Yang nagsulat yang librung naa ti Lucas ang sasang duktur ig tumatalig tung ni Ginuung Jesu-Cristo atiing tukaw. Yang pinaëklan na yang librung isinulat na ya ra yang sasang kailala nang nag̓aranan tung ni Teopilo (1:1). Tung pag̓intindi yang mga sag̓ad tung kasulatan, ti Lucas bëlag̓an Judio yang nasyun na, kung indi, tag̓a dumang nasyun. Yang pag̓intindi nira tung ni Teopilo, sasang tag̓a Roma ang abwat ta pagkabëtang ig may kaya nang magpabuat ta mga kupia yang librung naa ug̓ud magkarabasa ra ta dakëlëng mga tau. Yay pinaëklan ni Lucas ay gustu nang mamarësmësan na ta mupia kung tinu pa ëngëd ti Jesus, kung unu pay ipinagtulduk na tung mga tau, kung unu pay nagkarabuat na, kung unu pay kapulutan yang pangingtau na, ig kung unu pay pinakaw̓ut yang pagpakugmatay na may yang pagkabui na si kang uman (24:45-47).

Kung tinu pay magbasa yang isinulat ni Lucas ang naa, asan da nga bilug̓ay na ang ti Jesus ya ra ka man yang Mananapnay ang pinangakuan yang Dios disti pa atii tung katëbtëw̓an. Mabilug̓an na ra ka ang yang inangay ni Jesus taa tung kaliw̓utan ang naa ay ug̓ud magsagyap da tung mga taung nagkaratalang da tung Dios ang para ya ray tapnayën nang ipaulik tung anya ang pinagpalawiran da rin nira (19:10).

Yang kapanawan ni Jesus ang atia, inimpisaan ni Lucas tung uras ang atiing indi pa nganing nag̓ipangana ang pagkatapus asan da tapusay na tung uras ang ipinagbalik na tung ni Ama na duun tung langit. Dispuis klaradung pisan tung isinulat na ang yang Matinlung Balita natëtëngëd tung ni Jesus para tung ikaayën yang tanan ang mga tau, maskin unu pang nasyunay, mag̓ing mga Judio kag bëlag, maskin unu pang pagkabëtangay nira maskin pag̓atëlëngan ang abwat, maskin nag̓alamkung aranëk ig makinasalananën pa.