Ti Jesus Nag̓iintriga Ra Nira Tung Ni Gubirnadur Pilato Ang Para Pabistaan Tung Anya (15:1)
15
Taa numanyan atiing kaldaw ra,
yang mga paring arabubwat ta katëngdanan kasiraan da ka tanira yang mga pamagpakigmaëpët pati yang mga sag̓ad asta yang tanan ang mga upisialis yang mga Judio,
ya ray kali-kaling namag̓urunta-untaan.
Pagkatapus anday dumang binwat nira,
namagkalalangan da ang ti Jesus gapusun dang para guyurun duun tung ni Gubirnadur Pilato ug̓ud iintriga ra nira tung pudir nang pabistaan.
Yang Pagbista Ni Gubirnadur Pilato Tung Ni Jesus (15:2-5)
2 Pagkaw̓ut nira duun tung katalungaan ni Gubirnadur Pilato,
kumus ti Jesus pag̓abangdanan dang lag̓i nira ang tanya unu pag̓ambu ang yay Adi nirang mga Judio,
dayun dang binista yang Gubirnadur ang inaning,
“Ta,
unu pay idiklara mu?
Matuud ang yawa yang Adi yang mga Judio?”
Mag̓aning ka ti Jesus ang tuminuw̓al,
“Aa,
yawa ka nganing ay pag̓aning,”
mag̓aning.
Crucifixion and Resurrection of Jesus (Marcos 15:1–16:7)
3 Numanyan yang mga paring atiang arabubwat ta katëngdanan durung nag̓ibangdan nira tung ni Jesus.
4 Purisu numanyan dayun sing tinalimaan ni Gubirnadur Pilato ang,
“Ay tia,
india ra matuw̓al?
Durug dakël yang nag̓ibangdan nirang atia tung nuyu!”
5 Piru ti Jesus,
indi ra kang pisan nagliing-liing.
Purisu ya ra kay nabërëngan ni Gubirnadur Pilato ta duru.
Nag̓ipatug̓ay Ni Gubirnadur Pilato Ti Jesus Tung Kalëlyag̓an Yang Mga Tau (15:6-15)
6 Ug̓aring kada kaw̓utun yang pistang atia,
may sa nga prisuan ang pagpalpasan ni Gubirnadur Pilato,
ang kumpurming tinu pay ingalukun yang mga tau tung anya.
7 Naa pala tung uras ang atii,
may sasang taung nag̓aranan tung ni Barabbas ang nakalabus,
kasiraan da ka tanira yang mga masigkaribildi na.
Ay atiing pagbatuk nira tung gubirnu,
may mga taung pinangimatay nira.
8 Numanyan may mga taung buntun ang namansitakwal asan ang ya ray namag̓ingaluk tung ni Gubirnadur ang palpasan na yang sa nga prisuan ang pariu ka tung nag̓abuat nang takun-takun.
9 Mag̓aning ka ti Gubirnadur Pilatong nagtimalës,
“Yang Adi ming mga Judio,
yay gustu ming palpasanu?”
10 Napagtalimaan da yang Gubirnadur ta maning tii,
ay may gustu nang magpabalagbag tung pag̓asikad yang mga paring atiang arabubwat ta katëngdanan ay kipurki nadëëp na ra kang lag̓i ang anday dumang ipinag̓intriga nira tung ni Jesus tung pudir na,
kung indi,
yang kimun nirang subra tung anya.
11 Ug̓aring ilëm naang mga paring arabubwat ya ray namagpausbung tung kulu yang mga taung atiang buntun ang anday dumang ingalukun nira tung ni Gubirnadur ang palpasan,
kung indi,
ti Barabbas da.
12 Taa numanyan,
pagkaingaluk nira,
dayun sing tinalimaan ni Gubirnadur Pilatong inaning,
“Ay kung yay palpasanu tia,
ay ti Jesus ang naang pag̓aningën ming Adi ming mga Judio,
ya ra ilëm unyayu?”
13 Atii namangisëg dang namaglëlpakën yang mga taung atiang buntun ang mag̓aning,
“Ipalansang mu ra ilëm tia tung krus!”
14 Mag̓aning si ti Gubirnadur Pilatong nagtimalës,
“Ayw̓a?
Unu pang kasalananay ang binwat na?”
Atii,
mas pang dinulangan nira yang paglëlpakën nirang pamansianing,
“Ipalansang mu ra ilëm tia tung krus!”
ag̓aaning.
15 Numanyan naisip da ni Gubirnadur Pilato ang kung indi na ra pauyunan yang kalëlyag̓an yang mga taung atiang buntun,
muya yay maliwag̓an na.
Purisu anday dumang binwat na,
kung indi,
ti Barabbas ang atiang nag̓alëlyag̓an nira,
ya ray pinatuw̓ulan nang palpasan da.
Pagkatapus ti Jesus tanya ya ray pinaburdunana na baklu iintrigaay na tung mga sundalu ang para ilansang da nira tung krus.
Ti Jesus Nag̓atag̓aman Da Ta Intrimis Yang Mga Sundalu (15:16-20)
16 Taa numanyan,
dayun dang ingkëlan nirang ipinaklëd tung balay ang dakulu ang yay pag̓istaran yang Gubirnadur.
Pagkatapus ginuuyan da nira yang mga kaugpuan nirang mga sundalu.
17 Numanyan yang binwat nira tung anya,
pagkaluas nira yang aw̓ël na,
pinaablan si nira ta aw̓ël ang lagwas ang tapël yang kulay na ang midyu tung suruutun ta mga adi.
Pagkatapus namangkël da ta mga balag̓ën ang kalarangan ang ya ray binwat nirang binakurung ang sinuklub tung kulu ni Jesus,
bilang kuruna ta Adi.
18 Dayun dang pinagtag̓aman nira ta saludu-saludung intrimis ang inaning,
“Basi pa ra ilëm ang malawig ka yang kabui mung Adiya yang mga Judio,”
ag̓aaning.
19 Pagkatapus dayun da nirang linampësan tung kulu na ta maninga bastun-bastun ang nunut da ka ta paglaway nira tung tinanguni na.
Pagkatapus tia,
dayun da nirang pinagluud-luuran tung katalungaan na ang purus ilëm tung intrimis yang paggaralangën nira tung anya.
20 Numanyan,
pagkatapus yang pag̓irintrimisën nirang maning tia tung anya,
dayun da nirang linuas yang aw̓ël ang atiang tapël ang pagkatapus yang dating aw̓ël na,
ya si ay ipinasuut nira tung anya.
Pagkatapus tia,
dayun da nirang ginuyuran ang para ilansang da nira tung krus.
Yang Paglansang Nira Tung Ni Jesus Tung Krus (15:21-32)
21 Taa numanyan,
tung paglua nira tung siudad,
may sasang taung napanawan nirang duun liit tung lua yang siudad ang ya rag papaklëd.
Ya ray pinagrëg̓ës nirang pinapagsakan yang kaw̓ala yang krus ang pag̓asakan ni Jesus.
Yang taung atia,
nag̓aranan tung ni Simon ang tag̓a Cirene ang yay tatay ni Alejandro durua ni Rufob.
22 Numanyan ginuyuran da nira ti Jesus duun tung sasang lugar ang naggug̓uuyan tung Golgota ang yang linëgdangan yang aran na ay kulu ta taung patayc.
23 Numanyan tinag̓aman da nirang paigmën ta binung linaktan ta pag̓aningën nirang mira ang yay pandisimular tung siit,
piru pinangindian nad.
24 Pagkatapus dayun da nirang linuasan yang mga aw̓ël na ang pagkatapus ilinansang da nira tung krus.
Pagkalansang nira,
dayun dang namagburunutan ang para maintindian da kung unu pang pidasuay ta mga aw̓ël ni Jesus yang maëklan nira sasa may sasa.
25 Yang uras ang ipinaglansang nira tung anya mga alas nuibing timpranu.
26 Dispuis may karatula ang sinulatan kung unu pay nag̓ipagbangdan tung anya.
Yang isinulat asan ya taa:
“Yang Adi yang mga Judio.”
27-28 Dispuis may durua ka nga ribildian ang iginapil yang mga sundalung ipinanlansang ka tung durua nga krusan ang ipinakdëng tung binit ni Jesus ang nagtimbange.
29-30 Numanyan may mga taung pamagtaraklib-takliw̓an asan ang ya ray pamagkëyëng-këyëng ang pamagtag̓am ta insultu tung ni Jesus ang mag̓aning,
“Ta,
yawang manggëw̓a yang pagtuuan tang pinakalusu ang pagkatapus pakdëngan mu si ka ta baklu tung sëlëd ilëm tulung kaldaw,
abir,
ilibri mu ra yang sadili mung maglampud asan tung krusf!”
31 Asta yang mga paring atiang arabubwat ta katëngdanan may yang mga sag̓ad,
ya ka,
namagtag̓am da ka ta insultu tung anyang namag̓araning-aningan dang mag̓aning,
“Yang duma ipinampalibri na,
piru yang sadili na indi na ra pala masarangan ang ilibri.
32 Atiay pag̓aningën ang Cristo ang yay Adi yang nasyun tang Israel?
Kaministiran numaan ang lag̓i yag dawalay tang maglampud tung krus ug̓ud asanita ra manangëd tung anya,”
mag̓aning.
Pati yang mga ribilding atiang durua ang ipinagngan tung anyang ipinanlansang tung mga krus,
namagtag̓am da ka ta insultu tung anya.
Natëtëngëd Tung Pagpakugmatay Ni Jesus (15:33-41)
33 Taa numanyan atiing kërëng da yang kaldaw,
nangiklëp da yang intirung banwang atii.
Baklu ngaulikay yang sadlaw na ang mga pag̓alas tris da yang apun.
34 Tung uras ang atii,
ti Jesus napagkëndal da ta tudu ang mag̓aning tung bitala yamën ang Hinebreo,
“Eloi,
Eloi,
lëma sabaktani!”
ang yang gustu nang ianing,
“Ay Diosu,
Diosu,
ayw̓a pinaw̓ayaanaw ra ka ilëm nuyu tani tung kalainang?”
35 Numanyan yang dumang këmdëngan asan,
pagkagngël nira yang inaning nang atia,
ya ra ag̓aningay nira,
“Uay,
ti Ëliash pala ya ray nag̓apangambayan na!”
36 Atii may sa nga tauan ang lag̓i-lag̓ing naglaksung nangkël ta ipinalëblëb na tung binung nangaklëm da ang asta tagmak da ta binu.
Pagkatagmak da,
dayun na rang isinakbët tung tumbung yang maninga tigbaw ang yay itinuluy na tung nganga ni Jesus ay tag̓aman na ra rin ang panutnutun.
Pagtuluy na,
ya kay pag̓aning na tung mga kaarumanan nang mag̓aning,
“Abir,
kung angayën pa ni Elias ang tangtangën tung krus,”
mag̓aning.
37 Atii nagkëndal si ta maknul ti Jesus ang ya ra kay pagkabuntuk yang linawa na.
38 Tung pagkabuntuk yang linawa na,
yang kurtinang nag̓ipagsalag̓a tung kuartung pinakasagradu duun tung pagtuuan ang pinakalusu,
ya ra nga bakbak tung kasubngan na,
manliit tung abwat,
utas da ang asta tung sidsirën na.
39 Numanyan duun tung pinakdëngan yang mga krus,
yang kapitan yang mga sundalung atiang piniaran ni Gubirnadur Pilato,
duun agtatalunga tung ni Jesus.
Pagkaita na yang pag̓apatay ni Jesus ang nunut da ta këndal,
dayun dang nabnga ang mag̓aning,
“Yang taung naa talagang Ana Yang Diosi!”
mag̓aning.
40 Dispuis duun tung tukaw-tukaw may mga baw̓ay ang pamagpaniid tung tanan ang pagkarainabu.
Duun ka tung nira ti Mariang tag̓a Magdala may ti Maria kang sam bilug ang yay nanay ni Santiagong atiang gësyë durua ni Jose.
Pati ti Salome duun kaj.
41 Yang mga baw̓ay ang atiang tulu,
atiing pagliliw̓utun pa ti Jesus duun tung Galilea,
ya ray namagpakigduman tung anyang namag̓asikasu tung mga kaministiran na.
Duru kang mga baw̓ay ang duma duun ang ya kay namagpakigluyug tung ni Jesus atiing pagdistinu na duun tung Jerusalem.
Nag̓ipalg̓ud Da Yang Tinanguni Ni Jesus Tung Lëyang (15:42-47)
42-43 Taa numanyan,
atiing apun da yang kaliw̓utan,
kinaw̓ut da yang uras ang dapat ipagtapus yang mga tau tung tanan ang mga pag̓urubraën nira ang para simpan da tanira tung pagkaw̓ut yang uras ang ipamaënay nira ang ya ray mag̓impisa tung pagkasantëk yang kaldaw.
Purisu may sasang tau ang tung makali nag̓ulag dang minangay duun tung ni Gubirnadur Pilato.
Yang taung atia nag̓aranan tung ni Jose ig tag̓a Arimatea.
Duru kang lag̓ing pagpakbat na tung uras ang ipagpalapus yang Dios yang paggaraëmën nang magbawi tung nasyun nira.
Maskin sasang pagpakigmaëpët ang pag̓agalang ka pa man ta mupia yang mga kaarumanan nang mga pamagpakigmaëpët tung banwa,
pinaisëg na ra ka ëngëd yang isip na ang asta nagpalangaas da ilëm ang nag̓ingaluk tung ni Gubirnadur kung maimung itug̓ut na tung anya yang tinanguni ni Jesus ang para kaldaw pa mapalg̓ud dang lag̓i duun tung lëyangk.
44 Numanyan pagkagngël ni Gubirnadur Pilato yang iningaluk ni Jose,
nabërëng da ta mupia ang ayw̓at kakaling napatay ti Jesus.
Purisu dayun na rang pinaguuyan yang kapitan ang atiing piniaran nang magpalansang tung ni Jesus ang pagkatapus tinalimaan na kung patay ra ka man ang matuud.
45 Numanyan pagkasiguru na ra tung kapitan ang patay ra ka man,
dayun dang nagkalalangan ang itug̓ut da tung ni Jose yang tinanguni ni Jesus.
46 Numanyan pagkatug̓ut tung anya,
dayun dang nangalang ta aw̓ël ang kulit ang pira pang yarda ang matitinlu kang klasi.
Pagkatapus dayun na ra kang inangayan ti Jesus ang ipinatangtang tung krus.
Dayun na rang pinasaw̓ëd-saw̓ëran yang aw̓ël ang atia ang pagkatapus itinuw̓ul na rang ipalg̓ud da duun tung sasang lëyang ang ibinangbang tung batung padir.
Numanyan pagkapalg̓ud da tung lëyang,
dayun na rang itinuw̓ul ang paligdan da yang purta na ta batung dakulu ang pinasag̓ing binilug ang ya ray itinakëp.
47 Simanyan ti Mariang naang tag̓a Magdala may ti Mariang naang sam bilug ang yay nanay ni Jose pamagpaniid ka ang ay pa ipalg̓uray nira ti Jesus.