Nag̓aula Ni Jesus Ang Yang Pagtuuan Ang Atiang Pinakalusu Magëw̓a (13:1-2)
13
Taa numanyan atiing pagliit na Jesus duun tung palayas yang pagtuuan ang atiang pinakalusu,
binugnu ra yang sasang taung nag̓apangugyatan na ang inaning,
“Amëëy,
uay,
tëlëngan mu w̓a yang mga batung atiang tinambi-tambi tung mga padir yang balay ang naa.
Kadarakul!
Pati yang dumang ipinakdëng asan durug katitinlu!”
2 Mag̓aning ka ti Jesus ang nagtimalës,
“Midyu agtinluana rang pagtëlëng tung mga batung atiang darakulu ka man.
Piru iugtulu tung nuyu,
may uras ang kaw̓utun ang yang mga batung atiang darakulung pinasag̓i ang tinambi-tambi asan,
anda rang pisan ay mabutwan pang magsarampaw-sampawan,
kung indi,
luw̓us dang magkarapanpan tung tanëk,”
mag̓aning.
Nag̓ipaaman Ni Jesus Tung Nira Yang Mga Kaliwag̓an Ang Dapat Mapasaran Nira (13:3-13)
3-4 Numanyan atiing duun da tanira na Jesus tung tag̓aytay yang bukid ang atiang durung ayung pag̓aningën ang olibo,
ya rag kakarung ti Jesus.
Ya rag bandaway nira yang pagtuuan ang atiang pinakalusu ang yag tatalunga duun tung duw̓aling bukid.
Numanyan namagpalëngët da tung anya na Pedro,
na Santiago,
na Juan,
may ti Andres.
Atiing tanira ra ilëm ang lima,
namagtalimaan da tung anyang mag̓aning,
“Amëëy,
pakdëkayami ka kung sanu pa magkamaning da ta maning tiang nainambit mu nungayna?
Unu pang pruibaay ang sarang tandaan yamën ang makali rang magkarainabu yang tanan ang atia?”
5 Atii,
dayun dang nag̓impisa ti Jesus ang nagpamadbad tung mga isip nirang mag̓aning,
“Mangamanamu ta mupia ang para indiamu madayaan ta dumang mapatalang.
6 Ay kipurki durung magluang mag̓ambu ang tanya unu ya ra yuung pag̓aningën ang Cristo ang pagkatapus durung taung magkaradayaan nira.
7 Dispuis pa kung magngël mi ra nganing yang gulu yang paggiriraan ubin mabalitaan mi ra ka nganing yang mga gira duun tung duma-rumang rugal,
indiamu ilëm magpakataranta.
Ay kipurki dapat ang magkarainabu yang mga maning tia,
piru indiamu ilëm maglaum ang yang magdasun ya ra yang uras ang ipagtapus yang Dios tung panimpung naa.
8 Ag̓aningënamu yëën ta maning tia ay yang magkarainabu,
nasyun may nasyun magsuruayan ang maggiriraan.
Dispuis may magpanaw ang mga yëgyëg tung duma-rumang banwa pati mga panuw̓uk ya ka.
Yang kaalimbawaan yang mga bag̓ay ang atia kung magkarainabu ra nganing,
maning pa tung primirung pagpasiit-siit yang baw̓ay ang paranganaën da.
Yay dapat ang mamagtukaw baklu pa kaw̓utay yang baklung panimpu.
9 “Ta yamu,
mangamanamu ay dëëpënamung idimanda tung mga usgadu.
Duunamu ka paburdunay yang pamagmaëpët-ëpët tung mga pagsaragpunan nira mismu.
Kung kaisan guyuranamung patalungaën tung mga gubirnadur may tung mga adi pa natëtëngëd tung pagkërërëngën mi tung yëën.
Asanamu ra nga pakdulay ta lugar ming magpaingmatuud tung nira natëtëngëd tung yëën.
10 Asta yang tanan ang mga nasyun tung bilug ang kaliw̓utan,
dapat kang pampakaw̓utan yang Matinlung Balita natëtëngëd tung yëën baklu kaw̓utay yang uras ang ipagtapus yang Dios tung panimpung naa.
11 Kung dëëpënamu ra nganing ang idimanda tung mga usgadu,
indiamu ra ilëm magpakabëgbëg ta mga kulu mi kung unu pay ituw̓al mi,
kung indi,
kumpurming unu pay ipaisip tung numyu tung mga uras ang atia,
ya ray ibitala mi.
Ay kung unu pay ibitala mi,
bëlag̓an numyung sadiling pasamintu,
kung indi,
ya ra ipaisipay tung numyung ipabitala yang Espiritu Santo.
12 Maning taa yang mainabu tung sam pamilya.
Kung tinu pay manangëd tung Matinlung Balita natëtëngëd tung yëën,
ya ray dëmtan yang mga putul nang idangëp tung usgadung ipaimatay.
Ang kaisan ya ra kay buatën yang sasang amaën tung mga ana nang namagpasirung da tung yëën.
Ang kaisan,
kung yang mga ginikanan ya ray namagpagaëm da tung yëën,
ya ra kay batukan yang mga ana nirang ipaimatay.
13 Dispuis pa,
dëmtanamu ka ta maskin tinu pang tauay arangan da ilëm tung yëën ang nag̓akëgngan mi.
Piru kung tinu pay magpatëntën yang isip nang magpadayun ka ëngëd tung pagtaralig̓ën na tung yëën,
maskin imatayën pa,
indi ra maunu pa yang kalibrian nang ipinakdul da yang Dios tung anya,”
mag̓aning.
Nag̓ipagpaaman Ni Jesus Natëtëngëd Tung Kaliwag̓an Ang Kumaw̓ut Tung Uri Ang Inding Pisan Mapasiring-siringan (13:14-23)
14 Mag̓aning ti Jesus ang nagpadayun yang bitala na,
“Tung mga uras ang atiang nag̓ianingu,
maita mi ra yang sasang pagpadamang ang makalalaway ang pisan ta isip ang ya rag bëbtang tung puistung sagradu ang dapat da rin ang indi pabtangana.
(Yuung ti Marcos ang nagsulat,
may yëën kang gësyëng isalëët ang para ipaëtaru tung numyung mga manigbasa.
Ipasanag mi tung mga taung pamamati kung unu pay linëgdangan yang mga bitalang atia.)
Purisu kung maita mi ra nganing tia,
kumpurming tinu pay pagtinir tung sinakëpan yang Judea,
kaministiran magpalaksu rang lag̓i duun tung kabukiran.
15 Kung tinu pay kaw̓utan yang uras ang atia ang asan dag kakarung tung sagpaw yang balay nang pagpalimasmasb,
kaministiran ang indi na ra kanugunun yang mga ëkël-ëkël na duun tung kaklëran ang maning ëklan na pa,
kung indi,
diritsyu ra ilëm ang magpalaksu.
16 Ya ka yang taung duun da kaw̓utay tung kaluakan na,
indi na ra ka balikan yang panlamig na duun tung balay na.
17 Kanugun yang pagkabëtang yang mga matung may yang mga talaana tung uras ang atia.
18 Mag̓ampuamu tung Dios ang indi matuun tung abag̓at yang ipagpalaksu mi.
19 Ag̓aningënamu ra yëën ta maning tia ay natëtëngëd tung uras ang atia kumaw̓ut da yang sasang kaliwag̓an ang durung pisan aglëbat.
Disti pa tung katëbtëw̓an ang atiing pag̓imu yang Dios yang kaliw̓utan ang asta ra ilëm simanyan,
indi pa nag̓apasaran yang kaliw̓utan ta maning tiag lëbat.
Maskin pa tung uras ang panalungaan,
anda ray magdëëg tii.
20 Kung indi nganing padiputun yang Dios yang timpung atia,
ya rang ya rang maspuk da rin yang mga tau.
Piru alang-alang da ilëm tung mga taung pinagpilik na kang lag̓ing mag̓ing mga tauan na,
ya ra kay ipagpadiput na.
21 Tung mga uras ang atia,
kung aningënamu ra ta mga tau ang ‘Uay,
nani ra yang pag̓aningën ang Cristo’ ubin kung aningënamu ka nirang,
‘Uay,
takaa ra’,
indiamu ëngëd manangëd.
22 Nag̓apaamanamu yëën ta maning tia ay tung mga uras ang atia may mamaglua rang mga tau ang ya ray mamag̓ambu ang tanira unu ya ra yuung pag̓aningën ang Cristo.
May dumang mamaglua kang mga manig̓imu-imu ta bitala ang ya unu ay bitalang itinuw̓ul yang Dios tung nirang ipalatay buat.
May mga pruiba nganing ang maktël ang durug kabëw̓ërëng ang ipalapus nira ug̓ud pati mga taung pinagpilik yang Dios ang mag̓ing mga tauan na,
tag̓aman da ka nirang dayaan kanung kayanan pa ka nira.
23 Purisu ta yamu,
mangamanamu ra ta mupia.
Tutal pinakdëkamu rang lag̓i yëën natëtëngëd tung tanan ang atia baklu magkarainabu,”
mag̓aning.
Natëtëngëd Tung Paglëkat Ni Jesus Tung Kaliw̓utan (13:24-27)
24 Mag̓aning ti Jesus ang nagpadayun yang bitala na,
“Tung uras ang atiang panalungaan,
kung mataklib da nganing yang kaliwag̓an ang atiang durug lëbat,
maning taa yang magkarainabu ang katulad ka tung napabtang tung kasulatan:
‘Yang kaldaw mangiklëp da,
pati yang bulan indi ra ka manadlaw.
25 Asta yang mga dumakël magkarataktak da.
Bilang yang tanan ang bag̓ay tung kalangitan papagwaldangën da yang Dios tung dating pagkarabëtangën nira,’
mag̓aning.
26 Tung uras ang atia,
yuung pag̓aningën ang ‘Maninga Tau’,
maitaw ra yang mga tau ang yuug sasaay tung panganud ang yuu kag dawalay nirang duru rag kasusulaw yang pagkabëtangung paggaraëmën.
27 Dayunaw ra kang manuw̓ul tung mga angil ang mamagliliw̓utun da tung bilug ang kaliw̓utan ug̓ud panagpunun da nira yang tanan ang mga tauanung kumpurming pinagpiliku kang lag̓i ang duun mamanliit tung maskin ay pang kabiw̓init-binitanay yang kaliw̓utan,”
mag̓aning.
Yang Magkarainabu Tung Uri Nag̓ipananglit Ni Jesus Tung Panguruk Yang Ayung Pag̓aningën Ang Igus (13:28-31)
28 Numanyan,
mag̓aning ti Jesus ang nagpadayun yang bitala na,
“Pamarësmësan mi ra kanay ta mupia yang pananglitung naa natëtëngëd tung ayung igus.
Kung manguruk da nganing,
nag̓aintindian ta rang makali rang kumaw̓ut yang tagkinit.
29 Maning ka tia yang kaalimbawaan yang mga bag̓ay ang atiang nagkarasambitu ta nungayna.
Ta yamu,
kung maita mi ra nganing ang pagkarainabu ra,
asan da ngaintindiay mi ang alëngët da yang uras ang makaliaw rang maglëkat.
30 Iugtulu tung numyu yang kamatuuran,
baklu magkarapatay yang kadaklan ang mga masigkanasyun ta simanyan,
kung nagkarainabu ra yang tanan ang atiang inulaw ta nungayna.
31 Matunaw yang kalangitan may yang katanëkan,
piru yang kumpurming nag̓ibitalaw indi ra ka ëngëd ang pisan matunaw,”
mag̓aning.
Anday Nag̓akdëk Kung Unu Pang Kaldaway Ang Ipaglëkat Ni Jesus, Kung Indi, Ultimu Ilëm Ti Ama (13:32-37)
32 Numanyan mag̓aning ti Jesus ang nagsugpat yang bitala na,
“Ug̓aring ilëm,
kung unu pang kaldaway ubin kung unu pang urasay yang ipaglëkatu,
anday nag̓akdëk,
maski yang mga angil duun tung langit,
maskin yuu pang pag̓aningën ang Ana Yang Dios,
kung indi,
ultimung nag̓akdëk ti Ama ilëm.
33 Purisu mangamanamu ig papabtikamung pirmi ay indi mi nag̓akdëkan kung sanu pa kumaw̓ut yang uras ang atia.
34 Yang kaalimbawaan na tia maning pa tung sasang taung magdistinu duun tung dumang lugar.
Baklu magliit tung balay na,
pamiaran na yang mga turuw̓ulun nang mamag̓ërëkëlën tung tanan ang prupidad na.
Sasa may sasa tung nira sinagpiaray na ta anya-anyang ubraën.
Pati yang purtiru,
linalangan na kang pirming magpaabtik tung ipaglëkat na.
35 Purisu papabtikamung pirmi,
ay indi mi nag̓akdëkan yang uras ang ipaglëkatu ang yuu manulad da tung may balay ang atia.
Ay indi mi makdëkan kung tung apun-apun,
u kung tung tënganan ta law̓ii,
u kung tung panuluk yang manu,
u kung tung pandiklat da yang sag̓iid.
36 Nusias kaw̓utanamu yëën ta inali ang yamu pagpaw̓aya-w̓aya tung ipiniaru tung numyu.
37 Yang nag̓ianingung naa tung numyung ëpat simanyan,
nag̓ianingu ka tung tanan ang mga tauanu ang yamung tanan pirmiamung papabtik tung ipaglëkatu,”
mag̓aning.