Nag̓asagyapan Da Ni Jesus Yang Sasang Taung Natalang Da Tung Dios (19:1-10)
19
Pagkatapus ti Jesus nagpadayun da yang pagparanawën na duun tung lansangan ang Jerico.
Pagkaw̓ut na,
namalaknga ra ilëm tung lansangan ang pagpanaw.
Lucas 19:1-27
2 Duun may sasang taung nag̓aranan tung ni Zaqueo.
Tanya sasang manigpanukut ta mga balayaran tung gubirnu ang abwat ta katëngdanan.
Purisu ya ray pinagmanggaranan na.
3 Numanyan pagkagngël na ang ti Jesus magtataklib da,
gustu na rin ang magtëlëng tung anyang mangilala.
Piru yang mga taung pamagpakigluyug tung ni Jesus buntun.
Purisu anday maimu ni Zaqueo ang magtëlëng ay tanya putut ang tau.
4 Kapurisu yang binuat na,
napalaksu ra tung tukawan ang panawan ni Jesus,
pagkatapus dayun dang nagtakwal tung sasang ayung dakulu ug̓ud kung tumaklib da nganing ti Jesus,
ya ray masurungan na.
5 Simanyan,
pag̓akpëng da ni Jesus asan tung ayung atia,
tiningara na ti Zaqueong binugnu ang inaning,
“Zaqueo,
pakalia ra.
Paranëka ra tani ay numaan kaministiran ang yuu asanaw ra rin magdayun tung balay mu,”
ag̓aaning.
6 Atii,
kali-kali ra ka man ang nagparanëk ti Zaqueo ang nag̓asikasu tung ni Jesus duun tung balay nang duru rag sadya yang isip na.
7 Numanyan atiing pagkaita yang duma tung ni Jesus ang nagnunut da tung ni Zaqueo duun tung balay na,
dayun dang namagburutung-butungan ang mag̓aning,
“Abaa,
ti Jesus ang naa ka,
kaduma ka!
Nag̓akdëkan na ka tia tëlëb ang pisan ta kasalanan,
tung anya pa ka ëngëd magdayun?”
ag̓aaning.
8 Taa simanyan,
buay-w̓uay ra ta gësyë,
nagkërëng da ti Zaqueo ang nagbitala tung ni Ginuu ta ang mag̓aning,
“Buinu,
Ginuu,
binilug̓u ra yang isipu.
Anday dumang buwatënu,
ya ra taa:
Yang katëngaan yang kamanggaranu ipamakdul-pakdulu ra tung mga maliliwag̓ën.
Kung tinu pay nadayaanung pinanukutan ta subra,
paulikanu ra ka ta ëpat ang dublia,”
ag̓aaning.
9 Ag̓aaning ka ti Jesus ang nagbitala,
“Numaan ang kaldaw,
yang sam pamilyang naa kinaw̓utan da ta kalibrian ay natëtëngëd pinapruibaan da yang pagmangulu ang ya ray nasug̓ut na yang irinsia ni Abraham ang nagtalig ka tung Dios ang bug̓us yang isip na.
10 Kipurki yuung pag̓aningën ang Maninga Tau,
yang inangayu taa tung kaliw̓utan ang naa ay ug̓ud magsagyapaw tung mga taung kumpurming natalang da ang ya ra ka rin ay ikadiadu nira ang para yay tapnayënung ipaulik tung Dios,”
mag̓aning.
May Nag̓ipananglit Ni Jesus Kung Unu Pay Dapat Ang Impurtaën Yang Mga Tauan Na Mintras Pamag̓ëlat Tung Anyang Maglëkat (19:11-27)
11 Numanyan yang mga taung atiang pamamati tung inaning ni Jesus ang atia tung ni Zaqueo,
ya si ay pinasanag̓an nang pinagngëlan ta pananglit.
Kumus tanya alëngët da tung Jerusalem,
yang kalaum nira,
kung makaw̓ut da nganing duun tung siudad,
atiang lag̓i ipalapus na ra ëngëd yang kabug̓usan yang paggaraëmën yang Dios ang duru ra atiing pagpakbat nira.
12 Purisu maning taa yang pananglit ang ipinagngël na:
“May sasang taung abwat ta pagkabëtang ang nagdistinu duun tung alawid ang banwa ang para pakdulan da ta katëngdanan nang maggaraëmën tung banwa na kung uras dang magbalik.
13 Numanyan baklu nagliit duun tung banwa na,
pinampaguuyan na ra kanay yang mga turuw̓ulun nang sam puluk nga tauan.
Numanyan pinamakdulan na ta kuarta ang pariu-pariu yang kantidad ang ipinamakdul na tung sasa may sasa.
Mag̓aning tung nirang nagbutwan ta bitala,
‘Yang kuartang atia,
ya ray buwatën ming puunan ang ipagnigusyu mi ang asta kaw̓utun yang ipaglëkatu.’
14 Piru atia pala yang mga masigkabanwa nang yay magaëman na tung pagbalik na,
anday gustu nira tung anya.
Purisu yang binuat nira,
namanuw̓ul da tung mga kaarumanan nira ang mamanikad da duun tung banwang atiing nag̓adistinu na ang para duun da mamagriklamu tung mas abwat tung anya ang talagang anda ëngëd ay gustu nira tung anya ang yay maggaraëmën tung nira.
15 Numanyan duun da tung banwang inangayan na,
piniaran da ka ëngëd ta katëngdanan nang maggaraëmën duun tung banwa na.
Pagkatapus,
dayun dang naglëkat duun.
Pagkaw̓ut na,
dayun na rang pinampaguuyan yang mga turuw̓ulun nang atiing pinamakdulan na ta kuarta ang para insapuën na tung nira kung unu pay pinakaw̓ut yang pagnigusyu nira.
16 Numanyan pagpalëngët yang sam bilug,
mag̓aning tung anya,
‘Maginuung Adi,
yang kuarta mung atiing ipiniar mu tung yëën,
nag̓umintu ra ta sam puluk ang dubli.’
17 Mag̓aning yang Ading minlës,
‘Maayën!
Talagang yaway sasang baling turuw̓ulun.
Kumus pagpailalaa rang maskin gësyëng bag̓ay,
matalig̓ana,
purisu piarana ra yëën ta katëngdanan mung maggaraemen tung sam puluk nga siudaran taa tung banwa ta.’
18 Pagkatapus,
pagpalëngët yang sam bilug,
mag̓aning tung Adi,
‘Maginuung Adi,
yang kuarta mung naang ipiniar mu tung yëën,
nag̓umintu ra ta limang dubli.’
19 Mag̓aning ka yang Ading minlës,
‘Pati yawa piarana ra yëën ta katëngdanan mung maggaraemen tung lima nga siudaran taa tung banwa ta.’
20 Numanyan nagpalëngët da yang sambilug ang mag̓aning,
‘Maginuung Adi,
atia ra yang kuarta mu.
Pinagputusu ra ilëm tung panyu ang pinagtaluk ta maayën ang para indi maplëk.
21 Ya ray binuatu ay kipurki duru kang lag̓ing ëlëru tung nuyu,
ay yang nag̓askëanu tung nuyu,
yawa durua ka pa man ag̓igpit ang tau.
Pagpakinaw̓anga tung indi mu pinakabëdlayan,
pagpakaayëna tung bëlag̓an pinaturukan ta ulas mu.’
22 Mag̓aning yang Ading minlës,
‘Abaa,
yawang inutilang turuw̓uluna!
Mismung sadiling bitala mu ya ra kay ibaliku tung nuyung ipatëmëng.
Ag̓aaninga ka palang nag̓askëan mu ang yuu duruaug kaigpit ang tau.
Pagpakinaw̓angaw tung indi pinakabëdlayanu,
maskin yang indi pinaturukanu ta ulasu,
ya ka.
23 Ayw̓a,
indi mu idinipusitu yang kuartaw tung bangku ug̓ud tung pagbaliku,
maëklanu pa ka rin pati tubu na?
Atii ra rin!’
24 Atii,
diritsyu rang nagbira ang nanalunga tung mga turuw̓ulun nang kadaklan ang këmdëngan asan.
Mag̓aning tung nira,
‘Ala,
ëklan mi ra tung anya yang kuartaung atia.
Ipakdul mi ra asan tung aruman nang napakaw̓ut ta sam puluk ang dubli.’
25 Ag̓aaning tanirang namagriklamu,
‘Abëë,
Maginuung Adi,
may kuarta na kang lag̓ing sam puluk ang dubli!’
26 Mag̓aning yang Ading nagtuw̓al,
‘Iugtulu tung numyu,
kung tinu pay madërëp ang magpapanaw tung ipiniar tung anya,
piaran pa ka ëngëd ta mas pa.
Piru yang taung paw̓aya-w̓ayaën tung ipiniar tung anya,
maski nganing yang gësyëng atiang ipiniar tung anya,
bawiën pa ka ëngëd tung anya.
27 Piru kung natëtëngëd tung mga taung atiang pamagpakigkuntra tung yëën ang anday gustu nirang mamagpagaëm tung yëën,
ala,
pangkëlan mi ra tani ang para pangimatayën ming luw̓us tung katalungaanu,’
ag̓aaning yang Adi tung mga turuw̓ulun na.”
Yang Pagparaklërën Ni Jesus Tung Siudad Ang Jerusalem (19:28-40)
28 Numanyan pagkatapus ni Jesus ta pagpananglit,
nagpadayun da yang pagturungulun na ang yang rumbu na duun tung Jerusalem.
Nagtukaw-tukaw ra tung mga kaarumanan nang sam paluyug̓an.
Lucas 19:28-48
29-30 Numanyan atiing pamanungul da na Jesus tung bukid ang atiing durung ayung pag̓aningën ang olibo ang alëngët da duun tung Betania may tung Betpage,
nanuw̓ul da tung durua nga tauan ang nag̓apangugyatan nang mag̓aning,
“Ala,
mangayamu ra kanay tung baryung atii tung tukawan ta.
Kung kumaw̓utamu ra nganing asan,
ya rang lag̓i ay mapanawan mi yang sasang asnung sinday pa ang yag këkëdkëd ang inding pisan nag̓asaay-saayan ta tau.
Ya ray badbarën ming guyuran tani.
31 Kung tinu pay magbugnu tung numyung ayw̓a nag̓abadbad mi tiang asnu,
yamu ra ag̓aaning ‘Kaministiran ilëm ni Ginuu ta.’”
mag̓aning.
32 Kapurisu numanyan namagpanaw ra ka man yang durua nga tauan ang atiang pinanuw̓ul ni Jesus.
Mansikaw̓ut tanira tung baryu,
ya ka man ang pisan ay napanawan nira.
33 Numanyan atiing nag̓abadbaran da nira yang asnung sinday,
binugnu ra ka man yang may mga asnung inaning,
“Ay tia,
ayw̓a ag̓abadbaran mi ra atiang sinday?”
34 Mag̓aning yang duruang atiang nansituw̓al,
“Kaministiran ilëm ni Ginuu ta.”
35 Pagkatapus dayun dang ginuyuran nira tung ni Jesus.
Pagkaw̓ut nira,
dayun da nirang sinapinan ta mga panlamig nira ang pagkatapus ya ray pinasaayan nira tung ni Jesus.
36 Numanyan yang pagsaay na tung asnu,
ya kay paggaralangën yang mga tau tung anya ang maskin yang mga panlamig nira,
ya ray pinanluas nirang ipinamëklad tung dalan ang pagpanawan yang asnu.
37 Numanyan pagkaw̓ut nira tung salapay yang bukid ang atiing durung ayung pag̓aningën ang olibo,
nabandaw ra nira yang siudad tung tukawan.
Pagkabandaw yang tanan ang mga taung atiang nag̓apangugyatan nang pamagpakigluyug tung anyang durug dakël,
pinangampayan da ta kasadyaan nirang duru ang pamag̓aw̓ayag dang nunut da ka ta pagdarayawën nira tung Dios.
Yang idinayaw nira tung anya ay natëtëngëd nadëmdëman nira yang tanan ang nagkaraita nirang mga pruibang makabëw̓ërëng ang ipinagpalapus ni Jesus.
38 Maning taa yang mga bitala nira:
“Pakaayënën dang pirmi yang Dios yang Ading naang ya kang lag̓i ay pag̓aëlatan ta ang yay pag̓atuw̓ul nang magpalua yang paggaraëmën na.
Ya ray magtukud yang kalibrian ta ang yay dayawën ta tung Dios duun tung kaabwat-abwatan!”
mag̓aning.
39 Taa numanyan,
may mga Pariseong namagpakiglakët asan tung mga taung atiang buntun ang pamagpakigluyug da kang lag̓i tung ni Jesus.
Numanyan,
pagkagngël nira yang bitala yang mga tau,
dayun dang namagriklamu tung ni Jesus ang mag̓aning,
“Amëëy,
sambëngën mu ka yang mga taung atiang nag̓apangugyatan mu!”
40 Mag̓aning ti Jesus ang nagtuw̓al,
“Iugtulu tung numyu,
kung sambëngënu tia,
yang mga batu ya si ay mamansiblës ang mamagkërëndalën ang mamagdarayawën tung yëën,”
ag̓aaning.
Nag̓ipanangit Ni Jesus Yang Mga Tag̓a Jerusalem (19:41-44)
41 Numanyan atiing nag̓alëngët-lëngët da ti Jesus tung siudad ang ya rag bandaway na tung tukawan,
unaw̓is ya ra nga panangit natëtëngëd tung panganugun na tung mga tag̓a Jerusalem.
42 Maning tanya,
“Aay,
kanugunamung tag̓a Jerusalem!
Kisira rin pati yamu,
nag̓amarësmësan mi ra rin numaan kung unu pay dapat ang buwatën mi ang para tung ikalimëng mi ra rin.
Piru indiamung pisan maintindi.
43 Kipurki may uras ang kaw̓utun ang yang siudad mi liw̓utun da yang mga kuntrariu mi.
Yang mga tanëk idësël da nira tung padir na ang para may pamdungan nirang mamagtumbak ang asta magëw̓a.
Lësëw̓ënamung pisan nirang sangsangën.
44 Pagkatapus kung paklëranamu ra nganing nira,
gëw̓aën dang pisan nira yang siudad mi,
pati yamung pagtinir asan diaduënamu ra ka nira.
Pati mga balay mi,
mga padir pa,
lubsun da nira ta panumba,
ang asta andang pisan ay batung pinasag̓ing maita ang mag̓aning ang magdërëpëtan pa.
Yang tanan ang atiang nag̓ianingu talagang yay mapasaran mi ay natëtëngëd ang yang mga uras ang naa ang ya ra rin ay uras ang ipagtapnay yang Dios tung numyu,
ang pagkatapus andang pisan ay naërëm tung mga isip mi,
kung indi,
ag̓ipataklib mi ra ka ilëm,”
mag̓aning.
Atia ya ray mga bitala ni Jesus ang ipinanangit nang nanganugun tung mga taung atiang tag̓a Jerusalem.
Yang Pagpalayas Ni Jesus Tung Mga Nigusyanti Tung Palayas Yang Pagtuuan Ang Pinakalusu (19:45-46)
45 Taa numanyan,
atiing duun da tanira na Jesus tung siudad,
tanya nagpaklëd da tung palayas yang pagtuuan ang atiing pinakalusu.
Pagpaklëd na,
dayun dang nagpalayas tung tanan ang mga nigusyanting kumpurming pinangaw̓utan na duun.
46 Mag̓aning tung nira,
“May sasang inaning yang Dios ang napabtang tung kasulatan ang yang balay unung naang ya ëngëd ay pag̓atiniran na,
dapat unu ang yay pag̓ampuan yang mga tau tung anyab.
Piru ay pa w̓a?
Ta numyu binuat mi ra ilëm ang kuinta lëyang ang pantalukan ta mga tulisan,
ay natëtëngëd taa ra mismu agpandayaay mi yang mga tauc,”
ag̓aaning.
Yang Pinakaw̓ut Yang Pagpalayas Ni Jesus Tung Mga Nigusyanti (19:47-48)
47 Numanyan kaldaw-kaldaw pagturuldukanën ti Jesus tung mga taung pamagsaragpun-sagpun duun tung palayas yang pagtuuan nirang atiing pinakalusu.
Piru yang mga paring arabubwat ta katëngdanan may yang mga sag̓ad pati mga pamagpakigmaëpët,
anday dumang pag̓atima nira tung uras ang atii,
kung indi,
kung ya pa ag̓ari yang pagpaimatay nira tung ni Jesus.
Pati mga taung arabubwat ka ta mga pagkabëtang,
namampasanyug da ka tung nira.
48 Kasu ilëm anday rimidyung mabuat nira ay pamangaman tung mga taung atiang buntun ang sumasakëp tung pista.
Ay tung pagparamatiën nira tung nag̓itulduk ni Jesus pamangganaan ta maayën.