Yang Mga Pari Pamagplanu Ra Kung Ya Pa Ag̓aring Mapadëëp Nira Ti Jesus (14:1-2)
14
Taa numanyan,
magpanaw pa ta duruang kaldaw baklu kaw̓utay yang uras ang ipag̓iapun nira yang pag̓aningën ang Taklib ang yay pag̓impisada yang pistang pag̓aningën ang Nag̓ipamangan Ta Tinapay Ang Indi Pinaliskag.
Yang mga paring atiang arabubwat ta katëngdanan may yang mga sag̓ad tung mga katuw̓ulan pamagdilëm da ta matinlung idya ang para mapadëëp nira ti Jesus ang anday durung taung makdëk ang pagkatapus ipaimatay ra nira dayun.
2 Mag̓aning tanirang pamagkërësën,
“Indi ta ilëm ituun tung pista.
Muya magkagulu yang mga tau,”
ag̓aaning.
Ti Jesus Nag̓abukbukan Yang Sasang Baw̓ay Ta Paamut (14:3-9)
3 Taa numanyan,
ti Jesus tanya duun tung Betania tung balay ni Simon ang yang tukaw may dispirinsia na pa rin tung ulit nang makamamansa.
Atiing pagpakigsarua ra ti Jesus,
may sasang baw̓ay ang nagpaklëd ang may ëkël nang midyu tung prasku ang yay punuk ta paamut ang pag̓aningën ang nardus ang durug kamaal ig pag̓as.
Numanyan pagpungak na yang parabtangan ang atia,
dayun na rang ibinukbuk yang paamut tung kulu ni Jesus.
4 Numanyan yang mga kasadu ni Jesus ang duma namagpakulain da ang namag̓araning-aningan dang mag̓aning,
“Ayw̓at ginasta na ra ilëm yang paamut ta maning tia?
5 Abaa,
kung ya pa rin ipaalangay na tia,
naita pa rin ta mga tulung gatus ang nigal ang salapib.
Napamakdul-pakdul pa rin tung mga maliliwag̓ën.”
6 Numanyan ti Jesus ya ray nagbitala ang mag̓aning,
“Paw̓ayaan mi ra ilëm asan.
Ayw̓at nag̓apaliwag̓an mi?
Durug tinlu yang binwat nang naa tung yëën.
7 Ay kung natëtëngëd tung mga maliliwag̓ën ang atiang nag̓aisip mi,
maskin unu pang urasay,
mataw̓angan mi,
ay taang pirmi.
Piru ta yëën,
bëlag̓an ang mag̓aning ang maskin sanu pang urasay ang taanaw ang pirmi tung numyu.
8 Binwatanaw rang lag̓i anya ta nasarangan na.
Ay tung pagbukbuk na yang paamut ang naa tung yëën,
yang kaalimbawaanu maning pa tung patayaw rang lag̓i ang pagkatapus sinimpananaw rang lag̓i anyang pinaamutan ang para ilg̓uraw ra tung lëyang.
9 Iugtulu tung numyu yang kamatuuran,
tung maskin ay pang banwaay tung bilug ang kaliw̓utan ipagpakaw̓ut yang Matinlung Balita natëtëngëd tung yëën,
yang binwatan yang baw̓ay ang naa tung yëën mabalita ka tung mga tau ug̓ud ya ray madëmdëman nira tung anya,”
mag̓aning.
Pagprisintar Ti Judas Tung Mga Pari Ang Tanya Ray Magpadëëp Tung Ni Jesus (14:10-11)
10 Taa numanyan,
ti Judas ang Iscariote ang yay sam bilug tung sam puluk may durua nga tauan ni Jesus,
anday dumang binwat na,
nag̓angay ra duun tung mga paring atiang arabubwat ta katëngdanan ay gustu na ang ti Jesus iintriga na tung pudir nira.
11 Pagkagngël nira yang gustu na,
namagkalipay ra ta duru.
Dayun dang namagpangaku tung anya ang pakdulan nira ta kuarta.
Purisu numanyan ti Judas ang naa,
dayun dang nag̓impisang nagbantay ta këtat ang para may lugar nang magpadëëp tung ni Jesus.
Pagpasimpan Ti Jesus Tung Pagsilibra Nira Tung Pistang Pag̓aningën Ang Taklib (14:12-21)
12 Taa numanyan,
kuminaw̓ut da yang primirung sug̓ud yang Pistang Nag̓ipagpangan Ta Tinapay Ang Indi Pinaliskag.
Ya ra kay kaldaw ang nag̓ipagdasag nira tung mga karnirung ipagsëra nirang mamagsilibra tung Pistang Taklib.
Tung kaldaw ang atii,
namagpalëngët da tung ni Jesus yang mga taung atiang nag̓apangugyatan nang namagtalimaan tung anyang mag̓aning,
“Ariami pa w̓asung balayay magsimpan yang iapun tang para silibraën ta yang pistang naang Taklib?”
mag̓aning.
The Last Supper (Marcos 14:12-26)
13 Numanyan dayun dang nanuw̓ul ti Jesus tung mga aruman nirang durua nga tauan ang mag̓aning,
“Mag̓angayamu ra kanay duun tung siudad.
May sasang laliing mabag̓as ming pagsakan ta tiw̓ud ang punuk ta waic.
14 Ya ray nuntun mi.
Kung ay pang balayay nga paklëd,
yamu ra ag̓aaning tung taung may balay,
‘Yami,
minangayami ra ilëm taa,
ay yang tuyun ni Ginuu tang pagturuldukanën tung yatën,
itulduk mu unu tung yamën yang kuartung pagyapunan nang magsilibra tung pistang naang Taklib,
kasiraanami ra ka unung nag̓apangugyatan na.’
15 Atia,
itulduk na tung numyu yang kuartung dakulu duun tung yadwang gradu yang balay na ang simpan da ka yang tanan ang garamitën ang tutal kaministiran ta.
Duunamu ra magsimpan yang iapun ta,”
mag̓aning.
16 Numanyan dayun da ka man ang nagliit yang duruang atiang nansiangay duun tung siudad.
Pagkaw̓ut nira duun,
yang tanan ang atiang sinambit ni Jesus tung nira,
ya ra kang pisan ay kinaw̓utan nira.
Purisu dayun da ka man ang namagsimpan tanira yang iapun nirang mamagsilibra tung Pistang Taklib.
17 Pagkatapus ta pagsimpan nira,
dayun dang namagbalik tung ni Jesus.
Numanyan atiing panlikarëm da yang kaliw̓utan,
minangay ra ti Jesus duun tung balay ang atii,
kasiraan da ka tanira yang mga taung nag̓apangugyatan nang sam puluk may durua.
18 Atiing pagsararuan da tanira,
nagbitala ra ti Jesus tung nirang mag̓aning,
“Iugtulu tung numyu,
may sam bilug tung numyung pagpakigsadu tung yëën ang maning pa tung sasang matinlung ungkuyu ang ya pay magtraidur tung yëënd,”
mag̓aning.
19 Numanyan yang mga aruman na,
pinamungaw ang nangagngël.
Purisu masigtalimaan tanira tung anyang mag̓aning,
“Bëlag̓an ka siguru yuu,
anu?”
20 Mag̓aning ka ti Jesus ang minlës,
“Anday dumang magtraidur tung yëën,
kung indi,
ya ra yang sam bilug tung numyung sam puluk may durua ang pagpakidëngan ka pa man tung yëën ang pagtëkmë tung sëra.
21 Kung tung bag̓ay,
yuung pag̓aningën ang Maninga Tau,
imatayënaw ka man ang katulad ka tung naula natëtëngëd tung yëën ang napabtang ka tung kasulatan.
Piru yang taung magtraidur tung yëën,
ya ray nag̓apanganugunanu ta mupia.
Ay kipurki durug lëbat yang talungaën na tung uri.
Mas maayën pa rin ang indi ra ilëm ipinangana,”
mag̓aning.
May Sasang Nag̓atukud Ni Jesus Ang Para Yay Ipausuy Na Tung Mga Tauan Nang Mamagdëmdëm Tung Anyang Nagpakugmatay (14:22-26)
22 Taa numanyan,
atiing sigi-sigi ra yang pagsararuan nira,
ti Jesus namisik da ta tinapay ang ya ray pinasalamatan na tung Dios.
Pagkatapus,
dayun na rang pinagpingas-pingas ang ipinarawat tung mga tauan nang mag̓aning,
“Ia,
ya ra taang tinanguniu,”
mag̓aning.
23 Pagkatapus dayun dang namisik ta sam basung binu ang ya si kay pinasalamatan na tung Dios ang pagkatapus dayun na rang ipinarawat tung nira.
Numanyan ya ray pinagbërëlës-bëlësan nirang tanan ang ininëm.
24 Ag̓aaning ti Jesus ang nagpasanag,
“Atia ya ra ka taang dug̓uung ipaturuku ang para ya ray magpabakëd tung sasang pagpakigpaig̓u nang pinangakuan na ug̓ud asan da nga tapnayay na yang dakëlëng mga tau.
25 Iugtulu tung numyu,
ultimu ra ilëm taa yang panginëmu ta binung maning taang nag̓ipagsilibra ta tung pistang naa.
Piru kung kaw̓utun da nganing yang uras ang ipagpabistu ra ëngëd ang pisan yang Dios yang paggaraëmën na,
magpakasadyaw ra tung tanan ang kaayënan na ang yay maning pa tung sasang igmënu sing baklu,”
mag̓aning.
26 Pagkatapus ta pag̓iriapunan nirang atia,
dayun dang namagkantang namagdayaw tung Dios.
Pagkatapus nira ta pagkanta,
dayun dang namaglampud ang namagpanaw ampir duun tung bukid ang atiang durung mga ayung pag̓aningën ang olibo.
Nag̓aula Ni Jesus Ang Yang Mga Tauan Na Mamamalpas Da Tung Anya, Maskin Pa Ti Pedro, Ya Ka (14:27-31)
27 Numanyan atiing pamagpanaw ra tanira,
napagbitala ra ti Jesus tung nirang mag̓aning,
“Yamung tanan,
maplëkanamu ra ta ipagtalig mi tung yëën,
ay mamatuuranita ra yang sasang ipinananglit yang Dios ang tukaw ang napabtang tung kasulatan ang mag̓aning,
‘Ilug̓utu ra yang manigpastur ang imatayën da ang pagkatapus magkarawasak da ka ilëm yang mga karniru na,’
mag̓aninge.
28 Piru maskin pang maning tii ay mainabu,
kung pabungkarasënaw ra nganing yang Dios,
magtukawaw ra tung numyu duun tung Galilea.”
29 Mag̓aning ti Pedrong nabnga,
“Maskin yang kadaklan maplëkan da ta ipagtalig nira tung nuyu,
piru ta yëën,
indiaw ka ëngëd maplëkan!”
30 Mag̓aning ka ti Jesus ang minlës,
“Aa Pedro,
iugtulu tung nuyu,
numaan ang law̓iing naa,
baklu ra manuluk yang manu ta madua,
maklua rang mag̓ingwara tung yëën.”
31 Atii,
nagpatirëg̓ës ti Pedrong nagtuw̓al,
“Maskin ipaunungaw pa tung nuyung imatayën,
talagang indiaw ra ka ëngëd mag̓ingwara tung nuyu,”
mag̓aning.
Asta yang kadaklan ang mga tauan ni Jesus,
maning ka tia yang nagkaraaning nira.
Yang Nag̓ipag̓ampu Ni Jesus Natëtëngëd Tung Pinitinsiang Atiang Nag̓atalunga Na (14:32-42)
32 Taa numanyan,
atiing pagkaw̓ut nira yang mga taung nag̓apangugyatan na duun tung lugar ang paggug̓uuyan tung Getsemane,
napagbitala ra ti Jesus tung nirang mag̓aning,
“Taanamu ra ilëm kanay ngarung.
Ay mag̓ampuaw pa,”
mag̓aning.
Jesus is Arrested and Tried (Marcos 14:32-72)
33 Numanyan yang ingkëlan nang pinanunut,
ya ra na Pedro na Santiago may ti Juan.
Numanyan ti Jesus pagkëlbaan da ta duru ig nag̓aliwag̓an da ta mupia ta pag̓isip.
34 Mag̓aning tung mga aruman na,
“Ag̓ampayanaw ra ta kapungawung duru.
Arus pa ilëm muntuk yang linawaw.
Taanamu ra ilëm kanay mag̓ëlat ang magpakipulaw,”
mag̓aning.
35 Numanyan nagpatukaw-tukaw ra ti Jesus ta gësyë,
ya rag papadagpa agpapadagpa tung tanëk ang nag̓arampuën ang kung maimu ilëm,
ipaluas da tanya yang Dios tung uras ang atiang lain ang nag̓atalungaan na.
36 Mag̓aning yang pag̓arampuën na,
“Aay Amaw,
sarangan mu yang tanan.
Ipataklib mu ra ilëm tung yëën yang lain ang naang nag̓atalungaw.
Piru maskin pang nag̓apagbitalaw ta maning tii,
bëlag̓an yang yëën ang kalëlyag̓an ay matuman,
kung indi,
yang nuyu,”
ag̓aaning.
37 Numanyan pagbalik na tung mga aruman nang tulu,
kaw̓utan na,
naa pala mga ëlëk da.
Purisu dayun na rang inaning ti Simon Pedro ang,
“Abaa,
ba tia,
Simon,
ëlëk mu rang ëlëk!
Maskin sang uras da ilëm,
india ka ëngëd nasarang ang nagpakipulaw?
38 Magpulawamu ra ta ustung mag̓ampu ug̓ud indiamu madëëg̓an ta tuksu.
Tung bag̓ay,
nag̓askëanu ka ang durung kalëlyag ming mag̓usuy tung kalëlyag̓an yang Dios.
Piru nusias ilëm dërëëg̓ënamu pa yang kaluluw̓ayën mi,”
mag̓aning.
39 Utru si,
nagpaalawid-lawid si ti Jesus ang nag̓arampuën sing uman ang pariu ka tung ipinag̓ampu na ta nungayna.
40 Pagkatapus pagbalik na si tung mga aruman nang atia,
kaw̓utan na,
mga ëlëk si ka ëngëd,
ay dërëëg̓ën da yang puyat nirang duru.
Pagkapuaw na tung nira,
nanganganga ra ilëm ang nangatëlëng tung anya.
41 Numanyan tung yaklung balik na tung nira,
dayun na rang inaning,
“Ba tia,
ëlëk mi rang ëlëk!
Ustu ra tiang pamaënay mi!
Kinaw̓ut da yang uras ang yuung pag̓aningën ang Maninga Tau,
iintrigaw ra tung pudir yang mga taung malalain.
42 Ala,
magbungkarasamu ra ay magpanawita ra.
Uay,
naa ra yang pagtraidur tung yëën,”
mag̓aning.
Yang Pagpadëëp Ni Judas Tung Ni Jesus (14:43-52)
43 Numanyan,
atiing indi pa nganing nag̓atapus ta pagbitala ti Jesus,
asan da ka man nakaw̓ut ti Judas ang sasa ka pa man tung nirang sam puluk may durua ang nag̓apangugyatan na.
Sam paluyug̓an da tanira yang mga taung buntun ang pamag̓ëkël-ëkël ta mga gëëd may mga palu.
Ay pinanuw̓ul da yang mga paring arabubwat ta katëngdanan,
kasiraan da ka tanira yang mga sag̓ad may yang mga pamagpakigmaëpët tung banwa.
44 Atii pala,
yang pagtraidur ang naa,
may sinyas ang ipinaskë na rang lag̓i tung mga kaarumanan na ang mag̓aning,
“Kung kumaw̓utita ra nganing duun,
yang taung ara-araanu,
mag̓aningamu ya ra tia.
Dëëpën mi rang lag̓ing ëklan duun tung namanuw̓ul tung numyu.
Bantayan mi ta mupia!”
ag̓aaning.
45 Purisu tung pagkaw̓ut ni Judas duun,
diritsyu rang nagpalëngët tung ni Jesus ang nagbugnu tung anyang mag̓aning,
“Mupiang law̓ii asan,
Rabbi!”
ag̓aaning.
Pagkatapus dayun na ra ka man ang inara-araan.
46 Pagkaara-ara na,
diritsyung lag̓ing pinggësan yang mga kaarumanan ni Judas ang dinëëp.
47 Atii may sam bilug ang yag këkdëng asan ang ya ray napanlaw̓ut yang gëëd nang napanibat tung turuw̓ulun yang paring pinakalandaw ang pagkatapus yang talinga na ya ray nalampung.
48 Numanyan ti Jesus dayun dang nagbugnu tung mga taung atia ang mag̓aning,
“Ayw̓a,
yuu sasang ribildi ang yuu rag sulungay mi ta mga gëëd may mga palu ang para madëëpaw numyu?
49 Kaldaw-kaldaw pagturuldukanënaw duun tung palayas yang pagtuuan ang pinakalusu ang pagkasira-siraanita ra ka.
Ang pagkatapus indiaw pa ka ëngëd dinëëp mi.
Piru nag̓askëanu ang nagkamaninganaw ra ta maning taa ug̓ud magkamatuud da yang napabtang tung kasulatan natëtëngëd tung yëën,”
mag̓aning.
50 Numanyan tanirang tanan ang mga taung atiang nag̓apangugyatan ni Jesus,
ya ra ka ilëm mamamutwan tung anyang namaglalaksuan da.
51 Duun may sasang kaw̓ataan ang pagpakignunut ka tung ni Jesus.
Yang sulaminting pag̓asuut na ya ra ilëm yang kuklun ang inambën na.
Yang taung atia ya ra ka rin ay tinag̓aman nirang dinëëp.
52 Piru ya ra nga puklut ang napalaksu ta luas ang yang aw̓ël ang inambën na ra rin,
ya ra butwanay na tung kalima nira.
Magbistaën Da Ti Jesus (14:53-65)
53 Taa numanyan dayun dang ginuyuran nira ti Jesus duun tung balay yang paring pinakalandaw.
Ay duun kang lag̓i pamagsaragpun yang tanan ang mga paring arabubwat ta katëngdanan kasiraan da ka yang mga pamagpakigmaëpët may yang mga sag̓ad.
54 Numanyan ti Pedro tanya,
ya ra ilëm manikad tung ni Jesus,
piru atii ra tung kauri-urian da ilëm ang pisan.
Numanyan pagkaw̓ut na duun tung balay ang atia,
dayun dang nagpaklëd tung plasa-plasa na ang nagpakigkarung da tung mga guardiang pamamarang tung apuy.
55 Numanyan duun tung kaklëran,
yang mga paring arabubwat ta katëngdanan may yang kadaklan ang mga kaarumanan nirang pamagpakigmaëpët ka,
ya ray pamagdilëm ta mga taung magpëtël ta malain tung ni Jesus ang para ya ray padatëlan nirang mamagsintinsia tung anya ang dapat ang ipaimatay.
Piru anday pruibang bastanting naita nira.
56 Tung bag̓ay,
dakëlëng sistigus ang namagpëtël ta kasalanan tung ni Jesus.
Dipirinsia ilëm,
indi magturunu yang bitala nira.
57-58 Numanyan may duma asan ang nansikdëng dang namagsistigus ta kabuklian ang kuntra tung ni Jesus ang mag̓aning,
“Yang taung atia nagngël da yamën ang pag̓aning ang tanya unu ay manggëw̓a tung pagtuuan tang pinakalusung binwat ka ilëm unu ta mga tau ang pagkatapus tung sëlëd ilëm tulung kaldaw,
pakdëngan na si unu ta baklu ang bëlag̓an unu pastikular ang ubra ta tau,”
ag̓aaningf.
59 Piru maskin pang maning tii yang nag̓ibangdan nira tung anya,
indi ka ëngëd nagturunu yang bitala nira.
60 Numanyan dayun dang kumindëng yang paring pinakalandaw tung katalungaan nirang tanan ang nagtalimaan tung ni Jesus ang mag̓aning,
“Ta,
anday matuw̓al mu tung nag̓ibangdan nirang atia tung nuyu?”
61 Piru ti Jesus indi nagliing-liing.
Purisu dayun sing tinalimaan yang pari,
“Unu pa?
Matuud ang yawa yang pag̓aningën ang Cristo,
bilang yang Ana yang Dios ang pag̓aningën?”
62 Mag̓aning ka ti Jesus ang minlës,
“Ëë,
yuu ka man tia.
Ig tung dumang uras,
yuung pag̓aningën ang Maninga Tau,
maitaaw ra numyung tanan ang yuug kakarung tung tëpad yang Dios ampir tung tuu na ang pagkatapus kung maglëkataw ra nganing taa,
maitaaw ra ka numyung yuug sasaay tung panganud ang liit tung langitg.”
63 Pagkagngël yang paring pinakalandaw tia,
anday dumang binwat na,
ya ra bakbakay na yang aw̓ël nang pag̓asuut na ay nasilag da ta duru tung itinuw̓al ni Jesus ang atia.
Mag̓aning tung mga kaarumanan na,
“Ta,
ministir pang magdilëmita pa ta sistigus?
64 Nagngël mi ra kang pagtiwakaw tung pagkadios yang Dios.
Ya pa ag̓ari yang disisiun mi tung taung naa?”
Numanyan tanirang tanan namagsintinsia ra tung anya ang bag̓ay ang pisan tung anyang ipaimatay ra ilëm.
65 Numanyan pagkasintinsia nira tung anya ta maning tia,
dayun dang linawayan yang duma.
Dayun da nirang pinëdëngan ang pagkatapus pinagtaraw̓angan da ka nira ta suntuk.
Kada suntukun nira,
aningën pa nirang,
“Ta,
atiing bantug da ang yawa unu yang pag̓aningën ang Cristo,
abir,
pintuën mu kanay kung tinu pa atiang nagtigbak tung nuyu!”
Pati yang mga guardia asan,
pinagtaraw̓angan da ka nira ta dapal.
Yang Pag̓ingwara Ni Pedro Tung Ni Jesus (14:66-72)
66 Balikan ta ra kanay ti Pedro duun tung aranëk tung plasa-plasa yang balay.
Numanyan may sasang baw̓ay ang turuw̓ulun yang paring atiang pinakalandaw ang ya ray nagpalëngët tung anya.
67 Pagkaita nang pamarang tung apuy,
dayun na rang pinatëëk-tëëkan ta mupia ang inilala ang pagkatapus dayun na ra kang binugnung inaning,
“Ëëy,
midyu yaway sasang aruman ni Jesus ang nakaang tag̓a Nazaret!”
68 Pagkagngël ni Pedro tia,
dayun dang nag̓ingwara ang mag̓aning,
“Indi ilëm nag̓aintindianu kung unu pay gustu mung ianing,”
mag̓aning.
Pagkatapus dayun dang nagpauman ang nagpaampir duun tung may purtang pagluluaan tung karsada.
Atii may manung nanuluk da.
69 Pagkaita si yang turuw̓ulun ang atia tung anya,
dayun dang nag̓ugtulun tung mga taung këmdëngan asan ang mag̓aning,
“Yang taung atia talagang sasang aruman na.”
70 Atii,
nag̓ingwara si ti Pedro.
Buay-w̓uay si ta gësyë,
binugnu si yang mga taung atiang këmdëngan asan ang inaning,
“Ëëy,
kamatuuran ka man ang yaway aruman na ay kipurki yawa sasang Galileanena ka!”
71 Atii,
dayun dang nanumpang mag̓aning,
“Sistigus tung pagkamatuud yang Dios ang yang taung nakaang nag̓aaning mi talagang indi nag̓ailalaw.
Parusaanaw pa yang Dios kung bëlag̓an matuud yang nag̓ianingung atia!”
72 Pagkaaning na tia,
nanuluk si yang manu,
bilang madua rang manuluk.
Baklu nga dëmdëmay na yang inaning ni Jesus tung anya ta nungayna ang mag̓aning,
“Baklu manuluk yang manu,
Pedro,
maklua rang mag̓ingwara tung yëën ang yuu pala indiaw nag̓ailala mu.”
Numanyan pagkadëmdëm na tii,
nag̓intra ra tarangitën ang duru ra kang pagsurug̓atën nah.