Nag̓aula Ni Jesus Ang Yang Pagtuuan Ang Atiang Pinakalusu Magëw̓a (24:1-2)
24
Taa numanyan dayun dang luminua ti Jesus duun tung palayas yang pagtuuan ang atiang pinakalusu ang nagpanaw.
Tung pagparanawën na,
sinikad da yamën ang pinalëngtan,
ay gustu yamën ang ipasapët da tung anya yang plantar yang pagtuuan ang atia kung unu pag katinlu.
2 Mag̓aning ti Jesus ang nagtimalës tung yamën,
“Midyu agtinluanamu rang pagtëlëng tung tanan ang atia.
Piru iugtulu tung numyu yang kamatuuran,
may uras ang kaw̓utun ang magëw̓a rang pisan yang tanan ang atia.
Yang mga batung atiang darakulung pinasag̓i ang tinambi-tambi asan,
anda rang pisan ay mabutwan pang magsarampaw-sampawan,
kung indi,
luw̓us dang magkarapanpan tung tanëk,”
mag̓aninga.
Nag̓ipaaman Ni Jesus Tung Nira Yang Mga Kaliwag̓an Ang Dapat Mapasaran Nira (24:3-14)
3 Numanyan atiing pagkaw̓ut yamën duun tung tag̓aytay yang bukid ang atiang durung naluak ang ayung pag̓aningën ang olibo,
dayun dang kuminarung ti Jesus.
Pagkatapus tinaripukpukan da yamën ang nag̓apangugyatan na ang yami yami ra ilëm.
Mag̓aningami tung anya,
“Amëëy,
pakdëkayami ka kung sanu pa magkamaning da ta maning tia yang nainambit mu nungayna.
Unu pang pruibaay ang sarang matandaan yamën ang yawa maglëkat da taa ang ya ra kay ipagtapus yang Dios tung panimpung naa?”
4 Mag̓aning ka ti Jesus ang nagtuw̓al,
“Mangamanamu ta mupia ang para indiamu madayaan ta dumang mapatalang.
5 Kipurki durung magluang mag̓ambu ang tanya unu ya ray yuung pag̓aningën ang Cristo ang pagkatapus durung taung magkaradayaan nira.
6 Dispuis tung uras ang atiang panalungaan may magngël ming gulu yang paggiriraan ig duun tung duma-rumang rugal may mga gira kang magkarabalitaan mi.
Piru yang pangamanan mi asan ang indiamu ilëm magpakataranta.
Ay kipurki yang mga bag̓ay ang atia dapat ang magkarainabu,
piru indiamu maglaum ang yang magdasun ya ra yang uras ang ipagtapus yang Dios tung panimpung naa.
7 Ag̓aningënamu yëën ta maning tia ay yang magkarainabu,
nasyun may nasyun magsuruayan ang maggiriraan.
Dispuis may magpanaw ang mga panuw̓uk tung duma-rumang banwa pati mga yëgyëg ya ka.
8 Yang kaalimbawaan yang mga bag̓ay ang atia kung magkarainabu ra nganing,
maning pa tung primirung pagpasiit-siit yang sasang baw̓ay ang paranganaën da.
Yay dapat ang magtukaw baklu pa kaw̓utay yang baklung panimpu.
9 “Dispuis tung uras ang magkarainabu yang mga bag̓ay ang atia,
muya-muyaamung ipadëëp yang mga taung pamagkuntra tung numyu ang para iintrigaamu ra nira tung mga ustisiang paparusaan,
ang asta yang duma tung numyu ipaimatay ra ilëm nira.
Dispuis dëmtanamu ka ta mga tau tung maski ariamu pang banwaay nga pangay,
arangan da ilëm tung yëën ang nag̓akëgngan mi.
10 Tung uras ang atiang pumasar yang kaliwag̓an,
durung mamalpas da tung yëën.
Mismu yang mga aruman nirang mga tumatalig ka tung yëën,
ya ray dëmtan nirang traidurun ang para iintriga ka nira tung mga ustisia.
11 Duru kang magluang mga manig̓imu-imu ta bitala ang ya unu ay bitalang itinalig yang Dios tung nirang ipalatay buat.
Ang pagkatapus durung magkaradayaan nirang papanangërën tung kabuklian nira.
12 Dispuis natëtëngëd tung paglalampasën yang mga tau tung mga katuw̓ulan yang Dios ang subra ra tung uras ang atia,
duru kang mga tauanu ang asan da manluw̓ay ang asta manlamig da yang gëgma nira tung yëën pati yang gëgma nira tung mga kaarumanan nira.
13 Piru kumpurming tinu pay tauanung magpatëntën yang isip nang magpadayun ka ëngëd tung pagtaralig̓ën na tung yëën,
maskin imatayën pa,
ya ray tapnayën yang Dios ang ipalg̓ud tung kaliw̓utan ang baklu.
14 Dispuis pa,
yang Matinlung Balitang naa natëtëngëd tung paggarëmën yang Dios ang baklu dapat ang ipagpakaw̓ut da tung bilug ang kaliw̓utan ug̓ud yang tanan ang mga tau,
maskin unu pang nasyunay,
mapaingmatuuran da.
Atia kung masalaid da nganing yang bilug ang kaliw̓utan,
baklu ra kaw̓utay yang uras ang ipagtapus yang Dios tung panimpung naa,”
mag̓aning.
Nag̓ipagpaaman Ni Jesus Yang Natëtëngëd Tung Sasang Kaliwag̓an Ang Kumaw̓ut Tung Uri Ang Inding Pisan Mapasiring-siringan (24:15-28)
15 Mag̓aning ti Jesus ang nagpadayun yang bitala na,
“Tung mga uras ang atiang nag̓ianingu,
maita ming ya rag bëbtang tung sagradung lugar yang sasang naula ni Daniel ang pagpadamang ang yay makalalaway ang pisan ta isipb.
(Yuung ti Mateong nagsulat,
may yëën kang gësyëng isalëët ang para ipaëtaru tung numyung mga manigbasa.
Ipasanag mi tung mga taung pamamati kung unu pay linëgdangan yang mga bitalang atia.)
16 Purisu kung maita mi ra nganing tia,
kumpurming tinu pay pagtinir taa tung sinakëpan yang Judea,
kaministiran magpalaksu rang lag̓i duun tung kabukiran.
17 Kung tinu pay kaw̓utan yang uras ang atia ang duun dag kakarung tung sagpaw yang balay nang pagpalimasmasc,
kaministiran ang indi na ra kanugunun yang mga ëkël-ëkël na duun tung kaklëran ang maning paranëkan na pang ëklan,
kung indi,
diritsyu ra ilëm ang magparanëk ang magpalaksu.
18 Ya ka yang taung duun da kaw̓utay tung kaluakan na,
indi na ra ka balikan yang panlamig na duun tung balay na.
19 Kanugun yang pagkabëtang yang mga matung may yang mga talaana tung uras ang atia.
20 Mag̓ampuamu tung Dios ang indi matuun tung abag̓at yang ipagpalaksu mi ubin tung kaldaw ang nag̓ipamaënay.
21 Ag̓aningënamu yëën ta maning tia ay natëtëngëd tung uras ang atia durung pisan aglëbat yang kaliwag̓an ang kumaw̓ut.
Disti pa tung katëbtëw̓an ang atiing pag̓imu yang Dios tung kaliw̓utan ang asta ra ilëm simanyan,
indi pa nag̓apasaran yang kaliw̓utan ta maning tiag lëbat.
Maskin pa tung uras ang panalungaan,
anda ray magdëëg tii.
22 Kung indi nganing padiputun yang Dios yang timpung atia,
ya rang ya rang maspuk da rin yang mga tau.
Piru alang-alang da ilëm tung mga taung pinagpilik na kang lag̓ing mga tauan na,
ya ra kay ipagpadiput na.
23 Tung mga uras ang atia,
kung aningënamu ta mga tau ang,
‘Uay,
nani ra yang pag̓aningën ang Cristo!’
ubin aningënamu nirang,
‘Uay atii ra!’,
indiamu ëngëd manangëd.
24 Nag̓apaamanamu yëën ta maning tia ay tung mga uras ang atia may mamaglua rang mga tau ang ya ray mamag̓ambu ang tanira unu ya ray yuung pag̓aningën ang Cristo.
May dumang mamaglua kang mga manig̓imu-imu ta bitala ang ya unu ay bitalang itinuw̓ul yang Dios tung nirang ipalatay buat.
May mga pruiba nganing ang maktël ang durug kabëw̓ërëng ang ipalapus nira ug̓ud pati mga taung pinagpilik yang Dios ang mag̓ing mga tauan na,
tag̓aman da ka nirang dayaan kanung kayanan pa ka nira.
25 Papatandaan mi ta mupia yang inaningung atia tung numyu,
ay pinakdëkamu rang lag̓i yëën baklu magkarainabu.
26 Purisu kung aningënamu ta mga tau ang ‘Aliamu ra,
yang pag̓aningën ang Cristo duun da tung banwang kapas!’,
indiamu ëngëd mag̓angay duun.
Ya ka,
kung aningënamu ta duma ang ‘Aliamu,
takaa ra tung kaklëran pantaluk!’,
indiamu ka ëngëd manangëd.
27 Kipurki ta yuung pag̓aningën ang Maninga Tau,
kung maglëkataw ra nganing,
maintindian da tung bilug ang kaliw̓utan.
Ay yang kaalimbawaan na maning pa tung kidlat ang kung suminggat da nganing,
bistu rang pisan tung duw̓ali magduw̓aling langit.
28 Basta maglëkataw ra,
indi mataluk tia.
Magkapariu ra tung nag̓ipananglit yang mga mamaëpët ang kung ay pa unu may ayëp ang patay indi unu mataluk ay natëtëngëd duun ka unu pamaglangët ang pamagpatipay-tipay yang mga lamlam ang atiang pamamangan ta ayëp ang patay,”
mag̓aning.
Natëtëngëd Tung Paglëlëkatën Ni Jesus Tung Kaliw̓utan (24:29-31)
29 Mag̓aning ti Jesus ang nagpadayun yang bitala na,
“Tung uras ang atiang panalungaan,
kung mataklib da nganing yang kaliwag̓an ang atiang durug lëbat,
maning taa yang magkarainabu ang katulad ka tung napabtang tung kasulatan:
‘Yang kaldaw mangiklëp da,
pati yang bulan indi ra ka manadlaw.
Asta yang mga dumakël duun tung langit magkarataktak da.
Bilang yang tanan ang bag̓ay tung kalangitan pampawaldangën da yang Dios tung dating pagkarabëtangën nira,’
mag̓aningd.
30 Pagkatapus may sasang pruibang maita tung langit ang ya ray magpailala ang yuung pag̓aningën ang Maninga Tau maglëkataw ra.
Pagkatapus yang kadaklan ang mga tau maskin unu pang nasyunay tung bilug ang kaliw̓utan mamagtarangitën dang mamagpurukpukan tung mga dëbdëb nira natëtëngëd indi kang lag̓i pamagpakbat tung yëëne.
Ay maitaw rang pisan nira ang yuug sasaay tung panganud ang liit tung langit ang yuu kag dawalay nirang duru rag kasusulaw yang pagkabëtangung paggaraëmënf.
31 Pagkatapus,
tung uras ang atia may sasang turumpitang ëyëpën ta durug tunul ig panuw̓ulunu yang mga angilung mamagliliw̓utun da tung bilug ang kaliw̓utan ug̓ud panagpunun da nira yang tanan ang mga tauanung pinamiliku kang lag̓i ang duun mamanliit tung maskin ay pang kabiw̓init-binitanay yang kaliw̓utan,”
mag̓aning.
Yang Magkarainabu Tung Uri Nag̓ipananglit Ni Jesus Tung Panguruk Yang Ayung Pag̓aningën Ang Igus (24:32-35)
32 Numanyan,
mag̓aning ti Jesus ang nagpadayun yang bitala na,
“Pamarësmësan mi ra kanay ta mupia yang pananglitung naa natëtëngëd tung ayung igus.
Kung manaringsing da nganing yang mga sanga-sanga na ang mag̓impisa rang manguruk,
nag̓aintindian mi rang makali rang kumaw̓ut yang tagkinit.
33 Maning ka tia yang kaalimbawaan yang tanan ang atiang nagkarasambitu ta nungayna.
Ta yamu,
kung maita mi ra nganing ang pagkarainabu ra,
asan da ngaintindiay mi ang alëngët da yang uras ang ipaglëkatu,
maning pa tung asanaw rag pag̓ëlat tung purta ang para magpaklëraw rag.
34 Iugtulu tung numyu yang kamatuuran,
baklu magkarapatay yang kadaklan ang mga masigkanasyun ta numanyan,
kung magkarainabu ra yang tanan ang atiang inulaw ta nungayna.
35 Matunaw yang kalangitan may yang katanëkan,
piru yang kumpurming nag̓ibitalaw indi ra ka ëngëd ang pisan matunaw,”
mag̓aning.
Anday Nag̓akdëk Kung Unu Pang Kaldaway Ang Ipaglëkat Ni Jesus Kung Indi Ultimu Ilëm Ti Ama (24:36-44)
36 Numanyan mag̓aning ti Jesus ang nagsugpat yang bitala na,
“Ug̓aring ilëm kung unu pang kaldaway ubin kung unu pang urasay ang ipaglëkatu,
anday nag̓akdëk maski yang mga angil duun tung langit,
maskin yuu pang pag̓aningën ang Ana Yang Dios,
kung indi,
ultimu ilëm ang nag̓akdëk ti Ama.
37 Ag̓aningënamu ra yëën ta maning tia ay kung ya pa ag̓ari yang palaksu yang pag̓irisipën yang mga tau tung panimpu ni Noe,
yang pisan yang palaksu na kung yuung pag̓aningën ang Maninga Tau makaliaw rang maglëkat.
38 Kipurki atiing indi pa ag̓akaw̓ut yang palëmpan,
baliwala ka ilëm tung mga isip yang mga tau yang sintinsiang atiang magkakaw̓ut da tung nira.
Yang pinadayunan nirang pinabilug̓an,
ya ra ka ilëm yang pag̓urubraën nira tung pangaldaw-kaldaw ang katulad ka tung pagparanganën nira may tung pag̓irinëmën nira may tung pagkarasawaën nira may tung pagparakasawaan nira tung mga ana nira.
Ya ra ka ilëm tii yang inintindi nira ang asta ra ilëm kinaw̓ut yang uras ang ipinagsaay na Noe tung parka.
39 Masapuan da ilëm nira ang kinaw̓utan da tanira yang palëmpan ang atia ang ya ra kay nagakdan nirang tanan tung kalainan.
Maning kang pisan tia kung uras dang yuung pag̓aningën ang Maninga Tau maglëkataw ra.
40 Ay tung uras ang atia,
ipabëtangu may durua nga tauan ang pamag̓ubra tung kaluakan,
yang sam bilug ya ray ëklan yang mga angilung isagpun tung tanan ang mga tauanu.
Yang aruman na,
mabutwan da ka ilëm asan tung karisguan.
41 Ubin may durua nga baw̓ayan ang pagtinaw̓angay ta paggaling yang bëyëd yang trigu,
yang sam bilug ya ray ëklan yang mga angilu,
yang katabyang na mabutwan da ka ilëm asan tung kaliwag̓an.
42 Purisu papabtikamung pirmi ay indi mi nag̓akdëkan kung unu pang kaldaway ang ipaglëkatu ang yuu ka man ay Ginuu mi.
43 Naa w̓a ya ray sasang matinlung padëmdëman mi.
Yang sasang may balay,
kung naskëan na ra ilëm kung unu pang urasay tung law̓ii ang ipagkaw̓ut yang takawan,
binantayan na ra rin ang pinulawan yang balay na ug̓ud indi ra rin mabangbangan ang mapaklëran.
44 Purisu kaministiran ang ta yamu pirmiamung riparasiun tung ipaglëkatu.
Ay yuung pag̓aningën ang Maninga Tau,
kung maglëkataw ra nganing,
muya matuun tung uras ang nalimung-limung da tung mga isip mi yang pagparakbatën mi tung yëën,”
mag̓aning.
Yang Mga Manigpadag̓ën-dag̓ën Nag̓ipananglit Ni Jesus Tung Turuw̓ulun Ang Katalig̓an Yang Ag̓alën Na May Yang Indi Na Matalig̓an (24:45-51)
45 Mag̓aning ti Jesus ang nagsugpat yang bitala na,
“Yang sasang turuw̓ulun ang katalig̓an ig abwat ta kinaisipan,
ya ray nag̓apiaran yang ag̓alën nang mag̓ërëkëlën tung mga kaarumanan nang turuw̓ulun ug̓ud yay mamarti-parti tung nira yang mga pamangan nira ang kada kaw̓utun yang ipagkaministiran nira.
46 Tëëd mi tiag kasadya yang isip yang turuw̓ulun ang atia kung kaw̓utan da yang ag̓alën nang pag̓intindi tung itinuw̓ul nang atia tung anya!
47 Iugtulu tung numyu,
ya ray piaran yang ag̓alën na tung tanan ang prupidad na.
48 Piru kung yang turuw̓ulun ang atia bëlag̓an katalig̓an,
maning taa yang nag̓asuma-suma na tung isip na:
‘Aa,
siguru mabuay pa kang mulik yang ag̓alënu.’
49 Ang pagkatapus mag̓intra ra pamalu tung mga masigkaturuw̓ulun na ig pagustuan na ra ilëm yang linawa na tung tanan ang masasabur ig magpakibarkada ra ka tung mga taung mga tarainëm.
50 Pagkatapus numanyan inaling kaw̓utan yang ag̓alën na tung kaldaw ang inding pisan nabantay ang andang pisan ay laum-laum nang kumaw̓ut da.
51 Anday dumang buatën yang ag̓alën na tung anya,
kastiguën na ang anday katëgkaan na.h
Duun da ipaugpuay na tung mga taung pamagpakaayën-ayën kang lag̓i ilëm.
Duun da tanya magtarangitën ang magkarëtkët yang isi nang magpapinitinsia ang asta tung sampa,”
mag̓aning.