Yang Isinulat Ni MARCOS Natëtëngëd Tung Ni Jesu-Cristo
Natëtëngëd Tung Pagparakaw̓utun Ni Juan Ang Manigbënyag (1:1-8)
1
Yang nag̓ibalitang naang durug tinlu natëtëngëd tung ni Jesu-Cristong yay pag̓aningën ang Ana Yang Dios,
maning taa yang pinangapunglan na.
2 Atiing tukaw,
may sasang isinulat ni Isaias ang sasang manigpalatay yang bitala yang Dios.
Duun napabtang yang inaning yang Dios tung sasang tuw̓ulun na ang mag̓aning,
“May taung tuw̓ulunung magpalatay yang bitalaw ang yay ipatkawu tung nuyu ug̓ud yay magliway tung mga kinaisipan yang mga tau ang para mampauyun da tung nuyua.
3 Duun tung banwang kapas magparakaw̓utun tung mga tau ta maning taa:
‘Katulad ka tung pagsirimpanën tung sasang dalan ang panawan ta sasang Adi ang yag tadlëngay,
kaministiran kang simpanën mi ra ka ta mupiang tadlëngën yang mga kinaisipan mi ang para magpauyunamu ra tung ni Ginuu tang magkakaw̓ut,’”
mag̓aningb.
4 Kapurisu,
kumus maning tia yang naula,
duun da nagkamatuud tung paglua ni Juan ang manigbënyag duun tung banwang kapas.
Nagparakaw̓utun da tung mga tau ang mag̓aning,
“Manlignaamu ra tung mga kasalanan ming magbalik tung Dios ang pagkatapus ya ra kay papruibaan ming magpabënyag ug̓ud patawarënamu ra anya,”
ag̓aaning.
Jesus is Baptized (Marcos 1:4-11)
5 Duru-durung mga taung tag̓a Judea may tag̓a Jerusalem ang namag̓arangay-angayan duun tung ni Juan.
Numanyan kumpurming tinu pay nangamin yang mga kasalanan na tung Dios,
ya ra kay binënyag̓an na duun tung subang atiang pag̓aningën ang Jordan.
6 Ti Juan ang naa,
yang aw̓ël na balayw̓u ta pag̓aningën ang kamilyu ang inubra tung tiralc.
Yang akës na ulit ta sasang ayëp.
Yang pamangan na apan ang maglutukun na may lanaw.
7 Numanyan may nag̓ipagpakaw̓ut na tung mga tau ang maning taa:
“May sasang taung nag̓auri pa tung yëën ang ya pay mas abwat ta katëngdanan tung yëën.
Indiaung pisan magkabag̓ay tung anya basin nganing tung pag̓uw̓ad da ilëm yang lakgëng yang sandalyas nad.
8 Kung tung bag̓ay,
sigun tung katëngdananu ka man,
pagpamënyag̓aw tung numyu taa tung waing naa ug̓ud simpanamu rang magrisibi tung anya.
Piru yang anyang katëngdanan,
maning pa tung magbërënyag̓ën ka tung numyu ëkël tung pagpatinir na tung numyu yang Espiritu Santo,”
mag̓aning.
Yang Pagpabënyag Ni Jesus Tung Ni Juan (1:9-11)
9 Taa numanyan,
tung mga uras ang atii,
ti Jesus nagliit da duun tung lansangan ang Nazaret ang lug̓ud tung sinakëpan yang Galilea ug̓ud mangay ra ka duun tung ni Juan.
Pagkaw̓ut na duun,
dayun dang nagpabënyag tung anya tung subang atiang pag̓aningën ang Jordan.
10 Tamang tamang magpatakas da ti Jesus,
ya ray natingara na yang langit ang gulpi ra ilëm ang nag̓abri tung tagbu na ang pagkatapus ya ray naita na yang Espiritu Santong nagpapariu ra tung kuari kalapati ang paparanëk da ang asta nangapun da tung anya.
11 Atii may busis da ang liit tung langit ang mag̓aning,
“Yaway pag̓aningënung anaw ang nag̓apabuyukanu ta gëgmaw ay yawa ra kang lag̓i ay nag̓auyunanu ta mupia,”
mag̓aning.
Ti Jesus Pag̓atag̓aman Ta Tuksu Ni Satanas (1:12-13)
12 Pagkatapus tia,
yang Espiritu Santo ya ray nagmangulu tung anyang nagpapanaw duun tung banwang kapas.
13 Tinag̓aman da ni Satanas ta tuksu tung sëlëd ëpat ang puluk ang kaldaw duun tung banwang atii,
ang yang mga ugpu ni Jesus duun pulus ilëm mga dayamdam.
Pagkatapus tia may mga angil ang namag̓arasikasuën da tung anya.
Nag̓aimpisaan Da Ni Jesus Yang Pag̓urubraën Na Duun Tung Galilea (1:14-15)
14 Taa numanyan,
atiing nakalabus da ti Juan ang manigbënyag,
ti Jesus tanya,
nagbalik da duun tung sinakëpan yang Galilea.
Duun da nagparakaw̓utun tung mga tau yang Matinlung Balita ang ya ra ka man ay itinalig yang Dios tung anyang ipagpakaw̓ut.
15 Maning taa yang ipinagpakaw̓ut na tung nira:
“Kinaw̓ut da yang uras ang atiing ipinaula yang Dios atiing tukaw ang ya ray ipagpundar na yang paggaraëmën nang baklu tung numyu.
Purisu manlignaamu ra tung mga kasalanan ming magbalik tung anya ig manangëramu ra ka tung balitang naang nag̓ipagpakaw̓utu tung numyu,”
mag̓aning.
Yang Pag̓imbitar Ni Jesus Tung Ëpat Ang Mga Manig̓ian Ang Mamagpaugyat Da Tung Anya (1:16-20)
16 Taa numanyan,
atiing pagbakay ni Jesus tung lalagunang atiang lug̓ud tung sinakëpan yang Galilea,
naita na ti Simon duruang mag̓ari ni Andres ang pamanlaman ta ian ay tanira mga manig̓ian.
17 Mag̓aning ti Jesus tung nirang nagbugnu,
“Magpakignunutamu ra tung yëën ang magpaugyat.
Dati-rati yang mag̓ëklan mi ian.
Piru numanyan ugyatanamu ra yëën kung ya pa ag̓aring maëklan mi yang mga isip yang mga tau ang basi pa ra ilëm ang magsuku ka tung yëën ug̓ud basi pa ra ilëm magpaugyat da ka tung yëën,”
ag̓aaning.
18 Numanyan lag̓i-lag̓ing binutwanan da nira yang mga laman nirang namagpakignunut da tung ni Jesus.
19 Numanyan matukaw-tukaw tanira na Jesus ta gësyë,
naita na ti Santiago duruang mag̓ari ni Juan ang yay mga ana ni Zebedeo.
Asan tanira tung balangay nirang pamag̓ëët yang mga laman nira.
Numanyan pagkaita ni Jesus tung nira,
dayun na rang bintëng ang mamagpakignunut da ka tung anyang para mag̓ing mga tauan na ka.
20 Numanyan lag̓i-lag̓ing binutwanan da nira ti Zebedeo ang tatay nira asan tung balangay,
kasiraan da ka tanira yang mga tauan na.
Ay tanirang durua namagpakignunut da ka tung ni Jesus.
Pagpalayas Ti Jesus Ta Dimunyu Tung Sasang Tau (1:21-28)
21 Taa numanyan,
diritsyu rang nansiangay tanira duun tung lansangan ang Capernaum.
Numanyan pagkaw̓ut yang kaldaw ang nag̓ipamaënay,
nagpaklëd da ti Jesus tung balay ang pagsaragpun-sagpunan yamën ang mga Judio ang para magturuldukanën tung mga taung pamag̓intindi tung Dios asan.
22 Numanyan tung pagpamati nira tung anya,
nangabërëng da ta mupia tung pasais nang nagturuldukun tung nira.
Ay ya pa ag̓ari,
yang pagturuldukun na,
may builu nang maktël ang yay pagpailala ang may katëngdanan na ka man ang ipinakdul yang Dios tung anya.
Bëlag̓an pariu tung pasais yang mga sag̓ad ang pagturuldukun tung nira.
23-24 Numanyan duun tung pagsaragpunan ang atii,
may taung pag̓aëkël-ëkëlan ta dimunyu ang ya ray naglëlpakën ang mag̓aning,
“Ay Jesus ang tag̓a Nazaret,
ayw̓a ag̓apasilabtanami pa nuyu?
Ayw̓a,
yaming mga dimunyu,
yami ray katuyuan mu ang para diaduënami ra nuyu?
Sampa india mailalaw.
Yawa yang pinilik yang Dios ang magpundar yang paggaraëmën nang baklu.”
25 Atii,
dayun dang sinambëng ni Jesus ang inaning,
“Ipës!
maglayasa ra ilëm asan!”
mag̓aning.
26 Atii,
yang dimunyu dayun na rang linuw̓ag yang tinanguni yang taung atia,
ang pagkatapus tung paglayas na tung anya,
ya ra kay paglëlpakën na ta maknul.
27 Pagkaita yang mga tau,
nangabërëng da ta mupia tanirang tanan.
Namag̓araning-aningan da ang,
“Unu pa w̓asu?
Baklu ilëm ngagngëlay ta yang maning tiang nag̓ipagpakaw̓ut!
Yang taung naa may katëngdanan nang magkalalangan tung mga dimunyu ang pagkatapus atiang lag̓i panangëd da!”
mag̓aning.
28 Kapurisu yang balita natëtëngëd tung binwat ni Jesus ang atia,
makali ilëm ang nanlaktëd-laktëd tung intirung sinakëpan yang Galilea.
Duru-durung Mga Tau Ang Nag̓apampamaayën Ni Jesus (1:29-34)
29 Taa numanyan,
dayun dang nansilua na Jesus tung pagsaragpunan ang atia ang nansiangay duun tung balay ni Simon durua ni Andres,
kasiraan da ka tanira ni Santiago durua ni Juan.
30 Kaw̓utan nira,
naa pala,
yang punyangan ni Simon ang baw̓ay yag lulw̓ug ay agkinitën.
Purisu ti Jesus,
ya ray inugtulan nira.
31 Purisu dayun dang pinalëngtan ni Jesus ang pinggësan tung kalima nang binangun.
Lag̓i-lag̓ing naumpawan da yang maëpët ang pagkatapus dayun dang nagsimpan ta mapapaan na tung mga bisita na.
32 Taa numanyan,
atiing pagsantëk da yang kaldaw,
duru-durung mga taung may mga laru pati yang duma ang agdimunyuwën ang ya ray ipinampadangëp yang mga aruman nira tung ni Jesus.
33 Pagkatapus alus pa ilëm yang tanan ang mga tau tung lansangan ang atia namagsaragpun da duun tung talungaan yang balay.
34 Tung uras ang atii,
dakëlë yang namaglaru ta sari-sari ang pinampamaayën ni Jesus,
pati mga dimunyu dakëlë ka yang pinampalayas na.
Gustu ra rin yang mga dimunyung atia ang mamagbaw̓alitaën da natëtëngëd tung anya ay natëtëngëd nag̓ailala ra nira kung tinu pa.
Piru indi na ra tinugtane.
Pagliliw̓utun Da Ti Jesus Ang Pagparakaw̓utun Tung Intirung Sinakëpan Yang Galilea (1:35-39)
35 Taa numanyan,
atiing sam parti pang mangayag,
nagbangun da ti Jesus ang nagpaag̓ës duun tung sasang lugar ang anday tatau na ig duun da nag̓intra pag̓arampuën tung Dios.
36 Numanyan,
pagkapuaw na Simon,
dayun da nirang sinagyap.
37 Pagkaita nira,
dayun da nirang inaning ang,
“Abëë,
panduua ra taa?
Nag̓adarawala ra ta durung tau!”
38 Mag̓aning ti Jesus ang nagtimalës,
“Amus ta ra.
Magpalaluyita ra tung dumang mga lansangan ang alëlëngëtën ug̓ud duunaw ra ka magparakaw̓utun,
ay ya ra kang lag̓i ay katuyuanu taa,”
ag̓aaning.
39 Kapurisu numanyan nagliliw̓utun da ka man ti Jesus tung intirung sinakëpan yang Galilea ang nagparakaw̓utun tung mga tau ang kada mamagsaragpun tung nira-nirang mga pagsaragpunan.
Dispuis nagparalayasën da ka tung mga dimunyung namagsuut tung mga tau.
Yang Pagpamaayën Ni Jesus Tung Sasang Taung May Dispirinsia Tung Ulit Nang Makamamansa (1:40-45)
40 Taa numanyan,
may sasang taung nagpalëngët da tung anya ang may dispirinsia tung ulit nang makamamansa.
Dayun dang nagluud tung pinagtalungaan nirang durua ang nagpakiildaw tung anyang mag̓aning,
“Amëëy,
kung malëlyag̓a ilëm,
nag̓askëanung sarangan mung kuatën tung yëën yang dispirinsiaung naa ang yay pagpamansa tung pagkatauu,”
ag̓aaning tanya.
41 Pagkagngël ni Jesus tia,
ya ra ngaildaw.
Dayun na rang dinëënan ang inaning,
“Ag̓alëlyag̓aw ka,
kuatana ra yëën,”
ag̓aaning.
42 Lag̓i-lag̓ing nakuatan da ka man yang dispirinsia nang atia.
43-44 Numanyan,
atiang lag̓i,
pinaliit da ni Jesus ang pinapanaw.
Baklu paliitay na,
pinagpaamanan na ta malëbat-lëbat ang bitala ang inaning,
“Kuidaw,
india ra ëngëd magbaw̓alitaën,
maskin tung ninu pa natëtëngëd tung binuatung atia tung nuyu.
Anday dumang buatën mu,
mag̓angaya ra kanay duun tung sasang pari ang magpatëlëng ang yawa limpiu ra.
Pagkatapus magpadasag̓a ra ka dayun tung anya ta sasang ayëp ang iprisintar na tung Dios ang katulad ka tung urdinansang ibinutwan ni Moises ang tukawf ug̓ud asan da nga kumpurmiay yang mga tau ang anda ray dapat ang likayan nira tung nuyu,”
mag̓aning.
45 Pagkatapus numanyan,
pagliit yang taung atia,
bëlag ya manangëd tung ipinaaman ni Jesus tung anya,
ya mag̓intra baw̓alitaën tung maskin tinu pang tauay.
Kapurisu kumus sarambung da yang balita,
anday dumang pinakaw̓ut na,
indi puiding magpanayang-nayang ti Jesus ang magpaklëd tung mga lansangan,
kung indi,
duun da ilëm tung lua ang anday mga balay.
Piru maskin maning tia,
sigi ilëm yang pag̓arangayën yang mga tau tung anya ang maskin tag̓a ay pang lugaray.