Yang Pagpalayas Ni Jesus Tung Mga Dimunyung Buntun (5:1-20)
5
Kapurisu numanyan nangatindak da tanirang nangakaw̓ut duun tung baw̓anwaan yang mga Geraseno.
2-3 Pagkalampud ni Jesus tung balangay,
may sasang taung pag̓aëkël-ëkëlan ta dimunyu ang ya ray nagpakigbag̓as tung anya.
Baklu ilëm nanliit tung may mga lëyang ang pinanlug̓uran ta mga patay ang ya ra kay pagpalaug-laug̓an na.
Yang taung atia,
anda ray masarang tung anyang bëgkësën pa ta kadina.
Jesus Casts Out Demons (Marcos 5:1-20)
4 Ay muya-muyang tinag̓aman nira ta bëgkës ang pagkatapus yang kadina tung kalima na ya ra ilëm agbuntuk-buntukay na ig yang tung kakay na ya ra ilëm ag̓itangkuay na tung batung asta magkaratëmëk.
Purisu anda ray masarang ang magsambëng tung anya.
5 Kaldaw law̓ii,
paglaug da ilëm duun tung may mga lëyang may tung kabukiran.
Yang bida na pirming paglëlpakën.
Ang kaisan manga ya nga pisik ta mga batung matatarëm ang ya ra ilëm ag̓igërët-gërëtay na tung tinanguni na ang asta magkaralukanan.
6 Naa pala,
atiing alawid-lawid pa ti Jesus,
nabandaw rang lag̓i yang taung atia ang pagkatapus dayun dang nagpataladtad ang nagpakigbag̓as tung anya.
Tung pagkaw̓ut na tung anya,
ya ra nga luud tung pinagtalungaan nirang durua.
7-8 Atii,
dayun dang binugnu ni Jesus yang dimunyung linalangan,
“Yawang dimunyua,
maglayasa ra ilëm asan tung taung atia!”
Pagkagngël yang dimunyu tia,
ya ra ngalpak ang mag̓aning,
“Ay Jesus,
yawang pag̓aningën ang Ana Yang Dios ang makagag̓aëm,
ayw̓a nag̓apasilabtanaw pa nuyu?
Pasumpaëna ra yëën tung Dios ang indiaw ra parusaan mu.”
9 Dayun dang tinalimaan ni Jesus ang,
“Tinu pay aran mu?”
Mag̓aning yang dimunyung nagtuw̓al,
“Ti Buntun yang aranu,
ay duruamig dakël,”
mag̓aning.
10 Pagkatapus,
dayun dang nangamu-amu ta mupia tung ni Jesus ang basta indi na ra ilëm paliitën tung banwang atii.
11 Numanyan,
may sasang kaayëpan yang mga baw̓uy ang gaw̓ung ang pamanulyad-tulyad tung napabukatud ang alëngët ka ilëm duun.
12 Purisu yang mga dimunyung atia,
namagpakiluuy ra ilëm tung ni Jesus ang mag̓aning,
“Maayën pa,
duunami ra ilëm ipasuutay mu tung mga baw̓uy ang atii,”
mag̓aning.
13 Numanyan tinugtan da ka man ni Jesus.
Purisu paglayas nira tung taung atia,
insigidang nanuut-suut da tung mga baw̓uy.
Pagkasuut nira tung mga baw̓uy,
dayun dang namansikurbut ang namampataladtad ang diritsyu ra ilëm tung lalagunang namampakpa ang asta nagkaralëmës da ilëm tanirang tanan.
Alëngët duruang liw̓u yang mga baw̓uy ang atii.
14 Taa numanyan,
yang mga manig̓asikasu tung mga baw̓uy ang atii,
dayun dang namagralaksuan ang namagbaw̓alitaën tung mga taung kumpurming nag̓apanawan nira tung lua ang asta duun tung lansangan.
Purisu numanyan yang mga taung atiang nagkarabalitaan da,
diritsyu rang namansiangay duun tung bakayan ang para mamanginsapu tung nainabung atii.
15 Numanyan kaw̓utan nira ti Jesus,
unu pay maita nira,
kung indi,
ya ra yang taung atiang dinimunyu ra rin.
Yag lalaptik asan ang durug kalimëng yang pagkabëtang na.
Dispuis,
bëlag dang luas,
kung indi,
napag̓aw̓ël da ay naulikan da atiing isip na.
Tung pagpaniid nira tung anya,
ya ra pandëlaay.
16 Taa numanyan,
yang mga manig̓asikasu ang atiang nangaita tung nainabung atii,
binalitaan si nira yang mga taung atiang baklung namansikaw̓ut kung ya pa ag̓aring nagkamaningan da yang taung atiang dinimunyu rin pati natëtëngëd tung kaayëpan ang mga baw̓uy.
17 Purisu pagkabalita nira tia,
dayun dang namag̓intra amu-amu tung ni Jesus ang basta magliit da ilëm duun tung banwa nira.
18 Numanyan tung pagsaay ni Jesus tung balangay,
yang taung atiang dinimunyu ra rin,
ya si ay nagpakiildaw tung anya kung puiding magpakignunut da tung anya ang para mag̓ing sasang tauan na.
19 Piru indi ra tinugtan na,
kung indi,
ya ra ag̓aningay nang,
“Maayën pa,
ungkuy,
mulika ra ilëm tung mga kaarumanan mu.
Magbaw̓alitaëna ra tung nira kung unu pay binwat ni Ginuu mu tung nuyu,
kung ya pa ag̓aring inildawana ra anya,”
mag̓aning.
20 Kapurisu dayun dang nagpanaw ang nag̓intra ra baw̓alitaën tung mga tau tung intirung banwang atiang sinakëpan yang pag̓aningën ang Sam Puluk NGa Lansanganan kung unu pay binwat ni Jesus tung anyang durug tinlu.
Yang tanan ang nagkarabalitaan,
nangabërëng da ta mupia.
Yang Pagpamaayën Ni Jesus Tung Sasang Baw̓ay May Yang Pagpabui Na Si Kang Uman Tung Sasang Mulang Baw̓ay (5:21-43)
21 Taa numanyan,
nagpatindak si ti Jesus ang nagbalik ang ampir tung pinanliitan na,
kasiraan da ka yang mga tauan na Pagparuung nira,
buntun da yang mga taung namagpakigbag̓as dang namagtaripukpuk tung anya duun tung bakayan.
22-23 Numanyan may nagpalëngët da tung anyang sasang may katëngdanan tung pagsaragpunan ta mga Judio ang yay nag̓aranan tung ni Jairo.
Pagkaita na tung ni Jesus,
dayun da ilëm ang nagpadagpa tung pinagtalungaan nirang durua ang nagpakiildaw ta mupia tung anyang mag̓aning,
“Yang anaung baw̓ay tag̓umatayën da!
Kung maimu ilëm tung nuyu,
angayën mu ra kanay ang dëënan ug̓ud indi madayunan,
kung indi,
magmaayën da,”
mag̓aning.
24 Pagkatapus,
ti Jesus dayun dang nagpakignunut tung anya.
Taa numanyan,
kadakël da yang mga tau ang namagpakigduman tung anya.
Tung pagparanawën nira,
ti Jesus ya ray nag̓asag̓ësë nira ta mupia.
25 Taa numanyan may sasang baw̓ay asan ang tung sëlëd sam puluk may duruang takun muya-muya ra ilëm ang nag̓aawasan.
26 Durung nagkarapasaran nang pinitinsia tung pagparabulungun na tung dakëlëng mga manigbulung ang linaktëd-laktëran na,
ang pagkatapus yang tanan ang kuarta na iginastus na ra ilëm ang luw̓us ta pagsuul tung nira.
Piru bëlag ya magmaayën yang laru na,
kung indi,
ya mag̓ësëg.
27 Kumus nabalitaan da natëtëngëd tung ni Jesus,
nagpakilakët da ilëm tung mga taung atiang buntun ang pagkatapus sinikup nang dinëënan tung aw̓ël na.
28 Ay yang nag̓ipagkësën-kësën na tung isip na ay maning taa:
“Maskin aw̓ël na ra ilëm yang madëënanu,
atiang lag̓i,
magmaayënaw ra,”
ag̓aaning.
29 Numanyan tung pagkadëën na tung aw̓ël na,
insigidang pinëdkanan dang lag̓i yang dug̓u na.
Panimanan na yang tinanguni na,
tanya maayën da.
30 Atiang lag̓i nasintian da ni Jesus tung sadili na ang may taung nagmaayën da ëkël tung kagaëman na.
Purisu dayun dang nagbirang nagtalimaan tung mga taung atiang buntun ang mag̓aning,
“Ëëy,
tinu pay nagdëën tung aw̓ëlu?”
31 Numanyan yang mga taung nag̓apangugyatan na,
ya ray namagtuw̓al ang mag̓aning,
“Yawa ra kag tëtëlëng!
Yang mga taung atia tung tëpad mung pamagsag̓ësë tung nuyu duru!
Magtalimaana pa ka ëngëd ang tinu pay nagdëën tung nuyu?”
mag̓aning.
32 Piru ti Jesus,
sigi ilëm yang pagsiman-siman na tung mga ityura yang mga tau ang basi pa ra ilëm masiplatan na kung tinu pa tung nira ay nagbuat ta maning tia.
33 Numanyan yang baw̓ay,
pagkamalamad na yang nainabu tung anya,
dinlaan dang nagpangërëla.
Piru maski pang maning da tia,
nagpalëngët da ka ëngëd tung ni Jesus ang nagpadagpa ra ilëm asan tung pinagtalungaan nirang durua ang pagkatapus nag̓ubligar da tung anya ang anda ray inëgtëman na.
34 Pagkatapus tia,
dayun dang nagtimalës ti Jesus ang mag̓aning,
“Ipag,
nagmaayëna ra nganing tung linaru mung atia ay natëtëngëd itinalig mu ra kang lag̓i tung yëën.
Malimëng da yang isip mung mulik tung balay mu ay india ra ka umbalingan yang masiit ang atia,”
mag̓aning.
35 Numanyan,
indi pa nganing nag̓atapus ti Jesus ta pagbitala,
may namansikaw̓ut da ang duun mamanliit tung balay ni Jairo.
Mag̓aning tanira tung may ana,
“Napatay ra yang ana mu.
Maskin indi mu ra aw̓alaën ti Amëëy,”
ag̓aaning.
36 Numanyan indi ra ilëm binalut ni Jesus yang ibinalita nirang atia,
kung indi,
pinaktël na rang lag̓i yang isip yang may ana ang inaning,
“Ungkuy,
india ra ilëm magpadla,
kung indi,
magtalig̓a ra ilëm tung yëën ta ustu,”
mag̓aning.
37 Numanyan yang ingkëlan nang pinanunut,
ya ra ilëm ti Pedro may ti Santiagong duruang mag̓ari ni Juan.
38 Taa numanyan mamansikaw̓ut da tanira duun tung balay yang may ana,
naita ra ni Jesus yang mga taung pamaggirinla ta mupia ay pamagtarangitën dang pamag̓urulimëngmëngën.
39 Numanyan pagpaklëd ni Jesus tung balay,
dayun na rang pinag̓aning yang mga tau asan tung kaklëran ang,
“Ayw̓a nag̓atarantaamu ra ta maning tiang pagtarangitën?
Bëlag̓an patay yang mula,
kung indi,
ag̓ëlkën ilëm,”
ag̓aaning.
40 Pagkagngël nira yang bitala ni Jesus,
ya ra ilëm agtalangkakay nira.
Piru tanya,
anday dumang binwat na,
dayun na rang ipinampaluang luw̓us tung balay.
Pagkatapus yang ingkëlan na duun tung kaklëran ang pag̓alubgan yang mula,
ya ra ilëm yang amaën may yang inaën may yang mga tauan nang atiang tulu.
41 Numanyan pagpëg̓ës na tung kalima yang mula,
dayun na rang inaning tung bitalang natauan nira ang,
“Talita kumi” ang yang gustu nang ianing,
“Nini,
magbungkarasa ra!”
42 Atii,
lag̓i-lag̓ing nagbungkaras da yang mulang nagpanaw-panaw asan.
Yang idad na sam puluk may duruang takun.
Numanyan pagkaita yang mga ugpu ni Jesus ang lima,
nangabërëng da ta dakulung pagkabërëng.
43 Pagkatapus numanyan,
nagkalalangan da ti Jesus tung nira ang indi ra ëngëd ang pisan mamagbaw̓alitaën tung duma may ruma.
Pagkatapus,
dayun na kang inaning yang may mga ana ang maayën pang papaanën da kanay nira yang ana nira.