Nag̓apapruibaan Da Ni Jesus Ang Tanya May Katëngdanan Na Ka Man Ang Magpatawad Tung Mga Kasalanan Yang Mga Tau (2:1-12)
2
Taa numanyan,
tung pira pang kaldaw,
atiing pagbalik da ni Jesus duun tung lansangan ang Capernaum,
nagsarambung da yang balita ang tanya unu duun da tung balay.
2 Durug dakël yang mga taung namagsaragpun asan ang asta naggëtëk da ilëm.
Maskin pa tung talunga yang purta,
anda ray masalëëtan.
Numanyan ti Jesus nagparakaw̓utun da tung nira natëtëngëd tung paggaraëmën yang Dios ang naang baklung pag̓atukud na.
3 Numanyan may ëpat nga tauan ang baklung namansikaw̓ut ang may ëkël nirang sasang taung pamamilay ra yang mga tinanguni na.
Ya rag tuang-tuangay nirang nag̓idangëp tung ni Jesus.
4 Numanyan,
atiing indi mapalëngët nira tung anya natëtëngëd tung mga taung atiang gëtëk dang pisan,
anday dumang rimidyung binwat nira,
kung indi,
itinakwal da ilëm nira duun tung aldan ang panganing tung sagpaw yang balaya.
Pagkatapus tung tagbu ni Jesus,
ya ray pinangukab nirang inabrian ang pagkatapus duun da ipapanaway nirang ituntunay yang papag ang nag̓aluw̓ug̓an yang aruman nira.
5 Numanyan,
pagkasiman ni Jesus ang tanira may pagtalig nira tung anya,
dayun na rang binugnu yang aruman nirang atiang pamamilay yang mga tinanguni nang inaning,
“Duduy,
nag̓apatawara ra yëën tung mga kasalanan mu,”
mag̓aning.
6 Numanyan may mga sag̓ad ang kumarungan asan.
Pagkagngël nira yang inaning ni Jesus tung taung atia ang maning tii,
ya ray ipinagkësën-kësën nira tung mga isip nira ta maning taa:
7 “Abaa,
yang tau kang naa ka,
ayw̓at maning da takaa yang nag̓ianing na?
Talagang ya ra pagtiwakaway na yang pagkadios yang Dios!
Ayw̓a,
tinu pa pay sarang ang magpatawad tung mga tau tung mga kasalanan nira kung bëlag̓an ultimu ilëm yang Dios?”
8 Kumus nag̓adëëp dang lag̓i ni Jesus ang maning da tia yang laksu yang pagparainu-inuën nira,
dayun na rang binugnung inaning,
“Ayw̓a maning da tia yang nag̓ipagkësën-kësën mi tung mga isip mi?
9 Kanisip mi ang sungaw ilëm yang inaningung atia tung taung naang pamamilay yang mga tinanguni na ang pinatawaru ra tung mga kasalanan na?
Piru kung aningënu si ang magbangun dang mag̓ëkël yang papag nang magpanaw,
asan da ngaskëay mi kung yang bitalaw sungaw ilëm u kung may kamatuuran na.
10-11 Purisu papruibaanu ra numanyan tung numyu ang yuung pag̓aningën ang Maninga Tau,
may katëngdananu ka man taa tung katanëkan ang magpatawad tung mga tau tung mga kasalanan nira,”
mag̓aning.
Pagkatapus,
diritsyu rang pinag̓aning na yang taung atiang pamamilay yang mga tinanguni na,
“Ala,
magbanguna ra.
Ëklan mu ra atiang papag mung mulik,”
mag̓aning.
12 Atii,
diritsyu rang nagbangun yang taung atia ang pagkatapus ingkëlan na ra yang papag nang luminua tung katalungaan nirang tanan.
Purisu nangabërëng da ta mupia tanira ang nunut da ka ta pagdarayawën nira tung Dios.
Namag̓araning-aningan dang,
“Bakluita ilëm naita ta maning tia!”
mag̓aning.
Natëtëngëd Tung Inangay Ni Jesus Tung Kaliw̓utan Ang Naa (2:13-17)
13 Taa numanyan,
dayun dang naglampud ti Jesus tung balay ang nagpabakayan si.
Numanyan may mga taung buntun ang namag̓arangay-angayan da tung anya ang ya ra kay pinanuldukan na natëtëngëd tung bitala yang Dios.
14 Numanyan tung pagbakay na,
naita na yang sasang taung nag̓aranan tung ni Levi ang yay ana ni Alfeo.
Yag kakarung tung upisina nang pagpanukut tung mga tau yang mga balayaran nira tung gubirnu.
Mag̓aning ti Jesus ang nagbugnu tung anya,
“Amus,
magpakignunuta ra tung yëën ang magpaugyat,”
mag̓aning.
Atii,
dayun dang kumindëng ti Levi ang nagpakignunut tung ni Jesus.
15 Taa numanyan,
nagkamaning da ang ti Jesus pagpakigsaru ra duun tung balay ni Levi,
kasiraan da ka tanira yang mga taung nag̓apangugyatan nang dati.
Dispuis duru kang mga manigpanukut ta balayaran tung gubirnu ang pamagpakisaru ka tung na Jesus,
kasiraan da ka tanira yang duma ang parariung nag̓alamku ka ta duma ang durug kakinasalananën.
Namagpakisaru ra ka ngani tanira tung ni Jesus ay durung mga taung mga maning tiang klasi ang kadagmitan ang pamagnunut-nunut da kang lag̓i tung anya.
16 Taa numanyan may mga sag̓ad tung mga urdinansa asan ang pamagpaniid.
Tanira mga pamagmangulung mga kinasakpan yang sasang grupung nag̓aranan tung mga Pariseo.
Numanyan,
pagkaita nira tung ni Jesus ang pagpakigsaru ra ka man tung mga manigpanukut pati mga ugpu nirang parariung pag̓atëlëngan nirang makinasalananën,
dayun dang inistinggir nira yang mga tauan ni Jesus ang dati ang inaning,
“Ba tia,
ayw̓a asan dag pagpakigsaru yang ag̓alën mi tung mga manigpanukut ang atia may tung mga ugpu nirang duru kag kakinasalananënb?”
ag̓aaning.
17 Numanyan,
pagkadngël ni Jesus tia,
ya ray nagtuw̓al ang asan da ipapanaway na tung sasang pananglit ang mag̓aning,
“Yang mga taung makëktël anday kaministiran nira yang manigbulung,
kung indi,
ya ra ilëm yang may mga laru.
Katulad ka tung yëën,
ay yang inangayung mag̓imbitarën ang para mag̓ing mga tauanu,
bëlag̓an yang mga taung pagtalig tung mga sadili nira ang tanira matadlëng da tung pagtërëlëngën yang Dios,
kung indi,
ya ra ilëm yang kumpurming tinu pay mangamin ang tanya talagang makinasalananën ka man,”
mag̓aning.
Yang Dating Nag̓apgësan Ta Mga Tau May Yang Nag̓ipatuman Ni Jesus Ang Baklu Indi Ëngëd Magkatunuan (2:18-22)
18 Taa numanyan,
tung mga uras ang atii,
may mga taung nag̓apangugyatan ni Juan ang manigbënyag pati mga taung nag̓apangugyatan yang mga Pariseo ang parariung pamamlëk tung pagparanganën nira ang para tung ikabilug yang mga isip nirang pamag̓ampu tung Dios sigun tung sasang urdinansa.
Numanyan may mga taung duma ang namagpalëngët tung ni Jesus ang namagkig̓a tung anyang mag̓aning,
“Yang mga taung nag̓apangugyatan ni Juan ang manigbënyag may yang mga nag̓apangugyatan yang mga Pariseo,
parariung pamamlëk tung pagparanganën nira.
Ayw̓a kaya yang mga taung nag̓apangugyatan mu indi pala pamag̓usuy?”
19 Tung tuw̓al ni Jesus tung nira,
yang sadili na ipinananglit na tung sasang laliing pangasawa.
Ag̓aaning tung nira,
“Ayw̓a,
kung may kumbira,
magkabag̓ay w̓asu ang yang mga laliing pamagkumpanya tung pangasawa,
mamamlëk da tung pagparanganën nira mintras asan pa tung tëpad nira yang aruman nira?
Simpri mintras asan pa tung nira,
indi puiding mamamlëk tung pagparanganën nira,
kung indi,
mamagpakigsaru ka ëngëd tung anya.
20 Piru may uras ang kaw̓utun ang yang aruman nirang atia lag̓unutun dang ëklan tung tëpad nira.
Kung kaw̓utun da nganing yang uras ang atia,
ya ray uras ang ipamlëk nira tung pagparanganën nira natëtëngëd tung kapupungawën da nirang duru.
21 Ayw̓a,
tinu pay nag̓aintindian ming tau ang yang aw̓ël nang lag̓i-lag̓i ra ya pa kay tambëlan na ta aw̓ël ang baklu ang indi pa nag̓abunakan?
Kipurki kung maning tia ya pay buatën na,
anday dumang mainabu,
kung bunakan na ra nganing yang aw̓ël nang atiang tinambëlan na,
bëkngën da ka ilëm yang baklung itinambël nang nagkërë ang asta mas dang magdakul yang lasik na kay tung primiru.
22 Dispuis,
tinu pay nag̓aintindian ming tau ang yang binung baklung ingkëlan tung saralug̓an,
asan da ilëm papagbaalay na tung parabtangan ang lag̓i-lag̓i ra?
Kipurki kung maning tia ya pay buatën na,
kung mabaal da nganing yang binu,
bëlakën na ra ka ilëm yang parabtangan.
Anday duma,
mailas da ka ilëm yang binu,
pati yang parabtangan,
diadu ra ka.
Yang pisan ay kaalimbawaan yang nag̓ituldukung naang baklu.
Indi magkatunu tung dating nag̓usuyun mi ang katulad ka tung pamlëk mi tung pagparanganën mi.
Kung indi,
mas maayën pa ang yang binung baklu,
asan da ibukbukay tung parabtangan ang baklu ka,”
mag̓aning.
Pagkuruntraan Da Ti Jesus May Yang Mga Pariseo Natëtëngëd Tung Pagturumanën Yang Katuw̓ulan Sigun Tung Kaldaw Ang Nag̓ipamaënay (2:23-28)
23 Taa numanyan,
may mininsa ang ti Jesus napanaw ra tung dalan ang naknga tung katriguan tung kaldaw ang nag̓ipamaënay tung mga pag̓urubraën,
kasiraan da ka tanira yang mga taung nag̓apangugyatan na.
Numanyan yang pagparanawën nira asan,
ya kay aplut-aplut nira yang mga kaluay yang trigu ang para mangapagsëngat-sëngat da.
24 Numanyan may mga Pariseo asan ang ya ray namag̓istinggir tung ni Jesus ang mag̓aning,
“Ba tia,
ayw̓at pamaglampas da yang mga taung atiang nag̓apangugyatan mu tung urdinansa ta ang anday mag̓urubraën ta maning tia tung kaldaw ang nag̓ipamaënay?”
25-26 Mag̓aning ka ti Jesus ang nagtimalës,
“Ayw̓a,
indi mi pa ka ëngëd nag̓amarësmësan yang sasang napabtang tung kasulatan natëtëngëd tung sasang binwat ni David atiing alang-alang da yang pagkabëtang nang duru rang atiing suw̓uk na pati mga aruman na?
Indi w̓a,
nagpaklëd duun tung balay-w̓alay ang atiing pinagtuuan pa rin nira tung Dios atiing ti Abiatar yang paring pinakalandaw?
Pagkatapus pinangan na yang tinapay ang atiing sagradu ang ya ag̓ipabtangay tung katalungaan yang Dios ang ya pa ka man ay bawal ang panganën ta duma ang bëlag̓an mga pari.
Piru maskin bawal,
ya pay pinangan na ig ipinapaan na pa ka nganing tung mga aruman na,
ang pagkatapus indi ka ipinakusalak yang Dios tung nirac.
27 Nani pa yang dapat ang dëmdëmën ta.
Ang sigun tung kaldaw ang nag̓ipamaënay,
binwat nganing yang Dios ang para tung ikaayën yang mga tau.
Bëlag̓an ang mag̓aning ang yang mga tau inimu na ang para tung ikaayën yang kaldaw ang atia.
28 Purisu yuung pag̓aningën ang Maninga Tau,
yuu ray pamala tung mga tauanu kung ya pa ag̓ari yang pag̓urusuyun nira tung katuw̓ulan yang Dios natëtëngëd tung kaldaw ang nag̓ipamaënay,”
mag̓aning.