Nag̓asig̓-asig Ni Jesus Yang Mga Tau Ang Mamanligna Ra Tung Mga Kasalanan Nira (13:1-9)
13
Yang uras dang atii,
may mga taung namagpalëngët da tung ni Jesus ang namagbaw̓alitaën natëtëngëd tung mga taung tag̓a Galilea ang ipinagpaimatay ni Gubirnadur Pilato atiing pagpadasag nira ta mga ayëp ang nag̓iprisintar nira tung Dios duun tung pagtuuan ang pinakalusu.
Purisu yang dinangat na,
yang dug̓u nira may yang dug̓u yang mga ayëp ang atiang nag̓ipadasag nira naglalakëtan da ilëm duun.
Lucas 13:1-21
2 Mag̓aning ti Jesus ang nabalitaan,
“Ayw̓a,
yang kanisip mi tia ang yang kamatayën ang atiing nalambëg̓an nira,
ya ray pruiba ang tanira mas pang naklëw̓an ta kasalanan kay tung kadaklan ang mga kaarumanan nirang tag̓a Galilea?
3 Bëlag kang maning tii!
Kung indi,
iugtulu tung numyu,
pati yamung tanan taa,
kung indiamu ëngëd manlignang lag̓i tung mga kasalanan mi,
pati yamu,
masapulamu ra ka tung kalainan.
4 Pati yang sam puluk may walu nga tauan ang atiing naktangan yang laturi duun tung Siloe,
muya maning si ka yang laum mi tung nira,
ang kumus maning da tii yang kamatayën ang nalambëg̓an nira,
purisu ya ray pruiba ang tanira mas pang naklëw̓an ta kasalanan kay tung kadaklan ang mga kaarumanan nirang pamag̓istar ka duun tung Jerusalem.
5 Bëlag kang maning tii!
Kung indi,
iugtulu tung numyu,
pati yamung tanan taa,
kung indiamu ëngëd manlignang lag̓i tung mga kasalanan mi,
pati yamu,
masapulamu ra ka tung kalainan,”
mag̓aning.
6 Atii,
dayun dang nagpakdul ta sasang pananglit ang mag̓aning,
“May sasang tau ang may sang kapungul ang pag̓aningën ang igus duun tung kaluakan na.
Numanyan tinëlëngan na yang igus na kung may burak na.
Naa pala,
anday burak na.
7 Purisu dayun na rang ginuuyan yang manig̓asikasu nang inaning,
‘Tëëd mu!
Pagpanaw ra tung tulu rang takun yang pagpabalik-baliku taang panginsapu tung igusung naa kung may burak na,
piru anda ëngëd ang pisan ay nag̓aitaw,
may sam bilug.
Maayën pa pëlarën mu ra ilëm.
Lingët da ilëm taa tung tanëk ang kindëngan na ang anda ka ilëm ay pakinaw̓ang tung anya,’
mag̓aning.
8 Mag̓aning ka yang manig̓asikasu ang nagtimalës tung ag̓alën na,
‘Kung yuu pay patimbangën mu,
maayën pa siguru ang paw̓ayaan ta ra kanay ilëm.
Pamalaran ta ra kanay ta sëlëd san takun.
Yang buwatënu,
kalug̓anung paliw̓ut,
pagkatapus pabtanganu ra ta mga abunu.
9 Basi pa ra ilëm ang mamurak taa tung matakun.
Piru kung indi pa ka ëngëd mamurak,
baklu ra ituw̓ulay mu tung yëën ang pëlarën,’”
mag̓aning.
Yang Pagkakuntraan Na Jesus May Yang Pagpakigmaëpët Natëtëngëd Tung Urdinansa Sigun Tung Kaldaw Ang Nag̓ipamaënay Nira (13:10-17)
10 Taa numanyan,
may dumang kaldaw ang nag̓ipamaënay ang ti Jesus pagparakaw̓utun da tung mga tau duun tung pagsaragpunan nira.
11 Naa pala duun may sasang baw̓ay ang pagpasakëp ka ang tung sëlëd sam puluk may walung takun pag̓aëkël-ëkëlan ta dimunyu ang yay pagpabuktut tung anya ang indi ra manuklid.
12 Numanyan pagtëlëng ni Jesus tung anya,
dayun na rang ginuuyan ang magpalëngët.
Tung pagpalëngët na,
dayun na rang inaning,
“Ipag,
libria ra tung pag̓alaru mung atia.”
13 Yang pag̓aning nang atia,
ya ra kay pagdëën na tung anya.
Pagdëën na tung anya,
lag̓i-lag̓ing nanuklid da yang pagkërërëngën na ang pagkatapus duru rang pagdarayawën na tung Dios.
14 Numanyan yang sasang pagmaëpët-ëpët asan,
duru rang kasilag na tung ni Jesus natëtëngëd yang kaldaw ang nag̓ipamaënay,
ya ray ipinag̓ubra na buat ang nagpamaayën tung baw̓ay ang atia.
Purisu diritsyung nagbitala tung mga taung pamagsaragpun asan ang mag̓aning,
“Tung sëlëd san linggu,
nag̓apakdulanita ra yang Dios ta ënëm ang kaldaw ang yay dapat ang ipag̓ubra ta.
Purisu yang mga kaldaw ang atia,
ya ray ag̓ipagdangëp mi tung sasang tau ang para pamaayënënamu anya,
bëlag̓an tung kaldaw ang nag̓ipamaënay ta,”
mag̓aning.
15 Numanyan ti Ginuu ta,
yay nagtuw̓al tung anya,
“Abaa yamung pag̓aning ang duruamug katinuuën tung Dios,
piru naa pala pagpakaayën-ayënamu ilëm.
Pati nganing yamu,
maskin kaldaw ang nag̓ipamaënay,
nag̓abadbaran mi nganing yang baka mi ubin asnu mi ang para maguyuran mi duun tung wai ang papaigmën.
16 Ya pa taang baw̓ay ang naa ang sasa pa ka man ang kanubli ni apu tang Abraham ang katulad ka tung yatën,
ang tung sëlëd sam puluk may walung takun,
maning pa tung kinëmkëm ni Satanas,
indi w̓a yay dapat ang taw̓angan ang ipapuklut tung kagaëman na,
maskin natuun da ka man tung kaldaw ang nag̓ipamaënay ta?”
ag̓aaning.
17 Numanyan tung itinuw̓al ni Jesus ang atia,
yang mga taung atiang pamagkuntra tung anya,
luw̓us dang nangapaëyak ta mupia.
Piru yang kadaklan ang mga taung atiang buntun,
durung pagkalipay nira natëtëngëd tung tanan ang atiang pag̓abuat ni Jesus ang durung pisan agkatinlu.
Yang Palaksu Yang Paggaraëmën Yang Dios Nag̓ipananglit Na Tung Gëg̓ësyëng Mga Bag̓ay (13:18-21)
18 Pagkatapus tia,
ti Jesus nagpadayun da yang pagparakaw̓utun na tung mga tau ang mag̓aning,
“Tung unu pa w̓asu ipananglitay ta yang palaksu yang paggaraëmën yang Dios ang baklu tung mga tau?
Tung unu pa w̓asu ipapariuay tang yay mag̓atu ta maayën?
19 Puiding ipananglit ta tung lisu ta mustasaa ang ingkëlan yang sasang taung ipinanakbul tung sular na.
Pagkatapus may tuminubu rang nagyari rang sasang ayu ang yang mga lamlam duun da mamagbayay tung mga sanga na,”
mag̓aning.
20 Numanyan nagsugpat si ti Jesus yang bitala nang mag̓aning,
“Tung unu pa si ipananglitay ta yang palaksu yang paggaraëmën yang Dios ang baklu tung mga tau?
21 Puiding ipananglit ta tung pampalëskag ang ilinakët yang sasang baw̓ay tung sang palangganang arina ang pag̓abuat nang tinapay ang asta pinalëskag na yang intirung pag̓amasa na,”
ag̓aaning.
Nag̓apamanan Ni Jesus Yang Mga Tau Ang Kung Indi Paklëran Nira Yang Purtang Piët Numanyan, Indi Ra Ëngëd Malg̓ud Tung Kaliw̓utan Ang Baklu Tung Uri (13:22-30)
22 Taa numanyan,
sigi-sigi yang pagparanawën ni Jesus ang yang rumbu na duun tung Jerusalem.
Yang bida na,
panakluy-takluy tung mga lansangan pati mga baryu ang pagparakaw̓utun yang bitala yang Dios tung mga tau.
Lucas 13:22-35
23 Taa numanyan may nagtalimaan tung anyang mag̓aning,
“Amëëy,
gësyë ilëm w̓asu yang mga taung tapnayën yang Dios ang ipalibri tung sintinsia na?”
ag̓aaning.
Numanyan yang itinuw̓al ni Jesus,
tung nira rang tanan iparumbuay na.
24 Mag̓aning,
“Yang kalibrian maning pa tung may purta nang durug kapiët.
Purisu kaministiran ang ya imurasay ming sëlsëlay ang para mapaklëran mi.
Kipurki iugtulu tung numyu,
duru-durung mga tau ang mamagtag̓am ang mamagpaklëd din,
piru indi mangapaklëd.
25 Ay yang purtang naang nag̓ianingu,
kung kaw̓utun da nganing yang uras ang yang may balay këmdëng da nganing ang magsiradu,
ta yamu,
asanamu ra ilëm tung lua magkërërëngan,
ang yang kanisip mi abrianamu pa ka anya.
Ang pagkatapus ang indiamu abrian na,
magtag̓amamu ra ilëm ta guuy ang mag̓aningamu tung anya,
‘Amëëy,
kung maimu ilëm,
paklërayami ka asan.’
Piru tuw̓alënamu ra ka ilëm anyang aningën,
‘Indiamu nag̓ailalaw kung tag̓a ariamu pa.
Anday kalalabtën mi tung yëën!’
26 Pagkatapus dayunamu rang magriklamu tung anyang mag̓aningamu,
‘Ëlat kanay,
“‘Amëëy.
Bëlag bang nagpakisaruami ra tung nuyu?
Bëlag bang nagpamatiami ra ka tung nuyung pagturuldukun tung mga banwa yamën?
Umpat indiami ra nag̓ailala mu?’
27 Piru tuw̓alënamu si anyang aningën,
‘Iugtulu tung numyu,
indiamu nag̓ailalaw kung tag̓a ariamu pa.
Anday kalalabtën mi tung yëën!
Paaw̓ig̓amu ra taa tung yëën,
ay ta yamu,
nagpadayunamu ra ka ëngëd tung mga ubra-ubra ming malalain tung pagtërëlëngënu,’
ag̓aaning.
Maning ang pisan tia yang ituw̓alu tung numyu tung uri.
28 Pagkatapus,
kung maita mi ra nganing yang mga kinaampu tang na Abraham,
ni Isaac,
may ni Jacob pati yang tanan ang mga manigpalatay yang bitala yang Dios ang tukaw ang pamagsararuan da tung kaliw̓utan ang baklu ang nag̓agaëman da yang Dios,
ang pagkatapus yamu ag̓ipapaw̓ig̓ay duun tung lua,
mag̓intraamu rang magtarangitën ang nunut da ka ta pangërëkëtëk mi.
29 Dispuis pa,
may mga tau kang tag̓a maskin ay pang banwaay ang tag̓a duma-rumang nasyun ang ya ra kay panlugtan yang Dios ang mamagpakigsaru ka tung nira asan tung baklung kaliw̓utan.
30 Indiamu mabërëng ang aningënamu ra yëën ang may mga taung pag̓atëlëngan ang aranëk numanyan ang tung uri ya pay ipampaabwatay ig may mga tau kang pag̓atëlëngan ang abwat simanyan ang tung uri ya pay ipamparanëkay,”
mag̓aning ti Jesus.
Nag̓apanganugunan Na Yang Mga Tag̓a Jerusalem Natëtëngëd Tung Pagpakuindi Nira Tung Anya (13:31-35)
31 Yang uras dang atiing pagbitala ni Jesus,
may mga Pariseong baklung namansikaw̓ut ang ya ray namagbaw̓alitaën tung anyang mag̓aning,
“Maayën pa,
magliita ra ilëm taa.
Ay ti Adi Herodes ang yay may kagaëman taa,
nag̓atimaana ra anya ang yawa ipaimataya ra ilëm anya,”
mag̓aning.
32 Mag̓aning ka ti Jesus ang nagtuw̓al,
“Durug kaidya pala yang Ading naa.
Aningën mi ang papatandaan na ta mupia yang bitalaung naa.
Yuu magpadayunaw pa kanay tung pag̓urubraënung naang pagpalayasaw tung mga dimunyu tung mga tau kag pagpamaayënaw tung may mga laru ig may uras ka man ang kaw̓utun ang ya ray ipagtapusu tung mga pag̓urubraënung naa.
33 Ug̓aring naa w̓a yang gustuung ianingu tung numyu.
Dapataw pa kanay magpadayun yang pagparanawënung naa ay natëtëngëd yang sasang manigpalatay yang bitala yang Dios indi ëngëd magkabag̓ay ang imatayën tung ay pa,
kung indi,
duun ëngëd tung siudad ang Jerusalem,”
mag̓aning.
34 Numanyan atiing pagkasambit ni Jesus yang siudad ang atiang Jerusalem,
ya ra manganugun ang mag̓aning,
“Aay yang mga taung naang tag̓a Jerusalem,
kanugun yang pagkabëtang nira tung uri.
Kada paangayan yang Dios tung mga manigpadapat yang bitala na,
ya ra ilëg batway nirang imatayay.
Pira-pira rang bisis ang gustuu rin ang managpun tung nira ang katulad ka tung manung inayën ang pag̓ayupup tung mga butu na.
Piru indi ra ka ëngëd mangalëlyag ang mamagpaayupup tung yëën.
35 Naa w̓a yang dapat ang isipën nira.
Yang siudad nira ang kanisip nirang indi ra maunu pa,
paw̓ayaan da ilëm yang Dios ang ilug̓ut tung kadiaduan.
Talagang indiaw ra maita nirang uman ang asta kaw̓utun da ilëm yang uras ang ipag̓ilala ka ëngëd nira tung yëën ang ustu ang nunut da ka ta pag̓ingaluk nira tung Dios ang yuung pag̓atuw̓ul nang mag̓ërëkëlën yang kagaëman na,
pakaayënënaw ra kang pirmi anya,”
mag̓aning ti Jesus duun.