Nag̓apaamanan Ni Jesus Yang Mga Tauan Nang Indi Ëngëd Magpauyun-uyun (12:1-3)
12
Numanyan mintras nag̓apatarëg̓ësan nira ta pabalitëktëk ti Jesus,
ya kay pagsaragpun yang mga taung liniw̓u-liw̓u ang asta paglilikëd-likëran da ilëm.
Numanyan ti Jesus may gustu nang ianing ang tëëd ilëm tung mga taung atiang nag̓apangugyatan na.
Mag̓aning tung nira,
“Kuidaw,
indiamu ra ëngëd mag̓usuy tung ug̓ali yang mga Pariseo ang yang kadagmitan tung nira pamagpatunu-tunu ilëm.
Muya masaliranamu ra ilëm nira tung ug̓ali nirang atia ang yang kaalimbawaan na maning pa tung pampalëskag tung san masang tinapay ang gulpi ra ilëm ang tumagmak ang indi ra masuspindian.
Lucas 12:1-21
2 Agpamanënamu ra yëën ta maning tia ay natëtëngëd anday nag̓atipig̓an ang indi luw̓awan,
anday kay nag̓italuk ang indi makdëkan.
3 Kapurisu kung unu pay inaning mi tung sikritu,
magngël da ka ëngëd tung publiku.
Kung unu pay ialas-alas mi tung kaklëran,
mabandilyu ra ka ëngëd tung kadaklan.
Nag̓apaktël Nang Magpakatëntën Ang Mag̓agwanta Tung Padëëg-dëëg (12:4-7)
4 “Mga ungkuyu,
iugtulu tung numyu,
indiamu mag̓ëlëd tung mga taung gustu nirang mangimatay tung numyu,
ang ya ka ilëm yang mga tinanguni mi ay sarangan nirang patayën,
ang pagkatapus anda ra kay dumang mabuat nira tung numyung malain.
5 Kung indi,
yang dapat ang ëldan mi ëngëd,
ipakdëku ra tung numyu.
Anday duma,
ya ra yang kung tapusun na ra nganing yang linawa yang sasang tau,
may pudir na pa tung uri ang mamlëk tung anya duun tung impirnu.
Atia,
iugtulu tung numyu,
yay mas pang dapat ang ëldan mi.
6 Dispuis para tung indiamu mag̓ëlëd tung buwatën yang mga tau tung numyu,
padëmdëman mi ra ilëm yang mga kutung ang mga balaynën.
Indi w̓a,
kung mangalangamu tung palingki,
maskin limang bilug,
durung pisan agkabaratu?
Piru inding pisan nag̓apaw̓aya-w̓ayaan yang Dios,
may sam bilug.
7 Ya pa yamung mga tauanu,
paw̓aya-w̓ayaanamu pa anya?
Ultimung mga bua mi ilëm ngani pinamilang na rang tanan.
Kipurki sasa may sasa tung numyu,
mas maalamu tung Dios kay tung mga kutung ang panëng.
Natëtëngëd Tung Pag̓urubligarën May Pag̓iringwaraën (12:8-12)
8 “Kidispuis pa,
iugtulu tung numyu,
kung tinu pay mag̓ubligar tung katalungaan yang mga masigkatau na ang tanya sasa rang tauanu,
ig disir ta yëën ang pag̓aningën ang Maninga Tau,
kung kaw̓utun da nganing yang uras,
yuu kay magpailala tung anya tung katalungaan yang mga angil ang pag̓apanuw̓ul yang Dios ang tanya sasa ra ka man ang tauanu.
9 Piru kung tinu pay mag̓ingwara tung yëën tung katalungaan yang mga masigkatau na ang tanya bëlag̓an tauanu,
ig disir,
ta yëën,
yang buwatënu,
ingwaraënu ka tung katalungaan yang mga angil ang pag̓apanuw̓ul yang Dios ang tanya bëlag̓an ka man ang tauanu.
10 “Kidispuis pa tung mga taung ituw̓ulu tung numyung pampakaw̓utan yang Matinlung Balita natëtëngëd tung yëën ang pag̓aningën ang Maninga Tau,
kung tinu pay magpakuindi tung yëën,
puiding pasinsiaën yang Dios basta pagsug̓atan na.
Piru kung tinu pay manambing tung Espiritu Santong pagtandëg tung kinaisipan nang magpasirung din tung yëën,
atia indi ra ëngëd patawarën yang Dios.
11 Kidispuis pa kung lag̓unutunamu ra nganing ta mga tau ang para ipabistaamu ra nira tung mga pamagpakigmaëpët duun tung mga pagsaragpunan nira ubin duun tung katalungaan yang ustisia,
indiamu magpakabëgbëg kung ya pa ag̓ari yang pagdipinsa mi tung mga sadili mi u kung unu pay maayën ang ituw̓al mi tung nira.
12 Kipurki yang Espiritu Santong pag̓ërëkëlën tung numyu,
yay magpainunuku tung numyu tung uras ang atiang mainabu tung numyu,
kung unu pay matinlung ituw̓al mi,”
mag̓aning.”
Yang Manggaranën Ang Ipinananglit Ni Jesus Ang Anday Isip Na (12:13-21)
13 Numanyan may sasang tau asan tung mga taung atiang buntun ang yay nagbugnu tung ni Jesus ang mag̓aning,
“Amëëy,
maimu ilëm,
aningën mu ra kanay naa ti manung ang ipakdul na tung yëën yang partiu tung surubliën yamën tung ni tatay yamën,”
ag̓aaning.
14 Mag̓aning ti Jesus ang minlës,
“Abëë,
yang taung naa!
Ayw̓a,
kanisip mu ang yuuy may pudir ang mag̓ariglu tung numyung durua ang para magpamarti tung numyu yang surubliën mi tung ginikanan mi?”
ag̓aaning.
15 Pagkatapus tia,
dayun dang nagbira tung mga tau ang nagpasanag tung nirang mag̓aning,
“Yamung tanan asan,
mangamanamu ang indiamu mag̓amluk ang kuw̓ali manalënsënamu tung maskin unu pang bag̓ayay!
Kipurki yang matinlung pagpangabui yang sasang tau,
bëlag̓an liit tung mga kaayënan ang sarang maëklan na tung kaliw̓utan ang naa,
maskin unu pag kadakël,”
ag̓aaning.
16 Pagkatapus,
dayun dang nagpakdul ti Jesus ta sasang pananglit ang mag̓aning,
“May sasang manggaranën ang puirti yang umintu yang kaluakan na.
17 Simanyan,
pag̓akësën-kësën na yang isip nang maning taa:
‘Unu pa kaya ay maayën ang buwatënu?
Kulang yang pagluug̓anu yang patëbas yang kaluakanu,’
ag̓aaning.
18 Numanyan pagkatimbang na tung isip na,
mag̓aning si tung sadili na,
‘Aa,
nag̓askëanu ra yang buwatënu.
Pampatastasanu ra ilëm yang mga tambuw̓uung pampadakulun,
ang para bastanti ra yang pagluug̓anu yang tanan ang pruduktu yang kaluakanu pati mga garamitënu.
19 Matapusu ra nganing ta pagpaubra,
matimës dang pisan yang tanan ang kaministiranu,
maskin pira-pira rang takun,
indiaw ra ka ëngëd kulangën.
Maënayanaw ra ka tung tanan ang pag̓urubraënu,
mapapsawaw ra ka tung kumpurming iblën yang linawaw,
mapagustuaw ra kang mapagtarangwayanaming magbararkada ang para mapagpakasadyaami ta ustu,’
ag̓aaning.
Atia,
ya ray ipinagkësën-kësën na tung isip na.
20 Numanyan mag̓aning yang Dios tung anya,
‘Naa pala,
anday isip mung pagkatau!
Indi mu nag̓askëan?
Muyang law̓ii,
bawiënu ra yang kabui mung ipinablësu ra ka ilëm tung nuyu.
Ta,
yang tanan ang atiang pinagluug mu,
tinu pa pa w̓asu ay makinaw̓ang?’
ag̓aaning yang Dios tung anya.
21 Purisu yang pisan ay kaalimbawaan yang taung pagtuw̓ud dang pagtuw̓ud ta manggad,
ang pagkatapus,
bëlag̓an kang manggaranën tung nag̓auyunan yang Dios,”
mag̓aning.
Nag̓atuldukan Ni Jesus Yang Mga Tauan Nang Indi Ëngëd Magpakabëgbëg Ta Kulu (12:22-34)
22 Numanyan dayun dang nanalunga ti Jesus tung mga taung atiang nag̓apangugyatan nang nagsugpat yang bitala na.
Mag̓aning tung nira,
“Purisu ya man taang nag̓ipag̓aningu tung numyu,
ang indiamu ëngëd magpakabëgbëg ta kulu natëtëngëd tung pagpangabui mi,
kung ariamu pa mangkël ta mapangan mi,
u kung ya pa ag̓ari yamu mangkël ta aw̓ël ang masuut mi tung mga tinanguni mi.
Lucas 12:22-31
23 Kipurki tëlëngan mi.
Pinakdulanamu ra nganing yang Dios yang mga linawa mi.
Ya pang pamangan mi ilëm,
indiamu sarangan nang pakdulan?
Pati mga tinanguni mi,
pinakdulanamu ra ka nganing anya.
Ya pang aw̓ël mi ilëm,
indiamu sarangan nang paablan?
24 Tëlëngan mi ra ilëm yang mga lamlam.
Indi pamagtugda,
indi ka pamangayëg.
Anda kay mga pagtalukan nira ta pamangan ang para luug nira tung timpung pamig̓a-pig̓a.
Piru indi ka pangalulutan,
ay natëtëngëd ag̓asikasuën yang Dios.
Pagkatapus yamung mas maal tung anya kay tung mga lamlam,
indiamu ka w̓asu asikasuën na?
25 Sam pulukamung magpakabëgbëg ta mga kulu mi,
inding pisan mataw̓ang ang mapalagway tung mga kabui mi basin tung sang uras ilëm.
26 Kapurisu kung indi mi nganing kayanan yang gësyëng bag̓ay ang atiang sang uras ilëm,
ya pa yang dumang bag̓ay ang pabëgbëg̓an mi pa?
27 Kidispuis,
kung natëtëngëd tung pag̓araw̓ëlën mi,
isipën mi ra kanay yang mga talay.
Indi pagpakabëdlay tung tanëk,
anda kay tiral ang pag̓ubraan nira ta mga aw̓ël nira.
Piru iugtulu tung numyu,
maski nganing ti Adi Solomon ang yay nag̓askëan tang pinakamanggaranën atiing tukaw ang durung pisan agkatitinlu yang mga bisti na,
yang katitinlu na inding pisan tëmëpëng tung katitinlu yang mga talay ang naa.
28 Kidispuis pa,
kung yang ilamunun ka ilëm nganing ya pay nag̓apatinlu yang Dios ang nag̓apaëyangan ta mga talay ang simanyan yag dawalay mi ang pagkatapus mangayag yang kaliw̓utan,
puiding sirukun da ka ilëm,
ya pa yamu,
indiamu pa kayanan nang patinluën ang paablan?
Masyadug kagëg̓ëtëy yang pagtaralig̓ën mi tung Dios!
29 Purisu ta yamu,
indiamu ra magpakalingalag natëtëngëd tung mga pagpangabui mi.
Bëlag̓an ya tia ay pabëgbëg̓an mi.
30 Indi mi sakaën yang kadaklan ang mga tau tung bilug ang kaliw̓utan ang alawid pa tung Dios ang alus pa ilëm ya ra ilëm ay pag̓asikad nira tung kaldaw-kaldaw.
Yang indi mi ipagpakabëgbëg ta mga kulu mi tung pangabui mi,
ay natëtëngëd yamu may Ama mi ang yay nag̓askëng pisan kung unu pay mga kaministiran mi.
31 Kung indi,
yang ipalusu ming sikarën ang yamu pirming magparanëk ang magpagaëm tung Dios.
Atia,
kung yay sikarën mi,
tay puis tanya ray balang mag̓arasikasuën tung tanan ang mga kaministiran mi ang ya ra rin ay nag̓aliw̓ëg̓an ta mga kulu mi.
32 “Yamung mga tauanu ang pirming nag̓abantayanu ang pariu ka tung sasang kaayëpan,
tung bag̓ay gësyëamu ka man ilëm,
anday puirsa mi tung kaliw̓utan ang naa kung ikumpalar pa tung mga darakulung mga tau.
Piru indiamu ra ilëm magpatalaw.
Kipurki uyun ang pisan tung isip ni Ama ming palg̓urunamu ra anya tung mga kaayënan ang ipinagsimpan na tung kumpurming pagpagaëm ang bug̓us tung anya.
Lucas 12:32-48
33 Purisu ipaalang mi yang mga ganadus mi.
Yang kabayaran na,
ipamakdul-pakdul mi tung mga maliliwag̓ën.
Ay maning ka tia yang pagtaralukun mi ta manggad duun tung langit ang anda ray kaluw̓us-luw̓usan na.
Kung duun yang manggad ming ipinagtaluk mi,
indi maalëngtan ta takawan,
indi ka mapangan ta andap.
34 Purisu maayën pa duunamu ra ilëm magtaluk yang manggad mi.
Kipurki kung ariamu pa magmanggad,
duun da ka nga gamën yang mga isip mi,”
ag̓aaning.
Yang Dapat Pagamënan Nira Ta Mga Isip Nira Bëlag̓an Yang Kaliw̓utan Ang Naa, Kung Indi, Yang Kaliw̓utan Ang Baklu (12:35-48)
35-36 Mag̓aning ti Jesus ang nagpadayun yang bitala na,
“Kaministiran ang yang pambungun mi,
ya ra yang mga turuw̓ulun ang pamag̓ëlat tung ag̓alën nira ang duun manliit tung sasang kumbirang pinasakpan na.
Yang pagpakbat nira tung anya,
pirming riparasiun ig pirming dëkal yang mga kaas nira ug̓ud kung kumaw̓ut da nganing tanya ang gumuuy tung nira,
alistu ra ilëm ang abrian nirang paklërën.
37-38 Kung tinu pay mga turuw̓ulun nang kaw̓utan nang pamagpulaw,
durug dakul yang kaayënan ang ipakdul na tung nira.
Maskin tënganan da ta law̓ii yang ipagkaw̓ut na,
maskin alëngët dang mangayag,
ang tanira pamagpulaw pa ka ëngëd,
anday dumang iblës na tung nira,
tanya ra mismu ang ag̓alën nira ya pay mag̓asikasu tung nirang maglamisa.
39 Naa w̓a ya ra kay sasang isipën mi.
Yang sasang may balay,
kung naskëan na ra rin yang uras ang ipagkaw̓ut yang takawan,
indi na ra rin pinaw̓ayaan ta pamangbang yang balay na,
kung indi,
pinulawan na ra rin ang binantayan ta mupia.
40 Purisu ta yamu kaministiran ang pirmiamung riparasiun tung ipaglëkatu.
Ay ta yëën ang pag̓aningën ang Maninga Tau,
yang uras ang ipaglëkatu inali.
Muya matuun tung uras ang yang laum mi indiaw pa malkat,”
mag̓aning.
41 Numanyan mag̓aning ti Pedrong nagtalimaan,
“Ginuu,
tinu pay ag̓apatëmëngan mu tung ipinananglit mung atia?
Yami ilëm ang mga tauan mu u maskin tinu pa?”
42 Numanyan mag̓aning ti Jesus ang nagtimalës,
“Yang sasang turuw̓ulun ang katalig̓an ig mawayang ta kinaisipan,
ya ray nag̓apiaran yang ag̓alën nang mag̓ërëkëlën tung mga kaarumanan nang mga turuw̓ulun ug̓ud yay mamarti-parti yang mga pamangan nira ang kada kaw̓utun yang ipagkaministiran nira.
43 Tëëd mi tiang kasadya yang isip yang turuw̓ulun ang atia kung kaw̓utan da yang ag̓alën nang pag̓intindi tung itinuw̓ul nang atia tung anya.
44 Iugtulu tung numyu,
ya ray piaran yang ag̓alën na tung tanan ang prupidad na.
45 Piru,
ipabëtangu,
kung yang turuw̓ulun ang atiang nag̓ianingu,
maning taa yang kësën-kësën yang isip na,
‘Aa,
siguru mabuay pang kumaw̓ut yang ag̓alënu.’
Ang pagkatapus mag̓intra ra pamalu tung mga masigkaturuw̓ulun na,
tig lalii tig baw̓ay,
pariu ilëm yang aplit na,
ig pagustuan na ra ilëm yang linawa na tung tanan ang mga pamangan ang masasabur ig magpakigbarkada ra ka tung mga taung mga tarainëm,
atia aparti kusas.
46 Pagkatapus numanyan inaling kaw̓utan yang ag̓alën na tung uras ang inding pisan nabantay ang andang pisan ay laum-laum nang kumaw̓ut da.
Anday dumang buwatën yang ag̓alën na tung anya,
kastiguën nang anday katëgkaan na.
Duun da ipaugpuay na tung mga taung bëlag̓an kang katalig̓an.
47 Utru si ipabëtangu si,
kung may kirëpën ang maskin nag̓aintindian na yang itinuw̓ul yang ag̓alën na tung anya,
piru inding pisan nanalugkamay ang para magtuman da rin,
anday dumang buwatën tung anya,
paburdunan da ta mupia yang ag̓alën na.
48 Piru yang sam bilug ang indi nakdëk kung unu pay kalëlyag̓an yang ag̓alën na,
ang pagkatapus napagbuat ta kamali ang yay dapat ang masalapuan na ka ta paburdun,
paburdunan ka,
piru malakan-lakan pa tung ipinakdul tung sam bilug.
Kung tinu pay piniaran yang Dios ta dakëlë,
sagyapan na ka ta dakëlë.
Kung tinu pay piniaran na ta mas dakëlë kay tung mga aruman na,
dilëman na ka ta mas dakëlë kay tung nira,”
mag̓aninga.
Ti Jesus Ya Ray Pagbëlag̓anan Ta Isip Yang Sam Pamilya (12:49-53)
49 Mag̓aning ti Jesus ang nagpadayun yang bitala na,
“Yang inangayu taa tung kaliw̓utan ang naa,
magpagkalaw ta maninga sasang apuy.
Basi pa ra ilëm ang tung makali madëëtan da.
Lucas 12:49-59
50 Piru baklu ra madëëtan dang magdëkal,
kung napasaranu ra yang pinitinsiang malbat ang yay dapat ang pasaranu.
Baklu ra lumakan yang isipu kung yuu napasar da.
51 Ayw̓a,
kanisip mi ang yang inangayu taa ang para yang tanan ang mga tau mamag̓uruyunan dang mamagsarasaan?
Iugtulu tung numyu,
anday dumang dangatën na,
mamagsuruag-suag̓an da natëtëngëd tung pagpabëtang nira tung yëën ang indi ëngëd magkapariu.
52 Ayw̓a indiamu paamanënu sindu anday dumang pakaw̓utun na,
mag̓impisa ra simanyan puiding may sam pamilya ang limang mamag̓ana ang magbërëlag ta kinaisipan may kinaisipan natëtëngëd tung yëën.
Puidi ang yang tulu mamagpasirung tung yëën,
yang durua ya ra kay mamagpakuindi.
Ubin yang durua mamagkërëng tung yëën,
yang tulu ya ra kay mamagkuntra.
53 Ang kaisan yang mga mamaëpët yay mamagpasirung tung yëën,
ang yang mga ana nira,
mamagpakuindi.
Ang kaisan yang mga mamula yay mamagpasirung tung yëën,
ang yang mga ginikanan nira yay mamanambing.
Ang kaisan tung magpurunyangan,
yang mga mamaëpët yay mamagpasirung tung yëën,
ang yang mga minag̓ad nira,
indi.
Ang kaisan yang mga minag̓arën yay mamagpasirung tung yëën,
piru yang mga punyangan nira yay mamagpakuindi.
Purisu magsuruag-suag̓an dang magbërëlag ta kinaisipan natëtëngëd tung yëën,”
mag̓aning.
Nag̓apaamanan Ni Jesus Yang Mga Tau Ang Yang Pagsuku Nira Tung Dios Indi Nira Ipataw̓ën-taw̓ën, Kung Indi, Atiang Lag̓i Ubligaduën Da Nira (12:54-59)
54 Taa numanyan ti Jesus dayun dang nagbitala tung mga taung atiang buntun ang pamagtaripukpuk tung anya ang mag̓aning,
“Kung mabandaw mi ra nganing yang galëm ang pag̓unup dang ampir tung abag̓at,
diritsyuamu rang mag̓aning ang kumuran da buay-w̓uay.
Ang pagkatapus kumuran da ka man.
55 Kidispuis kung mag̓ëyëp da nganing yang salatan,
mag̓aningamu ka ang manginit da ta duru.
Ang pagkatapus manginit da ka man.
56 Matakuamu nganing ang magpamalad tung nag̓aita mi tung kaliw̓utan may tung kalangitan,
piru yang palaksu yang pagkarainabu tung panimpu tang naa,
indiamu pala maskëng magpamalad yang nag̓adapatan nab?
57 Ayw̓a kaya indiamu maskëng magtimbang-timbang tung mga isip mi kung unu pay dapat ang buwatën mi tung mga uras ang naa?
58 Para maintindian mi yang dapat ang buwatën mi,
magpananglitaw ra kanay.
Ipabëtangu,
may utang ming dakulu tung sasang tau.
Piru kumus panginluasamu ang anday nautangan mi,
anday duma,
ëklanamu ra ilëm anya duun tung ustisia.
Maayën pa indiamu ra mag̓ëlat,
kung indi,
atiang lag̓i ang duunamu pa tung dalan,
magsukuamu rang lag̓i tung anya.
Indiamu ra mag̓aning ang taw̓ën da intindiay mi ang yamu duun da tung katalungaan yang usgadu.
Kipurki kung duunamu ra nganing,
masintinsiaanamu ra nganing anya,
anday duma,
ipiaramu ra ilëm anya tung sasang pulis ang yamu ra iplëkay na duun tung kalabus.
59 Iugtulu tung numyu,
indiamu ka ëngëd palpasan ang asta indi mi mabayaran yang utang ming luw̓us ang andang pisan ay pagkakulang na,
may sang iki.
Yang pisan ay kaalimbawaan mi simanyan ang mga uras ang naa,”
ag̓aaning ti Jesus.