Yang Nag̓ipagngël Ni Jesus Tung Mga Tau, Asan Da Nag̓ipapanaway Na Tung Pulus Pananglit (4:1-2)
4
Taa numanyan may uras ang ti Jesus nag̓intra si pasanag tung mga tau duun tung bakayan.
Kumus durug damël yang mga taung namagtaripukpuk da tung anya,
purisu naparugal-rugal dang suminaay tung balangay ang napaabwat-abwat ta gësyë.
Duun da ilëm ngarung ang ya kag tatalunga tung mga tau asan tung bakayan.
2 Durung mga bag̓ay ang ipinagtulduk na tung nira ang asan da nag̓ipapanaway na tung mga pananglit.
Tung pagturuldukun na tung nira,
maning taa yang palaksu yang pananglit nang sam bilug.
Nag̓ipananglit Ni Jesus Yang Mga Tau Tung Mga Tanëk Ang Tarakbulan Ta Binik (4:3-9)
3 Mag̓aning ti Jesus tung nira,
“Pamasian mi ra kanay ta maayën yang bitalaw.
Numanyan may sasang taung minangay ra duun tung pinagbangtëran na,
ay magtarakbulun da ta binik ang trigu.
4 Numanyan tung pagtarakbulun na,
yang dumang binik nalagsik da tung dalan ang palanawan ta mga tau tung kakngaan ang pagkatapus kinaw̓utan da ta mga lamlam ang pinagsumpit.
5 Yang duma kang binik,
duun ka nëpa tung tanëk ang manipis ang may batung tapik ang unayën ang alëngët dang lumput tung ulit yang tanëk.
Purisu indi ilëm nabuay,
buminukngil da ay malw̓aw kang lag̓i yang tanëk.
6 Numanyan,
pagkapangayag da ang atiing abwat da yang kaldaw,
nangalëëy ra ang asta namanlumpayëng dang pisan,
ay indi ra nangapanlamut ta adalëm.
7 Yang duma kang binik duun ka nëpa tung tanëk ang may mga laskaw yang sapinit ang indi nadëëg̓an ta kapwa yang aradu.
Purisu tung pagtubu yang mga sapinit,
pinanaw̓ëd-saw̓ëran da nira yang mga trigu ang pinagpig̓ës.
Purisu indi ra nangapamurak.
8 Yang dumang binik duun da tung lunsan ang tanëk nëpa ang asta nangapagtubu rang nangapamurak.
Yang pangaluay yang duma inisën,
yang duma kasarangan,
yang duma arabubwat da ang tung katëgkaan na ra ka ëngëd.”
9 Numanyan tung pagtapus na tung pananglit nang atia,
dayun da sinugpatan na yang bitala na tung mga tau ang mag̓aning,
“Ta,
yang nagngël ta mga talinga mi,
ya ra kay painu-inuan mi ta mupia,”
mag̓aning.
Yang Katuyuan Yang Pagparananglitën Ni Jesus (4:10-12)
10 Taa numanyan,
atiing namagparanawan da yang mga taung atiang buntun,
ti Jesus pinaalëngtan da yang mga taung nag̓apangugyatan na kang lag̓i kasiraan da ka tanira yang sam puluk may durua.
Ay namanalimaan da tung anya kung unu pay mga linëgdangan yang ipinampananglit na.
11 Mag̓aning ti Jesus ang nagtuw̓al,
“Ta yamung pagpaugyat da tung yëën,
linugtanamu ra yang Dios ang makdëkan mi yang mga bag̓ay ang nag̓aëgtëman na pa rin ang tukaw natëtëngëd tung paggaraëmën nang baklu tung mga tau kung ya pa ag̓ari yang palaksu na simanyan.
Piru tung mga taung atiang indi pa pagpagaëm tung anya,
asan da nag̓ipapanawayu yang mga bag̓ay ang atia tung pulus pananglit.
12 Yang nag̓ipagpananglitu tung nira ay ug̓ud magkamaningan da ang katulad ka tung bitala yang Dios ang napabtang tung kasulatan ang mag̓aning,
‘Maskin sam puluk ang magtëlëng,
anday sakpën ta mga isip nira,
basin sam puluk ang mamati,
anda kay mamarësmësan nira.
Ay ya pa ag̓ari,
may sasang pangamanan ëngëd nira asan ang kung disgrasia maintindian ilëm nira tia,
nusias mangapagsug̓at dang mamagbalik tung Dios ang pagkatapus patawarën na ra ka dayun,’
mag̓aninga.”
Nag̓ipagpasanag Da Ni Jesus Kung Unu Pay Linëgdangan Yang Ipinananglit Na (4:13-20)
13 Taa numanyan,
dayun dang sinugpatan ni Jesus yang nag̓ituw̓al nang mag̓aning,
“Naa pala,
indi mi nag̓aintindian yang ipinananglitung atia?
Ay kung indi mi maintindian tia,
ya pa ag̓aring maintindian mi yang kadaklan?
14 Yang linëgdangan atiing nagpanakbul ta binik ya ra yang sasang pagparakaw̓utun yang bitala yang Dios.
15 Kung natëtëngëd tung dalan ang atiang nalagsikan ta dumang binik,
yang linëgdangan na ya ra yang dumang pamamati tung bitala yang Dios,
ang kung magngël da nganing nira,
nag̓apaalëngtan dang lag̓i ni Satanas ang agludasën tung mga isip nira yang bitalang nagngël nira.
16 Yang linëgdangan yang tanëk ang atiang manipis ang may batung natampëk,
ya ra yang duma ang kung mapamatian da nganing nira yang bitala yang Dios,
atiang lag̓i magpauyun da ang duru rag sadya yang mga isip nira.
17 Piru kumus indi nalamut ta ustu tung mga kinaisipan nira,
indi ilëm mabuay yang pagparanangërën nira.
Ay kung mapasaran da nganing ta kaliwag̓an ubin pandëëg-dëëg natëtëngëd tung bitalang atiang nag̓apanangëd da rin nira,
atiang lag̓i,
mansipalpas da ka ilëm.
18-19 Yang linëgdangan yang tanëk ang atiang may mga laskaw ang masapinitën,
ya ra yang duma ang maskin pamati tung bitala yang Dios,
piru kumus masyadung pagpakabëgbëg nira tung pagpangabui nira taa tung kaliw̓utan ang naa ubin may intris nirang magmanggad ubin may duma pang nag̓apagamënan ta mga isip nirang ëklan,
maning pa tung asan da ilëm nga pig̓ësay yang bitalang nag̓agngël nira ang asta anda ray pinakaw̓ut na.
20 Piru yang linëgdangan yang tanëk ang atiang lunsan ya ra yang dumang pamati tung bitala yang Dios ang yang nag̓agngël nira ya ray nag̓apanangëd nira ang asta may pakaw̓utun nang nag̓auyunan yang Dios.
Tung duma may pakaw̓utun nang gëg̓ësyë ka ilëm,
tung duma may pakaw̓utun nang kasarangan,
tung duma katëgkaan na ra ëngëd yang pakaw̓utun na,”
mag̓aning.
Baklu Ra Ngaipabunayag̓ay Ni Jesus Tung Mga Tau Yang Linëgdangan Yang Nag̓ipananglit Na, Kung Ëyangan Da Ta Gustu Nirang Magpasadsad (4:21-25)
21 Mag̓aning si ti Jesus ang nagsugpat,
“Ayw̓a,
tinu pay nag̓aintindian ming tau ang magsindi ta kingki ang pagkatapus ya ra sukluw̓ay na ubin ya ra ipasirungay na tung katri?
Simpri asan da ipabtangay na tung tapi-tapi.
22 Pariu ka tung yëën,
anday itinaluku tung nag̓ipananglitu sigun tung palaksu yang paggaraëmën yang Dios ang indi ipabunayag̓ayu,
anda kay tinipig̓anu asan ang indi ipalw̓awayu.
23 Padëmdëman mi ra kanay yang inaningu tung numyu nungayna ang kung unu pay nagngël ta mga talinga mi,
kaministiran ang ya ra kay painu-inuan mi ta mupiang pasadsaran.”
24 Mag̓aning ka ti Jesus ang nagsugpat yang bitala na,
“Intindiën mi ta mupia yang nag̓ipagngëlu tung numyu.
Kung unu pag kadërëp yang pagpasadsad mi tung nag̓ipananglitu,
ya ra kay paatuan yang Dios ang magbuskad tung mga painu-inu mi ig dulangan na pa ka ngani.
25 Ay ya pa ag̓ari,
kung tinu pay may nag̓aintindian na,
dulangan pa ngani yang Dios.
Ig kung tinu pay mapinaw̓aya-w̓ayaën tung pag̓irintindiën na,
maskin yang nag̓aintindian nang gësyë,
bawiën da ka ëngëd yang Dios tung anya,”
mag̓aning.
Yang Matinlung Balita Natëtëngëd Tung Paggaraëmën Yang Dios Ang Baklu May Sadiling Puirsa Nang Magpalua Ta Pruduktu Ang Katulad Ka Tung Mga Binik Ang Nag̓ipanakbul (4:26-29)
26 Mag̓aning ka ti Jesus ang nagpadayun yang bitala na,
“Yang kaalimbawaan yang palaksu yang paggaraëmën yang Dios ang naang baklu,
maning pa tung taung pagpanakbul ta binik tung pinagbangtëran na.
27 Pagkatapus ta pagtarakbulun na,
magpadayun da tung dumang pag̓urubraën na tung pangaldaw-kaldaw mintras pamansipalpak dang pamamansilawlaw yang binik ang ipinanakbul na.
Piru anday malai na kung ya pa ag̓ari yang palaksu yang binik ang paglëpak.
28 Ay ya ra kang lag̓i yang natural na.
Yang tanëk ang pinanakbulan mismu,
ya ray magpalpak.
Lëmpak da nganing,
yang tukaw ang maita ya ra yang tingway na.
Tung kabuayan da gatasan da yang burak na.
Tung kauri-urian da,
lutuk dang pisan.
29 Pagkalutuk da nganing,
mangaw̓ang da yang may anya tung mga manig̓ayëg ay tilig̓ayëg da,”
mag̓aning.
Yang Palaksu Yang Paggaraëmën Yang Dios Nag̓ipananglit Na Tung Sasang Gësyëng Gësyë Ang Dakulung Bag̓ay Yang Pakaw̓utun Na (4:30-32)
30 Mag̓aning ti Jesus ang nagsugpat tung bitala na,
“Tung unu pa w̓asu ipapariuay ta yang palaksu yang paggaraëmën yang Dios ang baklu ang naang pag̓atukuru?
Tung unu pa w̓asu ipananglitay ta ang yay mag̓atu ta maayën?
31-32 Yang kaalimbawaan na,
maning pa tung lisu ta mustasab.
Maskin pinakagëtëy tung tanan ang mga lisu tung kaliw̓utan,
piru kung ipanakbul da nganing tung tanëk,
dayun dang tumubu ang asta ya ray magyaring pinakaabwat tung tanan ang kapariu nang luak ang atiang gurulayën.
Mananga-sanga ra ta darakulu ang puiding mabayayan ta mga lamlam ang pagpalandungan,”
mag̓aning.
Natëtëngëd Tung Pasais Ni Jesus Ang Pagparananglitën (4:33-34)
33 Duru pang mga pananglit ang mga maning ka tii yang ipinagngël ni Jesus ang nagparakaw̓utun tung mga tau natëtëngëd tung paggaraëmën yang Dios ang baklu ang naang pag̓atukud na.
Kumpurmi ra ilëm yang maintindian nira,
ya ray ipinagngël na tung nira.
34 Indi nagparakaw̓utun tung nira kung indi na ipinapanaw tung mga pananglit.
Piru kung tanira tanira ra ilëm yang mga taung nag̓apangugyatan na,
ya ra kay pagpasanag na tung nira kung unu pay linëgdangan yang tanan ang atiang ipinananglit na.
Yang Pagpalinaw Ni Jesus Tung Tampung Durug Këtël (4:35-41)
35 Taa numanyan,
atiing panlikarëm da tung kaldaw ang atii,
mag̓aning ti Jesus tung mga tauan na,
“Ala,
magpatindakita ra kanay,”
mag̓aning.
Jesus Calms the Storm (Marcos 4:35-41)
36 Purisu dayun da nirang binutwanan yang mga taung atiang buntun duun tung bakayan ang namansisaay tung balangay ang atiang pag̓akarungan kang lag̓i ni Jesus ang pagkatapus namagpaabwat da.
May dumang mga balangay ang namagpaaway ka tung pag̓asaayan nira na Jesus.
37 Numanyan tung pagpalaksu nira tung lalaguna,
nainalian dang binungsaran ta tampung durug këtël.
Ya rag sasaw̓uy agsasaw̓uy yang lakun ang magsasaay tung balangay.
Gësyë ra ilëm mapnukan.
38 Ti Jesus duun tung buli ag̓ëlkën da ang yang kulu na ya kag kukulun tung kukulunan.
Atii,
dayun da nirang pinuaw ang inaning,
“Amëëy,
anda tung kulu mu yang pagkabëtang tang magkaralëmësita ra taa?”
ag̓aaning.
39 Pagkapuaw ni Jesus,
dayun na rang pinagsambëng yang palët ang mag̓ëltëng,
pati yang lalaguna pinaglalangan na ra kang maglinaw.
Atii,
yang palët nag̓ëltëng dang lag̓i,
pati yang lalaguna naglinaw ra ka ang anda rang pisan ay giup-giupun na.
40 Numanyan mag̓aning ti Jesus tung mga aruman na,
“Ayw̓at nagpatalawamu ra?
Ayw̓a,
anda pa ka ëngëd ay pagtalig mi tung yëën?”
mag̓aning.
41 Numanyan nangaimakluan da tanira ta mupiang namagtëlëng tung anya.
Namag̓araning-aningan da ilëm ang mag̓aning,
“Abaa,
unu ra kayang klasiay ta tau taa?
Maskin palët,
maskin lakun pa,
parariu ra ilëm ang pamanangëd tung anya,”
mag̓aning.