Yang Primirung Pruibang Ipinalapus Ni Jesus (2:1-11)
2
Taa simanyan tung yaklung kaldaw,
may kumbira tung lansangan ang Cana duun ka tung sinakëpan yang Galilea.
Yang nanay ni Jesus duun agpagtaw̓ang.
2 Asta ti Jesus may yaming nag̓apangugyatan na,
pinag̓imbitarami ra kang magpasakëp.
3 Simanyan atiing pagkakulang da yang irinëmën ang atiang pag̓aningën ang binu,
nagpakdëk da yang nanay ni Jesus tung anya ang mag̓aning,
“Anda ray binu,
nalubsan da tanira.”
4 Diritsyung nagtuw̓al ti Jesus ang mag̓aning,
“Siguru maskin indiaw ra aningën mu kung unu pay buatënu.
Indi pag kaw̓utun yang urasua,”
mag̓aning.
The miracle at Cana (Juan 2:1-12)
5 Simanyan yang mga sirbintis ya ray inaning yang nanay nang mag̓aning,
“Maskin unu pay ituw̓ul na tung numyu,
buatën mi,”
mag̓aning.
6 Taa numanyan may ënëm ang bilug ang tapayan asan ang parabtangan ta wai.
Yang mga tapayan ang atia batung binangbangan.
Ipinabtang asan ay tung dating pagturuuën yamën ang mga Judio tung Dios,
durung mga riglamintung nag̓ausuy yamën sigun tung pag̓urug̓asën.
Yang paklëd nira,
mga talaëpat asta tung talaënëm ang lata.
7 Simanyan,
mag̓aning ti Jesus tung mga sirbintis,
“Ala,
pamungkun mi ra kanay ta wai yang mga tapayan ang atia,”
mag̓aning.
Diritsyung pinamunuk nirang pisan.
8 Pagkapnuk,
mag̓aning si ti Jesus tung nira,
“Ala,
sarukun mi ra kanay ang ëklan duun tung kuimi,”
mag̓aning.
Pagkatapus dayun da ka man ang ingkëlan nira tung kuimi.
9-10 Simanyan,
pagkatikmi na yang waing atiang nag̓imu rang binu,
nabërëng.
Anday kaliw̓utan na kung ay pa liit yang binung atia,
piru yang mga sirbintis ang namanaruk ya ilëm ay nangakdëk.
Purisu yang binuat na,
dayun na rang ginuuyan yang pangasawa ang inaning,
“Yang nuyung atia,
aparti ka.
Yang kadagmitan ang buw̓uatën tung mga kumbira,
simpri yang matinlung klasi ta binu ya ray ipatkaw ang ipalua.
Kung midyu nangapagustu ra ngani ta inëm yang mga bisita,
baklu ra ipalapusay tiang mga sigunda.
Naa pala ta nuyu,
yang matinlu ya itig̓anaay mu!
Numaan da ilëm ipaluaay mu!”
mag̓aning.
11 Yang binuat ni Jesus ang atia tung Cana duun tung sinakëpan yang Galilea,
yay primirung pisan ang pruibang makabëw̓ërëng ang binuat na.
Ya ray nagpailala yang kagaëman na tung yamën ang nag̓apangugyatan na.
Purisu asan da mas pang nagbakëd yang pagtaralig̓ën yamën tung anya.
12 Taa numanyan,
tung pira pang kaldaw,
nanuldak da ti Jesus duun tung lansangan ang Capernaum,
kasiraan da ka tanira na nanay na,
may yang mga putul na,
asta yaming nag̓apangugyatan na.
Duunami ra nagtinir ta pira pa ilëm ang kaldaw.
Yang Pagpalayas Ni Jesus Tung Mga Nigusyanti Tung Palayas Yang Pagtuuan Ang Pinakalusu (2:13-22)
13 Simanyan kumus gësyë ra ilëm yang uras ang kaw̓utun da yang pista yamën ang mga Judiong paggug̓uuyan ang Taklib,
ti Jesus nanungul-tungul da duun tung Jerusalem,
kasiraanami ra kang nag̓apangugyatan na.
Jesus in the Temple courtyard (Juan 2:13-25)
14 Kumaw̓ut tung pagtuuan ang atiang pinakalusu,
duun da tung palayas na nga panaway na yang mga manigpaalang ta mga baka,
mga karniru,
may mga kalapatib.
May duun kang mga manigbailu yang kuarta yang mga tau ang para ikambiu tung kuarta nirang mga Judio.
Kumarungan tung mga lamisaan nira.
15 Numanyan,
pagkaita ni Jesus tung nira,
anday duma,
nagpamëgkës da ta mga pinling binuat na rang latigu.
Ya ray ipinagpamurdun na tung nirang tanan ang ipinampalua,
pati karniru pati baka.
Asta yang mga lamisaan yang mga manigbailu ang atiang punuk ta mga kuarta,
ya ray pinamaliskad na ang asta nagkaraburarag da ilëm.
16 Pati mga manigpaalang ta kalapati,
linalangan na ra kang inaning,
“Ëëy,
pangkëlan mi ra ka tia duun tung lua!
Yang balay ang naang pag̓atiniran ni Ama,
indi mi ra pangaasan ang buatën ang palingki,”
mag̓aning.
17 Pagkagngël da yamën ang nag̓apangugyatan na,
ya ra nga dëmdëmay yamën yang sasang nabtang tung kasulatan ang mag̓aning,
“Aay,
Ampuanung Dios,
yang kadërërëpënung pagdipindir tung kadëngëg̓an yang balay mu,
ya ra kay ikadiaduu,”
mag̓aningc.
18 Taa numanyan,
kumus binuat da ni Jesus ta maning tia,
dayun dang inusisa yang mga pamagmangulu tung nasyun yamën ang mga Judio ang inaning,
“Abir,
ipaita mu ra taa tung yamën yang sasang pruiba bilang kabakëran mu ang yaway may katëngdanan ang magbuat ta maning tia taa tung pag̓atiniran ëngëd yang Dios ang naa.”
19 Mag̓aning ka ti Jesus ang minlës,
“Kung diaduën mi yang pag̓atiniran nang naa,
tung sëlëd yang tulung kaldaw pakdënganu si ka ta baklu.”
20 Mag̓aning tanirang namansituw̓al,
“Abaa,
tung sëlëd ilëm yang tulung kaldaw mapakdëngan mu si ka ta baklu,
ang ëpat dang puluk may ënëm ang takun yang pagparakdëngën yang pag̓atiniran nang naa?”
mag̓aning.
21 Piru kung pasadsaran ta ëngëd yang gustu ni Jesus ang ianing,
anday dumang pag̓atiniran ëngëd yang Dios ang atiang nag̓ianing na,
kung indi,
ya ra yang sadiling tinanguni na mismu.
22 Purisu numanyan,
atiing pinabungkaras da yang Dios,
nadëmdëman da yamën ang pinag̓ugyatan na ang ya ray nag̓abitala nang kaisan.
Purisu duunami rang nag̓ingmatuud tung napabtang tung kasulatan natëtëngëd tung pagkabui na si kang uman.
Asta yang ibinitalang atia ni Jesus,
pinanangëd da ka yamën.
Yang Pundu Yang Kinaisipan Yang Tanan Ang Mga Tau Dëëp Ang Pisan Ni Jesus (2:23-25)
23 Taa,
simanyan,
atiing duun pa ti Jesus tung Jerusalem tung uras yang pistang atiing pag̓aningën ang Taklib,
kadakël dang namanangëd da tung anya ang ya ra ka man yang pag̓aningën ang Cristo ay natëtëngëd tung mga pruibang makabëw̓ërëng ang binuat na ang ya ray nagkaraita nira.
24 Piru ti Jesus tanya,
indi na itinalig yang sadili na tung nira,
ay kipurki kabisadu na ra ka tanirang tanan.
25 Anday kaministiran nang balitaan pa natëtëngëd tung ninu pang tauay,
ay dëëp nang pisan yang pundu yang kinaisipan nira sasa may sasa.