Ti Jesus Nag̓abukbukan Ni Maria Ta Paamut, Bilang Agsimpanan Na Rang Lag̓ing Ipalg̓ud Tung Lëyang (12:1-8)
12
Kapurisu numanyan,
atiing ënëm da ilëm ang kaldaw baklug kaw̓utay yang pistang atiang pag̓aningën ang Taklib,
ti Jesus tanya,
nagbalik si duun tung Betania ang yay baw̓anwaan ni Lazarong atiang binwi na si kang uman.
2 Numanyan sinimpanan da yang mga tag̓a duun ta iapun.
Ti Marta yay nag̓arasikasuën,
piru ti Lazaro tanya,
sasa tung nirang namagpakigsadu tung ni Jesus.
Mary anoints Jesus (Juan 12:1-11)
3 Numanyan ti Maria,
nangkël da ta sasang paamut ang pag̓aningën ang nardus ang yay durug kamaal ig pag̓as ka pa man.
Ya ray ibinukbuk nang luw̓us tung kakaya ni Jesus.
Yang kadakël na tënga tung sang litro.
Pagkatapus tinarapuan na yang bua na.
Yang banglu na nag̓ulimpëg da tung intirung balay.
4-5 Simanyan ti Judas ang sasang aruman yamën ang nag̓apangugyatan ni Jesus ang ya ray magtraidur tung anya tung uri,
ya ray nagbitalang mag̓aning,
“Abaa,
ayw̓a indi pa ilëm ipinaalang yang paamut ang atiang iningkuarta ug̓ud ipamakdul-pakdul tung mga maliliwag̓ën?
Kipurki kung ya pay ipabayaray ta kuarta tia,
mga tulung gatus ang nigal ang salapib yang itaën na asan,”
mag̓aning.
6 Naa pala,
napagbitala ra ta maning tia,
bëlag̓an ang mag̓aning ang tanya mainildawën tung mga maliliwag̓ën,
ang indi,
takawan tanya.
Ay kumus yay manig̓ëpët yang bëbtangan yang kuarta yamën ang sang paluyug̓an,
ang kaisan ya ray nag̓atatakaw na.
7 Simanyan ti Jesus ya ray nagtuw̓al ang mag̓aning,
“Paw̓ayaan mu ra ilëm tia.
Yang indi na ra ipinagpaalang yang paamut ang naa ay ug̓ud itig̓ana na para tung yëën.
Yang kaalimbawaan yang binuat nang atia tung yëën,
maning pa tung sinimpanan na rang lag̓i yang tinanguniu para tung uras ang ipagpalg̓ud da tung lëyang.
8 Kung natëtëngëd tung mga maliliwag̓ën ang atiang sinambit mu,
maski unu pang urasay,
taang pirmi.
Piru ta yëën,
bëlag̓an ang mag̓aning ang maskin sanu pang urasay ang taanaw ang pirmi tung numyu,”
mag̓aning.
Pati Ti Lazaro Nag̓abalakan Da Yang May Mga Katëngdanan Ang Imatayën (12:9-11)
9 Simanyan,
durung mga taung tag̓a Judea ang nangagngël yang balita ang ti Jesus duun pa tung Betania.
Purisu namansiangay ra duun ang yang inangay nira duun bëlag̓an ilëm ang para mamagpaniid tung ni Jesus,
ang indi,
may gustu ka nirang maita ti Lazarong binwi na si kang uman.
10 Kapurisu,
simanyan,
yang mga paring atiang arabubwat ta katëngdanan,
namagsaranyug da ang pati ti Lazaro damayën da ka nirang ipaimatay.
11 Sipurki natëtëngëd tung ni Lazaro,
durung mga kinasakpan nirang pamampablag da tung nira ang pamanangëd da tung ni Jesus.
Ti Jesus Nag̓ibandilyu Ra Yang Mga Tau Ang Ya Ray Adi Nirang Mga Israel (12:12-19)
12 Pangayag yang kaliw̓utan,
nabalitaan da yang mga taung atiang pamagpasakëp tung pistang atia ang ti Jesus unu mangay ra ka duun tung Jerusalem.
Triumphal entry (Juan 12:12-19)
13 Kapurisu yang binuat nira,
namaglampang da ta mga paklangc ang ya ray ingkëlan nirang namansilua tung siudad ang para mamagpakigbag̓as da tung ni Jesus.
Yang pagparanawën nira sigi ra ilëm yang pagkëkëndalën nirang mag̓aning,
“Salamat tung taung naa!
Pakaayënën dang pirmi ni Yawi yang taung naang pag̓atuw̓ul nang magpalua yang pagaraëmën na ang yay mag̓ing Adi yang nasyun tang Israel,”
mag̓aning.
14 Taa numanyan ti Jesus tanya nagpaëkël da ta sasang asnu ang para ya ray masaayan na.
Yang pagsaraayën nang maning tia ya kang lag̓i ay naula tung kasulatan ang mag̓aning,
15 “Yamung pamag̓istar asan tung Sion,
indiamu ra mag̓ëlëd.
Uay,
atia ra yang adi ming panganing da asan tung numyung yag sasaay tung asnung sinday pa,”
mag̓aningd.
16 Yang mga bag̓ay ang atia,
indi pa namarësmësan yamën ang nag̓apangugyatan na tung uras ang atiing pagkainabu kung unu pay linagpakan na yang pagpaklëd na tung siudad ta maning tia.
Piru atiing ti Jesus pinagpadëngëg̓an da ëngëd yang Diose,
baklu ra nga dëmdëmay yamën ang ya ra ka man ay nagkaraula tung kasulatan natëtëngëd tung anya ang pagkatapus duun ka man nga matuuray tung anya.
17 Ibalik ta ra kanay yang isturia tung mga taung atiing nangaugpu ra tung ni Jesus atiing pagguuy na tung ni Lazarong maglua tung lëyang ang duun da nga buiay na si kang uman.
Ya ray namagbaw̓alitaën tung duma may ruma kung unu pay nainabu duun.
18 Kapurisu numanyan,
ya ray ipinagpakigbag̓as yang mga taung atiang buntun tung ni Jesus ay natëtëngëd nabalitaan da nira ang tanya napagpalapus da yang pruibang atiang maktël.
19 Kapurisu simanyan,
yang mga Pariseong atiang pamagpakigkuntra tung ni Jesus,
pagkaita nira yang nag̓ainabu,
namag̓araning-aningan dang mag̓aning,
“Ta,
tëlëngan mi,
anda rang pisan ay pinakaw̓ut yang planu ta.
Tëëd mi,
yang kadaklan ang mga tau pamagpakampi ra tung anya!”
mag̓aning.
Nag̓ibilug Da Ni Jesus Yang Isip Nang Magpakugmatay (12:20-36)
20 Taa,
simanyan,
may mga taung bëlag̓an mga Judio ang namagpakiglakët da tung mga taung atiang namagturungulan duun tung Jerusalem ang para mamagtuu ka tung Dios tung pistang atiang Taklib.
Jesus foretells his death (Juan 12:20-36)
21 Numanyan yang mga taung atia,
ya ray namagpalëngët tung ni Felipe ang yay sasang ugpu yamën ang tag̓a Betsaida duun tung sinakëpan yang Galilea.
Mag̓aning tanira tung anya,
“Amëëy,
kung maimu ilëm,
gustu rin yamën ang magpakigkësën tung ni Jesus,”
mag̓aning.
22 Numanyan ti Felipe,
dayun dang nag̓ugtulun tung ni Andres.
Pagkatapus,
tanirang durua nansiangay ra tung ni Jesus ang namagpakigkaw̓ut.
23 Pagkabalita nira,
mag̓aning ti Jesus ang nagtuw̓al ang yang itinuw̓al na ipinagngël na ra ka tung mga taung këmdëngan asan,
“Kinaw̓ut da yang uras ang ipagpadëngëg ëngëd ni Ama tung yëën ang pag̓aningën ang Maninga Tau.
24 Iugtulu tung numyu yang kamatuuran,
yang sam pasi ta trigu,
kung indi nganing lumagpak tung tanëk ang madunut ang maninga patay ra,
anday pakaw̓utun na.
Dayun-dayun yang pagka sam bilug na.
Piru kung maning pa tung mapatay,
atia duru rang burak ang mapalua na.
Ya ra kay dapat ang pambungunu.
25 Kung tinu pay pag̓amlig tung sadili nang para indi mapanawan ta malain,
asan da nga diaduay na.
Piru kung tinu pay panlipat tung sadili na numaan tung kaliw̓utan ang naa,
asan da ngamlig̓ay na ang asta magsapënan da tanira yang Dios ang asta tung sampa.
26 Kapurisu kung tinu pa tung numyu ay malëlyag ang yuuy magkalalangan tung anya,
dapat dang magpakiunung tung yëën ug̓ud yang kumpurming mapanawanu ya ra kay mapanawan na.
Kung tinu pay magpakiunung tung yëën ang magpalalang,
ya ray padëngëg̓an ni Ama,”
mag̓aning.
27 Simanyan,
ti Jesus nag̓akësën-kësën na yang isip nang mag̓aning,
“Agdëlaanaw ra ta mupia.
Unu pay sarang ang maampuu tung ni Ama?
Aningënu w̓asu ang ipalibriaw anya tung uras ang naang durug kalain ang nag̓atalungaw?
Piru ya ra nganing ay inangayu taa ang yuu magpasar tung pinitinsiang maning tia,”
ag̓aaning.
28 Atii,
diritsyu rang nag̓ampu ang mag̓aning,
“Amaw,
ikadëngëg̓aw ra ëngëd nuyu ang kumpurming nag̓alëlyag̓an mu,”
mag̓aning.
Atii,
may busis ang liit tung langit ang mag̓aning,
“Ikinadëngëg̓a rang lag̓i yëën ig ikadëngëg̓a si ka ëngëd yëën,”
mag̓aning.
29 Simanyan yang mga taung atiang buntun ang këmdëngan asan,
nangagngël ka yang busis ang atia.
Ya ra ag̓aningay ta duma ang,
“Nagduldul da!”
Piru mag̓aning yang duma,
“Siguru may angil ang nagbitala tung anya!”
mag̓aning.
30 Numanyan mag̓aning ti Jesus tung nira,
“Bëlag!
Yang busis ang atiang nadngël mi ta nungayna,
bëlag̓an ilëm ang para tung yëën,
kung indi,
kapin da ëngëd ang para tung numyu.
31 Simanyan ang mga uras ang naa,
ya ray uras ang ipagdëëg yang Dios tung sistima yang kaliw̓utan ang naang balaw̓ag ang pisan tung anya.
Ay numanyan ya ra kay uras ang ipagpalagpak na tung pagmangulu tung sistimang atia.
32 Ay ta yëën,
kung ipaabwataw ra nganing,
asan da nga bëkngayu yang kinaisipan yang mga taung maskin unu pang nasyunay ang para mampatapnay ra tung yëën,”
mag̓aning.
33 Yuung ti Juan ang nagsulat may yëën kang isalëët ang ipasanag.
Tung inaning nang atia ang tanya ya ipaabwatay,
asan dang lag̓i nag̓ipasapliray na kung unu pang kamatayënay ang dapat mapasaran na.
34 Simanyan yang mga taung atiang buntun ang pamamati,
ya ray namagtimalës tung anyang mag̓aning,
“Yang yamën ang nag̓askëan tung kasulatan natëtëngëd tung pag̓aningën ang Cristo,
ya unu ay magnatis ang asta tung sampang anday kamatayën na.
Ya pa ag̓aring magkatunu asan yang nuyung atiang pag̓aninga ka ang yang pag̓aningën ang Maninga Tau ya ipaabwatay?
Yang pag̓aningën mung Maninga Tau,
tinu pa tia?”
35 Mag̓aning ti Jesus ang nagtimalës,
“Yuung maning pa tung sasang kaas ang pagpasanag tung mga painu-inu mi,
gësyë ra ilëm ang uras magliitaw ra taa tung numyu.
Mintras nag̓apasanag̓anamu pa yëën,
intindiën mi ra ta maayën ay muya maning pa tung makiklëpanamu pa.
Sipurki kung tinu pay pag̓usuy tung makiklëp,
indi na nag̓askëan kung unu ra ilëm ay panampëtan na.
36 Mas matinlu,
mintras taanaw pang pagpasanag tung numyu,
magsukuamu rang lag̓i tung yëën ang magtalig ug̓ud mapalg̓uramu ra ka yëën tung masadlaw,”
mag̓aning.
Nag̓ipagpasanag Ni Juan Kung Unu Pay Natëngëran Yang Pagpakuindi Nirang Kadaklan Tung Ni Jesus (12:36b-43)
Numanyan,
pagkaaning ni Jesus tii,
diritsyu rang nagpanaw ang nantaluk.
37 Maskin kadakël da yang mga pruibang atiang maktël ang ipinagpaita na tung katalungaan mismu nirang mga tau,
piru yang kadaklan indi ra ka ëngëd namagsuku tung anyang namagtalig.
Believers and unbelievers (Juan 12:37-50)
38 Purisu duun da nagkamatuud tung ni Jesus yang sasang iriniklamu ni Isaias tung Dios atiing pagpalatay na yang bitala na ang tukaw ang mag̓aning,
“Yawi,
midyu anda ray nanangëd tung ipinagpakaw̓utu tung nira.
Midyu anda ra kay nag̓impurmi tung mga pruibang atiang maktël ang yay pagpailala tung kagaëman mu,”
mag̓aningf.
39 Dispuis kung unu pay natëngëran na ang tanira indi namagpanangëd tung anya,
naula ka ni Isaias atiing pag̓ulit na yang sasang pinag̓aning yang Dios tung anyang mag̓aning,
40 “Kung pampakaw̓utan mu ra nganing yang mga taung atia,
anday dumang dangatën na,
kung indi,
asan da manlaw̓uk yang mga isip nira ang asta magtëg̓as da ilëm.
Ay ya pa ag̓ari,
may nag̓adipindiran kang lag̓i nira asan ang muya kung maklëran pa yang mga isip nirang mamarësmësan da ka nira yang nag̓ipagpakaw̓ut mu tung nira,
nusias mangapagsug̓at pa tung mga kasalanan nirang mamampatapnay pa tung yëën,”
mag̓aning yang Diosg.
41 Naula ni Isaias yang mga bag̓ay ang atia ay natëtëngëd atiing tukaw ipinaita yang Dios tung anya kung unu pa ëngëd ay ipagpadëngëg na tung ni Jesus tung uri.
Purisu napag̓ula ra natëtëngëd tung anya ang tanya pangindian da yang mga tau.
42 Ug̓aring,
maskin pang maning tia,
dakëlë kang may mga katëngdanan ang namanangëd da tung anyah.
Dispirinsia ilëm,
indi ra inubligar nira tung mga kaarumanan nira ay may pinangamanan nira tung mga Pariseo ang muya ityapuiraën da nira tung mga pagsaragpunan nira.
43 Ay ya pa ag̓ari,
yang minaal nira bëlag̓an ang tanira bantug̓un yang Dios,
ang indi,
ang tanira dayawën yang mga masigkatau ka ilëm nirai.
Yang Pangultimung Pag̓irimbitarën Ni Jesus Tung Nirang Mamagpalamtuk Da Yang Pundu Yang Kinaisipan Nirang Mamagtalig Tung Anya (12:44-50)
44 Taa numanyan nagpadayun da ti Jesus yang pagparakaw̓utun na tung mga taung atiang mag̓aning,
“Kung tinu pay magtalig yang sadili na tung yëën,
bëlag̓an ilëm yuuy talig̓an na,
kung indi,
pati yang nagtuw̓ul tung yëën ang mangay taa.
45 Kidispuis pa,
kung tinu pay nag̓aita tung yëën,
katimbang nang nag̓aita na ka yang nagtuw̓ul tung yëën.
46 Yuu,
minangayaw taa tung kaliw̓utan ang naa,
ay yang kaalimbawaanu yuu maning pa tung sasang kaas ang pagpasanag tung kinaisipan yang mga tau,
ug̓ud kung tinu pay magtalig tung yëën,
indi ra magdayun tung makiklëp.
47 Purisu kung tinu pay mamati tung nag̓ipagpakaw̓utu ang pagkatapus indi na tumanën,
ta yuu indiaw magsintinsia tung anya tung kalainan.
Sipurki tung mga uras ang naa,
yang inangayu taa tung kaliw̓utan ang naa,
ay bëlag̓an ang para magsintinsiaw rang lag̓i tung mga tau,
ang indi,
ang para magpanapnayaw tung nirang ipampalibri tung sintinsiang atia.
48 Piru kung tinu pay magpakuindi tung yëën ang yang bitalang naang nag̓ipagpakaw̓utu indi na ka pauyunan,
may magsintinsia ka ëngëd tung anya tung uri ta kaldaw.
Yang bitalaung naa mismu ang ipinagpakaw̓utu ang ya ra kay pinangindian na,
ya ra kay pitik ang patiëlanung magsintinsia tung anya tung kalainanj.
49 Talagang matuud tia ay sipurki yang bitalang naang ipinagpakaw̓utu tung mga tau,
bëlag̓an sadiling bëët-bëëtu ilëm,
ang indi,
ti Amang nagtuw̓ul tung yëën,
yay nagkalalangan tung yëën kung unu pay dapat ang ipagpakaw̓utu tung nira.
50 Kidispuis pa,
nag̓askëanu ang yang ipinaglalang na tung yëën ang magparakaw̓utun tung mga tau ay ug̓ud kumpurming tinu pay manangëd ang yang sadili na italig na ra tung anya,
asan da nga paëyangay ta baklung ipagpangabui nang anday pagtapusan na.
Kapurisu kumpurming unu pay nag̓ipagpakaw̓utu tung mga tau,
yang pisan yang pinag̓aning ni Ama tung yëën ang yay ipagngëlu,”
mag̓aning.