9
Purisu ti Jesus tanya,
anday dumang binuat na,
dayun da ilëm ang nagsaay tung balangay ang nagpatindak si ang asta nagbalik da duun tung Capernaum ang yay lansangan ang pag̓atiniran na.
Nag̓apapruibaan Da Ni Jesus Ang Tanya May Katëngdanan Nang Magpatawad Tung Mga Kasalanan Yang Mga Tau (9:2-8)
2 Naa pala may sasang taung namamilay ra yang mga tinanguni na ang ya ra ilëm agtuang-tuangay yang mga aruman na tung papag ang nag̓idangëp tung ni Jesus.
Numanyan pagkasiman ni Jesus ang tanira may pagtalig nira tung anya,
dayun na rang binugnu yang taung atiang namamilay ra yang mga tinanguni nang inaning,
“Duduy,
paktëlën mu ra yang isip mu,
ay nag̓apatawara ra yëën tung mga kasalanan mu,”
ag̓aaning.
3 Naa pala may mga tau asan ang yay mga sag̓ad tung mga urdinansang pinanubli tung mga kinaampu ta.
Pagkagngël nira yang inaning ni Jesus tung taung atiang namamilay ra yang mga tinanguni na,
dayun dang ipinagkësën-kësën nira tung mga isip nirang maning taa:
“Abaa yang tau kang naa ka,
ya rag pagtiwakaw tung pagkadios yang Dios!”
4 Kumus nag̓adëëp da ni Jesus kung unu pay laksu yang mga pag̓irisipën nira,
dayun dang nagbugnu tung nira ang mag̓aning,
“Ayw̓a nag̓alaumanaw numyu ta malain?
5 Kanisip mi ang sungaw ra ilëm yang inaningu tung taung naa ang pinatawaru ra tung mga kasalanan na?
Piru kung aningënu si ang magbangun dang magpanaw,
asan da ngaskëay mi kung yang bitalaw sungaw ra ilëm u kung may kamatuuran na.
6 Purisu papruibaanu ra numanyan tung numyu ang yuung pag̓aningën ang Maninga Tau,
may katëngdananu ka man tung katanëkan ang magpatawad tung mga tau yang mga kasalanan nira,”
mag̓aning.
Pagkatapus diritsyu rang pinag̓aning na yang taung atiang pamamilay yang tinanguni na,
“Ala,
magbanguna ra asan.
Ëklan mu ra tiang lulubgan mung mulik,”
mag̓aning.
7 Pagkatapus yang taung atia,
dayun da ka man ang nagbangun ang minulik tung balay na.
8 Pagkaita yang mga taung atiang buntun,
nangabërëng da ta duru ang nunut da ka ta pagdarayawën nira tung Dios ang may sasang taung pinakdulan na ta katëngdanan na ang maning tia.
Natëtëngëd Tung Inangay Ni Jesus Tung Kaliw̓utan Ang Naa (9:9-13)
9 Pagkatapus tia,
ti Jesus dayun dang luminua tung balay ang nagpanaw.
Numanyan yuung ti Mateo,
naitaaw ra anyang yuug kakarung tung upisinaung pagpanukut tung mga tau yang mga balayaran nira tung gubirnu.
Mag̓aning tung yëën ang nagbugnu,
“Amus Mateo,
magpakignunuta ra tung yëën ang magpaugyat,”
ag̓aaning.
Pagkagngëlu tia,
dayunaw rang kumindëng ang nagpakignunut tung anya.
10 Taa numanyan nagkamaning da ang ti Jesus pagpakigsaru ra tung yëën duun tung balayu,
kasiraan da ka tanira yang nag̓apangugyatan nang dati.
Duru rang mga kaarumananung mga manigpanukut ang namansikaw̓ut da ka,
kasiraan da ka tanira yang duma ang nag̓alamku ka ta kadaklan ang durug kakinasalananëna.
Pagkatapus dayun dang namagpakigsaru tung ni Jesus may tung yamën ang mga tauan na.
11 Taa numanyan may mga Pariseo ka asan ang nangaita tung nainabung atia.
Purisu dayun dang namag̓istinggir tung yamën ang nag̓apangugyatan ni Jesus ang mag̓aning,
“Ayw̓a asan dag pagpakigsaru yang manigtulduk mi tung mga manigpanukut ang atiang mga mandaraya may tung mga kaarumanan nirang atiang duru kag kakinasalananënb?”
12 Numanyan pagkagngël ni Jesus tia,
ya ray nagtuw̓al ang asan da ipapanaway na tung sasang pananglit ang mag̓aning,
“Yang mga taung makëktël anday kaministiran nira yang manigbulung,
kung indi,
ya ra ilëm yang mga taung may mga laru.
13 Maayën pa,
pasadsaran mi ra kanay ta mupia yang sasang napabtang tung kasulatan ang para mamarësmësan mi yang linagpakan yang sasang inaning yang Dios tung mga kinaampu tang mag̓aning,
‘Mas matimbang tung yëën ang mag̓irildawanamu kay tung magpadasag̓amu ta mga ayëp ming para ya ag̓iprisintaray mi tung yëën,’
ag̓aaningc.
Asan da ngaintindiay mi yang linyang pag̓ausuyu.
Kipurki yang inangayung mag̓imbitarën ang para magpaugyat tung yëën,
bëlag̓an yang mga taung pagtalig ang tanira matadlëng tung pagtërëlëngën yang Dios,
kung indi,
ya ra ilëm yang kumpurming mangamin ang tanya talagang makinasalananën ka man,”
mag̓aning.
Yang Dating Nag̓apgësan Ta Mga Tau May Yang Baklung Nag̓ipatuman Ni Jesus Tung Nira Indi Ëngëd Magkatunuan (9:14-17)
14 Numanyan may mga taung nag̓apangugyatan ni Juan ang manigbënyag ang namansiangay ra tung ni Jesus ang namagkig̓a ang mag̓aning,
“Ayw̓a kaya ang yang mga taung naang nag̓apangugyatan mu indi pamamlëk tung pagparanganën nira?
Ta yamën may yang mga Pariseo,
pirmiaming pamlëk tung pagparanganën yamën natëtëngëd tung sasang urdinansang pinanubli tang mga Judio,”
mag̓aning.
15 Yang tuw̓al ni Jesus tung nira,
yang sadili na ipinananglit na tung laliing pangasawa.
Mag̓aning tung nira,
“Ayw̓a,
kung may kumbira,
magkabag̓ay w̓asu ang yang pamagkumpanya tung pangasawa mamagpakapungaw ra ilëm ang indi ra mamagpakigsaru mintras asan pa tung tëpad nira yang aruman nira?
Ug̓aring may uras ang kaw̓utun ang yang aruman nirang atia,
lag̓unutun dang ëklan tung tëpad nira.
Atia ya ray uras ang magkabag̓ay rang pisan ang ipamlëk nira tung pagparanganën nira natëtëngëd ka man tung kapupungawën da nirang duru.
16 “Ayw̓a,
tinu pay nag̓aintindian ming tau ang yang aw̓ël nang lag̓i-lag̓i ra ya pay tambëlan na ta aw̓ël ang baklu ang indi pa nag̓abunakan?
Kipurki kung maning tia ya pay buatën na,
anday dumang mainabu,
yang tinambëlan bëkngën da ka ilëm yang baklung itinambël ang nagkërë ang asta mas dang magwangwang yang lasik na kay tung primiru.
17 Dispuis tinu pay nag̓aintindian ming tau ang yang binung baklung ingkëlan tung saralug̓an,
asan da ilëm papagbaalay na tung parabtangan ang lag̓i-lag̓i ra?
Kipurki kung maning tia ya pay buatën na,
kung mabaal da nganing tia,
bëlakën na ra ka ilëm yang parabtangan.
Anday duma,
mailas da ka ilëm yang binu,
pati yang parabtangan,
diadu ra ka.
Kung indi,
mas maayën pa ang yang binung baklu,
asan da ibukbukay tung parabtangan ang baklu ka ang malpës ka ilëm manlëskag ug̓ud parariung indi mangaunu pa,”
mag̓aning.
Yang Pagpamaayën Ni Jesus Tung Sasang Baw̓ay May Yang Pagpabui Na Si Kang Uman Tung Sasang Mulang Baw̓ay (9:18-26)
18 Numanyan,
atiing indi pa nag̓atapus ti Jesus ta pagbitala,
may sasang may katëngdanan tung pagsaragpunan tang mga Judio ang ya ray nagkaw̓ut.
Pagkaw̓ut na,
dayun dang napadagpa tung pinagtalungaan nira ni Jesus ang nagpakiildaw tung anyang mag̓aning,
“Yang anaung baw̓ay baklu pa ilëm nabuntukan ta linawa na.
Kung maimu ilëm tung nuyu,
nuntay kanay duun tung balay ang para madëënan mu.
Atia,
madëënan mu ilëm,
mabui si,”
mag̓aning.
19 Pagkagngël ni Jesus tia,
dayun dang kumindëng ang nagnunut tung anya,
kasiraanami ra kang mga nag̓apangugyatan na.
20 Numanyan atiing pagnurunutanami ra na Jesus,
may sasang baw̓ay ang ya ra ilëm agsisikup tung buku ni Jesus ang nagdëën tung sam bilug ang mabilug-bilug ang atiang yag tatakëd tung sidsirën yang aw̓ël nang langkuy.
Yang baw̓ay ang naa,
tung sëlëd sam puluk may durua rang takun,
muya-muya ra ilëm ang nag̓aawasan.
21 Yang ikinësën-kësën na tung isip na maning taa:
“Maskin aw̓ël na ra ilëm yang madëënanu,
atiang lag̓i magmaayënaw ra,”
mag̓aning.
22 Numanyan tung pagdëën yang baw̓ay tung aw̓ël na,
dayun dang nagbira ti Jesus ang naita tung anya.
Pagkaita na,
dayun na rang binugnu ang inaning,
“Ipag,
indi mu ra ilëm papagdua-duaën yang isip mu.
Nagmaayëna ra tung pag̓alaru mung atia ay natëtëngëd itinalig mu ra kang lag̓i tung yëën,”
mag̓aning.
Purisu mag̓impisa tung uras ang atii,
nagmaayën da ka man.
23 Numanyan nagpadayun da ti Jesus yang pagparanawën na ang asta kuminaw̓ut da duun tung balay yang manig̓ërëkëlën.
Pagpaklëd na duun,
naita na yang mga manigpalautad may yang mga taung pamaggirinla.
24 Pagkaita na tung nira,
dayun dang nagkalalangan tung nirang mag̓aning,
“Ala,
magluaamu rang tanan asan.
Ti Nini bëlag̓an patay,
kung indi,
ag̓ëlkën ilëm,”
mag̓aning.
Pagkagngël nira tia,
ya ra ilëm agtalangkakay nira.
25 Numanyan atiing pagpalua na tung nira,
dayun dang nagpaklëd tung kuartung atiang pag̓alubgan yang mula.
Pagpaklëd na,
dayun na rang pinggësan tung kalima na ang pagkatapus nagbangun da ka man yang mula.
26 Purisu yang nainabung atia nabantug da tung intirung banwang atii.
Yang Pagpamaayën Ni Jesus Tung Durua NGa Burayan (9:27-31)
27 Numanyan atiing pagliit da ni Jesus duun tung balay ang atia,
may durua nga burayan ang namag̓impisa rang namagpakignunut tung anya.
Sigi ra ilëm yang pagkëkëndalën nirang mag̓aning,
“Yawang manubli tung paggaraëmën ni Adi David,
ildawayami ka,”
ag̓aaning.
28 Piru ti Jesus tanya,
indi ra nagliing-liing,
kung indi,
nagpadayun da ilëm tung pagparanawën na ang asta kuminaw̓ut da duun tung balay ang pag̓atiniran na.
Pagkaw̓ut na,
dayun dang nagpaklëd pati yang durua nga burayan,
namagpaklëd da kang namagpalëngët tung anya.
Numanyan dayun na rang tinalimaan ang mag̓aning,
“Panangëramu ka ang kayananung buatën yang nag̓aingaluk ming atia tung yëën?”
Mag̓aning tanirang namansituw̓al,
“Ëë,
Amëëy,
talagang panangërami!”
29 Atii,
diritsyu rang pinandëënan ni Jesus yang mga mata nirang inaning,
“Magkamaninganamu ra ang kumpurmi ra ilëm tung nag̓apanangëd mi tung yëën,”
mag̓aning.
30 Pagkatapus nangabuskad da ka man yang mga mata nira.
Numanyan nagpaaman da ti Jesus tung nira ta malëbat-lëbat ang mag̓aning,
“Kuidaw,
indiamu ra ëngëd magbaw̓alitaën maskin tung ninu pa,”
mag̓aning.
31 Piru tung pagliit nira tung balay na,
maskin pinag̓urdinan da,
anday dumang binuat nira,
indi ra ka ëngëd nangaëgtëm,
kung indi,
namagbaw̓alitaën da ka ëngëd natëtëngëd tung binuat nang atia tung nira ang asta nagsarambung da ilëm yang balita tung intirung sinakëpan yang banwang atia.
Nag̓apamaayën Ni Jesus Yang Sasang Apa (9:32-34)
32 Tamang tamang pamansiliit yang durua nga tauan ang atia tung balay,
may sasa si kang taung nag̓iatëd tung anyang apa.
Yang natëngëran yang pagkaapa na,
tanya agdimunyuwën.
33 Numanyan tung pagpalayas ni Jesus tung dimunyu,
atiang lag̓i napagbitala ra yang taung atia.
Ya ray nabërëngan ta mupia yang mga tau.
Purisu namag̓araning-aningan dang mag̓aning,
“Indiita pang pisan nag̓aita ta maning tia taa tung banwa tang Israel,
kung indi,
numaan ilëm,”
ag̓aaning.
34 Numanyan pagkagngël yang mga Pariseo tia,
namansianing da tanira ang “Aa,
yang taung atia,
nag̓apagpalayas nganing ta mga dimunyu ay natëtëngëd nag̓apaktël ni Satanas ang yay pagmangulu tung nira,”
mag̓aning.
Nag̓ibilug Da Yang Pag̓urubraën Ni Ginuung Jesus Duun Tung Galilea (9:35-38)
35 Kapurisu maning da ka man tia yang nagkarainabu atiing pagliliw̓utun ni Jesus tung mga lansangan pati mga baryu duun tung intirung sinakëpan yang Galilea.
Yang bida na nagturuldukanën tung mga taung pamagsaragpun-sagpun tung nira nirang mga pagsaragpunan.
Nagparakaw̓utun da ka dayun tung nira yang sasang matinlung balita ang yang Dios mag̓impisa rang magtukud yang paggaraëmën nang baklu tung mga tau.
Nagparamaayënën da ka tung may mga laru maskin unu pang klasing masiitay.
36 Tung pagtërëlëngën na tung mga taung atiang buntun ang muya-muyang pamagpalëngët tung anya,
ya ra ngaildaw ta duru tung nira.
Ay pamanluluw̓ayan da yang mga isip nira ay pangalingalag da ta duru natëtëngëd nag̓apaw̓aya-w̓ayaan da ilëm yang mga manig̓ërëkëlën tung nira natëtëngëd tung pag̓irintindiën tung Dios.
Yang kaalimbawaan nira maning pa tung mga kaayëpan ang anda ray manigpastur ang pagpadag̓ën-dag̓ën tung nira.
37 Purisu yaming nag̓apangugyatan na,
pinag̓aningami ra anyang,
“Duru-durung mga tau ang mga simpan dang mamagpamati tung bitalaw.
Yang kaalimbawaan nira maning pa tung paray ang malapad ang arayëg̓ën da,
piru kulang yang mga manig̓ayëg.
38 Purisu ya ra kay ipag̓ampu mi tung Dios ang yay maning pa tung pag̓ërëkëlën yang paayëg ang panuw̓ulun na yang mga manig̓ayëg na ang para mamangayëg da yang paray na,”
mag̓aning.