Natëtëngëd Tung Pagkabui Si Kang Uman Ni Jesus Tung Yaklung Kaldaw (16:1-8)
16
Taa numanyan,
pagkalampas da yang kaldaw ang nag̓ipamaënay ang atiing Sabadu rang santëk da yang kaldaw,
ti Mariang naang tag̓a Magdala may ti Maria kang naang sam bilug ang nanay ni Santiago may ti Salome ya ray namangalang ta mga paamut.
Yang planu nira,
tung pangayag,
mamansiangay ra duun tung pinanlug̓uran tung ni Jesus ang para yang paamut ang atia,
ya ray ipandasëk nira tung aw̓ël ang atiang isinaw̓ëd-saw̓ëd tung tinanguni na.
2 Numanyan atiing pagkapangayag da ang timpranung pisan tung primirung kaldaw tung sëlëd yang sang linggu,
bilang kaldaw ta Linggua,
ya ra kay pag̓angay nira duun tung pinanlug̓uran.
Yang kaldaw baklu pa ka ilëm ang lumimpak tung sag̓iid.
3 Numanyan tung pagparanawën nira,
namagkërësën da kung tinu pa kaya ay maaraw̓a nirang magpalig̓id yang batung atiang itinakëp tung purta yang lëyang ang para mapaklëran nira.
4 Numanyan atiing naalëngët-lëngët da tanira,
bandawën nira,
naa pala yang batung atia napalig̓id dang napabinit ag̓ad durug dakul ang batu.
5 Purisu tung pagkaw̓ut nira duun,
dayun-dayun yang pagpaklëd nira tung pinanlug̓uran.
Pagkapaklëd nira,
may naita nirang sasang midyu kaw̓ataan ang yag kakarung ampir tung tuu nira ang may nag̓asuut nang aw̓ël ang langkuy ig nangaklag da ta duru.
6 Numanyan ya ray nagbugnu tung nirang mag̓aning,
“Ëëy,
indiamu ra mëlëd.
Nag̓askëanu ang yang nag̓asagyap mi taa ti Jesus ang atiang tag̓a Nazaret ang ilinansang tung krus.
Pinabungkaras da yang Dios,
anda ra taa.
Uay,
nani ra yang pinagpalw̓ug̓an tung anya.
7 Ta ala,
magpanawamu ra.
Panganingën mi yang mga taung pinangugyatan na ang tanya nagtukaw ra tung nira duun tung Galilea.
Duun da mamag̓irita tanira ang katulad ka tung inaning na tung nirang tan taa pa.
Ti Pedro ëngëd yay siguruën ming aningën,”
mag̓aning duun yang kaw̓ataan.
8 Purisu numanyan pagkagngël nira yang inaning yang kaw̓ataan,
diritsyu ra ka man ang namansilua tanira tung pinanlug̓uran ang namagralaksuan.
Pangëtab-këtaw̓an da ay natëtëngëd tung pagkabërëng nirang subrang alus indi ra kaw̓utun ta pag̓intindi nira.
Dispuis tung pagralaksuën nirang pamag̓impurta duun tung mga taung nag̓apangugyatan ni Jesus,
anda ray naaning nira tung duma may ruma,
ay natëtëngëd pinamangëlbaan da ta duru.
Natëtëngëd Tung Pagpailala Ni Jesus Tung Ni Mariang Tag̓a Magdala (16:9-11)
9 [Atiing nagbungkaras da ti Jesus,
ang timpranu pang pisan tung primirung kaldaw tung sëlëd sang linggu,
bilang kaldaw ta Linggu,
yang tingkawan nang pinagpaitaan,
ya ra ti Mariang naang tag̓a Magdala ang ya ray pinalayasan na ta pitu nga dimunyuan ang tukawb.
10 Pagkatapus tia,
ti Mariang naa diritsyu rang minangay duun tung dating mga ugpu ni Jesus.
Kaw̓utan na tanira,
pamagtarangitën ang pamag̓urulimëngmëngën.
Kapurisu dayun dang suminublang ang nagbaw̓alitaën tung nira.
11 Pagkagngël nira yang balita na ang ti Jesus bui ra unu ig sinakëp da unu ta mata na,
indi ra ilëm pinanangëd nira.
Natëtëngëd Tung Pagpailala Ni Jesus Tung Mga Tauan Nang Durua (16:12-13)
12 Numanyan tung pira pang kaldaw,
nagpaita ra ti Jesus tung mga tauan nang durua atiing pamagpanaw tanira duun tung lua yang siudad ang Jerusalem.
Ug̓aring tung pagpaita na tung nira,
indi pa rin nailala nira ay naglëw̓ad da yang pagkabëtang na.
13 Pagkailala nira ang ya ra ka man ti Jesus,
dayun dang nansibalik duun tung Jerusalem ang namagbaw̓alitaën tung mga kaarumanan nirang kadaklan.
Piru indi ra ka ëngëd pinanangëd nira.
Natëtëngëd Tung Panuw̓ul Ni Jesus Tung Mga Tauan Nang Mamagparakaw̓utun Yang Matinlung Balita Natëtëngëd Tung Anya (16:14-18)
14 Taa numanyan,
tung pangultimung pagpailala ni Jesus,
nagpaita tung mga tauan nang atiang sam puluk may sasa atiing pamagsararu ra tanirang tanan.
Binasul na tanira natëtëngëd tung pagdiskumpiar nira ang ayw̓at matëg̓as yang mga isip nirang indi namanangëd tung mga aruman nirang yay naita tung anyang pagkatapus ang pinabungkaras da yang Dios.
15 Pagkatapus dayun na rang sinugpatan yang bitala nang mag̓aning tung nira,
“Magliliw̓utunamung magparakaw̓utun yang Matinlung Balita natëtëngëd tung yëën tung tanan ang mga tau tung bilug ang kaliw̓utan.
16 Kumpurming tinu pay magsuku tung yëën ang magtalig yang sadili na ang yang pagtalig nang atia tung yëën ipananglit na yang nag̓adapatan nang magpabënyagc,
ya ray tapnayën yang Dios.
Piru kumpurming tinu pay indi ra magsuku tung yëën ang magtalig,
tung uri ta kaldaw yay sintinsiaan yang Dios tung kalainan ang asta tung sampa ang anda ëngëd ang pisan ay katapus-tapusan na.
17-18 Dispuis yang kumpurming nagtalig tung yëën,
paktëlënu ra ang para mapagpalapus ta mga pruibang makabëw̓ërëng ang mga maning taa.
Mapagpalayas tung mga dimunyu ëkël tung katëngdanan ang ipakdulu tung nirad.
Mapagbitala ka tung dumang mga bitalang indi pinag̓aralan nirae.
Kung alimbawa mapgës tung mga iraw ubin mainëm ta may lakët nang lasun,
indi ra maunu paf.
Kung dëënan nira yang may mga laru,
asan da ka magmaayëng,”
mag̓aning.
Natëtëngëd Tung Pagpaabwat Ni Jesus Tung Langit May Yang Pagparakaw̓utun Yang Mga Tauan Na (16:19-20)
19 Kapurisu numanyan,
pagkatapus ni Jesus ta pagbitala tung mga tauan na,
dayun dang ingkëlan yang Dios duun tung langit.
Duun da nagkarung tung ampir tung tuu na ang para kasiraan da tanirang mamaggaraëmën.
20 Taa numanyan,
yang mga tauan nang atiang nangabutwan,
ya ray namagliit duun tung Jerusalem ang namagparakaw̓utun tung maskin ay pang banwaay.
Tinaw̓angan ta mupia ni Ginuung Jesus tung pagparakaw̓utun nira ang yang bitalang nag̓ipagpakaw̓ut nira tung mga tau yay pinapruibaan na ang talagang matuud ang liit tung Dios ëkël tung mga pruibang mga maning tiang nag̓ipalua nira.]
Yang Sam Bilug Kang Isinulat Ta Duma Tung Dumang Uras Ang Ya Ka Isugpatay Na Tung Isinulat Ni Marcos
[Taa numanyan,
mansikaw̓ut yang mga baw̓ay ang atia tung na Pedro,
antimanung namagbaw̓alitaën da tung nira yang tanan ang itinuw̓ul yang kaw̓ataan tung nirah.
Numanyan tung pira pang kaldaw,
ti Jesus mismu ya ray nanuw̓ul tung mga tauan nang mamagliliw̓utun tung bilug ang kaliw̓utan ang para mamagparakaw̓utun tung mga tau yang sagradung bitala ang andang pisan ay kauman-umanan na kung ya pa ag̓aring tanira matapnay yang Dios ang asta tung sampa.]i