd yang magbasa ang ti Jesus pirming nagpakaayën tung mga tau ang katulad tung pagparamaayënën na tung may mga laru pati yang pagparalayasën na tung mga dimunyung pagkëmkëm da rin tung duma. Purisu duun da ëngëd nga papruibaay ang ti Jesus talagang may kagaëman nang durug puirsa ig tanya ka man yang pag̓aningën ang Ana Yang Dios bilang Mananapnay ang pinangakuan nang yay maggaraëmën ang asta tung sampa.